Taisbeanadh 9:1 - An Tiomnadh Nuadh anns an Eadar-Theangachadh Ùr Gàidhlig 2017

¹ Agus shèid an còigeamh aingeal trombaid, agus chunnaic mi rionnag a bh' air tuiteam o nèamh chun na talmhainn, agus chaidh iuchair sloc na h‑Àibheis a thoirt dha.

Am Bìoball Gàidhlig 1992

¹ Agus shèid an còigeamh aingeal a thrompaid, agus chunnaic mi reul a’ tuiteam o nèamh a‑chum na talmhainn: agus thugadh dha iuchair sloc an dubh-aigein.

Am Bìoball Iomraidh Gàidhlig 1880 1992

¹ Agus shèid an còigeamh aingeal a thrompaid, agus chunnaic mi reul a’ tuiteam o nèamh a‑chum na talmhainn: agus thugadh dha iuchair sloc an dubh‐aigein.

Tiomnadh Nuadh (MacEachen) 1875

¹ Agus sheid an coigeamh aingeal an trombaid; us chunnaic mi reul, a bhʼ air tuiteam bho neamh air an talamh, agus thugadh dha iuchair an t-sluic gun ghrunnd.

Taisbeanadh 9:1 Iomraidhean Croise

Lùcas 10:18

Thuirt e riutha, “Chunnaic mi Sàtan a' tuiteam mar dhealanach o nèamh.

Lùcas 8:31

Agus ghuidh iad air gun àithne a thoirt dhaibh falbh sìos dhan doimhneachd.

Ròmanaich 10:7

“no ‘Cò a thèid sìos dhan doimhneachd?’” (Is e sin a bhith a' togail Chrìosd suas o na mairbh).

Taisbeanadh 1:18

agus esan a tha beò, is a bha marbh, agus seall, tha mi beò gu saoghal nan saoghal, agus tha iuchraichean a' bhàis is Ifrinn agam.

Taisbeanadh 1:20

Dìomhaireachd nan seachd rionnagan a chunnaic thu nam làimh‑dheis, agus na seachd lampairean òir: 's iad na seachd rionnagan na h‑ainglean aig na seachd eaglaisean, agus 's iad na seachd lampairean na seachd eaglaisean.

Taisbeanadh 11:7

Agus nuair a chrìochnaicheas iad an teisteanas, nì a' bhiast a thig a‑nìos à sloc na h‑Àibheis cogadh leotha, agus buadhaichidh i thairis orra agus marbhaidh i iad.

Taisbeanadh 17:8

A' bhiast a chunnaic thu, bha i ann 's chan eil i ann, agus tha i gus tighinn a‑nìos às an Àibheis agus gus a dhol gu sgrios. Agus bidh iadsan a tha a' còmhnaidh air an talamh – aig a bheil ainmean nach eil air an sgrìobhadh ann an leabhar na beatha o thoiseach an t‑saoghail – fo iongnadh, nuair a chì iad a' bhiast a bha ann agus nach eil ann agus a bhitheas ann.

Taisbeanadh 20:1

Agus chunnaic mi aingeal a' tighinn a‑nuas o nèamh aig an robh iuchair na h‑Àibheis is sèine mhòr na làimh.

Taisbeanadh 20:10

Agus bha an Diabhal, a tha gam mealladh, air a thilgeil dhan loch theine is phronnaisg, far an robh a' bhiast 's am fàidh‑bhrèige cuideachd, agus bidh iad air am pianadh a latha 's a dh'oidhche gu saoghal nan saoghal.

Taisbeanadh 6:13

Agus thuit rionnagan nan speuran gu talamh, mar a thilgeas craobh‑fhìge a fìgean an‑abaich nuair a thèid a crathadh le gaoth mhòr.

Taisbeanadh 8:10

Agus shèid an treas aingeal a thrombaid agus thuit rionnag mhòr o nèamh, a' losgadh mar lampa, agus thuit i air an treas pàirt dhe na h‑aibhnichean 's air fuarain nan uisgeachan.

Taisbeanadh 8:12

Agus shèid an ceathramh aingeal a thrombaid, agus chaidh an treas pàirt dhen ghrèin a bhualadh is an treas pàirt dhen ghealaich, is an treas pàirt dhe na rionnagan, gus an deach an treas pàirt dhiubh dorcha, agus nach nochdadh an treas pàirt dhen latha, agus dhen oidhche cuideachd.

Taisbeanadh 8:2

Agus chunnaic mi na seachd ainglean a tha nan seasamh mu choinneamh Dhè, agus chaidh seachd trombaidean a thoirt dhaibh.

Taisbeanadh 9:2

Agus dh'fhosgail e sloc na h‑Àibheis, agus dh'èirich ceò às an t‑sloc mar cheò fùrneis mhòir, agus chaidh a' ghrian agus an t‑adhar a dhèanamh dorcha le ceò an t‑sluic.