Taisbeanadh 17:3 - An Tiomnadh Nuadh anns an Eadar-Theangachadh Ùr Gàidhlig 2017

³ Agus ghiùlain e mi air falbh dhan fhàsaich san spiorad agus chunnaic mi boireannach na suidhe air biast sgàrlaid a bha làn de dh'ainmean toibheumach, 's air an robh seachd cinn is deich adhaircean.

Am Bìoball Gàidhlig 1992

³ Agus thug e leis mi anns an spiorad don fhàsach: agus chunnaic mi bean na suidhe air fiadh-bheathach air dhath sgàrlaid, làn de ainmean toibheim, air an robh seachd cinn agus deich adhaircean.

Am Bìoball Iomraidh Gàidhlig 1880 1992

³ Agus thug e leis mi anns an spiorad don fhàsach: agus chunnaic mi bean na suidhe air fiadh‐bheathach air dhath sgàrlaid, làn de ainmean toibheim, air an robh seachd cinn agus deich adhaircean.

Tiomnadh Nuadh (MacEachen) 1875

³ ʼS thug e mi anns an spiorad do ʼn fhasach. Agus chunnaic mi boirionnach ʼna suidhe air uilebheist air dhath sgarlaide, lan ainmeannan toibheum, air an robh seachd cinn ʼs deich adhaircean.

Taisbeanadh 17:3 Iomraidhean Croise

Mata 27:28

Agus thug iad an t‑aodach dheth agus chuir iad cleòc sgàrlaid timcheall air,

Gnìomharan 8:39

Agus nuair a thàinig iad a‑nìos às an uisge, thug Spiorad an Tighearna Philip air falbh, agus chan fhaca an caillteanach tuilleadh e, agus chaidh e air a shlighe a' dèanamh gàirdeachais.

2 Tesalònianaich 2:4

esan a shuidhicheas e fhèin an aghaidh agus a dh'àrdaicheas e fhèin os cionn a h‑uile nì a thèid ainmeachadh mar dhia no mar chuspair adhraidh, air chor 's gun suidh e e fhèin ann an teampall Dhè, a' cumail a‑mach gur esan Dia.

Taisbeanadh 1:10

Bha mi anns an Spiorad air latha an Tighearna, agus chuala mi guth àrd air mo chùlaibh mar thrombaid,

Taisbeanadh 12:14

Agus chaidh dà sgèith na h‑iolaire mòire a thoirt dhan bhoireannach, airson 's gun sgiathadh i dhan fhàsaich, chun an àite aice, far am biodh i air a beathachadh an sin airson ùine is ùineachan is leth ùine, air falbh o aghaidh na nathrach.

Taisbeanadh 12:3

Agus bha comharra eile air fhaicinn air nèamh, agus seall, dràgon mòr dearg le seachd cinn agus deich adhaircean, agus air a chinn, seachd crùintean.

Taisbeanadh 12:6

Agus theich am boireannach dhan fhàsach, far an robh àite aice air ullachadh an sin le Dia, airson 's gum biodh i air a beathachadh airson mìle, dà cheud is seasgad latha.

Taisbeanadh 17:18

Agus am boireannach a chunnaic thu, is ise am baile mòr a tha a' riaghladh thairis air rìghrean na talmhainn.”

Taisbeanadh 17:4

Agus bha am boireannach air a h‑èideadh ann am purpaidh 's ann an sgàrlaid, agus air a sgeadachadh le òr is clach phrìseil is neamhnaidean. Bha cupa òir aice na làimh a bha làn de ghràinealachdan is neòghlaine a strìopachais.

Taisbeanadh 18:12

Bathar de dh'òr is airgead is clach phrìseil is nèamhnaidean is anart mìn is purpaidh is sìoda is sgàrlaid, agus a h‑uile seòrsa fiodh cùbhraidh is a h‑uile seòrsa soitheach ìbhri agus a h‑uile seòrsa soitheach fiodh prìseil is umha is iarann is màrmor,

Taisbeanadh 18:16

ag ràdh: “‘Is mairg, is mairg am baile mòr, a chòmhdaich e fhèin ann an anart mìn is purpaidh is sgàrlaid agus a bh' air a sgeadachadh ann an òr is clach phrìseil is nèamhnaidean.

Taisbeanadh 21:10

Agus ghiùlain e mi air falbh san spiorad gu beinn mhòr is àrd, agus sheall e dhomh am baile naomh, Ierusalem – a' tighinn a‑nuas à nèamh o Dhia –

Taisbeanadh 4:2

Sa bhad, bha mi san Spiorad, agus seall, rìgh‑chathair air a suidheachadh air nèamh, agus neach na shuidhe air an rìgh‑chathair.