2 Corintianach 4:2 - An Tiomnadh Nuadh anns an Eadar-Theangachadh Ùr Gàidhlig 2017

² Ach chuir sinn cùl ri rudan falaichte na nàire, chan ann a' coiseachd ann an ceilg, no a' fiaradh facal Dhè, ach le foillseachadh na fìrinn, gar moladh fhèin do chogais gach neach ann an sealladh Dhè.

Am Bìoball Gàidhlig 1992

² Ach chuir sinn cùl ri nithean falaichte na nàire, gun sinn a bhith a’ siubhal ann an ceilg, no a’ truailleadh facal Dhè, ach le foillseachadh na fìrinn gar moladh fhèin do chogais nan uile dhaoine ann an sealladh Dhè.

Am Bìoball Iomraidh Gàidhlig 1880 1992

² Ach chuir sinn cùl ri nithean falaichte na nàire, gun sinn a bhith a’ siubhal ann an ceilg, no a’ truailleadh facal Dhè, ach le foillseachadh na fìrinn gar moladh fhèin do chogais nan uile dhaoine ann an sealladh Dhè.

Tiomnadh Nuadh (MacEachen) 1875

² Ach tha sinn leigeil dhinn nichean falaichte na mi-chiatachd, us cha n-eil sinn a g-imeachd am foill, no a truailleadh facal De, ach le cur na firinn an ceill ga ʼr moladh fhein do chogais a h-uile duine an lathair Dhe.

2 Corintianach 4:2 Iomraidhean Croise

Ròmanaich 1:16

Oir chan eil nàire ormsa mun t‑soisgeul, oir is e cumhachd Dhè a th' ann airson slàinte dhan a h‑uile neach a chreideas, an toiseach dhan Iùdhach agus cuideachd dhan Ghreugach.

Ròmanaich 6:21

Ach dè an toradh a bha sibh a' faighinn aig an àm sin bho na rudan a tha a‑nis gur fàgail air ur nàrachadh? Oir is e crìoch nan rudan sin am bàs.

1 Corintianach 4:5

Mar sin na toiribh breith ron àm, mus tig an Tighearna, a bheir gu solas an dà chuid na rudan a tha a‑nis falaichte ann an dorchadas agus a dh'fhoillsicheas rùintean a' chridhe. An uair sin gheibh gach aon cliù o Dhia.

2 Corintianach 1:12

Oir is e seo ar bòst: fianais ar cogais, gun do ghiùlain sinne sinn fhèin san t‑saoghal, ann an sìmplidheachd is dùrachd dhiadhaidh agus chan ann ann an gliocas feòlmhor, ach ann an gràs Dhè, agus gu h‑àraidh dhur taobh‑se.

2 Corintianach 11:3

Ach tha eagal orm, mar a mheall an nathair Eubha le a chuilbheartan, gum bi ur n‑inntinnean‑se air an treòrachadh air seachran o shìmplidheachd is fìorghlaine do Chrìosd.

2 Corintianach 11:6

Ach fiù 's ma tha mi mì‑sgileil ann an cainnt, a dh'aindeoin sin chan eil mi mar sin ann an eòlas; ach, sa h‑uile dòigh tha sinn air a h‑uile sìon a dhèanamh follaiseach dhuibhse.

2 Corintianach 2:17

Oir chan eil sinne mar a tha mòran, a nì malairt le facal Dhè, ach mar o dhùrachdas, mar o Dhia, tha sinn a' bruidhinn ann an Crìosd am fianais Dhè.

2 Corintianach 5:11

Mar sin, le fios a bhith againn air eagal an Tighearna, tha sinn a' cur ìmpidh air daoine, ach tha sinn fhèin air ar dèanamh follaiseach do Dhia, agus tha dòchas agam cuideachd gu bheil sinn air ar dèanamh follaiseach nur cogaisean‑se.

2 Corintianach 6:8

tro urram agus eas‑urram, tro mhì‑chliù agus dheagh‑chliù; air ar faicinn mar mhealltairean, ach fìrinneach;

2 Corintianach 7:14

Oir ma rinn mi bòst sam bith ris‑san mur deidhinn‑se, cha deach mo nàrachadh; ach dìreach mar a thuirt sinn a h‑uile sìon ribh ann am fìrinn, mar sin cuideachd chaidh ar bòstadh mu choinneamh Thìtuis fhaighinn fìor.

Ephèsianach 4:14

Airson 's nach bi sinn tuilleadh nar leanabanan, air ar tonn‑luasgadh agus air ar giùlain mun cuairt leis a h‑uile gaoth teagaisg, le caran dhaoine, le seòltachd ann an innleachdan mheallta.

Ephèsianach 5:12

Oir tha e nàrach fiù 's bruidhinn air na rudan a th' air an dèanamh leotha ann an uaigneas.