Pidipi 2:2 - Anegisemee'm Mina Kapuge

² Ku wui kuwa ku eki kaa mike mina waa kumana ni'm bani-bani se dimina me waya wadobo asiyoo kam asiyoo nabani-bani siyaabuu taae. Nabani-bani siyaabuu sisea na se kao ona me ko ekii'm nigeke-nigeke ku ese ona ndo kiyaana dodo ndo nigi siwoo taae, me ona. Ona me ko a-embaa naa-embaa siwoo taae, me ona, wiya. Ona me ko dimina ona ndo kiwoo taae, me ona, wido. Ona me ko eki'm awaao kan sipea ku widigi tau kan apaatana yaa mu-mu siwoo taae, me ona, wui. Ku wui kuwa ku eki ndepo yaa mu-mu nakea kipii kindo ko ku se ku ni eki kaa kadeo yako ni'm kabani-bani se dimina me ese asiyoo kam asiyoo kiwoo taamba.

Pidipi 2:2 Iomraidhean Croise

Yohanesi 3:29

Kena Yohanesi wa'm waya se asina ko “Ni'm sese masimasea na mina ebeabea da kasiinka ndeo. Keditusi wa ko wai ambii masiimbi se mee to mugo dodo. Ni ko ni wa'm dadaa se anamoo se mee to me ndo. Kena ogu bage waa ku wa'm masiimbi se ambii mugo dodo se bage waa. Ku kindo ko wa'm ambii mugo se bage waa ku wa mbo ndo meke bada. Ni mbo tau. Ni ko ni ese, ese bani-bani se kan wa mbo pasi kaa tomuna wa'm mina yito naka se mee to. ‘O, wai wa'm ambii mugo se bage waa ku wa mbo metakea ae,’ se deo yako ni'm bani-bani se dimina da me ese mike eneke sekii tau. Ese asiyoo kam asiyoo bani-bani se aoo,” aseke.

Edaseo Bage 1:14

Ku Yesiusi kaa yapeyaami bage waa ku nuwa, Yesiusi wayoi Madiya me nuwa, Yesiusi wa'm kinaa bage ku nuwa, aii bage'm ambii waa ku nuwa, ku ekii otuma omiyaa siyaa ku ndo me nda andaga semuuna ndo Anegisemee mbo asetoo siwoo nakea.

Edaseo Bage 2:1

Ea na gapi, Yahudi bage ekii Pentakoseta badii noke se dodo me kaa ko Yesiusi mbaya bage ekii Yedusedem okaa yoo me kaa andagatagea.

Edaseo Bage 2:46

Ku semana ndo waa ko omiyaa siyaa ku ndo ekii Yahawee'm ee yau-yau yoo da kaa andagatake. Andagata semuu sita mugo ndoe, aii mee'm ee waa ku nda nde miya andaga siwoo nakea. Andaga semana ndo waa ko namo bitana wadeke, namo bitana wadeke, namo bitana wadeke se ku ndo awatakea. Bakabu se dimina mbeenaa kaa miya emi tau. Aii dimina ona ndo kan namo wadiwoo nakea. Ese bani-bani se kan se awawoo nakea.

Edaseo Bage 5:12

Yesiusi kaa yapeyaami bage ekii mee'm emaa misi kaa “Abayai, mike ae,” se nigisi na ebeabea waa ku oba awawoo nakea. Abayai se ebeabea da ku ko kee yadano kiyaake ku nde miya, mbaa waa yapeyaake ku nde miya, ku mugo ebeabea da waa ese oba awawoo nakea. Ku oba awawoo sita mugo ndoe, Yesiusi mbaya bage ekii otuma Yahawee'm ee bagogo kaa andagatagea. Yahawee'm ee bagogo da me ekaa da ko Seadomo Bagogo da.

Edoma 12:16

Ona me ko mee agumee mesema widigi tau tosi na dimi ona ndo kan tuta taae. Ona me ko a kaa to si dodo taae. A kaa to si dodo se kan bakata bage mesema akamoo kaae. Ona me ko a kaa to “Ni disi. Ni ese epi se mee to,” se nigeke se dimina me si nigaae.

1 Kodintusi 1:10

Yesiusi kaa eniikinaa bage waa woe. Endo ko ni Tuhani Yesiusi Keditusi wa ekaa da kaa dim kakoeta taao gai se mina me ko me se de. Pata oba taa kisea na dimina ona ndo kaae. Eki otuma mbaya ona ndo towoo sisea na mina abade se ku mbeana dimina ona ndo kaae. Eki'm nigeke-nigeke ku nuwa, eki'm awawoo taao gai ku nuwa, ku kaa nde miya dimina ona ndo kaae.

2 Kodintusi 13:11

Yesiusi kaa eniikinaa bage waa woe. Ni'm ese pake-takanu mina ku kasiinka ndeo. Ona me ko bani-bani siwoo taae, me ona. Ona me ko si maaneke se kao ku duwa matana en'kiki se dimina me ndo kapiwoo taae, me ona. Ona me ko a-takuniyaabuu naa-takuniyaabuu siwoo taae, me ona. Ona me ko eki ndepo dimina ona ndo kina widigi tau ndo towoo taae, me ona. Ku se ku awawoo se kipii kindo ko “O, Anegisemee wai enii mbo aoo ae,” se nigaambea. Kase enta mugo ndoe, a-embaa naa-embaa se se dimina nuwa, widigi tau toke se dimina nuwa, ku se ku Anegisemee wa'm kakumawoo nai se dimina da waa koena. Kum seta kaa, ku mugo dimina yaa mu-mu se kipii kindo ko “O, Anegisemee wai enii mbo aoo ae,” se nigaao sekii kaambea.

2 Kodintusi 2:3

Eki ko eki ni'm dimina nabani-bani siyaambea se bage waa se kadeo. Ku koya eki'm woo-woo nakea ku kaa kiyoo ni'm nigina ko “Eki mbo kaukeke waa, si nabani-bani siyaa. Aii dim bodi ndo nakiyaayaa,” se nigima. Kum seta kaa, dim bodi si nakiyaasea na eki mbo mani kameen tau. Aii kapuge ndo kaawudumaao ndo sekii se nigima. Kena ni ese dimina ona ndo kan eki kaa se kanigina ko ni'm kaawudumama mina ku si taman ndo dama yaa mu-mu se kipii kindo ko anikee waa ni eki mbo memana eki kaa kabani-bani taata, se nigeo. Waya ni'm bani-bani se dimina ku nadegea yako eki namba bani-bani taasea, se nigeo.

2 Kodintusi 7:7

Kena wa'm ukeke yoo me kaa kiyoo ndo dim natakuniyaami se ku tau. Wa'm eki kaa mina nanige-manei yako dimina natakuniyaami. Dee, Titusi wa'm eki kaa mina se asina ko “Ogiyoo Kodintusi bage ekii'm sese ona me ko ekii a kaa ese dimina mbikana ndigi aoo, me ona. Ona me ko ekii'm si maaneke awamea ku kaa dim bodi aoo, me ona. Ona me ko ekii a kaa dimina ona ndo kan a mbaya bage ndo se tutakea, me ona.” Ku Titusi wa'm eki kaa nasimi se mina waa. Dee, Titusi wa ko wai eki'm sese ku kadei yako wa'm dimina nde miya yatakuniyaamea. Kena ekii'm yatakuniyaabuu simea ku wa'm masewena enii'm dimina nda nde miya mi-natakuniyaabuu simi. Ku kaa kiyoo wa'm ukeke yoo me kaa ni bani-bani se kima koya eki kaa mina kayemata mugo ndoe, ku kaa nde miya ni'm bani-bani se dimina me ese asiyoo wa-nini kidai.

Pidipi 1:4

Ndumbo kaseo. Omiyaa siyaa ku ndo Anegisemee mbo asetoo sita mugo ndoe, ni eki kaa bani-bani se kan “Paamee,” se kaasetoo naka.

Pidipi 2:16

Waya wada nda omiwoo towoo sisi na se mina me nde miya mee mbo yaeniwoo taae. Ku se ku awawoo nakea kipii kindo ko anikee waa Keditusi wa'm waya ukaasi se gapi me kaa ko ni eki kaa kabani-bani taata. “O, eduga ko ni'm Pidipi bage mbo kanam-kanam mina tupiwoo sima ku aii bada kimea se ku tau. Mike maaneke ae, se deo. Yai, bada kee kanam-kanam yatupiwoo sima see,” se kanigaata. Ni'm anikee waa se kanigimaa yako ni eki kaa kabani-bani taata.

Pidipi 2:20

Ni'm Timotiusi kameyaao gai me ko me kase enta mugo ndoe, Timotiusi anai, ana'm eki kaa dimina ese dodo ndo. Ana'm se kanigina ko “Pidipi okaa yoo togea se Yesiusi mbaya bage ku naa dama toke ee? Tau ee?” se kanigiwoo naka. Timotiusi ana'm ndo se kanigiwoo naka. Ogu bage waa se ku ko tau.

Pidipi 4:2

Kena mina ona me ko ogiyoo eki mbo kiyoo ambii akaa wiya aoo. Ona me ekaa da ko Euodiya. Ona me ekaa da ko Sin'tike. Akaa wiya awisine semuu nakea kumana ni'm akaa mbo dim yakoeta taao gai se mina ku se de. “Akaai Tuhani nda dipinimapea se ambii wiya kumana si awisine taae. Dimina ona ndo kaae!” se yakoeta taao gai.

2 Teseadonika 2:13

Tuhani wa'm kaembaawoo nai se eniikinaa bage waa woe, ese eduga edugana ko Anegisemee wa'm eki tao se kambeana ko eki'm woo-woo se ku kaa si em kadan ndo aii omiwoo towoo katoyaasi na se mina se kaambeasimi. Ku kaa kiyoo enii eki kaa Anegisemee mbo “Paamee,” se mina ku ndo kaasetoo taao sekii. Dee, Anegisemee wa'm aii dodo se kaambeana ko Teseadonika bage ekii'm omiwoo towoo sisi na kao wiya aoo kaasea se kaambeasimi. Wa'm kaambeasimi ona me ko eki'm Keditusi kaa mike mina waa ku kaa “Mike ae,” nigeke se dimina da, me ona. Ona me ko Anegisemee Dim'mba wa'm eki tao dimi ndumbo se bage waa kakiyaake, me ona, wiya. Ku wiya ku kaa kiyoo eki'm woo-woo se kaa si em kadana aii omiwoo towoo katoyaao sekii se kaambeasimi. Ese eduga edugana ko Anegisemee wa'm se kaambeasimi kumana ku kaa kiyoo enii eki kaa Anegisemee mbo “Paamee” se mina ku ndo kaasetoo taao sekii.

2 Timotiusi 1:4

Eduga ko anai enda awade se se dodo me kaa ko a dimi bodi kan yee sime se kadema. Kena a'm yee sime ku kaa nigi simaa yako ni'm ese “Oowoo,” se kao me ko me a mesema waya ade taao gai. Ni'm dimina da bani-bani taao kan waya ni a mesema ade taao waa “Oowoo,” se nigeo.

Pidemoni 1:20

Ku kumana dama nayito taae. Ana ko anai Tuhani nda anakinaa wii kumana ni'm kaedaake mina ku ni tao dama naawaae. Ana ko Keditusi mbaya bage kumana ni'm dimina etaa nakiyaana natakuniyaabuu taae, ni'm mina dito se kindo, se kaseao kan sipa.

2 Yohanesi 1:4

Ni ko ni ese bani-bani se aoo. Kase enta mugo ndoe, ni a kaa mina se yena ko a'm yopaa se bage ebanaa ku ko ekii Anegisemee'm mike ndumbo mina ku dama yaa mu-mu nakea ae, se mina se yema. Mike ndumbo mina yaa mu-mu se me ko me Anegisemee wa'm “Se awaae,” se nambeasimi mina mugo dodo awake. Ku kumana ekii'm awawoo sipea ku kaa mina yemata mugo ndoe ni ese bani-bani sipa.

3 Yohanesi 1:4

Dee, ni'm eduga tupima se bage waa ku ni'm yopaa se bage mugo dodo. Kena ni'm yopaa se bage waa ekii mike ndumbo mina ku kaa kusipimana dama towoo nakea ae se mina yeke kipii kindo ko ni'm bani-bani se dimina ku eneke sekii tau. Ese asiyoo kam asiyoo bani-bani se ku se ene. Ku kumana ni a kaa mina kayepa se dodo me kaa ko ese bani-bani se sima.