Pidipi 2:16 - Anegisemee'm Mina Kapuge

¹⁶ Waya wada nda omiwoo towoo sisi na se mina me nde miya mee mbo yaeniwoo taae. Ku se ku awawoo nakea kipii kindo ko anikee waa Keditusi wa'm waya ukaasi se gapi me kaa ko ni eki kaa kabani-bani taata. “O, eduga ko ni'm Pidipi bage mbo kanam-kanam mina tupiwoo sima ku aii bada kimea se ku tau. Mike maaneke ae, se deo. Yai, bada kee kanam-kanam yatupiwoo sima see,” se kanigaata. Ni'm anikee waa se kanigimaa yako ni eki kaa kabani-bani taata.

Pidipi 2:16 Iomraidhean Croise

Mandiusi 10:27

“Ku mugo bage si widaan ndo ni'm eki mbo ndo kasipa mina waa ku masewena mee mbo uwa pana eniwoo taae. Kena eki'm opa ndo nda koo kasipa mina waa ku nde miya mina ebo mbeana uwa pana eniwoo taae,” aseke. “Ese ee wado pakemana kiyoo kam mina ebo woeyaa mugo dodo se eniwoo taae,” aseke.

Dukasi 12:8

Kena Yesiusi wa'm se asina ko “Waya ku kaa uketake mina kasiinka ndeo,” aseke. “Ni ko ni Mee Yombai. Kena mee'm emaa misi kaa ‘Ni Yesiusi mbaya bage,’ se asipea se bage waa ku mugo bage ku kaa ni namba ‘Ku ni mbaya bage waa,’ se pi-yasiita,” aseke. “Anegisemee wa'm epo wado bage'm egi kaa kiyoo ‘Ku ni mbaya bage waa,’ se yasiita,” aseke.

Yohanesi 6:63

“Mee tuma da bage ku omiwoo towoo toyaasi na, me mee'm yaa mani da kaa eki kaa to toyaake sekii tau. Anegisemee Dim'mba wa'm ndo katoyaabuu taao sekii. Ku kumana ni'm kasipa mina ku kaa kiyoo Anegisemee Dim'mba okaa katoyaabuu taao sekii.

Yohanesi 6:68

Kena Simoni Petadusi wa'm se ambewaana ko “Ni'm ebo se Tuhani woe. Omiwoo towoo tosi na se mina me yeao kan wa-nini mee to wa mbo peao sekii baa! Ku mugo mina ku a mbo ndo yeao sekii kumana enii a kabatana aii yoo si peemba ndeo!” aseke.

Edaseo Bage 13:26

Kena Paudusi wa'm waya se asina ko “Nikinaa bage waa woe. Abedaham wa'm yopaa waa ku nuwa, Anegisemee yapapa nakea se Yahudi tau se bage ku nuwa, eki ni'm mina nayito taae. Enii'm woo-woo se kaa em si nadana ndo dama natoyaasi na se mina me me, me Anegisemee wa'm Keditusi kaa enii mbo naameyaami mina da,” aseke.

1 Kodintusi 1:8

Eduga ko Anegisemee wai mina kawoewemi. Wa'm mina kawoewemi me ko wayombai mesema dipinimana tosea na, mina kawoewemi. Wayombai me ko me enii'm Tuhani, Yesiusi Keditusi me me, me mesema ese dadaa se ekimoo kisea na mina kawoewemi. Ku taao kan mina kawoewemi kumana “Si naawaambi ae,” se ku si nigaae. Anegisemee wai ese dimina ona ndo se mee to kumana wa'm kaawaao gai ku mike kaawaambi sima. Ku kaa kiyoo, Tuhani Yesiusi Keditusi wa'm ukaasi se gapi eki kaa mina emi tau kisi na ese takanu gapi kam miyo Anegisemee wai eki'm dimina da waa ku ese oyu kusipimana katoyaabuu siwoo nai. Ku wa'm ba-gamitake sekii tau se kao. Ku wa'm eki tao mike kaawawoo nai se kao sima.

1 Kodintusi 9:26

Ku mugo awake ku ni'm sese kui. Dee, ni'm awake-awake ku yima awaao be. Aii bada kaasi kao ku nde miya awaao be. Kum seta kaa ni'm awaao gai ku kaa ku kita nigi si pena “Maaniimbi ae,” se nigipa kao ku ndo awawoo naka.

Gadasiya 2:2

Se pakeke se dodo me kaa ko ni aii se pakeke se ku tau. Anegisemee wa'm kita “Yedusedem okaa yoo pakeae,” se nanige-manemi kumana pakema. Me kaa pakemana ko ni mee mesema mina dama. Ku koya aii bage mesema mina dama se ku tau. Kiyoo toke se Yesiusi mbaya bage ekii'm emaa misi kaa ebo se bage waa, ku mugo ebo bage ku mesema enii ndo mina dama. Enii ndo mina dake se dodo me kaa ko ni'm ogiyoo Yahudi tau se bage mbo tupinaa sima mina, Anegisemee'm dama mina kuwa ku dopeana ku ebo bage'm emaa misi kaa uwa pana yanige-manema. Mbao awasi na uwa pana yanige-manema ee? Tau, ni'm oyu kan awawoo sima nuwa, endo nde miya awawoo naka nuwa, ku ogu bage ekii'm “Mbeduwa ae,” se nanigimagea yako si namaaniyaambea koena. Ku kindo ku taa kisi na ni'm donaa asinaa naka se mina ku ni'm ekii mbo uwa pana pi-yanige-manema.

Gadasiya 4:11

Yai, widaa ndeo! Eki'm awake-awake ku kadena ko ni eki kaa kagigi aoo. Ni'm eki mbo kanam-kanam kaa-awawoo sima ku naa aii bada kaambi ee? Tau ee? Ku kaa nigimaa yako kagigi aoo, se kanigeo.

Pidipi 1:10

Ku kaa aii se kaasetoo naka se ku tau. Eki ko eki ese asiyoo maaneke se sese ku ndo pikamoona yaa mu-mu sisea na kaasetoo naka. Dee, endo se gapi kam wado kisee Keditusi ukaasi gapi kam miyo, epopi nda kuwa, ku dama se kao ku ndo yaa mu-mu se kipii kindo ko peu se kao mbeenaa kaa miya si awaambea. Kena peu se kao ku awaan tau ae se degea yoo ogu bage waa ekii'm eki kaa kaseao kana se mina me ko me se de. “O, ekii'm peu awapea ambuu dee,” se mina mike kaseao kana kaambea.

Pidipi 1:6

Kena ona me ko ese eduga edugana ko eki Yesiusi wa'm sipi mugo ekokedosea na Anegisemee wai eki'm dim'mba nda kiyoo dama se bai amba kamatami. Kena endo nde miya ni ese dimina ona ndo kan se nigina ko wa'm eki'm dim'mba nda amba kamatami se masii me ko me mbeenaa ndo awana wisin'take sekii tau. Aii si dan ndo masii kaamasiwoo semuuna Yesiusi Keditusi waya ukaasi gapi me kaa pakemai se dodo ndoe, wa'm kaa-awaao kan sipi ku otuma oto kaawandeta-pata taasi. Me ona. Ku wiya ku kaa kiyoo ni bani-bani se kan “Paamee,” se kaasetoo naka.

1 Teseadonika 2:19

Mbao kaa mi-kadewe taao gai ee? Tau. Dee, eki ko aii bage se ku tau. Enii eki kaa nigi si pe se se dodo me kaa ese bani-bani se aoo. Eki kaa kaapake nde miya aoo. Ku kaa kiyoo “Eki aii bage waa baa,” se kanigeo. Waya wada nda anikee waa enii'm ebo toke se Tuhani, Yesiusi me me, wai waya ukaasi. Waya ukimai ndoe enii wa'm egi kaa inewena tomu taata. Ku semai ndoe Teseadonika bage eki namba enii mesema kiyoo inewena tomu taasea. Me ko me enii'm ese dimina ona ndo kan em'ndiwoo nakea se kao. Waya me gado me kaa pakemai ndoe, enii ese bani-bani se kan se asina ko “Ku Teseadonika bage ku dee! Ku bage ku kaa kiyoo enii'm Tuhani kaa wa tao yaa-awama - yaa-awama ku aii bada kimi se ku tau. Ku eki mbo mike maan'dai ae, se deo,” se asiita. Ku kaa kiyoo enii eki kaa ese bani-bani taata. Ku se ku kanigimana ko “Eki aii bage tau ae,” se nigimai yako eki mbo waya mi-kaomiwee taao gai. Se.

1 Teseadonika 3:5

Eki'm bodi ababa se ku kaa nigi si pe se se dodo ndoe, ni eki kaa mina yeao gai se dimina da me ese asiyoo wa-nini kidai. Kisena ndo waa ko eki kaa mina yeao gai ku ese asiyoo mbeaseao eo se dodo ndoe, Timotiusi eki mbo kameyaama. Eki'm Anegisemee kaa “Mike ae,” nigeke se dimina da me ndigi yee? Tau yee? Eé, Ibedisi wa'm kaoya-oya se mina ku dito sigea yako Anegisemee kaa dimi wiya-wiya semapea ee? Tau ee? Ku kaa kiyoo enii eduga eki mbo awama-awama, katupima-katupima ku aii bada kiyaapea yee? Tau yee? Ku se ku kaa nigi si pena widaa ae se nigeo gumba ndoe Timotiusi eki mbo kameyaama, ekii kaa mina pi-yewena ni mbo mi-nasisi nde.

Ibedani 4:12

Kase enta mugo ndoe, anikee waa enii'm awamea-awamea en'ndo otuma ku kaa Anegisemee mesema mina daasea. Ku kaa mina data mugo ndoe yadeba se nde miya sekii tau. Wa'm aoo kiyaabuu simi se-kao we-kao en'ndo otuma ku wa'm dito taao sekii se kao waa koena. Wa'm deao kana se kao ona kaa miya emi tau. Wa'm si desi na dapimaao sekii se kao ona kaa miya emi tau. Ku otuma wa'm uwa pana dito nai se kao waa. Ku kumana enii'm awamea-awamea en'ndo otuma ku kaa mina daasea. Waya wada nda enii'm awamea-awamea ku nandamana pikamoo taasi se dodo me kaa wa'm mina da me kaa kiyoo kam se napikamoo taasi. Wa'm mina me ko me ese binduneke se mina da. Me ese uuda aoo se mina da. Ese uuda aoo se yape yado da, naa uuda aoo, naa uuda aoo, eo wiya aoo se yape yado da me me, me mbeenaa uuda tau. Anegisemee'm mina me ese uuda aoo. Dee, yape yado da me emii oi dake se dodo me kaa mitoo gamu okitaao sekii. Waya dudu maseao kan mitoo kapitaao sekii. Ku koya me mbeenaa mbeedi. Anegisemee'm mina me mee'm dim'mba nda nanugaao sekii. Me nda nanugina dimina da naa, se-nigemoo we-nigemoo naa se ku naokitaao sekii. Waya ku kaa kiyoo mee'm dim'mba nda se-dimina we-dimina en'ndo otuma ku nuwa, mee'm awaao kan sipea en'ndo otuma ku nuwa, ku otuma uwa da kaa uwa pana yadeyaabuu taao sekii. Anegisemee'm mina me ko. Me mina me kaa kiyoo Anegisemee mesema mina daasea kumana ese dimina ona ndo kan wa'm mina yaa mu-mu taae, se kaseao kan sipa.

1 Petadusi 1:23

Dee, Anegisemee wai yipi se dimina one kadamami kumana mee ogumee kaa yaembaao sekii kimea. Kase enta mugo ndoe, wa'm yipi se dimina one kadamata mugo ndoe buwaao sekii se paadi ku kaa one kadamami se ku tau. Ese buwaao kana se paadi ku kaa ndo yipi se dimina one kadamami. Ku buwaao kana se paadi ku ko ku Anegisemee wa'm mina da mei! Wa'm mina da me ese si dan ndo omiwoo towoo semuu nai se mina da mei!

1 Yohanesi 1:1

Enii'm kanige-maniinka mina me ko me Yesiusi Keditusi wa kaa mina. Yesiusi Keditusi wa ko wai omiwoo towoo sisi na mina da me kaa nanige-manemi se mee to. Kena wa'm tomi yoo me ese maa nuwa, epo nuwa, ku se ku aoo kiyaan tau yoo nde miya wai Anegisemee Naamee mesema aii aoo-aoo aoo ku ndo se towoo simea. Kisena ndo waa ko Anegisemee wai omiwoo towoo natoyaasi na mee me me, me enii'm emaa misi kaa kiyoo uwa pana se naadeyaami. Ku ese mike mina kaseo. Mee me me enii'm emaa misi'm dema se mee to. Kena wa'm enimi mina ku enii'm opa'm yito sima se mina waa. Wa'm maa buboo ku enii'm yaa ku nde miya yaa-de sima se maa buboo. Dee, omiwoo towoo natoyaabuu taasi mee to me enii mbo agidimami ae, se kaseao kan sipa.

Wahayu 22:17

Anegisemee Dim'mba me nuwa, Dom'mba Yuwa to wa'm ambii se bage waa ku nuwa, ekii otuma “Mewee, mewee,” se mina eniwoo nakea. Kena, ku eniwoo sipea mina ku kaa “Mike ae,” nigimapea se bage ekii nde miya ukina waya “Mewee, mewee,” se mina en'takea waa bada ae se nigeo. Mbao awasi na “Mewee,” se mina aseao bada ee, tau na. Omiwoo towoo sisi na uwo mi-nosi na “Mewee,” se mina woeke. Ku kumana omiwoo towoo sisi na uwo naadi kipii kindo ko mi-noke bada. Kipe edina noke se uwo se ku tau. Aii se mi-noke ndo bada, se kaseao kan sipea.