Anegisemee wai ese, ese dama nagane keo koena. Ese, ese nagane kumana naagapeke mee to wai Siduga kaa kam enii mbo ukaasi. Enii Anegisemee mesema apoesi na. Enii widigi tau toke yoo bada namaao kan ukaasi. Se naanige maneao kan ukaasi. Wa'm ukaasi yoo ese daamee emaa misi pakemana ao da aumapi mugo kui. Dee, Siduga kaa kam ukeke se mee to me enii'm tuku epuyiba toke yoo ao da aoo kisi na, ukaasi. Enii'm buwaao pasi se taa se yoo si widaasi na, ukaasi,” aseke. Sekadiya wai Anegisemee Dim'mba'm yakumapi mina se yaaenimi.
Pidipi 1:8 - Anegisemee'm Mina Kapuge8 Kiyoo kam Anegisemee'm emaa misi kaa kiyoo ese ndumbo mina kasiinka ndeo. Keditusi Yesiusi wa'm eki kaa kanigitai se dimina da me ese ni namba eki kaa kanigitaka se dimina da me ndo. Wa'm eki kaa kaembaake se dimina me ni'm kaembaake se dimina mei! Waya ni'm kaembaake se dimina da me kaa kiyoo ni'm dimina da eki mbo kambikana towoo naka. Faic an caibideil |
Pidipi 1:8
24 Iomraidhean Croise
Ku mike kaseo. Omiyaa siyaa ku ndo ni eki kaa Anegisemee mbo kaasetoo semuu naka. Anegisemee nadito nai kumana dimi kadake sekii tau. Ese mike mina ndo kaseo. Me Anegisemee me me, wa kaa ni dimi wiya-wiya se dimina mbeenaa kaa miya emi tau. Ni ko ni wa kaa wa tao masii yaamaseao kan Wayombai kaa dama se mina kuwa ku mee mbo donaa asinaa naka.
Anegisemee wa'm Keditusi kaa ese naembaake koya ni'm okaa kinaa bage waa, Yahudi bage kuwa, ekii oba mugo Keditusi kaa “Mike ae,” se yanigaao be. Ekii'm sese ku deo yako ni'm dim bodi keke ku ese wa-nini keo. Ese dim kai-bai kan dimina dano-dano siwoo naka. Mike ebata tau. Waya kiyoo kam “Mbao awai ndo naa bada kaambi ee?” se nigi si pe se dodo me kaa ni'm nigi seo se mina me ko me se de. Yahudi bage si em yadasi na, ekii'm woo-woo se kaa em yadasi aya ku ni kaa nadotaana Keditusi mbaya tau se mee to nakiyaake nde miya bada o. Nikinaa bage waa si em yadake kindo “Bada kee em nadapi see,” se asiyaa. Me dim dake mina kaseo se ku tau. Ni Keditusi mesema nadipinimai yako ese ndumbo mina kaseo. Waya ni'm dimina da nda koo nigeke ku Anegisemee Dim'mba wa'm nadetai kui.
Ni ko ni Edaseo se mee to kumana Tuhani Anegisemee wai ni tao yaa mani da namatami. Me yaa mani da me ko me eki Tuhani kaa dim katu kakiyaasi na se yaa mani da se ku tau. Me eki Tuhani kaa en'kiki kakiyaabuu siwoo sisi na se yaa mani da. Ku kumana ni'm awaao be me ko me ni eki mbo memana ndo waa ko woo-woo se aoo ae se deo yako Anegisemee wa'm namatami se yaa mani da masewena ese oyu kan katupeke kipii kindo ko, me ni'm ese awaao be se kao. Me eki'm dimina katu kakiyaabuu taata kumana me mugo sese me ni'm awaao be. Ku kindo me mugo sese si kaawaao kan ni eki mbo ukaan tau yoo me kapuge me me eki tao kaawudumeo, me ona. Kena eki Tuhani kaa en'kiki kisea na Anegisemee mbo kaasetoo siwoo naka, me ona. Dee, eki ko eki Tuhani kaa kusipimana oyu kaambea kipii kindo ko ku dena ko enii ese bani-bani se aoo. Mbao kaa bani-bani se ee, tau. Ese tunaa kan kaawaao sekii kaamba kumana ku kaa kiyoo bani-bani taata.
Eki'm sese kui se takea kumana eki'm ndumbo ndo awaao gai sese ku kaa ni ese dimina ona ndo kan “Wadobo nde miya dama sese mike awawoo taambea ae,” se ku ndo kanigaao sekii. Titusi wa ko wai eki mbo memana mina katupimi se dodo me kaa ko eki wa'm mina tamaao widaana pipi se nde miya aoo se kademi. Ku kaa kiyoo eki wa'm mina ese dama yaa mu-mu se ku ndo se kademi. Me gado me kaa kiyoo Titusi wai ese kaembaake aoo ko aoo koya endo nde miya wai eki'm sese ku kaa kanigi si pe nai se dodo me kaa kiyoo wa'm eki kaa kaembaake se dimina me ebo kiwoo nai. Eduga mbeenaa miyo. Endo ko ese asiyoo, wa'm kaembaake sese me me. Se deo.
Wai, wai, aa-oo, ni'm dimi se yopaa waa woe. Eduga ko eki yipi se dimina one kadasi na kanam-kanam katupiwoo sima. Bodi ababa se nde miya aoo. Ni'm toma sese me ko me ese ambii ona yuwa one daao kan andine-wandinena bodi ababa se mugo dodo se toma. Kena endo nde miya ni eki kaa kai-bai se dimina waya meaneke. Kase enta mugo ndoe, anikee waa Anegisemee wai eki tao Keditusi'm sipi mugo dodo se kakiyaabuu taasi. Ku koya endo se gumba Keditusi wa'm sipi mugo dodo kakiyaan tau kumana “Yai, wa'm sipi mugo kigea waa bada ae,” se kanigimaa yako dim kai-bai aoo.
Nemugoi nakawaa woe, eki'm toke yoo ku kaa dama nigi si pe taae. Ona me ko eki Keditusi mesema dipinimapea se bage waa kumana eki'm dimina da waa ku Keditusi wa'm eki tao katakuniyaabuu siwoo nai, me ona. Kena ona me ko wa'm kaembaawoo nai ku kaa kiyoo nigimagea yako eki'm dimina waa ku kakumawoo nai, me ona, wiya. Kena ona me ko eki ndepo eki nduwawe nda toke me ko me Anegisemee Dim'mba, me ona, wido. Kena ona me ko Keditusi wai ese kagane kan tunaa ndo kaawawoo nai, me ona, wui. Ku wui ku eki'm Keditusi nda togea sese waa, tau se.
Kena ana ndepi se awawoo naka se dodo me kaa ko Epapoditusi wai kee meanii. Wa'm kee meanipi se mina ku eki nde miya yemea. Ku eki nde miya yemea kumana Epapoditusi wa'm se nigina ko “Wai, wai, ni dim bodi aoo. Pidipi bage eki ni kaa ‘Buwaambi ee, tau yee na?’ se dimina nanige-nige semuu nakea kumana eki gigi aoo. Kena ekii'm ni kaa gigi aoo ae se nigimaa yako ni nde miya dim bodi aoo,” se nigeke, Epapoditusi wa ko. Epapoditusi wa'm se kanigeke kumana ni'm gai se kao me ko me Epapoditusi eki mbo kameyaao gai.
Yesiusi kaa eniikinaa bage waa woe. Ni ko ni ese, ese kaembaake aoo. Kena ni'm dimina eki kaa ese mbikana ndigi me nde miya aoo. Waya eki'm sese ku kaa nigi si pe sita mugo ndoe, “Ai, ai, ni'm eki mbo awama-awama ku aii bada kima se ku tau. Ku ese maaneke ndo se takea ae,” se kadeo. Se kadeo yako ni eki kaa ese kaapake aoo. Kabani-bani se nde miya aoo. Se. Kena kiyoo kam ni'm kaseao gai se mina me ko me se de. Eki Tuhani nda dipinimagea yako anikee waa wa'm sipi mugo dodo se bage waa se kakiyaabuu taasi. Me mina me kaa kiyoo tukuu wemana kusipimana tuwaae! Se kaseao kan sipa.
Ni'm sese ku kaa dama masimasea na ku kaa mina kanige-manepa. Dee, ni'm kanam-kanam awawoo naka se ndanda me ko me eki tao dama tosi na se ndanda. Me Daodikiya okaa yoo togea se Yesiusi mbaya bage ekii tao nde miya dama tosi na se ndanda. Kena ogu Yesiusi mbaya bage waa, ni'm ade taan tau se Yesiusi mbaya bage kuwa, ku en'ndo otuma ku nuwa, me ekii tao nde miya dama tosi na se ndanda. Ku kaa dama masimasea na se kaseao kan sipa.
Kodose bage waa woe. Eki ko eki aii bage se ku tau. Eki Anegisemee wa'm wa kaa wa tao daa kambeana wa-nini kawenimapi se bage waa. Wa'm ese dimi kan kaembaake se bage waa, eki. Ku kumana dama se dimina da waa ku matake bada, ese dama se duka matake mugo dodo. Ku taao kan mee kaa gane se dimina da nuwa, mee kaa dama yaawake nuwa, a kaa to si dodo se se dimina me nuwa, ese tunaa kan mee agumee'm nigeke ku nde miya dito taao gai se dimina da me nuwa, dimina mani si maseke se dimina me nuwa, ku mugo dimina da waa ku matake bada.
Ku koya oto kao aoo se mee ona wa ko wai ogu Yesiusi kaa eniikinaa bage ona ndamata mugo ndoe, “O, wa tapoo om'pi ae,” se deke. Se deke ko deke koya wa'm oto kao mbeenaa kaa miya maniin tau. Yai! Me mugo depi aoo diin tau aoo semana mige-mage semapi mee to wa nduwawe kiyoo Anegisemee wa'm sipi mugo mee kaa embaake se dimina da me me, mike emi tau ae, se ku ndo nigaao sekii.
Sanasan