Pidemoni 1:6 - Anegisemee'm Mina Kapuge

⁶ Waya wada nda ni'm kaasetoo se mina ona me ko me se de. Keditusi wa'm enii tao dama naawapi kao waa ebanaa ku a epi koya naa ku a eo. Naa ku a eo kumana ku kaa epi kiwoo sise na Anegisemee mbo kaasetoo naka, me ona. Waya wada nda Keditusi wa'm dama naawapi kao waa ku kaa epi kumae yako ku kaa kiyoo kam ogu Yesiusi kaa “Mike ae,” nigeke bage mesema eki dimina ona ndo ndo towoo taao sekii. Ku kaa nde miya Anegisemee mbo kaasetoo naka, me ona.

Pidemoni 1:6 Iomraidhean Croise

Mandiusi 25:16

“Medaa pidoseomina ko uwani aya edibi yamatapi se mee me me, wa mani pedona mee mbo uwani ku a-bade naa-bade se. A-bade naa-bade semuuna waa ko waya edibi kumatai yako uwani aya waa haas kidai.

Mandiusi 5:16

Ku mugo yaa, ai dama awake kipii kindo ko me ogu bage tao osee yaawake sese mugo dodo. Kum seta kaa eki'm dama awake sese ku desi na, ku mee'm egi kaa kiyoo uwa pana awawoo taae. Kase enta mugo ndoe, eki'm dama awapea ku kadegea yako ogu bage ekii eki'm Siduga maa kaa toi se Naamee to wa kaa yapapa taambea, ogu bage kuwa.” Yesiusi wa'm se tupimi.

1 Kodintusi 16:9

Kase enta mugo ndoe, Epesiusi okaa yoo me kaa kiyoo mbeedi nambeaseao gai se bage waa ku oba aoo ko aoo koya tau. Anegisemee'm mina yaa-eniwoo taao sekii se gine to me Anegisemee wa'm naawademapi kumana nakayoo kam mani peao be. Wa'm naa-awapi ku kaa kiyoo ni'm awake-awake ese mike maan'dai taambi ae, se nigeo yako mani si meemba.

Pidipi 4:8

Yesiusi kaa eniikinaa bage waa woe. Ni'm kaseao kan sipa mina ona ndigi. Mina ona ndigi me ko me se de. Omiyaa siyaa ku ndo ese, ese dama se kao ku kaa ndo nigi si pe siwoo taae. Mee'm “Awanke, awanke,” se aseao sekii se kao kuwa ku kaa ndo nigi siwoo taae. Kena ku taao kan eki'm se nigitakea waa bada ae se kao ku se de. Ese mike ndumbo se mina en'ndo otuma ku nuwa, en'kiki se mee to wa'm nigiyaa se dimina da waa ku en'ndo otuma ku nuwa, Anegisemee'm emaa misi kaa ndumbo se kao en'ndo otuma ku nuwa, si maaneke mbeenaa kaa miya emi tau se kao en'ndo otuma ku nuwa, mee'm emaa misi kaa deao dama se kao en'ndo otuma ku nuwa, mee'm “Me ebo se kao ae,” se nigimagea yako gai se kao waa ku en'ndo otuma ku nuwa, ku dama se kao kuwa ku kaa ndo nigi si pe siwoo taae.

Kodose 1:9

Eki kaa mina se nanige-manena dai kaa waa ko anai ese si dan ndo eki kaa eki tao Anegisemee mbo kaasetoo siwoo naka. Ana'm eki kaa kaasetoo naka mina me ko me se de. Eki ko eki Anegisemee wa'm gai-gai en'ndo otuma ku kaa epi kisea na “Ku kaa dama masimaao sekii se dimina da me nuwa, ese dim pame se dimina en'ndo otuma ku nuwa, ku se ku kakumamoo nai waa bada ae,” se kaasetoo naka.

Kodose 3:10

yipi se dimina matapea mugo dodo. Me yipi se dimina me me, me Anegisemee wa'm eki tao kaa-epipi semami se dimina da. Waya me dimina me kaa kiyoo eki Anegisemee'm sese “Se ae. Se ae,” se ku epi kiwoo nakea. Wa'm sese ku kaa epi kiwoo sita mugo ndoe, eki wa'm sipi-sipi mugo dodo kaekokeodoyaabuu nai.

Titusi 3:14

Kena mina ona me ko Kedeta epogo maa kaa togea se Yesiusi mbaya bage ekii tao mina da. A'm asise na mina me ko me se de. “Dimina ona ndo kan dama se ndanda ku nuwa, dama se masii maseke ku nuwa, ku mugo dama se kao kuwa ku ndo awawoo taae,” se mina da me dama yanige-maneae. Kase enta mugo ndoe, dama se kao ku ndo awawoo nakea kipii kindo ko ku kaa kiyoo maan'dai taambea se kao wiya aoo. Ona me ko ekii'm toke yoo ku aii bada keke sekii tau. Mike maan'dai taambea sima, me ona. Ona me ko mike tapoo toke se bage aoo se dodo me kaa ko ekii tao dama tosi na se oto kao maniwoo taao sekii kaambea, me ona, wiya. Ku wiya ku ekii'm dama awawoo sipea ku kaa kiyoo maan'dai taambea se kao sima. Ku mugo mina ku Yesiusi mbaya bage mbo pi-yatupiwoo taae. Se.

Ibedani 6:10

Kase enta mugo ndoe, eki Anegisemee wa kaa wa tao ndanda yaawawoo nakea se bage waa se kadetaka. Eki wa kaa ese yaembaawoo nakea se bage waa, se kadetaka. Mbao kadena ee, se enta mugo ndoe, tau na. Omiyaa siyaa ku ndo eki Anegisemee wa'm bage tao dama tosi na se kao yaawawoo nakea. Ese eduga kam ata kisee endo nde miya kui. Kena eki'm awawoo sipea ku kaa Anegisemee'm kaandibuu se sekii tau. Wa ese ndumbo ndo awawoo nai se Anegisemee to kumana eki'm wa tao yaa-awapea ku kaa kiyoo ese ndumbo ndo ogayo kapaa taasi sima.

Yakobusi 2:14

Yesiusi kaa eniikinaa bage waa woe. Mee ona wai “Ni Anegisemee kaa ‘Mike ae,’ se nigeo,” se aseke koya wa'm uwa da kaa awake, ku dama se kao si awake kipii kindo ko me mugo sese me maaneke yee? Tau na! Me mugo ebe'm ndo “Mike ae,” se nigeke se dimina me me, me omiwoo towoo toyaasi na se dimina tau. Me ese mike aii bada kaasi se dimina me ndo.

Yakobusi 2:17

Ku mugo yaa, mee ona wai Anegisemee kaa “Mike ae,” se nigeke ko nigeke koya dama se kao si awake kipii kindo tau. Wa'm “Mike ae,” se nigeke se dimina me mike aii bada kaambi se dimina da. Aii ebe'm ndo asipi se dimina da koena.

1 Petadusi 2:12

Ku kumana ku mbeenaa kaa miya si awan ndo, Anegisemee kaa “Mike ae,” se nigaan tau se bage waa ekii'm emaa misi kaa kiyoo dama sese ku ndo awawoo taae. Mbao awasi na dama se sese ku ndo awawoo taae se enta mugo ndoe, tau. Endo se gumba “Mike ae,” se nigaan tau se bage ebanaa ku ko ekii'm se kasina ko “O, eki peu-pau awawoo nakea ae, se kadeo,” se kasiimbea. Yibanda kiyaa ekii'm se kasita mugo ndoe, eki'm dama awatakea ku kita kadegea yako ekii'm kaseao kan sipea mina ku aii bada kaambea sima. Waya na kiyaa eki'm dama awawoo sipea ku kaa kiyoo waya wadobo Anegisemee wa'm ukaasi se gumba me kaa kiyoo ku bage ku ekii wa ekaa da ebo yambeana yapapa taasea. Ku kumana “Mike ae,” se nigaan tau se bage waa ku Anegisemee ekaa da ebo yambeasisi na ekii'm emaa misi kaa kiyoo dama se kao ku ndo awawoo taae.

1 Petadusi 3:1

Ambii waa woe. Ni'm kasipa dimina da me me, me eki nde miya dama yaa mu-mu taae. Dama yaa mu-mu sita mugo ndoe, eki'm yimee waa ku guna miyo dama tuwaae. Dee, “Anegisemee wa ebo ae,” se yanigimagea yako dama se kao ku ndo awawoo nakea kipii kindo ko me eki'm yimee mbo yaembeniyaake se mina asiyaa mugo dodo. Kase enta mugo ndoe, yaembeniyaake se mina ku uwa da kaa asiin tau koya eki'm dama awatakea ku kadegea yako dim yakoeta siyaa mugo dodo. Kiyoo kam Anegisemee mina kaa “Mike ae,” se nigaan tau se yimee waa ku nde miya yaembeniyaake kidai, dama awatakea kindo. Waya kiyoo kam ekii'm dim mbiseoo ku mbeedi yambeana Anegisemee mbaya embeniimbea, yimee'm guna miyo dama towoo semuu nakea kindo.

1 Petadusi 3:16

“O, ni si maaneke awapa ae,” se dimina ku taa kisi na ogu bage ekii kaa dama ndo yaawawoo taae. Waya wada nda eki Keditusi mbaya anewegea yako dama awatakea se dodo me kaa, ku kadegea yako ebanaa bage ekii kawisineke mina kasiimbea. Kena eki ekaa da waa ku peu kakiyaao kan eki kaa peu se mina kaasiimbea. Se kaasiimbea koya eki ko eki dama ndo awawoo semuu nakea kipii kindo ko ekii'm eki kaa kaseao kan sipea mina ku aii bada kaambea. Waya kiyoo kam ekii'm eki kaa mike tau se mina kasipea kumana ku kaa kiyoo ekii kaa to ego kaambea.

2 Petadusi 1:8

Ku kasipa sese waa ku ese dama yaa mu-muna agi kiwoo semuu nakea kipii kindo ko eki'm Tuhani Yesiusi Keditusi kaa yaepi se dimina da waa ku aii bada kaambea se ku tau. Waya na kiyaa ese maaneke sese waa ku ndo awawoo taambea sima.