Pidemoni 1:10 - Anegisemee'm Mina Kapuge

¹⁰ Dee, Onesimusi wa ko wai ese ni'm yopaa mugo dodo se mee to. Kase enta mugo ndoe, ni nakayoo peniyada ee nda ndigi se dodo me kaa wai ni mbo memami. Ni mbo memana ko ni Yesiusi kaa mina yanige-manema. Yesiusi kaa mina se yanige-manena ko wai Yesiusi kaa “Mike ae,” se nigimami. Ku kaa kiyoo wai niyombai mugo dodo ae, ni wa'm naamee mugo dodo ae, se nigeo. Ku kindo kiyoo kam ni'm yopaa se mee to wa kaa dama yaawaae se kaseao kan keo.

Pidemoni 1:10 Iomraidhean Croise

Madakusi 9:17

Ku ekii kooda me nda ndaa mee ona wa'm se asina ko “Mee tupeke mee to woe, niyombai a mbo duwaao kan ni nakayoo ukipa,” aseke. “Niyombai wa epuyiba nda mbaa aoo. Me mbaa me niyombai epuyiba aoo kumana mina eneao eo se yakiyaabuu nai,” se aseke.

Edoma 12:1

Nikinaa bage waa woe, ni'm mina dama nayito taae. Ni'm oyu kan kasiinka mina me ko me se de. Anegisemee wa'm aii se kagane kan kaa-awanaa se ku ese wa-nini keo. Eki kaa ese wa-nini kaa-awatai kumana wa kaa ese dama ndumbo ndo yaapapa taae. Kena dama ndumbo ndo yapapa taao kan eki'm maa buboo ku eki kaa to daa yaambeana “Anegisemee, a tao ee,” se aseae. A kaa to daa yaambeana “Ee,” se aseke me ko me mbeenaa Anegisemee kaa daa yaambeana bidea kaa yaaponoyaake mugo dodo ko dodo koya iyaao tae se gumba ndoe, “Ee,” se aseae! Me bage yapapa se me ko me Anegisemee'm emaa misi kaa ese maaneke se kao. Ku dena ko bani-bani se aoo.

1 Kodintusi 4:14

Kodintusi bage waa woe. Eki ko eki ese ni'm kaembaake se yopaa waa mugo dodo se bage waa. Kum seta kaa, ni'm oyu kan kaawudumapa mina kuwa ku kaego kiyaao kan kaawudumapa se mina se ku tau. Ku eki'm dimina ku kakoeta taao kan se mina waa.

1 Kodintusi 4:15

Kase enta mugo ndoe, Keditusi kaa mina katupiwoo nakea se bage waa ku ese oba aoo. Eake sekii tau. Ese 10.000 waa ku kisiu asiyaa mugo dodo. Ku koya eki'm naamee mugo dodo se mee to ku oba tau. Me ese ona ndo. Me ko me ni ndo. Dee, eduga ko ni eki mbo Keditusi Yesiusi kaa dama mina katupeke se dodo me kaa kiyoo eki “Mike ae,” se yanigimana yipi se dimina one kadami. Ku kaa kiyoo kam eki'm naamee mugo mee to me ni ndo. Ogu bage se ku ko tau.

Gadasiya 4:19

Wai, wai, aa-oo, ni'm dimi se yopaa waa woe. Eduga ko eki yipi se dimina one kadasi na kanam-kanam katupiwoo sima. Bodi ababa se nde miya aoo. Ni'm toma sese me ko me ese ambii ona yuwa one daao kan andine-wandinena bodi ababa se mugo dodo se toma. Kena endo nde miya ni eki kaa kai-bai se dimina waya meaneke. Kase enta mugo ndoe, anikee waa Anegisemee wai eki tao Keditusi'm sipi mugo dodo se kakiyaabuu taasi. Ku koya endo se gumba Keditusi wa'm sipi mugo dodo kakiyaan tau kumana “Yai, wa'm sipi mugo kigea waa bada ae,” se kanigimaa yako dim kai-bai aoo.

Kodose 4:9

Kena Tikikusi mesema kameyaapa mee to ona me ekaa da ko Onesimusi. Me Onesimusi me me, me eki'm epi se mee to, wa namba Kodose bage sima. Wa ko wai Yesiusi kaa eniikinaa bage se mee to. Me enii'm ese yaembaake se mee to. Wai Tuhani tao ndanda yaa mu-mu nai se dodo me kaa ese dimina ona ndo kan si dan ndo yaa mu-mu siwoo nai se mee to. Wai, wa mesema Tikikusi akaai enii'm nakayoo simea-simea mina ku dopeana eki mbo mi-kasiimbea. Ku awasi na kameyaapa koena. Se.

1 Timotiusi 1:2

Timotiusi woe. Ni'm kapuge me a tao ee. Eduga ko ai ni'm eniwoo sima mina ku yemai ndoe Yesiusi kaa “Mike ae,” se nigime. Ku kumana ni'm kadena ko “O, a ese mike niyombai ae,” se kadeo. Endo ko Anegisemee Naamee mesema enii'm Tuhani, Yesiusi Keditusi me mesema, akaai a'm woo-woo se kaa si em kadake me nuwa, aii se gane kan dama katoyaake me nuwa, ku waya wadobo kaawatai waa bada ae se kaanigeo, me ona. Kena ona me ko, akaa'm ese widigi tau se dimina da kakumake me nde miya waya wadobo kakumai waa bada ae se kanigeo, me ona. Ku wiya ku kaawatai waa bada ae, se kanigimaa yako “Aba, aba,” se kaseo.

Titusi 1:4

Titusi woe. Ni'm eduga katupima mina waa, ku a'm “Mike ae,” se nigimame mina kuwa ku ese ni'm “Mike ae,” se nigeke mina ese dodo ndo. Ku kaa kiyoo ni'm kadena ko ai ese okaa se niyombai se mee to mugo dodo se kadeta. Kena ni'm a kaa kadotaa taao gai se mina ku se de. Anegisemee Naamee mesema enii'm woo-woo se kaa em si nadan ndo omiwoo towoo natoyaake se mee to, Yesiusi Keditusi me mesema, akaa'm aii se dama katoyaake ku waya wadobo kaa-awai waa bada ae se nigeo, me ona. Kena ona me ko, akaa'm ese widigi tau se dimina da kakumake me nde miya waya wadobo kakumai waa bada ae se kaanigeo, me ona. Ku se ku kaa-awatai waa bada ae, se kaanigimana “Aba, aba,” se kaseo.

Pidemoni 1:11

Eduga ko Onesimusi wai a tao ndanda ku dama yaa mu-mu taan tau. Kamaaniyaasi na se kao mbeenaa kaa miya kaawaan tau ae se yademe. Ku koya endo ko wa'm sese wa-nini kimapi. Waya ku kaa kiyoo a tao ndanda nuwa, ni tao ndanda nuwa, ku wa'm ese dama naayaa mu-mu taao sekii. Wai ana tao namaaniyaabuu taambi se mee to kumana dama yaawae waa bada ae, se kasipa.

Pidemoni 1:13

Ku kindo ni'm yapeyaake ko yapeyaapa koya mbeenaa bem-bem yapeyaapa. Kase enta mugo ndoe, ni Anegisemee'm dama mina ku eniwoo sima kumana ku kaa kiyoo peniyada ee nda nadomaamea. A mbo pasi tau se peniyada ee me nda nadomaamea. A mbo pasi waa, a ko dama nadito siwoo siyaa. Ku koya Onesimusi wa nakayoo aoo kumana ni'm nigina ko “O, Onesimusi wai a kumo-kumo kumatana ni tao dama nadito taao sekii ae,” se nigeke. Se nigimaa yako “Onesimusi ai ni mbo ndo tuta taae,” se ku aseao gai koya tau.

3 Yohanesi 1:4

Dee, ni'm eduga tupima se bage waa ku ni'm yopaa se bage mugo dodo. Kena ni'm yopaa se bage waa ekii mike ndumbo mina ku kaa kusipimana dama towoo nakea ae se mina yeke kipii kindo ko ni'm bani-bani se dimina ku eneke sekii tau. Ese asiyoo kam asiyoo bani-bani se ku se ene. Ku kumana ni a kaa mina kayepa se dodo me kaa ko ese bani-bani se sima.