Ifiso 1:19 - 阿美語聖經-新約附詩篇箴言

¹⁹ O romasato, nanay mafana' kamo to nika hakowa ko nika tadamaan no 'icel no tayal no Kawas i titaanan o paso'linay, onini i o nido^doan Ningra to tadamaanay a 'icel a mipakatayal.

Ifiso 1:19 Iomraidhean Croise

Yohani 3:6

O tireng no tamdaw i, o nihofocan no mama ato ina. Nikawrira, o 'adingo no tamdaw i, o nihofocan no Fangcalay 'Adingo.

Dmak 26:18

O mamifohat kiso to mata nangra. O papasasiyoren iso cangra nai to'manay a pasayra i ta^ngaday. O papasasiyoren iso cangra nai sakowan ni Satan a pasayni i Kawas. Ta pakayni i nipiti'er nangra i Takowanan ko sakahpol no raraw nangra ato sakapikapot nangra to finawlan no Kawas saan.>

Loma 1:16

Caay ka ngodo kako a mipatnak to Nga'ayay Ratoh. Onini a Nga'ayay Ratoh i, o 'icel no Kawas a pa'orip to paso'linay a tamdaw a ma^min. O Yutaya a tamdaw ko sa'ayaway a mapatnak, ta o romato a finacadan.

2 Korinto 4:7

Nikawrira, matiya o sra a koreng kami. Ira i tamiyanan konini a tadamaanay a dafong. O kacipinangan konini to nika o nai Kawasay konini a tadamaanay a 'icel, caay ko nano niyam.

2 Korinto 5:17

Ano mapalaccay aci Kristo ko cima a tamdaw i, o fa^lohayto a tamdaw cingra. Malasawadto ko matlangay a pinangan ningra, ta masafa^lohto cingra.

Ifiso 2:10

O misanga'ay titaanan ko Kawas. Pakaynien no Kawas i nika laccay ita aci Kristo Yis ko nipisafa^loh titaanan to sakanga'ayaw no dmak ita. O nisahalakaanto no Kawas konini naniti:ya aca to dadmaken ita.

Ifiso 3:20

Pakayni i matayalay i titaanan a 'icel no Kawas ko nika ma^deng a malahci Ningra ko ikakaay no nilongocan ato niharatengan ita a maamaan a dmak.

Ifiso 3:7

O nano micidekay a rocek no Kawas ko saka malakoli kako to no Nga'ayay Ratoh, onini i pakaynien Ningra i dmak no tadamaanay a 'icel ko pipafli i takowanan.

Ifiso 6:10

Saikoray a sapa'icel ako i, pakaynien namo i tadamaanay a 'icel no Tapang ko sakatanektek namo.

Filipi 2:13

Nawhani mararid ko Kawas a matayal i faloco' namo a pafaloco' a papilahci to nafaloco'an Ningra.

Filipi 3:21

Itiya i, o 'icel ni Kristo a papitoor to ma'oripay a ma^min ko sapifalic Ningra to tadancaay a mamapatay a tireng ita a palcad to tadamaanay a tireng Ningra.

Kolosay 1:29

Tona sapilahciaw tonini a patosokan, saka pakaynien ako to nipaflian ni Kristo a tadamaanay a 'icel a caay ka rorayen a misa'icel a matayal.

Kolosay 2:12

Yo mapaino' kamo i, mapakapot kamo ci Kristoan a matadem. Pakayni i nipipaso'lin namo a miti'er to 'icel no palowaday ci Kristoan a pa'orip nai patay a Kawas a mapakapot kamo i Cingraan a mapalowad a mapa'orip nai patay.

1 Tisalonika 1:5

Nawhani o nipipatnak niyam i tamowanan to Nga'ayay Ratoh i, caay ko sowal a ccay. O nano 'icel niyam ato nano tayal no Fangcalay 'Adingo ato ci'icelay a pipaso'lin niyam konini. Mafana' kamo to nika masamaan ko dmak niyam yo itira kami i tamowanan. O sakaci^poc namo ko tayal niyam a ma^min.

2 Tisalonika 1:11

Onini ko sakararid niyam a mitolon to saki tamowanan. Yo mitolon kami to Kawas i, nanay matatodong i niharatengan no mitahidangay tamowanan a Kawas ita kamo. Nanay pakayni i 'icel Ningra a malahci Ningra a ma^min ko nilongocan namo to sakanga'ay no pinangan namo ato dmak no nipiti'er namo Cingraan.

Yakop 1:18

O sakanga'ayaw ita a malasakakaay i tini i nisanga'an no Kawas a ma^min saka, do^doen Ningra ko nafaloco'an Ningra a mihofoc titaanan pakayni i so'lin a sowal.

1 Pitiro 4:11

O pakimaday a tamdaw i, ka o sowal no Kawas ko sasowalen. O matayalay a tamdaw i, ka o nipaflian no Kawas a 'icel ko sakatayal. Ta pakayni i ci Yis Kristoan a mapahmek ko Kawas i masamaamaanay a dmak. Nawhani o ci'dilay, o ci'icelay Cingra a tahada'oc! Amin.