Ifiso 1:15 - 阿美語聖經-新約附詩篇箴言

¹⁵ Orasaka, yo matngilto ako ko pakayniay i piti'er namo to Tapang ci Yisan ato nika olah namo to mitooray a ma^min.

Ifiso 1:15 Iomraidhean Croise

'Olic 16:3

Wata: ko nika tadamaan no so'linay a finawlan no Tapang. O pikapot ako i cangraan ko sakakaay a lipahak ako.

Dmak 20:21

Ano o Yutayato a tamdaw, ano o romato a finacadan i, songila'en ako a palimo'ot to sakasiyor no faloco' nangra, a pasayra i Kawas a papiti'er to Tapang ita ci Yisan.

Loma 1:8

Sa'ayaway i, pakaynien ako i ci Yis Kristoan ko nipiahowid i Kawas ako to saki tamowanan, nawhani malosiyang i polong no hkal ko nipiti'er namo.

Kalatiya 5:6

Nawhani, yo malaccay kita i 'orip ni Kristo Yis i, caay ko kalimlaan ko nika krit ato nika ^ca ka krit, deng o nano pilahci ita to olah a mahapinangay a nipiti'er ko kakalimlaan.

Ifiso 1:1

Ci Pawlo kako, pakayniay i nafaloco'an no Kawas a malatarokosay ni Kristo Yis kako. Patilid kako i tamowanan o i Ifisoay a malaccayay aci Kristo Yis a so'linay ko faloco' a mitooray.

Ifiso 3:18

Ta malcad kamo ato polong no finawlan no Kawas a ma^deng a mihapinang to nika hakowa ko kakahad, kakaya', takaraw ato talolong no olah ni Kristo.

1 Tisalonika 1:3

nawhani maharateng niyam i ka'ayaw no Wama a Kawas ita ko pipatalahkal namo i dmak to piti'er namo i Kawas ato nika roray namo a matayal to nano olah namo ato nika tanektek no kacifaloco'an namo to Tapang ci Yis Kristoan.

1 Tisalonika 4:9

O maanho ko papatiliden ako i tamowanan to pakayniay i kasasiolaolah namo o salikaka. O nipasifana'an no Kawas kamo to sakasasiolaolahaw.

2 Tisalonika 1:3

Salikakaaw, tona matongal ko piti'er namo i Kawas ato nika sasiolaolah namo a ma^min saka, o papararid kami a mikansiya i Kawas to pakayniay i tamowanan. O matatodongay ko pihaen niyam.

1 Timoti 1:14

Pahapinangen no Tapang kako to tadamaanay a mikomi Ningra a papiti'er, papiolah Cingraan. Onini a olah ato piti'er ako i, o nano nika laccay ako aci Yis Kristo.

1 Timoti 1:5

O patosokan nonini a limo'ot i, o pipalowad to so'linay a olah, o nai tingalaway a faloco' ato makoracay a nga'ay a faloco' ato so'linay a piti'er ci Kristoan a masadak konini.

Filimon 1:5

Nawhani matngil ako ko sowal to pakayniay i piti'er iso to Tapang ci Yisan ato nika olah iso to polong no mitooray.

Hipray 6:10

O mo^celay ko Kawas saka, caay ka tawal Ningra ko nano tayal namo ato nipipatalahkal namo to olah i Cingraan i tini i nipipadama namo to mitooray ato nika tahanini nora dmak namo.

1 Pitiro 1:22

Anini sato, tona mihaklong kamo to so'lin, o makoracayto namo kamo, ta o malkakaayto kamo ato romaroma a mitooray, kao nai faloco'ay namo a masasiolaolah.

1 Yohani 3:17

Ano ma'araw no cidafongay a tamdaw ko cango'otay a salikaka, ano caay ka sini'ada cingra i, maanen ningra ko nika somowal to nika o maolahay kako to Kawas saan saw?

1 Yohani 4:21

O maolahay to Kawas a tamdaw i, o mamaolah to salikaka. Mahaen ko limo'ot ni Kristo i titaanan.