Tito 3:5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁵ Ñeñthpaꞌ ama añotheyaye attho eꞌñe kowen es yephaꞌyen, añña eꞌñe poemoereñotheya ñapaꞌ aꞌkeshphaterrey. Atthoña eꞌshowerrnayña yoꞌchñar atthochña ellopaꞌ oꞌch yokthapeꞌcherr eꞌñe kowen etserra ñokop, ñamha Poekamkëñothpaꞌ oꞌ eꞌñe etserrataterrnay yokthaphña.

Tito 3:5 Iomraidhean Croise

San Mateo 3:11

Elloña Juanpaꞌ ateth oterraneterr: —Ñeñthes kothapeꞌcherreꞌ kowen Yomporekop napaꞌ amaꞌt eꞌñe poꞌñoxh napatensoñ Yomporekop, napaꞌ eꞌñekaꞌye oñochaya napatenes. Tharraña Cristo ñeñthchaꞌ wapatsa chentaꞌpaꞌ ñapaꞌ añchaꞌkaꞌye chorratossa Parets Poekamkëñ ñeñth ateth ñerraꞌm tsoꞌ. Ñapaꞌ ñeñth atarr awamenkatheshaꞌ nañapaꞌ ama tama awamenkatheyayno. Ñapaꞌ ñeñthña atarr sherbets, nañapaꞌ ama es nesherbeno atthoch amaꞌt poꞌsapatapaꞌ oꞌch nanmoñ.

San Lucas 1:50

Allowen ñeñth amhchaꞌnaꞌtpoꞌ enteneꞌ Yepapar, ñañapaꞌ xhokmach atarr moererranet amaꞌt thayotheñ errponañowen amaꞌt allpon allowen acheñeneshaꞌ ñeñthchaꞌ mererrtsa arr patsro.

San Lucas 1:54

Yepaparpaꞌ añach xhokma yenpoen israelenaꞌtar ñeñth poeyochreshaꞌ pen ña. Amach poeserrano ñeñth ateth otaneꞌth awath yamoꞌmtayñeneshañ ñeñthchaꞌ ateth perranet ñamha allowen ñeñthchaꞌ poꞌmhreneñ perret. Eꞌñe ateth otaneꞌth awath Abraham poꞌmhrenñekop. Atthoch xhokma moerenanet amaꞌt errponowañen. Arrpaꞌ allowa ñeñth ateth axhotan María Yompor.

San Lucas 1:72

Atthochña etsotaterrnay ñeñth ateth otaneꞌth awath yatañneshañ ñeñthchaꞌ attho xhokma moererrya. Attheña ñapaꞌ amach poeserrano ñeñth ateth aꞌpoktat awathotheñ yokop tharroꞌmar ñeñthpaꞌ eꞌñe Partseshoth aꞌpoktatarethta.

San Lucas 1:78

Theꞌpaꞌ xhapchaꞌ allempoch Yompor eꞌñe poemoereñothey xhapaterrnaychaꞌ ñeñth wetsa entoth ñeñthchaꞌ yokthapeꞌchaterreꞌ eꞌñe kowen, ñeñthña kothaphñatserpaꞌ ñeñthchaꞌ yaꞌpoetarsamperreꞌ.

Romanos 11:14

Tharroꞌmar allochñapaꞌ atthoch nameꞌñatera ñeñth amaꞌt ama judioneshayaye. Atthochña ñatoꞌ judioneshaꞌ ñeñth eꞌñe namoꞌtsnaꞌtaranetpaꞌ eꞌñe poempaꞌteñothet Yomporpaꞌ oꞌch alla moeneret oꞌch ameꞌñerret ello ateth sepena sa. Allochñapaꞌ atthochña aꞌkeshphatarethterret ñamet, amaꞌt poesheñaꞌttsotha.

Romanos 11:6

Tharraña eꞌñe poemoereñothanet awoꞌt aꞌkeshphatanet. Amaña añotheyaye attho kowen es yexhkatyenet ñet. Tharroꞌmar ñeñth kowen yexhkatyenet ñerraꞌm allo aꞌkeshphatenetañpaꞌ Yomporña poemoereñapaꞌ amatheꞌ aꞌkeshphatañeyeꞌ yenteñe.

Romanos 12:2

Allochñapaꞌ amach alloꞌna ateth es yephatseꞌtyesneno ñeñth ateth yeyxhen ya añe patsro, ellochña yokthapeꞌcherr etserra atthoch etserrataterrnay Yompor yokthaphña. Atthochña eꞌñe kowen señoch erraꞌtsentheꞌña moenen Yompor ñeñth eꞌñe kowen enten ña, ñamha ñeñthchaꞌña koshateneꞌ eꞌñe poktakma.

Romanos 3:20

Tharroꞌmar yeñoteñ eꞌñe yetsotateñotha añ ñoñets ñeñth ateth anareth awathotheñpaꞌ amach errothenoth amaꞌt poesheñarrotheya eꞌñe yaꞌpoktatoña yañeña atthoch eꞌñe pokteꞌ enteney Yompor. Añekpaña sherbeney añ ñoñets ñeñth ateth anareth, ñeñthchaꞌ yeñotateneꞌ poꞌñoxh yapaꞌ nanak ochñath enteney Yompor.

Romanos 3:28

Ñeñthoꞌmarña theꞌpaꞌ eꞌñe poꞌñoxh yeñoteñ eꞌñe yeyemteñotha Cristopaꞌ eꞌñech pokteꞌ enteney Yompor amaꞌt ama yetsoteno ñoñets ñeñth ateth anareth awathotheñ.

Romanos 9:16

Ñeñthoꞌmarña yapaꞌ yeñoteñ ñerraꞌm eseshaꞌ moenen Yompor ñeñthchaꞌña aꞌnatena, ñeñthpaꞌ eꞌñe pokteꞌ. Ñeñthpaꞌ ama añotheyaye ñeñth ateth yemnen ya acheñey, ñamha ama yaꞌmoeroxhtameꞌteñotha yeꞌchenyoña Yompor. Eꞌñechña poemoereñotha yeꞌchenana erraꞌtsen moenen ña.

Romanos 9:30

Ñeñthoꞌmarña theꞌpaꞌ yeñoteñ acheñeneshaꞌ ñeñth ama judioneshayaye amaꞌt ama eꞌneñeto atthoch eꞌñe pokteꞌ entanet Yomporpaꞌ ñetñapaꞌ awepaꞌt enteret ñeñth eꞌñe attho pokteꞌ enteney Yompor alloweney ñeñthpaꞌ ñeñthña attho yeyemteña ñeñth ateth oteney Yompor.

1 Corintios 6:11

Sapaꞌxhoꞌña poesheñaꞌttsos atthekma sepeꞌth samha awaña. Tharraña theꞌpaꞌ oꞌ eꞌshowarethterra soꞌchñar, atthoña oꞌ saꞌkowentatarethterra Partsokop. Eꞌñe seyemteñoth Yepartseshar Jesucristo theꞌña Pomporpaꞌ oꞌ pokteꞌ enterres. Ñamha eꞌñe poechorreñothes Yompor Poekamkëñpaꞌ oꞌ pokteꞌ enterres Yompor.

Gálatas 2:16

Tharroꞌmar ya amaꞌt judioneshaypaꞌ yeñoteñ eꞌñe yameꞌñeñotha Jesucristopaꞌ oꞌch pokteꞌ enterrey Yompor, ñeñthpaꞌ ama añotheyaye oꞌch eꞌñe yephowa ñeñth ateth anareth judioneshakop. Añña eꞌñe yameꞌñeñotha Jesucristopaꞌ oꞌch pokteꞌ enterrey Yompor, ñeñthoꞌmarña oꞌ yameꞌñera Cristo, tharroꞌmar yeñoteñ eꞌñe yetsoteñotha ñeñth ateth anareth judioneshakoppaꞌ amach pokteꞌ enterrye Yompor amaꞌt poesheñarrotheya.

Efesios 2:4

tharraña Yomporñapaꞌ atarr nanak amorrentña, atarr moerenya. Eꞌñe ña poemoereñotheypaꞌ oꞌ aꞌkeshphaterrey.

Efesios 4:23

Theꞌña sapaꞌ añepaꞌchña setserrataterreꞌ Yompor eꞌñe ora ñeñth ateth sokthapeꞌchyen seyoxhro.

Efesios 5:26

Allochñapaꞌ atthochña eꞌñe eꞌshowerrnay allowen yoꞌchñar oꞌch aꞌkowentaterrey Partsokop. Ñewa, ñeñth tomaꞌntena allempo yapatarethterra Yomporekop. Ñamha poꞌñoñpaꞌ ñeñthña eꞌñe yaꞌkowentaterreꞌ.

Colosenses 3:10

Sapaꞌ añchaꞌña sechorrerraya ñeñth etserra ñeñthchaꞌña sokthapeꞌchaterreꞌ ello etserra allochña setserrataterrña sokthaphña. Atthoña eꞌñe setserrateñothpaꞌ oꞌch sokthapeꞌcherr eꞌñe kowen ñeñth ateth kothapeꞌchen Yompor ñeñth seyexhkateꞌ. Atthochña sapaꞌ alloꞌnach sesen eñotneneꞌ ñeñth ateth kothapeꞌchen ña.

2 Timoteo 1:9

Ñeñthara ñeñth oꞌ aꞌkeshphaterrey, atthoña oꞌ xhoreꞌterrey atthoch yemaꞌyoxhra ñeñth kowentetsa Partsokop. Tharraña añmapaꞌ ama añotheyaye attho eꞌñe kowen es yephaꞌyeseꞌth awath, añmapaꞌ tharroꞌmar ateth moenen ña. Yomporpaꞌ nanak morrentyeꞌth ñeñthoꞌmar amaꞌt awathotheñpaꞌ awoꞌt oꞌpatatya Poechemer Cristo Jesús.

Tito 3:4

Tharraña allempoña Yomporpaꞌ eñotatey eꞌñe ña poemoereñothpaꞌ moeneñ oꞌch yenpaꞌy, eꞌñe allempokma yapaꞌ atthothña aꞌkeshphaterrey, ñeñthoꞌmarña Yomporpaꞌ ñeñth Yaꞌkeshphatañer yepen.

Hebreos 10:22

Ñeñthoꞌmarña eꞌñe yeyemteñothpaꞌ amach yemhchaꞌnañothayaya yexhoreꞌteñe. Eꞌñepaꞌchña yeñmañeshaꞌ yeyoxhrokmañen yexhoreꞌteñ, tharroꞌmar Cristo poꞌrrasoña oꞌ aꞌkowentaterrnay yeyoxher attho theꞌpaꞌ oꞌ eꞌñe kowen yokthapeꞌchyerr, amachña alloꞌna yerpapaꞌtatnenye yoꞌchñar. Ñeñthpaꞌ añ tomaꞌntena attho yapaꞌ eꞌñe kowen apatarethey oño ñeñth poktetsa Partsokop.

Hebreos 4:16

Ñeñthoꞌmarepaꞌchña eꞌñe yeyemteñoth Yompor Poechemer, amach yemhchaꞌnañotheyeꞌ yexhoreꞌteñe Yompor amaꞌt ñeñth atarr partsotets poꞌkonaño. Eꞌñe poemoereñothey eꞌñech kowen eꞌmhñoteney, xhokmach yenpoeney. Ñamha ñerraꞌm esempo wennaya ñeñthchaꞌ yellkateneꞌ ñachña eꞌñe awamenkath yepeneꞌ.

1 San Pedro 1:3

Theꞌñapaꞌ ayeꞌchoxhtaterrapoꞌch Yompor Parets ñeñth Yepartseshar Jesucristo Pompor ñeñthara ñeñth Poꞌyomporer pen, tharroꞌmar oꞌ yeꞌñalleterra etserra eꞌñe ña nanak poemoereñothey. Allempotheñña ya eꞌñe yeyemteñoth ña xhokmach yekwameꞌteñ esempowañen tharrempowa allempoch ama yaꞌrromñathterro. Attho Jesucristopaꞌ oꞌ tanterra, ñeñthoꞌmarña yapaꞌxhoꞌña yekwen yamha atthoch amach yaꞌrromñathterro.

1 San Pedro 2:10

Awathpaꞌ ama esonaꞌtareyayye, theꞌñapaꞌ Yomporenaꞌtarey. Awathpaꞌ ama amoeraretheyayye, theꞌñapaꞌ oꞌ yaꞌmoerarethterra.

1 San Pedro 3:21

Tharroꞌmar yapaꞌxhoꞌña theꞌ ñerraꞌm yapatarethta oñoth Partsokop eꞌñe ateth pena ñerraꞌm awath Noépaꞌ oꞌ keshpha eꞌñe oñoth. Ñeñthoꞌmarña yapaꞌxhoꞌña ñerraꞌm yameꞌñeñoth oꞌ yapatarethta Partsokop eꞌñe oñothpaꞌ yeñoteñ oꞌ yekeshpha. Ñewa, ñeñth apatarethteñetspaꞌ ama añekpayaye oꞌch yapa oño atthoch wañ yepatser. Añchaꞌña ñeñth alloch yekeshpha. Attho yapatarethta Partsokop oꞌch yenamh Yompor etserrataterrnayepaꞌ yokthaphña eꞌñe kowen. Attho yapatarethta Partsokoppaꞌ yeñoteñ oꞌ yekeshpha tharroꞌmar Jesucristo attho tanterra amaꞌt rromwa.