Tito 2:5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁵ ñamha atthoch ñetpaꞌ eñotenet nanak ñeñthchaꞌ ateth phaꞌyeset ñeñth poktetsa ñamha atthoch moechethtenet, ñamha atthoch amach moenmeꞌcheneto ñeñth poꞌtarwas penet paꞌpaklleto, ñamha eꞌñech amoerañtenet, ñamha eꞌñech ameꞌñeñet poerrollaret. Allochñapaꞌ eꞌñe ñeshothetpaꞌ amach errothenoth acheñeneshaꞌpaꞌ achmhareꞌtoñeto Yompor poꞌñoñ.

Tito 2:5 Iomraidhean Croise

Los Hechos 9:36

Eñall poesheñarr koyaneshaꞌ ñeñth ameꞌñetsa añ paꞌsoꞌcheñ Tabita, añ ñeñthara soꞌchñets Tabita ñeñth otenet griegaxho Dorcas. Ñapaꞌ arr yexhena anetso ñeñth paꞌsoꞌcheñ Jope eꞌñe alla allameꞌtets Lido. Ñañapaꞌ nanak amoeraña, xhokmach yenpoenan ñeñth wokchañetyets.

Los Hechos 9:39

Pedroñapaꞌ oꞌ kotherranet. Xhap allpaꞌ oꞌ anmet all cuarto eno alloꞌtsen arromñath. All thomxhen shonteꞌ rrethorrnaneshaꞌ ñeñth llekanrrortetsa. Allñapaꞌ all gatannaꞌtyenet ñeñth chorraꞌyenet ñeñth sepechyesanet awaña Tabitañ.

Romanos 14:16

Ñeñthoꞌmarña notenes, amaꞌt pokteñ ñeñth ateth pephaꞌyena, tharraña ñerraꞌm yemoꞌnasheñpaꞌ ama pokteyeꞌ enteñe, ñañapaꞌ ñeñthothach sasareꞌteney. Ñewa, amaꞌt eꞌñe pokteñ oꞌch ateth yepenañ, tharraña amach ateth yephatsche.

Romanos 2:24

Amaꞌt ateth oten Yompor poꞌñoñ ñeñth ateth anwareth awathotheñ, ñeñthpaꞌ ateth oten: “Amaꞌt ñeñth ama judioneshayayepaꞌ achmhareꞌteñet Yompor eꞌñe sesharrmoroth, eꞌñe sephatseꞌtyeñoth ñeñth amaꞌt mameshapaꞌ ama pokteyeꞌ enteneto amaꞌt ñameꞌttseta.”

1 Corintios 11:3

Theꞌña añmapaꞌ ñeñth nemneñ oꞌch señoch samha, attho ya alloweney ñeñthey asheñorreypaꞌ añ pomnaren yepeneꞌ Cristo. Añña koyaneshaꞌpaꞌ añ pomnaren penawet poerrollar. Cristoñapaꞌ añ pomnaren peneꞌ Pompor.

1 Corintios 14:34

koyaneshaxhnopaꞌ amach serrpareꞌtatsteto, tharroꞌmar ñeñthpaꞌ ama pokteyaye. Añña pokteꞌ xhoch ameꞌñyet ñeñth amhchaꞌtarethtetsa, ñeñthpaꞌ ateth oteney ñoñets ñeñth ateth anareth awathotheñ.

Efesios 5:33

Ñeñthoꞌmarña oꞌch alla noterrserr, eꞌñe poesheñaꞌttsospaꞌ eꞌñepaꞌch kowen semoerya sethapor ateth atarr semorrentena eꞌñe sañeña. Ñamha ñeñthes koyaneshaspaꞌ oꞌch notas, añ poktetsa ñamha sokop semorrenteñothpaꞌ sameꞌñyach serrollar, ñamha eꞌñech kowen senteñ.

Colosenses 3:18

Theꞌpaꞌ oꞌch notas samha ñeñthes arrollarethes: Ñeñth serrollar sepenpaꞌ eꞌñech kowen sameꞌñeña tharroꞌmar ateth poktetsa yokop allowenakpay ñeñthey ameꞌñenaya Yepartseshar Jesucristo.

1 Timoteo 5:10

Ñamha erraꞌtsentheꞌ senten ñeñth eꞌñe kowenareꞌ es pets, ñeñth eꞌñe kowen kowampeneꞌ poechoyoreshaꞌ, ñamha ñeñth nanak amoeraña, ñamha ñeñth eꞌñe kowen agëneꞌ poemoꞌtoꞌ, ñamha ñeñth eꞌñe poeñmañeshaꞌ sherbeneꞌ allowen ñeñth ameꞌñetsa, ñamha ñeñth nanak yenpoeneꞌ amaꞌt ñeñth moeroxhtetsa, ñamha ñeñth nanak phaꞌyeneꞌ poꞌpoñexhno ñeñth kowentetsa.

1 Timoteo 6:1

Theꞌpaꞌ oꞌch notaph poꞌpoñ ñeñth poktetsa ñeñthchaꞌ ateth pha ñeñth atarwasatareth eꞌñe attha ñeñthara ñeñth oꞌ ameꞌñerrana Cristo. Añ pokteꞌ ñetpaꞌ kowenchaꞌ eñchet poꞌpatronar, atthoch eꞌñe ñothothetpaꞌ amach errothenoth eñalle atthoch achmhareꞌtachet Yompor, ñamha ñeñth ateth yeyxhaten Cristokop.

Tito 2:4

Ñetpaꞌ yexhachetepaꞌ pakmaneshaxhno ñeñth shopshareꞌ ñeñth oꞌ someꞌtwa allochñapaꞌ atthoch eꞌñe kowen moeryet poerrollaret, ñamha atthoch eꞌñe kowen moeryet poechoyoreshet,