Tito 1:8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁸ Añña eꞌñe pokteꞌ oꞌch amhchaꞌtarethta ñeñth eꞌñe kowen agëneꞌ acheñeneshaꞌ paꞌpakllo, ñamha ñeñth nanak moeneneꞌ oꞌch eꞌñe kowenareꞌ es phaꞌyes, ñamha ñeñth eꞌñe eñoteneꞌ ñeñth kowentetsa, ñamha ñeñth eꞌñe pokteꞌ es phaꞌyets acheñeneshakop ñamha Partsokop, ñamha ñeñth eꞌñech poetpara es phaꞌyen.

Tito 1:8 Iomraidhean Croise

San Lucas 2:25

Allempoña xhapoet Jerusaléñopaꞌ oꞌ beꞌthososet Parets paꞌpakllo atthoch aꞌpoktatenetaꞌ ñeñth ateth yexhenet ñeñth ateth oten ñoñets ñeñth anareth awathotheñ. Allñapaꞌ wapa poesheñarr yakma añ paꞌsoꞌcheñ Simeón ñeñthpaꞌ jerusaléñoꞌmarneshaꞌ. Tharroꞌmarña ñapaꞌ allempokma wapañaꞌ ñapaꞌ añ eñotateꞌ Parets Poekamkëñ. Tharroꞌmar ñeñth acheñerpaꞌ atarr kowen ñeñth atarr maꞌyoxhrenaya ñeñth kowentetsa Yomporekop. Ñapaꞌ ñeñth atarr koweneꞌ esempoch wapa ñeñthchaꞌ aꞌrroyataterreꞌ israelenaꞌtarneshaꞌ allochñapaꞌ oꞌch alla atarr kosherret. Attho xhapoña Parets Poekamkëñ ñeñthña eñotateneꞌ ñapaꞌ amach rromoenaꞌpaꞌ enterranchaꞌ Yompor Poechemer ñeñth Cristo ñeñthchaꞌ llesenserr esempo.

Los Hechos 24:25

Allempoña xhap Pablopaꞌ oꞌ serrpareꞌtatanet kowen ñeñth ateth yepena ya ñeñthey ameꞌñetsa. Ñamha ateth otanet añchaꞌ yemaꞌyoxhra atthoch eꞌñe pokteꞌ es yephaꞌyen, ñamha amach yephatsto ñeñth ama kowenayaye tharroꞌmar Yomporpaꞌ tsaꞌtatwerryach allempoch akrerran allowen acheñeneshaꞌ. Ñeñtha otwa Pablopaꞌ añña Félixpaꞌ xha yoren. Allempopaꞌ alla oter: —Theꞌpaꞌ orrerreph, esempochña eꞌñe poktaꞌwerrnanerrpaꞌ oꞌch alla nexhoreꞌtaterrperr.

1 Tesalonicenses 2:10

Sapaꞌ eꞌñe sentyeꞌth, Yomporpaꞌxhoꞌña eꞌñe enteney attho yapaꞌ eꞌñe kowen yorrtatyes sokop ñeñthes ameꞌñetsa all. Ñeñthpaꞌ eꞌñe kowen yorrtatyen Partsokop ñeñth eꞌñe pokteꞌ enten ña allochñapaꞌ atthoch amach errothenoth otenyeto “ama pokteyaye ñeñth ateth sepena.”

1 Timoteo 3:2

Tharroꞌmar ñeñth moenets oꞌch amhchaꞌtarethta allowenakop ñeñth ameꞌñetsapaꞌ añchaꞌ seꞌn ñeñth etsotweneꞌ añexhno. Ñeñthchaꞌ senaꞌ amhchaꞌtarethpaꞌ añchaꞌ seꞌn ñeñth eꞌñe kowenareꞌ es pets. Ñeñth amaꞌt awathapaꞌ amach eñalle atthoch thanmareꞌcha acheñeneshaꞌ amaꞌt mamesha. Ñamha ñeñthchaꞌ paꞌmhchaꞌtarether phaꞌyes allowen ñeñth ameꞌñetsapaꞌ añchaꞌ senaꞌyes erraꞌtsentheꞌ senten eꞌñe pathrra poethapor pen (ñerraꞌm athaporeth), ñamha ñeñth nanak maꞌyoxhrenaya ñeñth kowentetsa Yomporekop, ñamha ñeñth eꞌñe eñotweneꞌ ñeñth kowentetsa, ñamha ñeñth amhchaꞌnaꞌtpoꞌ entwen allowen acheñeneshaꞌ. Ñamha añ eꞌñe pokteꞌ oꞌch amhchaꞌtarethta ñeñth eꞌñe kowen agëneꞌ acheñeneshaꞌ paꞌpakllo, ñamha ñeñth eꞌñe kowen yexhateneꞌ acheñeneshaꞌ Yompor poꞌñoñ.

1 Timoteo 4:12

Ñamha xhokmach phorrta eꞌñe kowen acheñeneshakop, atthoch ñetpaꞌ eꞌmhñotapet amaꞌt phapaꞌ nanak wepoeshaph. Ñamha xhokmach phorrta kowen amaꞌt ateth peꞌñorena, ñamha amaꞌt allempo es pephaꞌyen. Ñamha xhokmach pemoereña acheñeneshaꞌ, ñamha xhokmach phameꞌñya eꞌñe kowen Yompor, ñamha amaꞌt peyoxhropaꞌ xhokmach phokthapeꞌch eꞌñe kowen ñeñth ateth pena ñeñth eꞌñe poꞌñoxh Cristonaꞌtartetsa. Allochñapaꞌ eꞌñe peshoth añña acheñeneshaꞌ ñeñth ameꞌñetsapaꞌ oꞌch xhapanet poeyoxhreto ñeñth ateth kowentetsa Yomporekop.

1 Timoteo 6:11

Tharraña phapaꞌ amach ateth pephatsto tharroꞌmar phapaꞌ anaretheph Yomporekop. Ñeñthoꞌmarña phapaꞌ añach pemaꞌyoxhra ñeñth kowentetsa Yomporekop, ñamha xhokmach peyerepya Yompor, ñamha xhokmach phameꞌñya kowen, ñamha xhokmach pemorrencha phamoꞌts, ñamha xhokmach phaꞌwantaꞌwanom ñeñth atarr echarr pentyen amach phañeña eꞌñe kowen entatstatso.

2 Timoteo 2:22

Ñeñthoꞌmarña phapaꞌ noteneph oꞌch peswanom allowen sosyaꞌtsañ ñeñth ateth moenatseꞌtyen wepaneshaxhno ñeñth ama poꞌñoxhayeꞌ sherbenaye Yompor, allochña phapaꞌ añach pemaꞌyoxhrena ñeñth kowentetsa Yomporekop, ñamha xhoch phameꞌñya Yompor eꞌñe peñmañeshaꞌ, ñamha xhokmach pemoerya allowen phamoꞌtseshaꞌ. Allochñapaꞌ atthoch peparrokmat epaph allowen ñeñth eꞌñe kowen poeyoxher peneꞌ Yepartsesharekop.

2 Timoteo 3:3

Ñamha allempopaꞌ oꞌwañchaꞌ eseshaꞌ moerannaꞌterrtsa, ñamha oꞌwañchaꞌ moenet oꞌch amoꞌtstannaꞌterret. Ñamha allempopaꞌ nanakchaꞌ tomaꞌtamphsannaꞌtyerret ñamha allempopaꞌ errothenxhoꞌ moenetpaꞌ atethchaꞌ phatseꞌtyenet, ñamha allempopaꞌ nanakchaꞌ moeroxhtatannaꞌtyerret atthoch nanak koshenet, ñamha nanakchaꞌ tsenaꞌterret ñeñth kowentetsa.

Tito 2:7

Phapaꞌxhoꞌña eꞌñech kowenareꞌ es pephaꞌyes phamha, allochñapaꞌ atthoch entaph acheñeneshaꞌ ñeñth kowen enten Yompor. Ñamha allpon peyxhatenanetpaꞌ eꞌñepaꞌchña paxharr peyxhatenanet, amachña xha moeneꞌ peyellsheñotha peyxhatenaneto atthoch amhchaꞌnaꞌtpoꞌ entoñet Yompor poꞌñoñ.

1 San Juan 3:14

Tharraña ya eꞌñe yemorrenteñoth yamoꞌtspaꞌ eꞌñe yeñoteñ yapaꞌ oꞌ yemhtanerrña allchaꞌ eꞌñe poktakma yerromoerreñ. Yapaꞌ oꞌ yexherr allña yapaꞌ korretsayach. Ñeñthña ama moerenayo pamoꞌts ñetñapaꞌ alloꞌtsenareta allchaꞌ eꞌñe rromoerret eꞌñe poktakma.

1 San Juan 5:1

Alloweney erraꞌtseneychaꞌ ameꞌñerraya Jesúspaꞌ ña Cristotats ñeñtheyña yapaꞌ oꞌ eꞌñe poechemer perrey Yompor. Ñewa, yeñoteñ arr patsro ñerraꞌm yemorrenteña poesheñarr acheñ ñeñth achemereshath, poechemereshaꞌnaña eꞌñe yemorrentwena.