San Mateo 6:5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁵ Jesúsñapaꞌ ateth oterraneterr: —Ñamha ñerraꞌm esempo semaꞌyochena sapaꞌ amach ateth sephatsto ateth pena ommoñatheneshaꞌ. Ñetpaꞌ añekpaña maꞌyochenet atthoch acheñeneshaꞌpaꞌ eꞌñech kowen entenanetañ. Ñeñthoꞌmarña allempo maꞌyochenetpaꞌ arrach thomyesoset all shontena acheñeneshaꞌ poerawoꞌmar amapaꞌ all etsapeꞌtyena thoñ allekma waxhena shonteꞌ acheñeneshaꞌ atthochña allowen acheñeneshaꞌpaꞌ eꞌñech kowen entenanetañ. Tharraña napaꞌ poꞌñoxhpaꞌ oꞌch notas: Ñeñth ateth ommoꞌchetsa Yomporñapaꞌ amach apoerraneto ñeñthchaꞌ koshaterrawet tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret.

San Mateo 6:5 Iomraidhean Croise

San Mateo 21:22

Amaꞌt allowen erraꞌtsenchaꞌ es senamh Yompor eꞌñe semaꞌyocheñoth, ñerraꞌm xho senamoeñ eꞌñe seyemteñokmañen, ñeñthñapaꞌ sagaphchaꞌ.

San Mateo 23:13

‘Atarr nanak llekëñtsoꞌtsenes fariseoneshachaꞌ ñamha samha ñeñthes eꞌñe etsotayenayeñ ñoñets ñeñth ateth anareth judioneshakop tharroꞌmar sapaꞌ sommoꞌcheñotheꞌna atarr seshkareꞌtyen. Tharroꞌmar amaꞌt sapaꞌ amakaꞌye senteññañeña Yompor poꞌkowenña, ellonethpaꞌxhoꞌña xhokma sepatareꞌteñña poꞌpotantañ ñeñth eꞌneneꞌ Yompor poꞌkowenña. Xha saꞌnpampeñña acheñeneshaꞌ atthoch ñetpaꞌxhoꞌña amach enterrñañeto Yompor poꞌkowenña ñeñth attho atarr ayochreshathtena ña poeꞌntañoth.

San Mateo 23:5

Fariseoneshaꞌ allowen ñeñth ateth etsotayeneñpaꞌ ñeñthpaꞌ eꞌñe pommoꞌcheñotheta ateth penet allochñapaꞌ acheñeneshaꞌñapaꞌ eꞌñech kowen entyeñet ñeñth attho atarr thorraꞌyenetañ Yomporekop. Tharraña ñeñthpaꞌ eꞌñekaꞌye orrena. Ñamha ñetpaꞌ xhakaꞌye ateshatomoerrtatenet poremh allñapaꞌ all kellkëññañetañ Yompor poꞌñoñ amaꞌt ñeñthpaꞌxhoꞌña allokaꞌyeña wankatoꞌtenet. Tharraña ñeñthpaꞌ eꞌñe añekpa ateth penet atthoch acheñeneshaꞌpaꞌ eꞌñech kowen entenanet. Tharraña ñeñthpaꞌ eꞌñe orrena ateth penet ñeñth attho ommoꞌchenet. Ñamha ñetpaꞌ añeꞌnakaꞌyeña allpochaꞌphtatenet ñeñth xheraꞌrrtenet paꞌshtamoeto paꞌrrpeꞌmoneth. Tharraña ñeñthpaꞌxhoꞌña eꞌñe añekpa ateth penet eꞌñe pommoꞌcheñothet.

San Mateo 23:6

Ñamha ñetpaꞌ ñerraꞌm xho rrallmeꞌchapretenetpaꞌ añakaꞌye atarr moenenet oꞌch anorrxhaꞌtyenet allekma anorryen ñeñth atarr amhchaꞌnaꞌtpoꞌ entyen allowen acheñeneshaꞌ. Ñamha ñetpaꞌ eꞌñe atthekma penet amaꞌt all judioneshaꞌ poꞌprawo.

San Mateo 6:1

Jesúsñapaꞌ ateth oterraneterr: —Eꞌñech señota, amachña eꞌñe sommoꞌcheñotheꞌnaña es sorrtatyeno kowen Yomporekop atthoch acheñeneshaꞌpaꞌ oꞌch entenset sapaꞌ atarroꞌ kowen acheñreseñ. Tharroꞌmar ñerraꞌm ñeñthekpaꞌna es sorrtatyen kowen, Yomporña ñeñth poeꞌntañoꞌtsenpaꞌ amach es apoerrsoña sa ñeñthchaꞌ atarr sokshaterreꞌ.

San Mateo 6:16

Jesúsñapaꞌ ateth oterraneterr: —Ñamha ñerraꞌm esempo semneñ semaꞌyocheñoth Yompor oꞌch sekexhpaꞌ serrar ñeñthpaꞌ eꞌñe pokteꞌ. Tharraña ñeñthpaꞌ ama añekpayaye atthoch entas acheñeneshaꞌ ñerraꞌm xha sellkaꞌwena. Tharroꞌmar ñeñthpaꞌ ommoñatheneshaꞌña ateth petsa. Ñetpaꞌ ñerraꞌm esempo kexhpoenet poerrar Yomporekop ñetpaꞌ atthach atsoklloyayenet allochñapaꞌ atthoch eñotenanet acheñeneshaꞌ ñetpaꞌ Yomporekpoꞌ ateth penet. Tharraña na poꞌñoxhpaꞌ oꞌch notas: Ñeñth ateth ommoꞌchetsa poethoreꞌteñoth Yomporñapaꞌ amach es apoerraneto ñeñthchaꞌ atarr koshaterrawet. Tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret.

San Mateo 6:2

Ñerraꞌm esempo es sapoeñ wokchañneshaꞌpaꞌ eꞌñechña aꞌnawa sapoenanet. Sommoꞌcheñothpaꞌ amach sotatsto entasepaꞌ allowen acheñeneshaꞌ atthoch eꞌñe kowen entasetañ. Tharroꞌmar ñeñthpaꞌ ommoñatheneshaꞌ ateth petsa. Ñeñth ommoñatheneshaꞌpaꞌ ñerraꞌm esempo es apoeñet wokchañneshaxhnopaꞌ oꞌch orrtachet alloꞌtsaꞌyen allowen acheñeneshaꞌ all poerawoꞌmar amaꞌt ñamha thoñoꞌmar; atthochña allowen acheñeneshaꞌpaꞌ eꞌñech kowen entenanetañ. Tharraña napaꞌ oꞌch notas, ñeñth ateth petsapaꞌ Yomporñapaꞌ amach es apoerraneto ñeñthchaꞌ atarr koshaterrawet. Tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret.

San Mateo 9:38

Theꞌpaꞌ añchaꞌña sanamoñ pamoꞌmteꞌ moeñanepaꞌña ñeñthchaꞌ aꞌyapaxherrets paꞌmro. Ñeñthpaꞌ ateth tomaꞌntatanet Jesús attho atarr shonteꞌ acheñeneshaꞌ ñeñthchaꞌ ameꞌñerrtsañ tharraña ñeñthchaꞌ ameꞌñaterrawetpaꞌ ama atarr atonayayeto. Añchaꞌña yanam Yompor ñeñth Yamoꞌmteꞌ yepen moeñanepaꞌña paꞌtarwasañer ñeñthchaꞌ thorraꞌyerrtsa ñokop allemeñ anetsoꞌmar.

San Marcos 11:25

Ñamha theꞌpaꞌ oꞌch notnomoes: Ñerraꞌm semaꞌyocheñoth xho sathen ñerraꞌm xho seꞌmoñeꞌteñ poꞌpsheñeñ xhosach peretnerreꞌ seyoxhro allorokma, allochñapaꞌ Sompor ñeñth entoꞌtsen peretnerrnaschaꞌ samha ñeñth ateth sephatseꞌtyen ñeñth ama pokteyeꞌ enteno ña.

San Marcos 12:38

All yexhaterraneterr ñeñthpaꞌ ateth oterraneterr: —Amach semeñeꞌtapretatsche ommoñatheneshaꞌ pokthaphña ñeñthareta ñeñthet atarr etsotayenayeñ ñoñets ñeñth ateth anareth. Tharroꞌmar ñetpaꞌ añeꞌnaña atarr kowen entenet oꞌch chorrenet atarrom shetamoets oꞌch attha yormaꞌtatseꞌtenet paꞌshtam. Ñamha pommoꞌcheñothetpaꞌ atarrchaꞌ moeneñet oꞌch eꞌñe poemhchaꞌnaꞌteñoth eꞌñech kowen womhchaꞌtenanet acheñeneshaꞌ all chopeñeꞌchyenet.

San Lucas 11:43

‘Atarr llekëñtsoꞌtsaꞌyenes sa ñeñthes fariseoneshas tharroꞌmar sapaꞌ eꞌñe sommoꞌcheñoth atarr semneñ allowen acheñeneshaꞌpaꞌ oꞌch eꞌñe kowen entenset. Ñeñthoꞌmarña sapaꞌ aña atarr semnen oꞌch sanorrxhaꞌtyen judioneshaꞌ poꞌprawo allekma anorryen ñeñth atarr amhchaꞌnaꞌtpoꞌ enten allowen acheñeneshaꞌ. Ñamha sapaꞌ aña atarr semnen allowen acheñeneshaꞌpaꞌ oꞌch womhchaꞌtenset poemhchaꞌnañoth ñerraꞌm esempo sechopeñeꞌchen thoñoꞌmar allekma chopeñeꞌchyen allowen acheñeneshaꞌ.

San Lucas 18:1

Allempoña Jesúspaꞌ alla serrpareꞌtaterraneterr tomaꞌnteñtso atthoch eñochet ñeñth poktetsa yokop xhokmach yemaꞌyochena amach yemoenmeꞌchatsche maꞌyochatsa.

San Lucas 18:13

Poꞌpsheñeñña ñeñth cobrets kelle ñañapaꞌ alla thomos aꞌyoth. Ñapaꞌ eñotena atarr ochñath ñeñthoꞌmarña ñapaꞌ ama kowoso enoneth Yomporeshoneth. Ña poellkëñothpaꞌ nosan pot poesomapo. Ña poemaꞌyocheñoth ateth otos: “Nompore, theꞌpaꞌ oꞌch pemorrenterrna atthoch eꞌñe pephretnaꞌwerrnan allowen noꞌchñar tharroꞌmar napaꞌ atarrkaꞌye ochñathen.”

San Lucas 20:47

Tharraña ñetñapaꞌ rrethorrnaneshaꞌnaña poerratampesyenetña paꞌpakëll. Elloña eꞌñe pommoꞌcheñothetpaꞌ aña atarr moenenet oꞌch ateth penet ñerraꞌmrratheꞌ ñetpaꞌ atarroꞌ kowen acheñret ñeñthoꞌmarña arrchaꞌ maꞌyochenet all shontena acheñeneshaꞌ, amach thematenayaya maꞌyocheneto. Ñeñthoꞌmarña theꞌ napaꞌ oꞌch notas, ñeñth ateth petsa pommoꞌcheñothpaꞌ elloña atarrchaꞌ aꞌkoñchaꞌtarethterret.

San Lucas 6:24

‘Tharraña theꞌpaꞌ oꞌch notas sa ñeñthes atarr ekhllayorethes ñeñthes echeneꞌ ora allpon ñeñth eꞌñe sokpa. Sapaꞌ ñeñtheschaꞌña atarr llekëñtsoꞌtsaꞌyenes tharroꞌmar esempopaꞌ wañerrchaꞌ ñeñth sokshateneꞌ.

San Juan 16:24

Sa themeꞌttsenpaꞌ ama es senamoeno eꞌñe seyemteñothen na eꞌñe nesoꞌchño. Theꞌña ñerraꞌm senampaꞌ sagaphchaꞌ allochñapaꞌ oꞌch soksha eꞌñe poktakma.

Efesios 6:18

Ñamha sapaꞌ xhokmoepaꞌch semaꞌyochena amaꞌt errothenoꞌtsensa. Añchaꞌña seyenpoeneꞌ Parets Poekamkëñ. Allochñapaꞌ atthochña xhokma semaꞌyoxhrena maꞌyochatsa. Oꞌch senamh Yompor ora allpon ñeñth sepalltena, ñamha xhokmoepaꞌchña eꞌñe semaꞌyochampesweña allowen ñeñth poeyochreshaꞌ pen Parets.

1 Tesalonicenses 5:17

Ñamha xhokmoepaꞌchña semaꞌyochena.

Santiago 4:6

Ñeñthoꞌmarña Yomporpaꞌ xhokmach moeneñ oꞌch awamenkath phaꞌy atthoch amach alla yepsere ña. Ñeñthoꞌmar amaꞌt Yompor poꞌñoñopaꞌ eꞌñe anwareth awathotheñ ñeñthpaꞌ ateth oten: “Yomporpaꞌ amach errothenoth yenpano ñeñth eꞌñe kowen entetsa ñañeña, amachña Yomporeyeꞌ ameꞌñeno. Ñeñthoꞌmarña Yomporpaꞌ añach nanak yenpoen ñeñth eꞌñe poeñmañeshaꞌ ameꞌñenaya ña.”