San Mateo 3:2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho2 Allñapaꞌ ateth otosanet: —Theꞌpaꞌ oꞌch sokthapeꞌcherr ello kowen Yomporekop tharroꞌmar oꞌ xhapmoch allempoch ayochreshathterra Yompor ñeñth poeꞌntañoꞌtsen. Faic an caibideil |
San Mateo 3:2
61 Iomraidhean Croise
Tharroꞌmar awath allempo serrpareꞌtataneꞌth Jonás nínivoꞌmarneshaꞌ, ñetñapaꞌ allempokma kothapeꞌcherret eꞌñe kowen Yomporekop. Theꞌña arr seshopaꞌ alloꞌtsenen na ñeñthen ello metaneneꞌ ñeñth ateth serrpareꞌtateꞌth Jonás. Tharraña sañapaꞌ amaña sokthapeꞌchenoña ello kowen Yomporekop. Ñeñthoꞌmarña esempowañen allempoch akrarethetwerra allowen acheñeneshaꞌ ñeñthña nínivoꞌmarneshaꞌ ñeñth eꞌñe kowen kothapeꞌcherrets Yomporekop awath, ñetpaꞌxhoꞌña orrterretchaꞌ, ñeñthchaꞌña señotaterreꞌña sapaꞌ amaꞌt mameshapaꞌ ama pokteyayeña ñeñth ateth sephaꞌyeseꞌth tharroꞌmar ama sokthapeꞌcherro ello kowen Yomporekop.
Jesúsñapaꞌ ateth oterraneterr: —Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ñeñth ateth penaña Yompor poꞌkowenña attho ayochreshathtena ña poeꞌntañoth. Tharraña poꞌpotantañexhnoñapaꞌ ñeñth attha es poexhaꞌyetsa, ñokpoetñapaꞌ amach errothenoth eñoterrñañeto Yompor poꞌkowenña.
Allempoña Jesúspaꞌ alla oterraneterr: —Añ Yompor poꞌkowenña ñeñth attho ayochreshathtena ña poeꞌntañoth, ñanompaꞌ eꞌñech poesheñaꞌttsa ameꞌñaꞌyestsa. Allempotheññapaꞌ alloꞌnach sen atonetnomtsa ñeñthchaꞌ ameꞌñerrtsa atthochña eꞌñe epaꞌwerra errakmañen Yompor poꞌkowenña. Ñeñthpaꞌ añ tomaꞌntaterraneterr mostazllomh: —Ñeñthña poeꞌllomhrethollpaꞌ poesheñarrñapaꞌ oꞌ anemh paꞌmro allchaꞌ nareꞌteñaꞌ.
Jesúspaꞌ alla serrpareꞌtaterraneterr elloneth ñeñth ateth pena Yompor poꞌkowenña ñeñth attho atarr ayochreshathtena ña poeꞌntañoth. Ñeñthpaꞌ amaꞌtchaꞌ añetholla ñeñthchaꞌ ñanom orrtatsa tharraña eꞌñe ña poꞌwamenkoth mamethollapaꞌ oꞌch eꞌñe epaꞌwa ora errapharen. Ñeñthpaꞌ añ tomaꞌntaterraneterr ateth pena chaseꞌ: —Ñeñth chaseꞌpaꞌ allo tsetenan koyaneshaꞌ harinaꞌ ñeñth oñetsetstaten atthoch aꞌchasatan harinaꞌ eshekchaꞌ eꞌñe aꞌmoesatwe. Ñeñthña chaseꞌpaꞌ amaꞌtchaꞌ añetholla net, amaꞌtchaꞌ aton harinaꞌ ñeñth maꞌpa arroga, mamethollapaꞌ oꞌch eꞌñe aꞌmoesatwanña amaꞌt atarr aton harinaꞌ.
Allempoñapaꞌ ateth otanet: —Ñeñthoꞌmarña amaꞌt allowen erraꞌtsen ñeñth atarr etsoteneꞌ ñoñets ñeñth ateth anareth awathotheñ, ñerraꞌm elloña ayxhatarethtet ñamet ñeñth ateth pena Yompor poꞌkowenña attho atarr ayochreshathtena ña, ñeñthña acheñer atarrchaꞌ kowen orrtatenan kothaphñats ñeñth awathotheñ, elloña kowenchaꞌ orrtaterran ñamha ñeñth eꞌñe etserra kothaphñats. Eꞌñech ateth pena ñerraꞌmrratheꞌ ñeñth apakllatheshaꞌ. All aññoꞌtyenan ñeñth atarr morrentena errothenopaꞌ oꞌch orrtatenan ñeñth errteꞌ aññoꞌten all; errothenoñapaꞌ oꞌch orrtatyenan ñamha ñeñth aññoꞌten awathotheñ all paꞌpakllo.
‘Atarr nanak llekëñtsoꞌtsenes fariseoneshachaꞌ ñamha samha ñeñthes eꞌñe etsotayenayeñ ñoñets ñeñth ateth anareth judioneshakop tharroꞌmar sapaꞌ sommoꞌcheñotheꞌna atarr seshkareꞌtyen. Tharroꞌmar amaꞌt sapaꞌ amakaꞌye senteññañeña Yompor poꞌkowenña, ellonethpaꞌxhoꞌña xhokma sepatareꞌteñña poꞌpotantañ ñeñth eꞌneneꞌ Yompor poꞌkowenña. Xha saꞌnpampeñña acheñeneshaꞌ atthoch ñetpaꞌxhoꞌña amach enterrñañeto Yompor poꞌkowenña ñeñth attho atarr ayochreshathtena ña poeꞌntañoth.
Jesúsñapaꞌ alla yexhaterraneterr, ñeñthpaꞌ ateth otanet: —Allempoch amhchaꞌtarethterra Yompor ñeñth poeꞌntañoꞌtsen allempoch nowerra na, ñeñthña allempopaꞌ atethchaꞌ perra eꞌñech ateth ñerraꞌmrratheꞌ xharrasheña shopshareꞌ ñeñthchaꞌ tatsa allchaꞌ kowoset allempoch werranet ñeñth eꞌñe errteꞌ senaꞌtetsa. Ñetñapaꞌ anomyeset poꞌlampareñ alloch poktapoeñet ñerraꞌm esempoch werra.
Jesúsñapaꞌ alla yexhaterraneterr poꞌpoñ, ñeñthpaꞌ ateth oterraneterr: —Allempoch amhchaꞌtarethterra Yompor ñeñth poeꞌntañoꞌtsen allempoch nowerra na, ñeñthña allempopaꞌ eꞌñech ateth perra ñerraꞌmrratheꞌ poesheñarr yakma oꞌch awoꞌ bhaxhayo. Ñeñthña yakmarpaꞌ oꞌch agotnoman paꞌtarwasañreneshaꞌpaꞌ oꞌch apaꞌyesnomanet kelle ñeñth allpon echen; ñetñapaꞌ oꞌch kowamphsoñet tharrempowach esempowañenchaꞌ werra.
Eꞌñe ateth anwareth awathotheñpaꞌ ñeñthñapaꞌ eꞌñexhoꞌ ateth perra allempo orrtosa Juan ñeñth apatoseꞌ acheñeneshaꞌ Yomporekop. Ñapaꞌ alla orrta amayo allña serrpareꞌtatosanña acheñeneshaꞌ. Ñeñthpaꞌ ateth otosanet: —Theꞌpa oꞌch sokthapeꞌcherr ello kowen Yomporekop allochñapaꞌ eꞌñech kowen sapatarethterra eꞌñe sameꞌñeñoth Yompor. Atthochña Yomporpaꞌ oꞌch peretnaꞌwerrnas soꞌchñar.
Ñeñthoꞌmarña theꞌpaꞌ notenes: Yamoꞌmteꞌ ñeñth poeꞌtañoꞌtsen atthekmach atarr nanak kosherrana amaꞌt poesheñarra acheñ ñeñth atarr ochñath ñerraꞌm esempoch oꞌch kothapeꞌcherret ello eꞌñe kowen ñokop. Elloch metanaꞌtwerran ñeñth attho koshenana poꞌpotantañ ñeñth shonteꞌ ñeñth eꞌñe pokteꞌ es phaꞌyenet ñokop amaꞌt ñetpaꞌ shontet ateth ñerraꞌm noventa nueve carnero ñamha ñetpaꞌ amaꞌt ama pallteneto oꞌch kothapeꞌcherret ello kowen.
Ñeñtha otwapaꞌ allempoñapaꞌ alla momaꞌwet allowenet. Allempoñapaꞌ oꞌ ayeꞌchoxhtatoñet Yompor, ateth otet: —Amaꞌt poꞌpoñ acheñ ñeñth ama judioneshayaye Yomporpaꞌ moeneñ oꞌch kothapeꞌcherret ello kowen alloch ñetpaꞌxhoꞌña korretsetach poksheñeshokmañen eꞌñe thayotheñ errponañowen. Allowa ñeñth ateth pha Pedro ñamha Cornelio.
Pedroñapaꞌ ateth otanet: —Theꞌpaꞌ aña poktetsa ñeñthchaꞌ seperra allowenes. Theꞌ sellkëñoth oꞌch sokthapeꞌcherr ello kowen Yomporekop. Allochñapaꞌ Yomporpaꞌ peretnaꞌwerrnaschaꞌ soꞌchñar. Eꞌñe sameꞌñeñoth Jesucristo añ pokteꞌ theꞌ oꞌch sapatarethterra Partsokop. Allochñapaꞌ Paretspaꞌ chorraterrsach Poekamkëñ.
Ñanompaꞌ oꞌ neserrpareꞌtatanet Damasco atthoch kothapeꞌcherret ello kowen Yomporekop. Allochñapaꞌ oꞌch phaꞌyenet ñeñth kowentetsa Yomporekop, atthoch yeñoch poꞌñoxh oꞌ kothapeꞌcherret etserra. Atthekma neserrpareꞌtatanet amaꞌt Jerusaléño, ñamha ora errakmañen Judeoꞌmar, amaꞌt ñamha alloꞌtsaꞌyen ñeñth ama judioneshayaye.
Tharroꞌmar ñerraꞌm esempo ateth yenteñ Yomporña ateth yellkateneꞌ ñeñthpaꞌ eꞌñech pokteꞌ yenteñ tharroꞌmar ñeñthpaꞌ alloch yokthapeꞌcherr kowen ñokop, allochñapaꞌ atthochña yekeshperra. Tharraña attho yellkëna arr patsro, ama Yomporekpayeꞌ yellkëno ñeñthpaꞌ ñeñthña alloꞌna aneney rromoeñtso, allchaꞌ yechenkërra poktakma.
Ñamha añ pokteꞌ oꞌch alla yokthapeꞌchater kowen ñeñth yeꞌmoñeꞌteneꞌ. Tharraña eꞌñech akopha yokthapeꞌchatyerranet eꞌñe kowen. Ñamha oꞌch yekwenanet eꞌñe akopha esempowañenchaꞌ xhapanet poeyoxhro ñeñth eꞌñe poꞌñoxh kowen enten Yompor. Ñamha oꞌch yekwenanet esempowañenchaꞌ kothapeꞌcherret ello eꞌñe kowen Yomporekop.
Alloꞌnepaꞌch yesen eꞌñe yexhaꞌnmoeꞌ Yompor pokthaphña amaꞌt ñeñth atarr echarr. Allochñapaꞌ yepeñoth ateth moenen ñapaꞌ eꞌñech poꞌn enteneyña Yompor. Ñewa, sapaꞌ oꞌ eꞌñe seyxherr ñeñth ñenmath yexhataset Cristokop, atthoch sekexhpaꞌwerrña ñeñth ateth seyexhkatyeseñ ñeñth ama aꞌkeshphatañeyaye. Añkaꞌyeña oꞌ ello sokthapeꞌcherr kowen Yomporekop xhokaꞌyeña oꞌ sameꞌñera. Oꞌ señoterr ñamha ñeñth ateth yapatarethtena Yomporekop, ñamha attho xhokma yenen yot ñesheto ñeñth ameꞌñatsa. Ñamha oꞌ saꞌyxhatarethterra atthoch yetanterra ñamha atthoch esempowañenpaꞌ yaꞌkrarethterrach alloweney errothenchaꞌ entyeswerrey Yompor, ñatoꞌ kowentheꞌ yephaꞌyen, ñatoꞌ amatheꞌ kowenayeꞌ yepeno. Ñeñth oꞌ yexhatwanmaset awañotheñ Cristokoppaꞌ amachña ñeñthaña alla seserrpareꞌtameꞌterreꞌthe. Añchaꞌña alloꞌnepaꞌchña yesen eñotnomoeꞌ poꞌpoñexhno Yompor pokthaphña ñerraꞌm Yomporchaꞌ yemnateꞌ.
Poesheñaꞌtets acheñpaꞌ otenet oꞌ meten shonteꞌ char amoꞌ werro. Tharraña yapaꞌ yeñoteñ Yepartseshar xhokmach aꞌpoktatan poꞌñoñ oꞌch werra. Yapaꞌ yeñoteñ tharroꞌmar amoꞌ werro añ kowen ñatoꞌ esempoch oꞌch yokthapeꞌchwerr ello kowen Yomporekop alloweney. Ñapaꞌ nanak moerenya ama moeno amaꞌt eseshapaꞌ oꞌch chenkërra.
Theꞌpaꞌ oꞌch notas, oꞌch seyerpoerra attho awañmoꞌcha nanak kowen semorrentenna. Theꞌpaꞌ ama attheyeꞌ sepeno. Añ pokteꞌ oꞌch alla sokthapeꞌcherr eꞌñe kowen atthoch oꞌch alla seperra kowen ñeñth ateth sepha allempo eꞌñe ñenmath sameꞌñenna. Ñerraꞌm amach ello sokthapeꞌcherro kowen napaꞌ thayekma oꞌch awen oꞌch neprratamperres ñeñth atmaꞌntatareth sokop ñeñthara ñeñth all orratenet werare.
Sanasan