San Lucas 8:13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹³ Ñamha ñeñth xhapyesets mapoetroꞌmesoꞌmarpaꞌ ñeñthpaꞌ añ notenes acheñeneshaꞌ ñerraꞌm esempo eꞌmhñoteññañet Yompor poꞌñoñ eꞌñech poksheñeshaꞌ agërrñañetañ Yompor poꞌñoñ. Eꞌñech kowen ameꞌñeretañ tharraña ñetpaꞌ mamekpach ateth pet. Tharroꞌmar ñetpaꞌ ateth penet ñerraꞌmrratheꞌ narmets ñeñth chepoets mapyo amach eñalle poerexh. Tsapathonethña ñerraꞌm oꞌch wapanet topateñets, ñetñapaꞌ oꞌch alla kaxhpoerrñañet Yompor poꞌñoñ.

San Lucas 8:13 Iomraidhean Croise

San Marcos 6:20

Tharroꞌmar Herodespaꞌ mechaꞌnaꞌtaneꞌth Juan, eñocheꞌth ñapaꞌ eꞌñe pokteꞌ es phaꞌyeseꞌth. Eñocheꞌth ñapaꞌ añekpaꞌna atarr thorrena Partsokop. Ñeñthoꞌmareꞌnaña eꞌñe kowen kowamphsacheꞌth allochñapaꞌ amach moetseto. Allempo eꞌmhñotenan Juan attho serrpareꞌteꞌth atarr kowen enteñeñ, tharraña ama eꞌñeyeꞌ eñotenanoña ñeñth ateth kothapeꞌchateñ Juan eꞌñe kowen.

San Lucas 8:12

Añ poerets ñeñth xhapyesets thoñoꞌmar ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ. Allempo eꞌmhñotwetpaꞌ allorokmach wapa oneñeth oꞌch alla poerratamperranet Yompor poꞌñoñ poeyoxhretoth. Atthoña amach moeneñeto oꞌch ameꞌñenet, atthochña ñetpaꞌ amach aꞌkeshphatarethterreto.

San Lucas 8:14

Ñamha poerets ñeñth xhapyesets ajmoꞌmar, ñeñthpaꞌ añ netmaꞌntatena poꞌpotantañ acheñeneshaꞌ ñeñth eꞌmhñotenayeñ Yompor poꞌñoñ. Amaꞌtchaꞌ xhapanetañ mameꞌ poeyoxhreto, tharraña ñetpaꞌ alloꞌnach senet aña atarr kothapeꞌchenet ñeñth llekaꞌyenet arr patsro ñeñth eꞌñe ñokpoeta. Añach moenenet oꞌch esokmañen es echyenet atthoch allo eꞌñe koshaꞌyenet. Atthoña ñetpaꞌ amach errothenoth orrtatoñeto ñeñth atarr sherbets Yomporekop. Ñetpaꞌ eꞌñe attheta ñerraꞌm narmets ñeñth xha kaꞌmatwerr ajmaꞌ amach errothenoth ellomhreꞌtyeseto.

San Juan 15:2

Sa ñeñthes neyemtenaya na sapaꞌ atthes ñerraꞌmrratheꞌ uvachmoꞌr poetakër. Allowen poetakër erraꞌtsen ñeñth ama meꞌtetso, Nomporñapaꞌ xhochña pechamphsoñ poetakër. Ñamha allowen ñeñth meꞌtetspaꞌ xhochña pechtakreꞌtyeset mameshaꞌtets atthoch eꞌñe kowen eꞌshtakreꞌchet allochñapaꞌ atthoch atarrchaꞌ nanak meꞌten.

San Juan 15:6

Eseshaꞌch ama neparrokmaterraye awaporeꞌtarethchaꞌ ateth ñerraꞌmrratheꞌ tsachtakër ñeñth ama meꞌtetso xhochña pechaꞌtamphsetña poetakër oꞌch eꞌñe porrarrkeꞌchwa allempochña aꞌyapaxhetpaꞌ oꞌch chamoet tso allchaꞌ poywa.

San Juan 5:35

Juanpaꞌ eꞌñe ateth peꞌth ñerraꞌmrratheꞌ lampareñ korretsa, atthoña xhoyoꞌteꞌth. Sañapaꞌ sa moenatseꞌth oꞌch sokshameꞌta mameꞌ all aꞌpoetarsamphsas.

1 Corintios 13:2

Ñamha amaꞌt yapaꞌ yeñotatset aꞌmhteꞌ Yompor poꞌñoñ, tharraña ñerraꞌm ama yemorreñcho yamoꞌts, atethpaꞌ amach esoyeꞌ entenye. Ñamha amaꞌt yeñotatset oꞌch yaꞌpotha ñeñth ñaptha eñoten Yompor tharraña ñerraꞌm ama yemorreñcho yamoꞌtspaꞌ ñeñthpaꞌxhoꞌña amach esoyeꞌ entenye Yompor. Ñamha amaꞌt yeñotatset ora allpon ñeñth eñall, tharraña ñerraꞌm ama yemorreñcho yamoꞌts, ñeñthpaꞌxhoꞌña amach esoyeꞌ entenye Yompor. Ñamha ñatoꞌ nanak yeyemteñoth Yomporpaꞌ apweney allowen ñeñth yenamoeñ, amaꞌt ñeñth echarr yentyen. Ñatoꞌ oꞌch netmaꞌntacha ateth: Ñatoꞌ oꞌch yoch Yompor, añ aspenethpaꞌ chenkëpaꞌ. Ñatoꞌ eꞌñe yeyemteñoth Yomporpaꞌ oꞌchxhoꞌ chenka. Tharraña amaꞌt yeyemteñoth Yomporpaꞌ oꞌ yephowa ateth, tharraña ñerraꞌm ama yemorreñcho yamoꞌtspaꞌ atthekma enteney Yompor, ama esoyayye.

1 Corintios 15:2

Ñamha ñeñthara ñoñets allo oꞌ saꞌkeshphatarethterra ñerraꞌm amach sekexhpoere, tharraña ñatoꞌ poꞌñoxhpaꞌ ama xhoyeꞌ sameꞌñeno.

Gálatas 3:1

Sapaꞌ nanak, galacioꞌmarneshachaꞌ, sepanteñ. Poꞌñoxh sa oꞌkaꞌye xha shekaset atthoña theꞌ sapaꞌ oꞌwañ sameꞌñenaña ñeñth eꞌñe poꞌñoxh alloch yekeshperra. Amaꞌt awaña allempo yeserrpareꞌtatensaꞌpaꞌ yapaꞌ añ yeñotatwas attho poꞌñoxh Jesucristopaꞌ oꞌ akorsoꞌtamphsarethta eꞌñe yokop. Ñeñthña poꞌñoxh sameꞌñaña sa allempo.

Gálatas 3:4

Eꞌñewachñakaꞌ orrena atarr semoeroxhetyesa. Poꞌñoxh ñatoꞌ ñeñthpaꞌ amatheꞌ eꞌñe orrenayaye ñerraꞌm oꞌch alla sokthapeꞌcherr kowen.

Efesios 3:17

Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

Colosenses 1:23

Ñerraꞌm poꞌñoxh xhokmach sameꞌñera Cristo, ñerraꞌm eꞌñech womenk seperr seyoxher atthochña sapaꞌ amach sepoerrerro. Kowen ñoñets ñeñth oꞌ seꞌmwa alloch yekeshperra ñerraꞌm amach xha saꞌypoꞌñampere ñeñth oꞌ seyemterra Yomporñapaꞌ enterreschaꞌ oꞌ eꞌñe saꞌkowentatarethterra. Añ kowen ñoñets ñeñth oꞌ seꞌmareꞌtwa sa, theꞌñapaꞌ aserrpareꞌtatarethterrach ñamha allowen ñeñth korraꞌyetsa añe patsro. Ñeñthoꞌmarña na ñeñthen Pablon nach sherberrets theꞌñapaꞌ nach serrpareꞌtaterrawet.

Colosenses 2:7

Atthochña sapaꞌ eꞌñech womenk serrmoerrñañ poꞌñoñ ateth ñerraꞌmrratheꞌ tsachrexh atarr womenk rromoenan pats, eꞌñe separrokmateñoth epaspaꞌ alloꞌnepaꞌchña atonetnomaña ñeñth attho sameꞌñena. Eꞌñe sameꞌñeñothpaꞌ womenkëpaꞌchña sephaꞌyesnom seyoxher. Attherepaꞌchña alloꞌna sesen ñeñth ateth yexhatyenes. Ñamha xhokmoepaꞌchña separasyosoꞌchña Yompor.

1 Tesalonicenses 3:5

Ñeñthoꞌmarña awaña allempo oꞌwañ naꞌwantaꞌ ñeñth attho nellkënsa naña allempo nemñe masheñ Timoteo atthoch neñotas sapaꞌ errothenestheꞌña sa, ñatoꞌ attheratheꞌ sesen ameꞌñaya Yompor. Napaꞌ nellkëñothpaꞌ ateth noten ñatoꞌrraña oneñeth poetpateñothes oꞌtheꞌ xha kexhpaterres Yompor. Ñerraꞌm ateth seperra napaꞌ ateth noten ñeñth attho nethorrena eꞌñe sokoppaꞌ ñatoꞌrraña ñeñthpaꞌ eꞌñetheꞌ orrena.

Hebreos 10:39

Tharraña yapaꞌ ama attheyayye ñerraꞌmrratheꞌ ñeñthchaꞌ poerramperraya Yompor ñeñthchaꞌ chenkërrtsa. Yapaꞌ añeykaꞌyeña ñeñtheychaꞌ xhokma yemterraya Yompor ñeñtheychaꞌ aꞌkeshphatarethterrtsa eꞌñe yekamkëñowen.

Santiago 2:26

Ñeñthoꞌmarña theꞌpaꞌ yeñoteñ amaꞌt errpon yotatset yapaꞌ eꞌñe kowen yameꞌñena, tharraña ñerraꞌm ama yorrtateno ñeñth poktetsa Yomporekoppaꞌ amatheꞌ eso yesherbeña Yompor. Ñatoꞌ oꞌch netmaꞌntacha ateth. Alloweneypaꞌ eꞌñe yeñotweñ ñerraꞌm esempo yeñch yamoꞌts oꞌ rromapaꞌ oꞌch yeñoch ñeñthpaꞌ oꞌ saꞌnemh poekamkëñ tharroꞌmar ñerraꞌm ñeñthoꞌ oꞌ yerromapaꞌ añ yechetspaꞌ amach es sherberreꞌthe.

2 San Pedro 2:20

Atthekma ñerraꞌm ya. Oꞌ yeñotwer Yepartseshar Jesucristo, ñeñthara Yaꞌkeshphatañer yepen. Yeparrokmateñoth Cristo oꞌ yeswanom sosyaꞌtsañ. Tharraña ñerraꞌm yoꞌchñarpaꞌ alla aꞌpsaterrey Yompor poꞌñoñpaꞌ yañapaꞌ elloña nanakchaꞌ yoroxhenoꞌtseney.

2 San Pedro 2:22

Yapaꞌ poꞌñoxh ñerraꞌm oꞌch alla yepoerrerra xha yottena ñerraꞌmrratheꞌ ochek. Yapaꞌ oꞌch alla yepoerrerra “ateth ñerraꞌm ochek oꞌch aꞌtatsta; oꞌch aꞌtatsetwapaꞌ thematenpaꞌ oꞌch alla poerrerra alloꞌtsen paꞌtatsña.” Amapaꞌ xha yottena ñerraꞌm ateth pena ñamha chañcho. “Chañchopaꞌ oꞌch apa; oꞌchña apwapaꞌ oꞌchxhoꞌ alla poerrerra atstso allchaꞌ eꞌyaphnaꞌtwerra oꞌch alla atsotseñeꞌchwerr.” Amaꞌt awathotheñ ateth oteteꞌth ateth pena ochek, ñamha ateth pena chañcho.

1 San Juan 2:19

Amaꞌt awañmoꞌcha eꞌñe parrokma yapxhañeꞌth ñetña theꞌpaꞌ oꞌ awanmoet elloneth oꞌ sowanerryet tharroꞌmar poꞌñoxhpaꞌ ama allowenakmayeꞌ yeparrokmaterro. Ñerraꞌm poꞌñoxhchaꞌ allowenakmay yeparrokmaterreñ allempoña ñetpaꞌ alloꞌtsaꞌyenetañatheꞌ ñamet yesho. Tharraña theꞌña ñetpaꞌ oꞌ awanerret elloneth atthoña oꞌ yeñoterranet poꞌñoxhpaꞌ ama allowenakmayeꞌ yeparrokmaterro.

San Judas 1:12

Ñeñthña ashkañneshaꞌpaꞌ sapaꞌ ñeñthña sepenknaꞌntateneꞌ allempo sapxhena oꞌch serratallmeꞌchannena ñeñthes ameꞌñenaya Yompor. Sapaꞌ serratallmeꞌchannena eꞌñe semorrentannaꞌteñoth, tharraña ñetpaꞌ atthach nanak rratseꞌtyenet amach ayetñathteneto amach kowaꞌpeñetoña ñamha poꞌpsheñeñ ñeñth cheporretsa ñeñth moenets oꞌch rraꞌ ñamha. Ñetpaꞌ eꞌñe ateth penetañ ñerraꞌmrratheꞌ ñeñth kowampenayeñ carnero ñeñthchaꞌ rratenayeñ tharraña amachña carneroyeꞌña rrateno, ñeñthapaꞌ ñañeñetach atarr rretset. Ñetpaꞌ ama es sherbeneto eꞌñe attha penet ateth ñerraꞌmrratheꞌ os ñeñth ama watetso atthach matateñ mhorr. Ñamha eꞌñe atthet ñerraꞌmrratheꞌ narmetsoch ñeñth ama ameꞌtño, amaꞌtchaꞌ xhen poemeꞌteñporopaꞌ amach meꞌteno. Ñamha ñeñthña narmetsocherpaꞌ eꞌñech ateth pena ñerraꞌmrratheꞌ rromoech oꞌch yaꞌmare ora poerxhowenpaꞌ oꞌch eꞌñe poetsowa oꞌch wañ. Ñeñthña amaꞌt mameshapaꞌ amach es sherberrye.