San Lucas 8:11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹¹ ‘Ñewa, ñeñth ateth netmaꞌntatasa ñorraꞌpaꞌ ñeñthpaꞌ ateth notenes: Ñeñth aꞌparreꞌtyeneꞌ poerets, ñeñth poeretspaꞌ añ notenes Yompor poꞌñoñ allempo serrpareꞌteñet.

San Lucas 8:11 Iomraidhean Croise

San Mateo 13:18

Jesúsñapaꞌ alla oterranerr poeyochreshaꞌ: —Ñeñthoꞌmarña theꞌ sapaꞌ seꞌmhñoten oꞌch neñotatas ñeñth ateth yexhateney ñeñth ateth oꞌ netmaꞌntatwa ateth ñerraꞌmrratheꞌ poesheñarr ñeñth aꞌparreneꞌ poerets.

San Mateo 13:19

Ñewa, añ poerets ñeñth xhapyesets thoñoꞌmar, ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ ñeñth attho ayochreshathtena ña. Amaꞌt eꞌmhñotenetañ tharraña ama xhenaneto poeyoxhreto ñeñth poꞌñoxh ateth oteney Yompor. Ñeñthoꞌmar allorokmach wapa oneñethpaꞌ oꞌch alla poerratamperranet Yompor poꞌñoñ eꞌñe poeyoxhretoth.

San Marcos 4:13

Jesúsñapaꞌ alla oterraneterr: —Sapaꞌ amaꞌt mameshapaꞌ areꞌt señotenoña ñeñth oꞌ netmaꞌntatwasa ñorraꞌ. Ñerraꞌm ama xhennaso seyoxhro ñeñth oꞌ netmaꞌntatwasa ñorraꞌpaꞌ errothenotwachñakaꞌyeña xhaponasaña seyoxhro allowen poꞌpoñexhno ñeñthchaꞌ netmaꞌntaterrserr tsapathoneth.

San Lucas 8:12

Añ poerets ñeñth xhapyesets thoñoꞌmar ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ. Allempo eꞌmhñotwetpaꞌ allorokmach wapa oneñeth oꞌch alla poerratamperranet Yompor poꞌñoñ poeyoxhretoth. Atthoña amach moeneñeto oꞌch ameꞌñenet, atthochña ñetpaꞌ amach aꞌkeshphatarethterreto.

Santiago 1:21

Ñeñthoꞌmarña sapaꞌ oꞌch sekexhpaꞌwerr sosyaꞌtsañ ora allowen ñeñth shonteꞌ sephaꞌyen ñeñth ama pokteyaye Yomporekop. Añchaꞌña sapaꞌ oꞌch sagapoñ Yompor poꞌñoñ eꞌñe señmañeshaꞌ. Tharroꞌmar ñerraꞌm oꞌch xhaponaya Yompor poꞌñoñ eꞌñe yeyoxhropaꞌ ñeñthpaꞌ ñeñthchaꞌ yaꞌkeshphaterreꞌ esempowañen yekamkëñoth.