San Lucas 6:29 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁹ Newa, ateth ñerraꞌm esempo eseshaꞌ poeꞌmoñeꞌteñothetas oꞌch takllaset setsaꞌpo, sañapaꞌ poktepaꞌchña señch takllerrserrepaꞌ ñamha poꞌpshemhtañoth. Ñamha ñerraꞌm esempo eseshaꞌ seprratamphseꞌ seshtam, sañapaꞌ poktepaꞌchña señch poerratamphsasetepaꞌ seshtam ñeñth moenenet amaꞌt ñamha poꞌpmañ seshtam allo sepmatena.

San Lucas 6:29 Iomraidhean Croise

San Mateo 26:67

Allempoñapaꞌ aꞌkoshareꞌtyeset eꞌñe paꞌklloyoth, xhoꞌña xhotaꞌtyeset; poꞌpotantañexhnoñapaꞌ takllapechyeset.

San Lucas 22:64

Wankaklleꞌcheñet, pachmhareꞌteñothetpaꞌ ateth oteñet: —Ñewa, theꞌña eñoratenperrepaꞌ Parets allochñapaꞌ atthoch photey eseshaꞌtheꞌña pexhotaꞌtyeneꞌ.

San Lucas 6:30

Ñerraꞌm eseshaꞌ es senamoeneꞌ sañapaꞌ sapepaꞌch amaꞌt esesha. Ñamha ñerraꞌm eseshaꞌ seyoratsreꞌtamphseꞌ sañapaꞌ amach alla senamatstere apoerrsetepaꞌ alla.

San Juan 18:22

Allempoña ateth otwanet Jesúspaꞌ poesheñarrña guardia ñeñth allameꞌttsoꞌtsenapaꞌ ñañapaꞌ allentha taklleꞌ, ateth och: —Amarramcheꞌ attheyeꞌ yanapoeñeña korneshaꞌ ñeñth nanak amhchaꞌtareth.

Los Hechos 23:2

Añña korneshaꞌ Ananías ñeñthara ñeñth nanak amhchaꞌtarethpaꞌ ateth otan ñeñth thets eꞌñe allameꞌtets Pablesho, ateth otanet: —Xhosañakaꞌye asnamaꞌteꞌ.

1 Corintios 4:11

Yañapaꞌ themeꞌttsen yemoeroxhtena amaꞌt yachporrñoth, yoꞌñpañotheꞌna yemoeroxhtena ñamha yemoelleñotheꞌna. Attha epayeꞌ atserrpenyet, ñamha ama yecheno allchaꞌ yeyxha.

1 Corintios 6:7

Tharraña ñeñthpaꞌ ama pokteyaye amaꞌt mamesha oꞌch setmantannena. Tharroꞌmar ñerraꞌm xhokma yetmantannenapaꞌ ñeñthpaꞌ ama añeyeꞌ yepeno ateth moenen Yompor. Añña ñerraꞌm esempo erroth phonas poꞌpsheñeñpaꞌ esoꞌmareꞌtña amaña alla saꞌwantannenoña ñeñth attho erroth es sephannaꞌtyena. Ñamha ñerraꞌm esempo es poerratampensetpaꞌ esoꞌmareꞌtña amaña alla saꞌwantenaneto. Añ poktetsa oꞌch alla yaꞌwantenanet alla.

2 Corintios 11:20

Amaꞌt ñet attho pomnaren penset, sañapaꞌ eꞌñech pokteꞌ senteñ. Amaꞌt es poerratamphsaset ñeñth allpon sechyen, sañapaꞌ eꞌñech pokteꞌ senteñ. Amaꞌt paꞌnamenoth shekareꞌtenset, sañapaꞌ eꞌñech pokteꞌ senteñ. Amaꞌt atarr poetsenaꞌteñothetaspaꞌ sañapaꞌ eꞌñech pomnaren sephatena. Ñerraꞌm esempo amaꞌt xho takllapechenset, sañapaꞌ eꞌñech pokteꞌ senteñ attho atarr penknaꞌntatenset.

Hebreos 10:34

Poꞌñoxh ñeñth arrmanatarethtatseꞌth oꞌch ayottamphsarethtet, sañapaꞌ eꞌñe sellkapreteñothanetpaꞌ xhokmach eꞌñe kowen seyenpoenanet. Amaꞌt allempo poerratamphsatsreꞌtaseꞌth ñeñth seꞌmoñeꞌtyesayeꞌth, sañapaꞌ eꞌñech soksheñeshaꞌ saꞌwantenanet. Tharroꞌmar sapaꞌ señoteñ oꞌ secherr ento ñeñth atarr sherbets ñeñth ello metanaꞌtweneꞌ attho sherbenes sechatser, tharroꞌmar ñeñthpaꞌ ama aptsaño.