San Lucas 6:27 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁷ ‘Sa ñeñthes neꞌmhñoteneꞌ oꞌch notas ñeñthchaꞌ ateth sepha eꞌñe kowen, semoeryach amaꞌt ñeñth seꞌmoñeꞌteneꞌ. Oꞌch ateth sepeꞌ eꞌñe kowen.

San Lucas 6:27 Iomraidhean Croise

San Marcos 4:24

Jesúspaꞌ alla oterraneterr: —Sapaꞌ señotenatheꞌ eꞌñetheꞌ poꞌñoxh kowen seꞌmhñoteññañ Yompor poꞌñoñ ñatoꞌpaꞌ amatheꞌ. Tharroꞌmar ñerraꞌm erroth sephoñ poꞌpsheñeñ ñeñth ama kowenayaye Yomporñapaꞌ atthekmach perres samha. Ñamha ñerraꞌm eꞌñe kowen sepenanet, Yomporñapaꞌ eꞌñech kowen perres samha amaꞌt elloneth oꞌch apoerres ñeñth eꞌñe kowen.

San Lucas 23:34

Eꞌñe allempo korsoꞌtamphsosetpaꞌ Jesúsñapaꞌ ateth maꞌyochamphsosana ñeñth eꞌmoñeꞌteneꞌ, ñeñthpaꞌ ateth ot: —Nomporchaꞌ theꞌpaꞌ pephretnanetepaꞌch tharroꞌmar ñetpaꞌ poꞌñoxhpaꞌ ama eñoteneto ñeñth atet yexhkatenet, ñeñth ama pokteyaye. Allempoña solltarneshaꞌpaꞌ yellsheñeꞌchatoñet paꞌshtam poꞌswertoth atthoch orrta poesheñaꞌtets ñeñthchaꞌ yorayeseꞌ poemaꞌtets.

San Lucas 6:22

‘Ñamha sapaꞌ atarr kosheñtsoꞌtsaꞌyenes ñerraꞌm esempo eꞌmoñeꞌtenset noꞌmar ñerraꞌm esempo moeñoꞌtenset, ñerraꞌm esempo poesasareꞌteñothetas sochatseꞌtenset tharroꞌmar sapaꞌ na sameꞌñena Ñeñthen Acheñetosets.

San Lucas 6:35

Tharraña napaꞌ oꞌch notas, sapaꞌ añeꞌnachña semorrentena amaꞌt ñeñth seꞌmoñeꞌteneꞌ. Ñamha sapaꞌ añeꞌnachña seyenpoen amaꞌt ñeñth ama seyenpoenaye. Ñamha sapaꞌ añeꞌnachña es saretyena amaꞌt ñeñthchaꞌ ama sapoerraye. Ñerraꞌm atethchaꞌ sepha Yomporñapaꞌ apoerreschaꞌ ello ñeñthchaꞌ atarr sokshatwerreꞌ. Ñapaꞌ allempoch eꞌñe poechemer perres, ñeñthara Yompor Ñeñth Nanak Parets. Tharroꞌmar ñapaꞌ añeꞌnaña moerena amaꞌt ñeñthchaꞌ ama koshaterraye ña, ñeñthara ñeñth ama kowenayeꞌ es petso.

San Lucas 8:15

Ñamha añ poerets ñeñth xhapyesets eꞌñe kowen patso ñeñth eꞌñe kowen cheparsatspaꞌ ñeñthña tomaꞌntenaya poꞌpotantañ acheñeneshaꞌ ñeñth eꞌmhñoteneꞌ Yompor poꞌñoñ. Ñetñapaꞌ attho ameꞌñeññañet Yompor poꞌñoñ amach poesereto xhoch eñochet poeyoxhreto atthoch eꞌñe kowen maꞌyoxhroñet Yompor poꞌñoñ. Xhokmach orrtatyenet ñeñth atarr sherbets Yomporekop amachña xha kaxhpoeñeto. Atthoña ñetpaꞌ eꞌñe ateth penet ñerraꞌm narmets ñeñth atarr aton ellomhreꞌtyets.

San Lucas 8:18

‘Ñeñthoꞌmarña sapaꞌ señotenatheꞌ eꞌñetheꞌ poꞌñoxh kowen seꞌmhñoteññañ Yompor poꞌñoñ ñatoꞌpaꞌ amatheꞌ. Eseshaꞌtheꞌ xhena poeyoxhro amaꞌt eꞌñe allpona Yompor poꞌñoñ, elloña Yomporpaꞌ alloꞌnach eñotatnenanet nanak shonteꞌ. Tharraña eseshaꞌña ñerraꞌm ama xhenaneto poeyoxhro tharroꞌmar ñetpaꞌ ama poꞌñoxhayeꞌ agëññañeto Yompor poꞌñoñ amaꞌt allpon eñotenetañ poeyoxhro ñeñthñapaꞌ xhach poerratamperranet Yompor.

San Lucas 8:8

Poꞌpotantañexhno ñeñthñapaꞌ arr xhapyes all eꞌñe kowen patso. Ñeñthñapaꞌ eꞌñe kowen chepares. Allempoña ateshaꞌtwapaꞌ atarr aton ellomhreꞌtyes. Poechaꞌtetspaꞌ xharroch xharraꞌ poeꞌllomer. Allempoña serrpareꞌtatwanet atethpaꞌ oꞌ alla oterraneterr. Eꞌñe womenkokma eñoranaꞌtanet, ateth otanet: —Ñeñthes poꞌñoxh neꞌmhñoteneꞌ, xhaponasepaꞌch seyoxhro ñeñth ateth netmaꞌntatensa añ ñoñets.

Los Hechos 10:38

Alla oterraneterr Pedro: —Señoteñtheꞌ Yomporpaꞌ oꞌ nan Poechemer Jesús ñeñth nazaretoꞌmarneshaꞌ. Oꞌ chorracha Parets Poekamkëñ ñamha nanak awamenkath peꞌ. Allothpaꞌ all chopeñeꞌchyeseꞌthpaꞌ nanak amoerañteꞌth. Aꞌkrratyesaneꞌth allowen ñeñth moeroxhtatyeseꞌth oneñeth, tharroꞌmar Pomporpaꞌ nanak yenpoeꞌth.

Los Hechos 16:28

Añña Pablopaꞌ oꞌ xhoreꞌch womenkpaꞌ ateth och: —Amach erroth pephatsto amaꞌt mamesha. Yapaꞌ alloꞌtsaꞌyenya alloweney.

Los Hechos 7:60

Allempoñapaꞌ konkorpa. Konkorpapaꞌ eñora womenk, ateth ot: —Amach Nepartseshare petsaꞌtatatstaneto. Allempoñapaꞌ ñeñtha otwapaꞌ oꞌ moechecha, oꞌ rroma.

Gálatas 6:10

Ñeñthoꞌmarña theꞌpaꞌ oꞌch notas: Xhokmach yeyenpaꞌyes allowen yamoꞌtseshaꞌ thayepaꞌtña orameñ atthoch yeyenpannaꞌta. Ñamha añña nanak kowen ñerraꞌm xho yeyenpoeñ yamoꞌts ñeñth parro oꞌ yameꞌñera Cristo.

1 Tesalonicenses 5:15

Ñamha sapaꞌ xhokmoepaꞌch eꞌñe kowen señotena allochñapaꞌ ñerraꞌm poꞌpsheñeñ erroth phonaspaꞌ sapaꞌ amaꞌt eꞌñe poesheñarrothesa amach setsaꞌtatatsche amaꞌt koñeꞌtha. Añchaꞌña eꞌñechña kowen sepeñ samoꞌts amaꞌt ñamha allowen poꞌpotantañ acheñeneshaꞌ.

3 San Juan 1:11

Ñewa, masheñe, phapaꞌ amach peyxhapretatsto ñeñth ateth pentapreten ñeñth ama pokteyaye. Phapaꞌ añchaꞌña peyxhaꞌ ñeñth pentapreten attho eꞌñe pokteꞌ es phaꞌyenet. Ñeñthoꞌmarña ateth noteneph tharroꞌmar erraꞌtsen ñeñth eꞌñe pokteꞌ es petspaꞌ ñeñthkaꞌyeña Yompor poeyochreshaꞌ; ñeñthña ama pokteyeꞌ es phaꞌyetso ñeñthña amaꞌt mameshapaꞌ ama eñotenanoña Yompor.