San Lucas 3:16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁶ Juanñapaꞌ ateth otanet: —Napaꞌ ama añeyayno ñeñth Cristotets, tharroꞌmar napaꞌ amaꞌt napatensoñ Yomporekop eꞌñe oñochaya napatenes. Tharraña Cristo ñeñthchaꞌ wapatsa chentaꞌpaꞌ ñapaꞌ añchaꞌña chorratossa Parets Poekamkëñ ñeñth ateth ñerraꞌm tsoꞌ. Ñapaꞌ ñeñth atarr awamenkatheshaꞌ, nañapaꞌ ama tama awamenkatheyayno. Ñapaꞌ ñeñthña atarr sherbets, nañapaꞌ ama es nesherbeno atthoch amaꞌt poꞌsapatrexhapaꞌ oꞌch nepyoñ.

San Lucas 3:16 Iomraidhean Croise

San Mateo 3:11

Elloña Juanpaꞌ ateth oterraneterr: —Ñeñthes kothapeꞌcherreꞌ kowen Yomporekop napaꞌ amaꞌt eꞌñe poꞌñoxh napatensoñ Yomporekop, napaꞌ eꞌñekaꞌye oñochaya napatenes. Tharraña Cristo ñeñthchaꞌ wapatsa chentaꞌpaꞌ ñapaꞌ añchaꞌkaꞌye chorratossa Parets Poekamkëñ ñeñth ateth ñerraꞌm tsoꞌ. Ñapaꞌ ñeñth atarr awamenkatheshaꞌ nañapaꞌ ama tama awamenkatheyayno. Ñapaꞌ ñeñthña atarr sherbets, nañapaꞌ ama es nesherbeno atthoch amaꞌt poꞌsapatapaꞌ oꞌch nanmoñ.

San Mateo 3:12

Ñapaꞌ atarr awamenkath ñapaꞌ ñach akrerreꞌ allowen acheñeneshaꞌ. Ñapaꞌ añ tomaꞌntena ñeñth orreneꞌ poeshoshnat alloch shoshnan poꞌtrigo oꞌch eꞌñe poeꞌllomhrochayamha. Ñeñthña poeꞌllomerpaꞌ oꞌch aꞌyapaxheꞌ oꞌch aññoꞌch allekma aññoꞌteñ eꞌñe kowen. Poeꞌsheꞌmarñapaꞌ oꞌch waporeꞌch tso allchaꞌ eꞌñe poywa. Ñeñthña tsoꞌpaꞌ ama emayaꞌpawo amaꞌt errponaña. Ñeñthpaꞌ allowa ateth serrpareꞌtatanet Juan.

San Juan 1:26

Juanñapaꞌ ateth oterraneterr: —Napaꞌ amaꞌt napatyen Yomporekoppaꞌ eꞌñekaꞌye oñochaya napatyenanet. Tharraña oꞌ xhap sesho poꞌpsheñeñ ñeñth ello atarr sherbets, tharraña sapaꞌ amakaꞌye señoteñeña sa.

San Juan 1:27

Ñapaꞌ amaꞌtchaꞌ chenta wapapaꞌ ñapaꞌ ñeñthkaꞌyeña ello atarr sherbets; nañapaꞌ ama es nesherbeno atthoch amaꞌt poꞌsapatrexhapaꞌ oꞌch nepyampes.

San Juan 1:33

Amaꞌt allempo napaꞌ ama neñoteñe ñeñththeꞌña Yompor Poechemer tharraña Yompor ñeñth oꞌ llesenserren atthoch napatyes acheñeneshaꞌ oño, ñapaꞌ atethkaꞌye otenen: “Esempoch pent oꞌ sowaꞌnma Nekamkëñ oꞌch xhap eꞌñe ñesho ñeñthchaꞌ chorrosaya, ñapaꞌ ñeñthchaꞌkaꞌyeña chorraterrawetña Parets Poekamkëñ.”

San Juan 7:38

Ñeñth nameꞌñenaya na eꞌñe poeñmateñothet poeyoxhretopaꞌ ateth pena ñerraꞌmrratheꞌ alloth poten oñ aton ñeñth atarr kowen, tharroꞌmar ñeñthpaꞌ ateth oten Yompor poꞌñoñ ñeñth anwareth awathotheñ.

Los Hechos 1:5

Allempopaꞌ añña ñeñth notwas: Juanañpaꞌ añothña apateꞌth oño, tharraña na tsapathonethpaꞌ añchaꞌña nechorratasa Parets Poekamkëñ. Añpaꞌ allowa ateth ot Jesús.

Los Hechos 10:44

Amaꞌt allempo serrpareꞌten Pedropaꞌ añña Parets Poekamkëñpaꞌ awepaꞌt chorranet allowenet ñeñthet eꞌmhñoteꞌ.

Los Hechos 2:33

Theꞌña ñapaꞌ eꞌñe alloꞌtsen epoet Pompor Parets all partsoten ento. Pomporpaꞌ oꞌ eꞌñe apwe Poekamkëñ. Theꞌñapaꞌ añ ñeñthara Poekamkëñ oꞌ chorratya yamha ateth otnerrey awaña. Ñeñthoꞌmarña oꞌ orrtonaya ateth sentyes ñorraꞌ, ñamha ateth seꞌmyes kowen ñoñets eꞌñe sa señoño.

1 Corintios 12:13

Tharroꞌmar allempo oꞌ yapatarethetwapaꞌ Parets Poekamkëñpaꞌ oꞌch parrokmatatwerrey alloweney. Amaꞌt ñamha poꞌpoñeꞌttsokmay acheñey ateth ñerraꞌm patantaꞌttsoypaꞌ judioneshay, ñatoꞌ poꞌpotantañpaꞌ amach judioneshayaye. Tharraña alloweney eꞌñe poechorreñothey Parets Poekamkëñpaꞌ eꞌñe allempotheñpaꞌ oꞌch yeparrokmatwa alloweney. Amaꞌt ñamha acheñ ñeñth atarwasatareth eꞌñe attha ñeñth ama esoyeꞌ enteñeto ñamha acheñ ñeñth eꞌñe kowenoꞌtsen. Tharraña eꞌñe poechorreñothey Parets Poekamkëñ ñeñth eꞌñe pathrrapaꞌ eꞌñe allempotheñpaꞌ oꞌch yeparrokmatwa alloweney.