San Lucas 16:13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹³ ‘Ñeñthpaꞌ atethchaꞌ netmaꞌntacha: —Amaꞌt poesheñarrotheyapaꞌ amach errothenoth eꞌñe kowen yetarwasoña epsheñoꞌmar yamoꞌmtayekop. Tharroꞌmar ñerraꞌm ateth yephapaꞌ poesheñarr eꞌñech kowen yemorrenteñoth yoksheñeshokmañen yesherbeñ, poꞌpsheñeññapaꞌ amach eꞌñeyeꞌ yemorrenteño; xhach yottena ñerraꞌm xha yetsenaꞌteñ. Ñeñthoꞌmar atethpaꞌ amach kowenayeꞌ yesherbeñe. Ñerraꞌm aña eꞌñe semaꞌyoxhrena ñeñth eꞌñe sokpa atthoch segana aton kelle, ñeñth atethpaꞌ amach errothenoth semaꞌyoxhroña ñamha añekop ñeñth atarr sherbets Yomporekop.

San Lucas 16:13 Iomraidhean Croise

San Mateo 4:10

Jesúsñapaꞌ alla otererr: —Theꞌpaꞌ oꞌch orrerreph oneñethe. Napaꞌ ama nemno oꞌch ateth nepha tharroꞌmar Yompor poꞌñoñ ñeñth anwareth ñeñthpaꞌ ateth oteney: “Añach ñapoeth yemaꞌyochena Yompor ñeñth Yepartseshar yepen, eꞌñech ñaptha yesherbeꞌ.”

San Mateo 6:24

‘Ñeñthpaꞌ atethchaꞌ yetmaꞌntacha: Amaꞌt poesheñarrotheyapaꞌ amach errothenoth eꞌñe kowen yetarwasoña epsheñoꞌmar yamoꞌmtayekop. Tharroꞌmar ñerraꞌm ateth yephapaꞌ poesheñarr eꞌñech kowen yemorrenteñoth yoksheñeshokmañen yesherbeñ, poꞌpsheñeññapaꞌ amach eꞌñeyeꞌ yemorrenteño; xhach yottena ñerraꞌm xha yetsenaꞌteñ. Ñeñthoꞌmarña ñeñthpaꞌ amach kowenayeꞌ yesherbeñe. Ñerraꞌm aña eꞌñe semaꞌyoxhrena ñeñth eꞌñe sokpa atthoch segana aton kelle, ñeñth atethpaꞌ amach errothenoth semaꞌyoxhroña ñamha ñeñthekop atarr sherbets Yomporekop.

San Lucas 11:23

‘Ñeñthoꞌmarña theꞌpaꞌ oꞌch notas allowenes: Ñerraꞌm eseshas ñeñthes ama nethorrapretenaye ñeñthña acheñerpaꞌ xhakaꞌye epatareꞌtennan ñeñth ateth nethorraꞌyena na. Ñeñthpaꞌ oꞌch netmaꞌntatasa ateth: Ñerraꞌm eseshaꞌ ama naꞌyapaxhapretenaye ñeñth naꞌyapaxhen na, ñeñthñapaꞌ xha aꞌparratseꞌtampenen aꞌyeneth.

San Lucas 14:26

—Ñerraꞌm eseshaꞌ moeneꞌ oꞌch kotherren eꞌñe poꞌñoxh, añ nemnen oꞌch atarr nanak morrentennet. Elloch metaneñet attho atarr morrenteñet pompor, amaꞌt ñamha pachor, amaꞌt ñamha poethapor ñamha poechemereshaꞌ, paꞌmoꞌnasheñneshaꞌ, poꞌxhaneshaꞌ. Attho atarr morrentennet ello metaneñet attho atarr morrentenet ñañeñeta ñeñth attho korrenet arr patsro. Ñerraꞌm erraꞌtsen ama attheyeꞌ nemorrentenayepaꞌ nañapaꞌ amach errothenoth neyochreshaꞌ neperraneto.

San Lucas 16:12

Ñamha ñerraꞌm ama es yesherbhateññañe ñeñth poꞌpsheñño ateth ñerraꞌm ñeñth Yomporo, allempopaꞌ amach errothenoth apyeña ñamha ñeñth eꞌñe yokop ñeñthchaꞌ eꞌñe kowen yokshateneꞌ.

San Lucas 16:9

‘Ñeñthoꞌmarña theꞌpaꞌ oꞌch notenes: —Ñeñth allpon paꞌnamen sechyen sekhllayorowen ñeñthpaꞌ añekpoepaꞌchña sherbenes alloch seyenpoeñ poꞌpotantañ allochñapaꞌ atthochña eꞌñech kowen moererrset. Sapaꞌ añekpoepaꞌchña setarwasatña sa sekhllayor ñeñth atarr sherbets Yomporekop amaꞌt yeñoteñ kellepaꞌ atarr aꞌgastaꞌpoꞌ amaꞌt ñamha añekop ñeñth ama pokteyeꞌ enteno Yompor. Allochñapaꞌ eñallchaꞌ sokop ñeñthchaꞌ eꞌñe kowen sagerreꞌ eꞌñe all Yomporepawo esempoch sexhaxherr all, allempopaꞌ oꞌwañchaꞌ alloꞌna sherbenes kelle ñeñth patsoꞌmarekpa. Atthoch allowenes eꞌñech kowen sokrraꞌwerra Yomporepawo ñeñthpaꞌ ama awañaño.

San Lucas 9:50

Jesúsñapaꞌ ateth otanet: —Amachkaꞌye sepatareꞌtatsche tharroꞌmar ñerraꞌm ama xho epatareꞌtenye yamha ñeñthña poꞌñoxhpaꞌ eꞌñekaꞌye parrokma yeyenpannena.

Santiago 4:4

Ñewa, awañapaꞌ soten awoꞌch sameꞌñera Cristo, tharraña theꞌñapaꞌ aña sokshatseꞌtyena poꞌpoñ. Amaꞌt señoteñe ñeñth koshatseꞌtyenaya ñeñth patsoꞌmarekpapaꞌ ñeñthña eꞌmoñeꞌteneꞌ ñeñth kowentetsa Yomporekop. Ñeñthoꞌmarña ñerraꞌm yapaꞌxhoꞌ oꞌch alla yokshatseꞌterra ñeñth patsoꞌmarekpapaꞌ oꞌchxhoꞌ alla yeꞌmoñeꞌter yamha Yompor.