San Lucas 15:15 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁵ Allempoña ñapaꞌ oꞌ awoꞌ alloꞌtsen aneꞌtañ all eꞌnyenan tarwas. Aneꞌtaññapaꞌ aña aph poꞌtarwas oꞌch awyesos aꞌyeneth allchaꞌ kowampesyesoñ poꞌchañchor.

San Lucas 15:15 Iomraidhean Croise

San Mateo 7:6

Jesúspaꞌ ateth oterraneterr poꞌpoñ: —Ñeñth ama kexhpoenaye pachmhareñ ñamha pathpareñ amach alla seserrpareꞌtaterraneteꞌthe Parets poꞌkowenña. Tharroꞌmar ñetpaꞌ attha penet ñerraꞌmrratheꞌ ochek. Ñewa, ochek ñerraꞌm esempo amaꞌtchaꞌ atarr kowen yaphpaꞌ yaꞌnach rremaꞌpes xhach axhotaꞌteypaꞌ oꞌch shetsay. Ñamha amaꞌt ateth ñerraꞌm chañcho ñerraꞌm esempo es yenaꞌ ñesho amaꞌtchaꞌ atarr kowen yenten ya, yeser, chañchoñapaꞌ atthach athmamaꞌtamphsey tharroꞌmar chañchopaꞌ ama esoyeꞌ entenano amaꞌt ñeñth atarr kowen.

San Lucas 15:13

Eꞌñe allponmatatsa ñeñthña poechoyomer penpaꞌ oꞌ eꞌñe pomwawanman ora allowen ñeñth allpon aph pompor allo agapan shonteꞌ kelle atthoch ta bhaxhayo poꞌpoñ anetso. Allempoña xhap bhaxhayopaꞌ allñapaꞌ sosyaꞌtsañexhna ateth phaꞌyesos. Atthoña amaꞌt shonteꞌ poꞌkhllayor ñeñth anem oꞌ eꞌñe aꞌgastaꞌwawe eꞌñe pottatseꞌteñoth.

San Lucas 15:14

Oꞌ eꞌñe aꞌgastaꞌwan ora poꞌkhllayorpaꞌ allempoña allpaꞌ oꞌ orrta moexheñets all ñeñthe anetsro. Ñañapaꞌ oꞌwañ errayeꞌ entan poerrar ñeñthchaꞌ rren.

San Lucas 15:16

Ña paꞌchporrñothpaꞌ atarr moeneñ oꞌch rrapretosan chañcho poerrar atthoch yetosa. Amaꞌt chañchopaꞌ paꞌtalleꞌtsa poerrar pen ñapaꞌxhoꞌña ñeñthaña atarr moenen oꞌch rros tharraña amaꞌt chañcho ama eseshayeꞌ apoenaye poerrar ñeñthchaꞌ rraꞌ.

Romanos 6:22

Tharraña theꞌpaꞌ oꞌwañchaꞌ alla tarwasaterryerr yoꞌchñar. Añchaꞌña yethorrateneꞌ Yompor poꞌtarwas atthoch yesherbeñ. Allochñapaꞌ ñach yetsaꞌtenaya alloch yaꞌkowentatarethterra eꞌñe kowen ñokop añe patsro. Allochñapaꞌ atthochña apwerrey allochña yapaꞌ korretsayach yoksheñeshokmañen thayotheñ errponañowen.

Tito 3:3

Ñeñthpaꞌ eꞌñe pokteꞌ atethchaꞌ phannenet tharroꞌmar yapaꞌxhoꞌña yeñoteñ awathpaꞌ aña yephatseꞌtyeseꞌth ñeñth ama pokteyaye. Yapaꞌxhoꞌña atthach ama es yepxheꞌthe allempo nanak yephatseꞌtyeseꞌth sosyaꞌtsañ. Ñamha nanak yathpareꞌteꞌth awath, ñamha aña yexhatyesyeteꞌth ñeñth ama poꞌñoxhoyaye kothaphñats. Yechetspaꞌ aña nanak moenatseꞌtatyeꞌth ñeñth ama kowenayaye ñamha allempopaꞌ aña nanak yoksheꞌth paꞌnamen sosyaꞌtsañexhno. Ñamha allempopaꞌ nanak atsrreꞌmoxhen yentannaꞌtyeseꞌth ñamha nanak es yeyeꞌchapretannaꞌtyeseꞌth. Ñamha allempopaꞌ ñerraꞌm eseshaꞌ yeꞌmoñeꞌteꞌpaꞌ yapaꞌxhoꞌña oꞌchxhoꞌ yeꞌmoñeꞌchxhoꞌ yamha.