San Lucas 13:24 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁴ —Sapaꞌ añchaꞌña eꞌñe kowen semaꞌyoxhrena ñeñth kowen enten Yompor atthochña seswanom ñeñth ama kowenayeꞌ enteno ña. Ñeñthpaꞌ oꞌch netmaꞌntacha ateth ñerraꞌmrratheꞌ allchaꞌ yebeꞌthos eshekchaꞌ yexhap ñesho ñeñthpaꞌ atarr añetholl, atarr thorrapoꞌ oꞌch yebeꞌthos all. Ñamha oꞌch notas esempowañen amaꞌtchaꞌ shonteꞌ acheñeneshaꞌ ñeñthchaꞌ atarr moenatseñ oꞌch beꞌtherretañ all atthoch xherretañ Yomporesho tharraña allempopaꞌ amach eshek beꞌtherreto atthoch xherret all tharroꞌmar allempopaꞌ oꞌch wañerr attho atarr koweney Yompor.

San Lucas 13:24 Iomraidhean Croise

San Mateo 11:12

‘Tharroꞌmar añña ñoñets, Moisés poꞌñoñ ñeñth ateth anareth ñamha añ ñoñets ñeñth kellkaꞌyeseꞌth ñeñth aꞌmhtaꞌyesayeꞌth Yompor poꞌñoñ, ñetpaꞌ ñeñthaña serrpareꞌteteꞌth atthoch atarr ayochreshathterra Yompor tharrempowa allempo orrtosa Juan. Ñamha allempotheñ serrpareꞌtatosanet Juan amaꞌt themeꞌttsen eꞌñe poꞌwamenkokma serrpareꞌtatyeset ateth penaña Yompor poꞌkowenña atthoch ayochreshathterra ña ñeñth poeꞌntañoꞌtsen. Amaꞌt atsrreꞌmñathneshaꞌpaꞌ eꞌñe ñeñtha atarr moenet poeyoxhrokmañen.

San Lucas 13:23

All oñen thoñopaꞌ allempoña poesheñarrpaꞌ aꞌphthoꞌtnomh, ateth och: —Ayochreshathe, ñeñthchaꞌ allpon aꞌkeshphatarethterrtsapaꞌ taꞌm ñetpaꞌ ¿poesheñaꞌttsetatheꞌ ñatoꞌ amapaꞌ atarrchaꞌ shonteꞌ? Jesúsñapaꞌ ateth och:

San Lucas 21:36

Añchaꞌña sapaꞌ xhokmachña señoseꞌrtena ñamha añchaꞌña senamoen Yompor atthoch saꞌwantaꞌwanom allowen ñeñthchaꞌ sewapoya paꞌnamen moeroxhteñtsoxhno allochñapaꞌ sañapaꞌ eꞌñech señmañeshaꞌ sathomwerr nesho na Ñeñthen Acheñetosets.

San Juan 13:33

Jesúsñapaꞌ alla oterraneterr: —Naꞌkñetharneshachaꞌ, oꞌ eꞌñe koñeꞌthamha pallta alloꞌtsenmeñenchaꞌ na eꞌñe arr parro. Napaꞌ oꞌch awerren. Allempoña sapaꞌ seꞌnerrnaꞌch. Ateth noteñ awaña judioneshaꞌ, allchaꞌ neserr napaꞌ sañapaꞌ amach errothenoth sexhapo, theꞌpaꞌxhoꞌ sapaꞌ eꞌñe ateth notenes.

San Juan 5:4

Tharroꞌmar ñerraꞌm esempoch pelleꞌllchena ñeñth oñerpaꞌ mellañotheñoꞌch sowetsa all oꞌch pelleꞌllchatosan oñ. Ñerraꞌm eseshaꞌ ñanom eshaꞌtostsa all oño allempo pelleꞌllchena ñeñthña atsnañetherpaꞌ akrrerrochayoꞌch, amaꞌt erraꞌtsena atsnañtsor rromoenawet.

San Juan 6:27

Theꞌpaꞌ oꞌch notas, sapaꞌ amach aña semaꞌyoxhratsto yokrramh ñeñth eꞌnwapoꞌ. Añchaꞌña semaꞌyoxhra sokrramh ñeñth ama eꞌnwapawoyaye; ñeñthña alloch sapaꞌ korretsasach soksheñeshokmañen eꞌñe thayotheñ amaꞌt errponañowen. Ñeñthña sokrramhpaꞌ nach sapoerreꞌ Ñeñthen Acheñetosets tharroꞌmar Apapaꞌ oꞌ llesenserren na Ñeñthen Acheñetosets arr patsro.

San Juan 7:34

Allempoña amaꞌtchaꞌ seꞌnameꞌterrenpaꞌ amach senterrno. Allchaꞌ neserr napaꞌ sañapaꞌ amatheꞌ errothenoth sexhapo.

San Juan 8:21

Allempoña Jesúspaꞌ ateth oterraneterr: —Napaꞌ oꞌch awerren, sapaꞌ seꞌnerrenchaꞌ. Sapaꞌ orach ochñarethes serromwa. Allchaꞌ neserrpaꞌ sañapaꞌ amach sexhapo.

Romanos 10:3

Poꞌñoxhpaꞌ ama xhenaneto poeyoxhreto ñeñth ateth moenen Yompor atethchaꞌ yepha atthoch pokteꞌ enteney amaꞌt eꞌñe alloweney. Ñetpaꞌ otenapoetañ eꞌñe poeyexhkateñothet ñeñth kowen entenet ñetpaꞌ Yomporñapaꞌ pokteꞌtheꞌ entapretenanet. Elloña ñetpaꞌ ama moeneñeto oꞌch yemterrñañet ñeñth ateth oteney Yompor, ñeñthchaꞌ atthoch eꞌñe poꞌñoxh pokteꞌ enterrey ña.

Colosenses 1:29

Ñeñthoꞌmarña napaꞌ nanak nethorrena ñokop. Eꞌñe poꞌwamenko ñeñth atarr awamenkath nepeneꞌ atthoña napaꞌ xhokma atarr nethorraꞌyena ñokop.

Hebreos 4:11

Yapaꞌxhoꞌña añepaꞌchña yeꞌnen atthoch yexherr yamha allchaꞌ amesaterrey Yompor atthochña eꞌñe yoksherra yeyoxhro. Theꞌñapaꞌ amaꞌt poesheñarrotheyapaꞌ amoepaꞌch alla yathpareꞌterreꞌthe theꞌt ama yexherro yamha all.

2 San Pedro 1:10

Ñeñthoꞌmarña masheñneshachaꞌ ñamha noxhaneshachaꞌ theꞌpaꞌ oꞌch alla noterrserr. Alloꞌnepaꞌch sesen yemoetnomaya Cristo attho ñapaꞌ oꞌ waꞌñerres atthoch sameꞌñeñothpaꞌ oꞌch sekeshperra. Ñerraꞌm atethchaꞌ sephapaꞌ amaꞌt awathapaꞌ amach sepsere, ñamha amach alla sepoerrerro atarr thoñoneth.