San Lucas 12:42 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁴² Partseshaꞌñapaꞌ alla tomaꞌntaterraneterr poꞌpoñoneth, ateth oterraneterr: —Allowenespaꞌ atethchaꞌ sepha eꞌñe kowen ateth ñerraꞌmrratheꞌ poesheñarr yakma ñeñth yechena ñeñth pamoꞌmteꞌ pen all paꞌpakllo. Ñeñthchaꞌ poꞌtarwas peneꞌ xhokmach apaꞌyesan allowen poꞌpotantañ pamoꞌmteꞌ paꞌtarwasañer poerraret allpon ñeñth poktetsa poesheñaꞌttsokop. Ñapaꞌ atthekmach pena xhokmach apoenanet ñerraꞌm esempoch xherrerr allempo ateth anareth ñokop oꞌch alla apaꞌyerraneterr poꞌpocheño. Ñapaꞌ xhokmach ateth pena amach kaxhpoere tharroꞌmar ñapaꞌ eñoteñ atthoch eꞌñe koshatenan pamoꞌmteꞌ.

San Lucas 12:42 Iomraidhean Croise

San Mateo 13:52

Allempoñapaꞌ ateth otanet: —Ñeñthoꞌmarña amaꞌt allowen erraꞌtsen ñeñth atarr etsoteneꞌ ñoñets ñeñth ateth anareth awathotheñ, ñerraꞌm elloña ayxhatarethtet ñamet ñeñth ateth pena Yompor poꞌkowenña attho atarr ayochreshathtena ña, ñeñthña acheñer atarrchaꞌ kowen orrtatenan kothaphñats ñeñth awathotheñ, elloña kowenchaꞌ orrtaterran ñamha ñeñth eꞌñe etserra kothaphñats. Eꞌñech ateth pena ñerraꞌmrratheꞌ ñeñth apakllatheshaꞌ. All aññoꞌtyenan ñeñth atarr morrentena errothenopaꞌ oꞌch orrtatenan ñeñth errteꞌ aññoꞌten all; errothenoñapaꞌ oꞌch orrtatyenan ñamha ñeñth aññoꞌten awathotheñ all paꞌpakllo.

San Mateo 20:8

Oꞌña poenasoꞌtenpaꞌ aneꞌtaññapaꞌ otosan ñeñth kowampeneꞌ allowen paꞌtarwasañer: “Theꞌpaꞌ oꞌch pexhoreꞌter atarwasañneshaꞌ, oꞌch petsaꞌtyesapoerranet eꞌñe poesheñaꞌttsokmoet. Añchaꞌ ñanom petsaꞌtapoerra ñeñth tarwasosets chentaꞌ allotheñach phaꞌmothech tsaꞌtyesapoerrawet atthothach petsaꞌtwanet ora allowenet amaꞌt ñeñth aromtañowen.”

San Lucas 12:43

Ñeñthña atarwasañpaꞌ atarrchaꞌ koshatweñ pamoꞌmteꞌ; ñerraꞌm esempoch werrapaꞌ alla entwenan paꞌtarwasañer ama xho kaxhpoenano ñeñth poꞌtarwas apaꞌnemh awañmoꞌchotheñ.

San Lucas 7:13

Partseshaꞌña Jesús allempo entapan rrethorrnaneshaꞌ poellkapreteñothpaꞌ atarr moerosya. Ñañapaꞌ ateth otapan rrethorrnaneshaꞌ: —Amach noxha peyawatsto.

San Lucas 7:19

Attheña Juanñapaꞌ agotatan epsheña ñeñth poeyochreshaꞌ pen ñeñthchaꞌ moeña Jesúsesho ñeñthchaꞌ aꞌphthoꞌtenayaꞌ Jesús poꞌñoxhtheꞌ ñapaꞌ ñeñth Cristotets ñeñth atarr kowenet awathotheñ, ñatoꞌ amatheꞌ ñeñtheyayepaꞌ añchaꞌ kowet poꞌpsheñeñ ñeñthchaꞌ wapatsa.

Los Hechos 20:28

Allempoñapaꞌ alla oterraneterr ñeñth pomporneshaꞌ penet: —Theꞌpaꞌ señotaꞌthach. Theꞌpaꞌ añ pokteꞌ oꞌch sekwampeñ kowen allowen ñeñth ameꞌñenaya Yompor. Atethchaꞌ sepha ateth ñerraꞌm ñeñth kowampeneꞌ poꞌcarneror. Sapaꞌxhoꞌña atethchaꞌ sepha samha oꞌch sekwampeñ ñeñth ameꞌñetsa. Ñeñthchaꞌ setarwas sephaꞌ ateth llesensenes Parets Poekamkëñoth. Tharroꞌmar Yepartseshar Jesúspaꞌ oꞌ rroma ñokpoet ñamet.

1 Timoteo 3:15

Tharraña ñerraꞌm ama newapopaꞌ amach sepallteno sapaꞌ oꞌch señoch ñeñthchaꞌ ateth sepha, tharroꞌmar oꞌ notwaph añ necartoth ñeñthchaꞌ ateth sepha ñeñthes parro sameꞌñeña Yompor, ñerraꞌm esempo sapxhena Yomporekop, ñeñthara Yompor ñeñth ama arromñatheshayaye. Ñamha ñeñthara Yompor ñeñth eꞌñe yameꞌñeñoth alloweneypaꞌ xhochña yorrtatyen ñeñth eꞌñe poꞌñoxh Yompor poꞌñoñ amachña xha yaꞌnasoteño.

1 Timoteo 5:17

Theꞌpaꞌ oꞌch notaph poꞌpoñ. Ñeñth pomporneshaꞌ pen ñeñth ameꞌñetsapaꞌ ñerraꞌm eꞌñe kowen amhchaꞌtarethtenetpaꞌ eꞌñe pokteꞌ acheñeneshaꞌpaꞌ kowenchaꞌ kosheñet, ñamha ellopaꞌ añ pokteꞌ oꞌch es apoeñet ñeñth palltena. Ñeñthpaꞌ ñeñthchaꞌ ateth sepeñ erraꞌtsenchaꞌ ñeñtha poꞌtarwas peꞌ attho serrpareꞌten, ñamha ñeñth eꞌñe maꞌyoxhrenaya yexhatets Yompor poꞌñoñ.

Tito 1:7

Tharroꞌmar ñeñthchaꞌ paꞌmhchaꞌtarether phaꞌ ñeñth ameꞌñetsapaꞌ añchaꞌ penaꞌyes acheñ ñeñth eꞌñe kowenareꞌ es phaꞌyets, ñeñth amach eñalle atthoch thanmareꞌteña acheñeneshaꞌ, tharroꞌmar ñapaꞌ anareth ñach aꞌpoktatyeneꞌ paꞌnamen ñeñth poktetsa Yomporekop. Ñamha ñeñthchaꞌ paꞌmhchaꞌtarether phaꞌyes ñeñth ameꞌñetsapaꞌ amach añeyaye acheñer ñeñth añach pokteꞌ enten oꞌch xhokma phatanet ñeñth ateth moenen eꞌñe ña, ñamha amach xha atsrreꞌmoxhen entweno, ñamha ñeñth ama posaꞌtareꞌtetso, ñamha ñeñth amach orroñatheyaye, ñamha ñeñth ama nanak yeꞌchapretetso kelle ñeñth apenkoxhenoth oꞌch gana.

Hebreos 13:17

Ñamha ñeñth saꞌmhchaꞌtaretherneshaꞌ sephaꞌyenpaꞌ xhokmoepaꞌchña sameꞌñenanet, tharroꞌmar ñetpaꞌ añekop anarethtenet ñetchaꞌ kowampenet sekamkëñ Yomporekop. Ñamha Yomporpaꞌ eñotatwerranetchaꞌ ñeñth ateth phaꞌyenet, ñatoꞌ eꞌñetheꞌ kowen kowampenset ñatoꞌpaꞌ amatheꞌ kowenayeꞌ kowampenseto. Ñeñthoꞌmarña sokoppaꞌ añ poktetsa eꞌñechña kowen sameꞌñenanet atthochña ñetpaꞌ eꞌñech poksheñeshokmañen thorrenet sokop. Amoepaꞌch xha sellkatatstenaneto tharroꞌmar ñerraꞌm atethpaꞌ amach errothenoth koshaterrsetoña samha.

Hebreos 13:7

Ñamha seyerpoeñoth xhokmoepaꞌch kowen senteñ ñeñth aꞌpotheneꞌ Yompor poꞌñoñ sokop, ñeñthchaꞌ señotatnomoeꞌ kowen. Ñamha oꞌch sokthapeꞌch ñeñth atarr kowenareꞌ orrtatyesnomoet sesho, attho ñetpaꞌ eꞌñe kowen yemteñet Yompor, sapaꞌxhoꞌña atethchaꞌ sepha samha yemtenaya Yompor eꞌñe kowen.

Hebreos 3:5

Añña Moiséspaꞌ eꞌñe kowen etsotan ñeñth ateth yechya Yompor; ñeñthpaꞌ oꞌch es eñotatyesan acheñeneshaꞌ tharraña ñeñthpaꞌ tomaꞌnteñtsa. Tsapathonethña Yomporpaꞌ oꞌch eñotaterranet ñeñth eꞌñe eñotoxhen. Amaꞌt eꞌñe kowen etsotenaneñ Moisés allowenakop ñeñth paꞌpakëll pen Yompor allempo, tharraña ñeñth attho sherbenan Yompor paꞌpakllopaꞌ ñapaꞌ attha poeñañra peñ Yompor. Amaña Poechemereyeꞌña peñe.

1 San Pedro 4:10

Yompor poemoereñothpaꞌ oꞌ eꞌñe apaꞌyeswas atthoch sethorraꞌyesa eꞌñe ñokop. Theꞌñapaꞌ oꞌch notas, oꞌch seyenpannaꞌta año ñeñth apoenes Yompor. Atthochña sesherbhatyesñañña Yompor poemoereña.