San Lucas 11:29 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁹ Allempoña acheñeneshaꞌ emchorreñet Jesús, ñañapaꞌ ateth otanet: —Acheñeneshaꞌ ñeñth korraꞌyetsa theꞌ ñetñapaꞌ ama kowenayeꞌ kothapeꞌchyeneto. Tharroꞌmar ñetpaꞌ aña eꞌnenet awoꞌch norrtatanet nepartsoteña atthoꞌchña eñotnet napaꞌ poꞌñoxhoꞌtheꞌ Parets Poechemeren ñeñthenoꞌtheꞌ Cristotosets. Tharraña amach es norrtataneto. Napaꞌ añach patherr neñotatanet ateth eñotataneꞌth Jonás awath nínivoꞌmarneshaꞌ allempo aꞌmhtaneꞌth Yompor poꞌñoñ.

San Lucas 11:29 Iomraidhean Croise

San Mateo 3:7

Allempoña entapan shonteꞌ saduceoneshaꞌ ñamha fariseoneshaꞌ ñeñthareta ñeñthet judioneshet. Ñetpaꞌ tharroꞌmar waxhenet añ moenenet oꞌch apatapanet Juan. Juanña serrpareꞌtatapanetpaꞌ otapanet: —Sapaꞌ ama kowenayayso atarr ashkarñathes, xha sottena ñerraꞌmrratheꞌ shechpha sompor sepen. Poꞌñoxhkaꞌ ama eseshayeꞌ sotenaye eꞌñech sapatarethteñotha oꞌch sekeshperra allochñapaꞌ amach koñchatwerrso Yompor allempoch yoroxhtatwer tsapathoneth.

San Marcos 8:38

Tharraña ñerraꞌm erraꞌtsenchaꞌ nepenkënaya na theꞌ, neñoñpaꞌxhoꞌña xha apenkoxhen entennanet, napaꞌxhoꞌña nepenkaꞌwerranetchaꞌ esempoch nowerra. Shonteꞌ acheñeneshaꞌ ñeñth korraꞌyetsa theꞌ arr patsro ñetñapaꞌ atarr ochñatheneshet tharroꞌmar ñetpaꞌ poꞌpoña poꞌyomporer phaꞌyenet. Tharraña ñerraꞌm eseshaꞌch poepenkëñothetan na amach aꞌmethenneto all, ñeñthña acheñerpaꞌ napaꞌxhoꞌña xhach nepenkaꞌwera ñerraꞌm esempoch nowerra. Poꞌñoxh napaꞌ Ñeñthen Acheñetosetspaꞌ nowerrach eꞌñe Nompor poꞌkowenñoth epan ñamha poꞌmhllañotheñnaneshar ñeñth eꞌñe thorraꞌyetsa Partsokop.

San Lucas 11:16

Poꞌpotantañ acheñeneshaꞌ ñetñapaꞌ xha moeneñet oꞌch topachet Jesús. Ñetpaꞌ ateth ochet: —Yapaꞌ añ yemnen oꞌch pegatey pepartsoña entoth allochñapaꞌ atthoch yeñotaph poꞌñoxh phapaꞌ Parets Poechemereph.

San Lucas 11:50

Atthoña eꞌñe allempotheñ ayexhkatarethta añ pats, ora allowen ñeñth aꞌmhtaꞌyesayeꞌth Yompor poꞌñoñ allpon ñeñth amtsanatyesarethtatseꞌth ashatarethetyeseteꞌth poꞌrras, sañapaꞌ allempotheñ eꞌñe saꞌyowarethtena themeꞌttsen sa ñeñthes korretsa theꞌ.

San Lucas 12:1

Shonteꞌ acheñeneshaꞌ ñeñth waxhenoya Jesús, shonteꞌ nanak patoner. Xha cheꞌmoechoset Jesúsesho attha athmatkaꞌtannaꞌtyesoset. Jesúsña ñanompaꞌ alla serrpareꞌtaterranerr poeyochreshaꞌ, ñeñthpaꞌ ateth otanet: —Eꞌñech señota ñatoꞌt semeñeꞌteñaꞌ fariseoneshaꞌ pokthaphña, tharraña ñeñth pokthaphña penet ñetpaꞌ ñeñthpaꞌ ommoꞌcheñtsa. Ñeñthpaꞌ mamethollapaꞌ oꞌch epaꞌwa errapharen eꞌñe ateth pena ñerraꞌmrratheꞌ chaseꞌ mamethollapaꞌ oꞌch eꞌñe es aꞌchasaꞌwa.

San Lucas 9:41

Jesúsñapaꞌ ateth ot: —Sapaꞌ ñeñthes acheñres amaꞌt mameshapaꞌ ama ayemtenayeꞌ sentpenno, xhach poꞌpoñ sentwena seyoxhro nokop. Oꞌ allponmatwanen alloꞌtsenen arr patsro napaꞌ attha atarr naꞌwantennas, attha nekwenes ñatoꞌ atthothpaꞌ oꞌch sameꞌñerrna. Allempoñapaꞌ ateth otan yakma ñeñth oteneꞌ oꞌch aꞌkrratoñ poechemer: —Theꞌpaꞌ oꞌch phanmon pechemer arr.

San Juan 2:18

Allempoña judioneshaꞌ paꞌmhchaꞌtaretherneshaꞌpaꞌ ateth ochet: —Añña phorrtatosnay pepartsoña allochñapaꞌ atthochña yeñotaph poꞌñoxhpaꞌ phapaꞌ allsensarethephtheꞌ, theꞌñapaꞌ atthoꞌ pephosnaytheꞌ añexhno.

San Juan 6:30

Ñetñapaꞌ ateth otereterr: —Errothenothwachkaꞌ pegateyña pepartsoña ñeñthchaꞌ yentpaꞌ atthothchaꞌ yameꞌñapha. Phapaꞌ eswañakaꞌ petsoten.

San Juan 8:44

Sapaꞌ oneñethakaꞌye ñeñth sompor sepen. Ñeñthoꞌmarña sapaꞌ aña semnen oꞌch sepha ñeñth moenen sompor. Ñapaꞌ awathotheñ eꞌñe paꞌmothrotheñ amtsañta. Ñapaꞌ amaꞌt mameshapaꞌ ama eñoraꞌpenoña Yompor poꞌñoñ ñeñth eꞌñe poꞌñoxh tharroꞌmar ñoñets ñeñth eꞌñe poꞌñoxhpaꞌ amakaꞌye atanenoña ña poeyoxhro. Ñerraꞌm xho eñorenapaꞌ, shekëñtsach eñorena tharroꞌmar ñapaꞌ eꞌñe shekëñtsa eñoten. Poꞌñoxh sekëñetspaꞌ pomporkaꞌ penanña oneñeth.

1 Corintios 1:22

Ñerraꞌm esempo yeserrpareꞌtach judioneshaꞌ attho Cristo rroma yokop, ñetñapaꞌ amach asherbenayeꞌ entenetoña yokthaphña tharroꞌmar ñetpaꞌ añach moenet yorrtatanetepaꞌtoꞌ Cristo poꞌpartsoña. Ñamha ñerraꞌm esempo yeserrpareꞌtateñ ñeñth ama judioneshayeyeto attho Cristo rroma yokop ñetpaꞌxhoꞌña amach asherbenayeꞌ entonayetoña yokthaphña tharroꞌmar ñetpaꞌ añach moenet yorrtatanetepaꞌtoꞌ ñeñthchaꞌ eñotatawet eꞌñetheꞌ poꞌñoxh ateth yoten.