San Lucas 10:21 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²¹ Eꞌñe allempoña Jesúspaꞌ atarr koshateñ Parets Poekamkëñ. Ñeñthoꞌmarña ñapaꞌ eꞌñe poksheñeshoth maꞌyochenana Pompor, ñeñthpaꞌ ateth oten: —Na Apachaꞌ oꞌch naꞌyeꞌchoxhtatonaph, phapaꞌ pha ñeñtheph atarr ayochreshathtetsa peꞌntaño amaꞌt ñamha arr patsro. Naꞌyeꞌchoxhtatonaph tharroꞌmar ora añexhno ñeñth pekowenña pepen, ñeñthpaꞌ ama arreyeꞌ pexhapateñe poeyoxhro ñeñth atarr eñotañ entyetsa. Phapaꞌ aña pexhapaten poeyoxhreto ñeñth ama eñotañeyeꞌ entetso. Tharroꞌmar Apa eꞌñe pemoereñoth ñeñthpaꞌ atethña eꞌñe pokteꞌ penten pha. Arrpaꞌ allowa ñeñth ateth maꞌyochenana Pompor.

San Lucas 10:21 Iomraidhean Croise

San Mateo 16:17

Jesúsñapaꞌ ateth och: —Nanak kosheñtsoꞌtseneph, Simóna ñeñtheph Jonás poechemereph tharroꞌmar attho peñotenenpaꞌ ñeñthpaꞌ ama arromñatheshayeꞌ peñotatenaye; naña Nompor peñotateneꞌ ñeñth poeꞌntañoꞌtsen.

San Mateo 21:16

Allempoñapaꞌ ateth ochet Jesús: —¿Amaꞌt peꞌmoenoña ateth otaxhreꞌtapaph cheshaneshaꞌ? Jesúsñapaꞌ otanet: —Neꞌmoeñkaꞌye. Sañapaꞌ amaꞌt selleyareña Yompor poꞌñoñ. All anareth ñoñetspaꞌ ñeñthña ateth oten: Amaꞌt cheshatholleshaꞌ eꞌñe poenamothet eꞌñech kowen peꞌñoratos axhotaxhreꞌteñtso. Amaꞌt ñeñth ora momoenmeñ peꞌmorrtatoschaꞌ eꞌñe kowen phokop.

San Mateo 3:7

Allempoña entapan shonteꞌ saduceoneshaꞌ ñamha fariseoneshaꞌ ñeñthareta ñeñthet judioneshet. Ñetpaꞌ tharroꞌmar waxhenet añ moenenet oꞌch apatapanet Juan. Juanña serrpareꞌtatapanetpaꞌ otapanet: —Sapaꞌ ama kowenayayso atarr ashkarñathes, xha sottena ñerraꞌmrratheꞌ shechpha sompor sepen. Poꞌñoxhkaꞌ ama eseshayeꞌ sotenaye eꞌñech sapatarethteñotha oꞌch sekeshperra allochñapaꞌ amach koñchatwerrso Yompor allempoch yoroxhtatwer tsapathoneth.

San Marcos 10:15

Poꞌñoxhpaꞌ oꞌch notas, ñerraꞌm eseshaꞌ ama eꞌñeyeꞌ poeyemteñotheyeꞌ agëññañeto Yompor poꞌkowenña amach ateth perreto ñerraꞌm cheshatholl eꞌñech yemtenana ñeñth kowampeneꞌ, ñetñapaꞌ amach oꞌpatenetoña Yompor poꞌkowenña attho atarr ayochreshathtena ña.

San Lucas 15:5

Allña senterpaꞌ oꞌch senatner, eꞌñech soksheñeshokmañen saner.

San Lucas 15:9

Oꞌchña enterpaꞌ allempoñapaꞌ oꞌch agotan pamoꞌtseshaꞌ eꞌñe pakmaneshocheꞌ, atethchaꞌ otanet: “Theꞌpaꞌ oꞌch sokshapreterrna ñeñth poetallarr nekhllayor ñeñth naꞌchenkat, theꞌpaꞌ oꞌ nenter.”

San Juan 11:41

Allempoñapaꞌ aꞌrrotheꞌtet mapoeꞌ aꞌyeneth, Jesúsñapaꞌ kowaꞌ enoneth ateth ot: —Apa, neparasyosoꞌtaph tharroꞌmar theꞌ phapaꞌ peꞌmhñotenen ñeñth ateth nenamoeneph.

2 Corintios 4:3

Attho yeserrpareꞌteññañ Yompor poꞌñoñ ñeñth poꞌñoxh alloch yekeshperra tharraña patantarr acheñeneshaꞌpaꞌ amach xhapaneto poeyoxhreto ñeñth alloch yekeshperra. Ñeñth ateth petsapaꞌ alloꞌna senet allchaꞌ chenkaꞌwerret.

Efesios 1:11

Yomporpaꞌ atarr koxhneshaꞌ oꞌpatatenana Poechemer Cristo. Yaꞌnaña eꞌñe oꞌpatatena attho eꞌñe yeparrokmateñoth Cristo. Ñewa, ñeñthpaꞌ ateth kothapeꞌcheꞌth Yompor awath yokop. Ñeñthoꞌmarña theꞌpaꞌ atethña oꞌ perrnay ñeñth ateth kothapeꞌcheꞌth ña ñeñth eꞌñe pokteꞌ enteꞌth eꞌñe ña pomnenñoth. Tharroꞌmar Yomporpaꞌ ama poenesho poꞌñoñ, xhokmach eꞌñe etsotwerra ñeñth allpon ateth onañchen ña.

Efesios 1:5

Ñapaꞌ atarr morrentenya; eꞌñe poemorrenteñotheypaꞌ oꞌ eꞌñe aꞌpoktatonay yokop amaꞌt awathotheñ. Ñeñthpaꞌ atthochña eꞌñe poechemer perrey. Ñeñthpaꞌ añña eꞌñe etsotatwerreꞌ Poechemer Jesucristo. Yomporpaꞌ eꞌñe ateth aꞌpoktatwonay tharroꞌmar ñeñth attho morrentya ñapaꞌ atethña moenen.