San Juan 7:28 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁸ Jesúsña allempo yexhaten Parets paꞌpakllo, ñapaꞌ poerranaroth ateth otanet: —Sapaꞌ sechmeꞌtennoñtheꞌ, señotennoñtheꞌña na erroththeꞌ nowapa. Tharraña napaꞌ ama nothayeꞌ nowapo, eñallña ñeñth nellsenseꞌ; ñapaꞌ eꞌñe poꞌñoxh ñerraꞌm erroth ot, ama poenesho poꞌñoñ. Ñeñthña sapaꞌ ama señoteñeña sa.

San Juan 7:28 Iomraidhean Croise

San Mateo 11:27

Jesúspaꞌ alla oterranerr acheñeneshaꞌ: —Nompor allowen poꞌkowenña eꞌñe eñotatwenen. Na ñeñthen Poechemerenpaꞌ ama poꞌñoxh eseshayeꞌ neñotenaye, ñapthaña Nompor eꞌñe eñotenen. Nomporpaꞌxhoꞌña ama poꞌñoxh eseshayeꞌ eñotenaye napthaña na ñeñthen Poechemeren eꞌñe neñoteñ Nompor, ñamha erraꞌtsenchaꞌ ñeñth eꞌñe pokteꞌ nenten na ñeñthen Poechemeren ñeñthñapaꞌ oꞌch neñotater Nompor.

San Mateo 2:23

Xherr Galileopaꞌ awerr patherr anetso ñeñth paꞌsoꞌcheñ Nazaret. Allñapaꞌ alla yexhaꞌwerra. Atthothkaꞌyeña etsotaña ñeñth ateth otyeseꞌth ñeñth aꞌmhtaꞌyesayeꞌth Yompor poꞌñoñ; ñetpaꞌ ateth otyeseteꞌth ñeñthchaꞌ Cristoterretspaꞌ “oteñetchaꞌ nazaretoꞌmarneshaꞌ.”

San Mateo 26:55

Allempoña Jesúspaꞌ ateth otan acheñeneshaꞌ: —Esoꞌmareꞌt sewaxhaꞌtennanaña eꞌñe okchellethareroches ñamha etsachperethareroches atthoch serrmaꞌn. Napaꞌ ¿eꞌñeꞌt ateth sentenen ñerraꞌmrratheꞌ eñethen? Oꞌ allponmatwanen nanorryen Parets paꞌpaklloꞌmar, all neyxhatyen, esoꞌmareꞌtña ama allempokmaña serrmaꞌneꞌthe.

San Lucas 10:22

‘Nompor allowen poꞌkowenña eꞌñe eñotatwenen. Na ñeñthen Poechemerenpaꞌ ama poꞌñoxh eseshayeꞌ neñotenaye, ñapthaña Nompor eñotenen. Nomporpaꞌxhoꞌña ama poꞌnoxh eseshayeꞌ eñotenaye, napthaña na ñeñthen Poechemeren eꞌñe neñoteñ Nompor, ñamha erraꞌtsenchaꞌ ñeñth eꞌñe pokteꞌ nenten na ñeñthen Poechemeren ñeñthñapaꞌ oꞌch neñotater Nompor.

San Lucas 2:11

Theꞌpaꞌ sokop oꞌ eñalleta ñeñthchaꞌ Saꞌkeshphatañer seperr ñeñthpaꞌ ñeñthchaꞌ Cristotats ñeñth Yepartseshar yepen. Ñeñthña cheshathollpaꞌ arr eñalleta David paꞌnetsro allara Beléño.

San Lucas 2:39

Allempoña oꞌ aꞌpoktatwet ora allpon ñeñth ateth anareth Yompor poꞌñoño ñeñthchaꞌ eꞌñe yexhaꞌ judioneshaꞌ ñetñapaꞌ awanerret paꞌnyeto Nazareto allara Galileo.

San Lucas 2:4

Ñeñthoꞌmarña Josépaꞌ on Nazaretoth allara anets Galileo, oꞌch awoꞌ all paꞌnetser peꞌth paꞌtañneshañ, ñeñthña anetserpaꞌ añ paꞌsoꞌcheñ Beléñ, allara Judeo, tharroꞌmar Beléño eñalleta awath paꞌtañ David. Tharroꞌmar Josépaꞌ Davidnaꞌtarkaꞌye.

San Lucas 2:51

Allempoñapaꞌ oꞌ kotherran pamoꞌmteꞌ oꞌ xhaxherret Nazareto, ñapaꞌ eꞌñe kowen ameꞌñenana pompor ñamha pachor. Pachorñapaꞌ allowen ñoñetspaꞌ eꞌñe eñotweñ poeyoxhro.

San Juan 1:46

Natanaelñapaꞌ ateth otapan Felipe: —Nazaretothpaꞌ amaꞌt awathapaꞌ amakaꞌye wenoña ñeñth eꞌñe kowen acheñ. Felipeñapaꞌ ateth otererr: —Poꞌñoxh orrakaꞌye oꞌch penteñaꞌ.

San Juan 10:36

naña ñeñthen oꞌ nerren Yompor ñeñthen oꞌ moeñerren arr patsro, sapaꞌ achmharñathach sepenen tharroꞌmarothña napaꞌ noten Yompor Poechemeren.

San Juan 12:49

Tharroꞌmar napaꞌ ama eꞌñe nothayeꞌ neñeno. Apaña ñeñth nellsenseneꞌ ñapaꞌ ñaña noteneꞌ atethchaꞌ notas ñamha atethchaꞌ neꞌñoranaꞌtasa.

San Juan 14:10

Phapaꞌ amaꞌtña phameꞌñenno napaꞌ eꞌñe neparrokmaten epan Apa, Apapaꞌxhoꞌña eꞌñe parrokmatenna. Ñeñth ateth notenespaꞌ ama nothayeꞌ ateth notenso. Apaña ñeñth neparrokmaten, ñapaꞌ eꞌñe etsotatennan ñeñth ateth nephaꞌyen.

San Juan 14:31

Napaꞌ añchaꞌña ateth nepha ñeñth ateth otenen Apa. Atthochña acheñeneshaꞌ arr patsropaꞌ eñochetchaꞌ na poꞌñoxhpaꞌ eꞌñe nemorrenteña Apa. Theꞌpaꞌ sathomxhaꞌt oꞌch awey arroth.

San Juan 16:3

Ñeñthpaꞌ tharroꞌmarchaꞌ ateth phaset ñetpaꞌ ama eseshayeꞌ eñotenaye Apa amaꞌt napaꞌ ama eñotenneto.

San Juan 17:25

Apa, pha ñeñtheph eꞌñe pokteꞌ es pets, acheñeneshaꞌ ñeñth ama ameꞌñetso arr patsro ñetpaꞌ ama eñotenpeto. Nañapaꞌ eꞌñe poꞌñoxh neñoteneph. Añña ñeñth eꞌñe neyemtenaya ñetñapaꞌ eñotenpet phapaꞌ pha nellsenseneꞌ.

San Juan 17:3

Añmapaꞌ ñeñthña alloch ñetpaꞌ korretsetach thayotheñ eꞌñe errponañowen ñerraꞌm esempo eñoterrpet pha ñeñtheph phapoeth eꞌñe poꞌñoxh Yomporetets ñamha ñerraꞌm eñoterrnet na ñeñthen Jesucristo pha pellsensaren.

San Juan 3:2

Ñañapaꞌ wapa Jesúsesho tsapopaꞌ ateth otos: —Maestrochaꞌ yeñoteneph phapaꞌ añ pellsenseneꞌ Yompor atthoch peyxhatosey kowen tharroꞌmar yapaꞌ yeñoteñ añach orrtatyeneꞌ partsoteñets ñeñth awamenkath pen Yompor.

San Juan 3:33

Ñeñth xhapa poeyoxhro ñeñth ateth serrpareꞌtatenanet ñeñth wapatsa Yomporeshoth ñetñapaꞌ ateth otet: Yomporpaꞌ eꞌñetheꞌ poꞌñoxh ateth oten Poechemerekop.

San Juan 5:32

Eñallña poꞌpsheñeñ ñeñth eꞌñe no Nompor ñeñthña naꞌpotheneꞌña na. Ñamha neñoteñ ñerraꞌm ña naꞌpotheꞌpaꞌ ñeñth attho aꞌpothenen ñeñthña eꞌñe poꞌñoxh sherbets.

San Juan 5:43

Napaꞌ attho nowapa Nomporña nellsenseneꞌ tharraña sapaꞌ amaña sameꞌñenno. Ñerraꞌm eseshaꞌchña wapatsañ ñeñth eꞌñe ñotha wena saña ñeñthpaꞌ atarrtheꞌ sameꞌñyañ.

San Juan 6:42

Ñeñthpaꞌ ateth otyeset: —Añmapaꞌ añakaꞌye Jesús, José poechemer, ñeñth pompor ñamha pachor eꞌñekaꞌye yechmeꞌteñ. Theꞌñapaꞌ esoꞌmareꞌtña oten ñapaꞌ entothoꞌ wapa.

San Juan 7:14

Oꞌña patmaꞌnma attho koshenet Jesúsñapaꞌ beꞌthosos Parets paꞌpakllo, yexhatosanet all.

San Juan 8:14

Jesúsñapaꞌ oterraneterr: —Tharraña amaꞌt nañeña aꞌpothetsapaꞌ attho naꞌpothenapaꞌ eꞌñe sherben. Tharroꞌmar napaꞌ neñoteñ alloth nowapa ñamha neñoteñ allchaꞌ neserr. Sañapaꞌ ama señotenno alloth nowapa ñeñthoꞌmarña ama señoteñe allchaꞌ neserr.

San Juan 8:16

Tharraña ñerraꞌm esempo naꞌmethenanet ñeñth ateth nentapretyenanet ñeñthpaꞌ eꞌñe poꞌñoxh ateth tharroꞌmar napaꞌ ama naptheyeꞌ es nephaꞌyeno, napaꞌ xhokmaña epan Apa ñeñth nellsenseneꞌ.

San Juan 8:19

Ñetñapaꞌ ateth otereterr: —¿Erroꞌtsenaꞌtña pha Phompor? Jesúsñapaꞌ ateth oterraneterr: —Amaꞌt napaꞌ ama señotenno, Apapaꞌxhoꞌ ama señoteñe. Ñerraꞌm señotennoñ na Nomporeꞌnatheꞌ señoteneñ.

San Juan 8:26

Atarr nanak palltena xhokmach notenes ateth sepena sa, shonteꞌch neños añekop ateth nentyen. Tharraña ñeñth nellsenseneꞌ ñapaꞌ eꞌñe poꞌñoxh ateth oten ña. Napaꞌ añkaꞌyeña neꞌñoreññaña acheñeneshaꞌ arr patsro ñeñth ateth neꞌmoeññañ Apa.

San Juan 8:42

Jesúsñapaꞌ alla oterraneterr: —Ñerraꞌm poꞌñoxh Sompor sepeñeñ Parets atarrtheꞌ semorrentennañ na tharroꞌmar napaꞌ Partseshothkaꞌye nowapa oꞌ nexhap arr. Napaꞌ amakaꞌye nothayeꞌ nowapo, napaꞌ Yomporña nellsenseꞌ.

San Juan 9:29

Yapaꞌ yeñoteñ Paretspaꞌ eñoranaꞌtana Moisés, tharraña ñeñth yakmarpaꞌ ama yeñoteñe erroththeꞌña wapa.

Los Hechos 17:23

All naswanempaꞌ shonteꞌ nentyesnom ñeñth semaꞌyochyena ñeñth seyomporer sepen. Patherr allekma semaꞌyochenapaꞌ napaꞌ nent all oten añ ñoñets: “Añpaꞌ añekop Yompor ñeñth ama yeñotenaꞌ.” Ñeñth semaꞌyochena ñeñth ama señotenaꞌpaꞌ ñeñthara Yompor theꞌpaꞌ ñeñthchaꞌña neserrpareꞌtatas.

Romanos 1:28

Atthoña amaꞌt mamesha oꞌwañchaꞌ moeneñet oꞌch yerpaꞌpesyet Yompor. Ñeñthoꞌmarña Yomporñapaꞌ paꞌypoꞌñeñothanetpaꞌ awoꞌt moenatanet oꞌch kothapeꞌchatseꞌtyeset ñeñth ama pokteyeꞌ enteno ña. Añachña phatseꞌtyenet ñeñth ama aphapawoyaye.

2 Corintios 1:18

Tharraña napaꞌ ama attheyeꞌ nokthapeꞌcheno. Ñerraꞌm es notenes ñeñthchaꞌ ateth nephapaꞌ neyoxhroñapaꞌ ama esoyeꞌ nokthapeꞌcheno poꞌpoñ. Tharroꞌmar Yompor ñerraꞌm es oteney ñeñthchaꞌ ateth phonaypaꞌ atethchaꞌxhoꞌ pennay tharroꞌmar ñapaꞌ ama poenesho poꞌñoñ.

2 Corintios 4:6

Ñewa, yapaꞌ yeñoteñ ateth ot awath Yompor, ñeñthpaꞌ ateth ot: “Eñalletepaꞌch poetareꞌ allochñapaꞌ oꞌwañchaꞌ chekmet.” Ñeñthara Yompor theꞌñapaꞌ oꞌ aꞌpoetarsamperrnay yamha yeyoxher allochñapaꞌ atthoch yeñotater poꞌpotantañ acheñeneshaꞌ attho Cristopaꞌ ña orrtateneꞌ Pompor poꞌkowenña.

Hebreos 6:18

Ñeñthoꞌmar yeñoteñ Yomporpaꞌ eꞌñe epoch eñotateney eꞌñe poꞌñoxh atethchaꞌ perrnay, ñamha Yompor poꞌñoñpaꞌ ama xhoyeꞌ shekënye. Ñeñthoꞌmarña eꞌñe yeyemteñoth ñapaꞌ yeñoteñ poꞌñoxhpaꞌ aꞌkeshphatwerreychaꞌ ñeñth ateth oteney. Ñeñthoꞌmarña yekweñ amaꞌt alloweney ñeñthey eꞌneneꞌ ña ñachña yaꞌkeshphatwerreꞌ.

1 San Juan 5:10

Ñerraꞌm eseshaꞌch ameꞌñerraya Yompor Poechemer, ñeñthñapaꞌ echerranchaꞌ eꞌñe ña poeyoxhro ñeñthchaꞌ eñotaterreꞌ eꞌñe pokteꞌ oꞌch eꞌñe yemterrana Jesucristo ñeñth eꞌñe poꞌñoxh Yompor Poechemer. Ñeñthña ama ameꞌñenayo Yomporpaꞌ xha ottatateñ ñerraꞌmrratheꞌ ñapaꞌ atarr ashkañ tharroꞌmar ñeñth acheñerpaꞌ ama ameꞌñenano Yompor ñeñth ateth eñotateney Poechemerekop.