San Juan 3:21 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²¹ Añña ñeñth eꞌñe ateth peneꞌ ñeñth poꞌñoxh kowen enten Yompor, ñetpaꞌ eꞌñe pokteꞌ enteñet oꞌch onet alloꞌtsen ñeñth aꞌpoetarsamphsañtetsa tharroꞌmar ñetpaꞌ añ moenenet oꞌch eñotateret poꞌpotantañ ñetpaꞌ Yompor awamenkath penawet ñeñthoꞌmarña ñetpaꞌ añ orrtatyenet ñeñth kowen enten Yompor.

San Juan 3:21 Iomraidhean Croise

San Juan 1:47

Natanaelpaꞌ allentha awoꞌ oꞌch entenanaꞌ Jesús. Jesúsñapaꞌ entapan Natanaelpaꞌ ñañapaꞌ ateth eñora ñokop: —Añkaꞌyeña poꞌñoxh poesheñarr israelneshaꞌ ñapaꞌ amakaꞌye shekëno amaꞌt mamesha.

San Juan 3:20

Allowen ñeñth ama masosyayeꞌ kothapeꞌchyeneto ñetpaꞌ ama kowenayeꞌ enteñetoña Cristo ñeñth aꞌpoetarsampeneꞌ alloweney yokthaphña. Ñeñthoꞌmarña ama eneto alloꞌtsen ñeñth aꞌpoetarsamphsañtetsa thayeꞌtoꞌtheꞌ orrtatarethtet pokthaphñet ñeñth ama masosyo.

San Juan 5:39

Sapaꞌ añchaꞌ sethorraꞌyesa Yompor poꞌñoñ ñeñth ateth anwareth awathotheñ tharroꞌmar sapaꞌ xhatheꞌ sotenapañ eꞌñe ñoñtsochayothapaꞌ sapaꞌ korretsasatheꞌ errponowañen. Tharraña Yompor poꞌñoñ ñeñth anwareth awathotheñ ñeñthpaꞌ nakaꞌyeña aꞌpotheꞌth.

San Juan 7:17

Ñerraꞌm eseshaꞌña moeneꞌ oꞌch ateth pet ñeñth moenen Yompor ñetñapaꞌ eñochetchaꞌ neyxhateñpaꞌ Yomporo amakaꞌye nothayeꞌ neñeno.

1 Corintios 15:10

Tharraña amaꞌt ateth nepeꞌthpaꞌ Yomporpaꞌ atarr morrentna. Eꞌñe poemoereñothpaꞌ atthoña aꞌpnaserren ñeñth nanak sherbets ñokop. Tharraña ama orrena morrentno Yompor, tharroꞌmar theꞌpaꞌ nanak nethorrena Yomporekop. Poꞌpotantañ allsensarethneshaꞌpaꞌ amaꞌt thorraꞌyenet Yomporekoppaꞌ tharraña napaꞌ ello nanak nethorrena ateth thorrenet ñet. Ñewa, amaꞌt noteneñ napaꞌ nethorrena Yomporekop, poꞌñoxhpaꞌ ama nayeꞌ thorretso, añña Yompor poemoereñothpaꞌ ñeñthña thorretsa na nechtsoth.

2 Corintios 1:12

Ñewa, theꞌpaꞌ oꞌch notas poꞌpoñ ñeñth ateth nokthapeꞌchen. Napaꞌ ñeñthña atarr nokshateneꞌ nanak. Napaꞌ neñotena neyoxhro poꞌñoxh arr patsropaꞌ xhokma nokthapeꞌchen ñeñth ateth pokteꞌ enten Parets. Eꞌñe nameꞌñeñoth Yompor, napaꞌ ama nemno oꞌch eseshaꞌ neshkaꞌyes amaꞌt mamesha. Elloña sapaꞌ ama nemno oꞌch neshkas amaꞌt eꞌñe mamesha. Ama aña neyemteno ñeñth ateth yokthapeꞌchen ya acheñey arr patsro, añchaꞌña neyemteñoth Yompor atthoch ñach neyenpoeneꞌ. Eꞌñe poemoereñoth ñachña neñotateneꞌ ñeñth kowen enten ña.

Gálatas 6:8

Atthekma ñamha ñerraꞌm aña yephatseꞌtyen ñeñth ateth moenatseꞌtyen yechetspaꞌ ñeñthara ñeñth yephaꞌyenapaꞌ aꞌchenkataterreychaꞌ. Tharraña ñerraꞌm añ yokthapeꞌchen kowen ñeñth ateth kothapeꞌchateney Parets Poekamkëñpaꞌ ñeñthara Poekamkëñothpaꞌ yokrrerrach esempowañen. Ñatoꞌ oꞌch netmaꞌntatererr ateth: Ñerraꞌm theꞌpaꞌ eꞌñe kowen yenareꞌten, tsapathonethpaꞌ nanakchaꞌ koshaterrey. Tharraña ñerraꞌm theꞌpaꞌ ama kowenayeꞌ yenareꞌteno, tsapathonethñapaꞌ nanakchaꞌ llekaterrey.

Efesios 5:9

Ñewa, ñerraꞌm poetaroch yokrrena, ñeñthpaꞌ atethchaꞌ yorrtatyen. Eꞌñech kowenakma es yephannaꞌtyena ñeñth eꞌñe pokteꞌ enten Yompor ñamha ñeñthpaꞌ ama shekëñtsoyaye amaꞌt mamesha.

Filipenses 1:11

Ora ateth nenamoennas Yompor sokoppaꞌ ateth noten, eꞌñe sameꞌñeñoth Jesucristo poktakmapaꞌ añepaꞌchña kowen ateth sephaꞌyen ñeñth nanak sherbets Yomporekop. Ñerraꞌm ateth yepenapaꞌ atthochña eꞌñe kowen yaꞌkshapretarethtena Yompor poꞌkowenña.

Filipenses 2:13

Tharroꞌmar Yompora eꞌñe yemnateneꞌ eꞌñe yeyoxhro ñeñth kowen enten ña. Ñamha ñapaꞌ ñach awamenkath yepeneꞌ atthoch yetsotoñ amaꞌt ora erraꞌtsenchaꞌ koshateneꞌ ña.

Colosenses 1:29

Ñeñthoꞌmarña napaꞌ nanak nethorrena ñokop. Eꞌñe poꞌwamenko ñeñth atarr awamenkath nepeneꞌ atthoña napaꞌ xhokma atarr nethorraꞌyena ñokop.

1 San Pedro 1:22

Sapaꞌ oꞌ sameꞌñaꞌwa ñoñets ñeñth eꞌñe poꞌñoxh Yompor poꞌñoñ. Ñeñthoꞌmarña eꞌñe Parets poꞌwamenkoth oꞌ seswanom allpon sosyaꞌtsañ ñeñth seyoxhroꞌtsen, atthothchaꞌ eꞌñe semorrentannaꞌta. Theꞌñapaꞌ semorrentannaꞌtepaꞌch poktakma eꞌñe seyoxhrokmañen.

1 San Juan 1:6

Yapaꞌ amaꞌt yoteneñ oꞌ eꞌñe yeparrokmaterr epay Yompor, tharraña ñerraꞌm ora yorrtatyen ñeñth ama kowenayeꞌ enteno ña, yañapaꞌ attha yeshkën. Ñeñthoꞌmarchaꞌña xhach yottena ñerraꞌm chekmeta yechopeꞌchen tharroꞌmar ama eꞌñe yeyxhenaꞌ ñeñth eꞌñe poꞌñoxh kowen enten Yompor.

3 San Juan 1:11

Ñewa, masheñe, phapaꞌ amach peyxhapretatsto ñeñth ateth pentapreten ñeñth ama pokteyaye. Phapaꞌ añchaꞌña peyxhaꞌ ñeñth pentapreten attho eꞌñe pokteꞌ es phaꞌyenet. Ñeñthoꞌmarña ateth noteneph tharroꞌmar erraꞌtsen ñeñth eꞌñe pokteꞌ es petspaꞌ ñeñthkaꞌyeña Yompor poeyochreshaꞌ; ñeñthña ama pokteyeꞌ es phaꞌyetso ñeñthña amaꞌt mameshapaꞌ ama eñotenanoña Yompor.

El Apocalipsis 3:15

Cristoña theꞌpaꞌ ateth otenes: ‘Napaꞌ eꞌñe neñotwennas ñeñth ora allpon ateth sephaꞌyen. Tharraña sapaꞌ sekhllañothetsetsa sameꞌñenna, ama eꞌñe womenkayeꞌ sameꞌñenno. Ñerraꞌm ama semno oꞌch sameꞌñaꞌna womenkpaꞌ amachña sameꞌñatsetno amaꞌt mamesha. Tharraña sapaꞌ sekhllañothetsetsa sameꞌñenna. Ñatoꞌ oꞌch netmaꞌntacha ateth. Sapaꞌ ama attheyayso ñerraꞌmrratheꞌ oñ ñeñth atarr soseꞌ, ñamha ama attheyayso ñerraꞌmrratheꞌ oñ ñeñth atarr atserrsasen. Sapaꞌ attha sepena ñerraꞌmrratheꞌ oñ ñeñth mamesha shorrsastetsa ñeñth nanak netsenaꞌten. Ñeñthoꞌmarña napaꞌ eꞌñe ateth nentenes ateth ñerraꞌmrratheꞌ oñ ñeñth xha ayaꞌpesatañtena. Ñerraꞌm yorrpaꞌ xhach yaꞌpesatey oꞌch yaꞌtatstera. Ñeñthoꞌmarña sapaꞌ eꞌñe ateth nentenes xhach nemneñ oꞌch newaporeꞌtamperres.