San Juan 17:3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

³ Añmapaꞌ ñeñthña alloch ñetpaꞌ korretsetach thayotheñ eꞌñe errponañowen ñerraꞌm esempo eñoterrpet pha ñeñtheph phapoeth eꞌñe poꞌñoxh Yomporetets ñamha ñerraꞌm eñoterrnet na ñeñthen Jesucristo pha pellsensaren.

San Juan 17:3 Iomraidhean Croise

San Marcos 9:37

—Erraꞌtsenothes sa ñerraꞌm eꞌñe kowen sagëñ amaꞌt ñeñth ama asherbenayeꞌ entyeneto ateth ñerraꞌm añ cheshatholl tharroꞌmar sapaꞌ na sameꞌñena, naꞌnaña eꞌñe kowen sagën. Elloña ñamha erraꞌtsenothes sa ñeñthes nagëneꞌ na, ama eꞌñe napthocheyeꞌ sagëno, añeꞌnaña sagënnan Nompor ñeñth nellsenseneꞌ.

San Lucas 9:48

allempoñapaꞌ ateth otanet: —Erraꞌtsenothes sa ñerraꞌm eꞌñe kowen sagëñ amaꞌt ñeñth ama asherbenayeꞌ enteneto ateth ñerraꞌm añ cheshatholl tharroꞌmar sapaꞌ na sameꞌñena, naꞌnaña eꞌñe kowen sagën. Elloña ñamha erraꞌtsenothes sa ñeñthes nagëneꞌ na, ama eꞌñe napthocheyeꞌ sagëno, añeꞌnaña sagënnan Nompor ñeñth nellsenseneꞌ. Tharroꞌmar ñerraꞌm erraꞌtsenchaꞌ pokteꞌ enteneꞌ oꞌch yenpoenan amaꞌt ñeñth ama esoyeꞌ enteneto, ñetñapaꞌ atarrchaꞌ poꞌñoxh asherben entenanet Yompor.

San Juan 10:36

naña ñeñthen oꞌ nerren Yompor ñeñthen oꞌ moeñerren arr patsro, sapaꞌ achmharñathach sepenen tharroꞌmarothña napaꞌ noten Yompor Poechemeren.

San Juan 11:42

Ñewa, napaꞌ neñoteñ xhokma peꞌmhñotenen. Añña acheñeneshaꞌ ñeñth thomxhaꞌtets arr ñokpoet neparasyosoꞌteneph allochñapaꞌ atthoch eñotenpet pha ñeñtheph nellsenseneꞌ.

San Juan 14:26

Tharraña Parets Poekamkëñ ñeñthchaꞌ sokthapeꞌchaterreꞌ, Apapaꞌ moeñerrnaschaꞌ eꞌñe na nesoꞌchño eꞌñe seyemteñothen na. Ñapaꞌ ñeñthchaꞌ señotaterreꞌña seyoxhro ora allowen ñeñth xhokma neyxhatenes theꞌ. Ñamha ñeñthchaꞌ seyerpaterraya allowen ñeñth ateth notyesaseꞌth.

San Juan 17:18

Attho pha pemñan na arr patsro, theꞌña napaꞌ oꞌch nemñanet ñamet atthoch serrpareꞌtatyeset acheñeneshaꞌ arr patsro.

San Juan 17:21

Allochña allowenetpaꞌ parrokmatetchaꞌ ateth pepena pha Apa eꞌñe peparrokmatennana ñamha napaꞌ eꞌñe neparrokmatennapha. Allochña ñetpaꞌ oꞌch eꞌñe parrokmaterryet eꞌñe parro epay. Atthochña acheñeneshaꞌña arr patsropaꞌ ñetñapaꞌ eñoteretchaꞌ pha ñeñtheph nellsenserreꞌ.

San Juan 17:23

Napaꞌ neparrokmatenanet, phañapaꞌ peparrokmatenna. Allochña allowenetpaꞌ eꞌñech parrokmatwenet eꞌñe poktakma. Atthoch acheñeneshaꞌ arr patsro ñetpaꞌ eñoteretchaꞌ phapaꞌ pha nellsenserreꞌ. Ñamha eñoteretepaꞌch phapaꞌ atarr pemorrentenanet eꞌñe ateth atarr pemorrentenna na.

San Juan 17:25

Apa, pha ñeñtheph eꞌñe pokteꞌ es pets, acheñeneshaꞌ ñeñth ama ameꞌñetso arr patsro ñetpaꞌ ama eñotenpeto. Nañapaꞌ eꞌñe poꞌñoxh neñoteneph. Añña ñeñth eꞌñe neyemtenaya ñetñapaꞌ eñotenpet phapaꞌ pha nellsenseneꞌ.

San Juan 17:8

Napaꞌ añña neꞌñorenanet ñeñth ateth photenen pha. Theꞌña ñetpaꞌ eꞌñe kowen ameꞌñennet. Ñamha eꞌñe poꞌñoxh eñoteñet napaꞌ eꞌñe peshoth nowapa, pha ñeñtheph nellsenserreꞌ.

San Juan 3:17

Yomporpaꞌ amakaꞌye añekpayeꞌ moeñanoña Poechemer arr patsro atthoch moeñosan acheñeneshaꞌ koñcheñtso. Ñapaꞌ añekopña moeñe atthoch ñach aꞌkeshphatoseꞌña acheñeneshaꞌ arr patsro.

San Juan 3:34

Tharroꞌmar ñeñth llesensaꞌ Yomporpaꞌ Yomporo poꞌñoño eñorena tharroꞌmar Yomporpaꞌ ama atparethayaya chorratenanetoña Poekamkëñ.

San Juan 5:44

Sapaꞌ tharroꞌmarña ama sameꞌñenno sapaꞌ añakaꞌye seꞌnen oꞌch eꞌñe sañeña ayeꞌchoxhtatannetsa, amakaꞌyeña añeyeꞌña seꞌneno atthoch eꞌñe kowen entas ñapoeth Yompor.

San Juan 6:57

Apa ñeñth nellsenseneꞌ ñapaꞌ ama arromñatheshayaye, ñakaꞌyeña napoeneꞌña attho napaꞌxhoꞌña korretsanach. Ateth nepena namha, allowen ñeñth pokrramh nepeneꞌ napaꞌxhoꞌña añ napoenanet atthoch ñetpaꞌxhoꞌña korretsetach ñamet.

San Juan 7:29

Nañapaꞌ eꞌñe neñoteñ, ñeshothkaꞌye nowapa. Ñapaꞌ ñeñthkaꞌyeña nellsenserreꞌ.

San Juan 8:19

Ñetñapaꞌ ateth otereterr: —¿Erroꞌtsenaꞌtña pha Phompor? Jesúsñapaꞌ ateth oterraneterr: —Amaꞌt napaꞌ ama señotenno, Apapaꞌxhoꞌ ama señoteñe. Ñerraꞌm señotennoñ na Nomporeꞌnatheꞌ señoteneñ.

1 Corintios 15:34

Añña pokteꞌ oꞌch sokthapeꞌcherr ello, ñamha oꞌch sekexhpoerr ñeñth ateth sephaꞌyeseꞌth ñeñth ama pokteyaye Yomporekop. Theꞌpaꞌ sepenkëpaꞌ tharroꞌmar ñatoꞌ poꞌñoxh ama señoteñe Yompor allowenes.

1 Corintios 8:4

Theꞌpaꞌ oꞌ notwas ateth theꞌñapaꞌ oꞌch neserrpareꞌtatas ñeñth kowentetsa Yomporekop. Ñeñthey ameꞌñenaya Cristopaꞌ pokteꞌtheꞌ oꞌch yerren poꞌchets ñeñth amtsareth ayexhkatarethekop, ñatoꞌ amatheꞌ pokteyaye. Ñewa, yeñoteñ ñeñth ayexhkatareth ñeñth tomaꞌntatenet ñetpaꞌ poꞌñoxhpaꞌ ama eñalle Yompor ñeñth ateth. Yapaꞌ yeñoteñ Yomporpaꞌ eꞌñe pathrra.

2 Corintios 4:6

Ñewa, yapaꞌ yeñoteñ ateth ot awath Yompor, ñeñthpaꞌ ateth ot: “Eñalletepaꞌch poetareꞌ allochñapaꞌ oꞌwañchaꞌ chekmet.” Ñeñthara Yompor theꞌñapaꞌ oꞌ aꞌpoetarsamperrnay yamha yeyoxher allochñapaꞌ atthoch yeñotater poꞌpotantañ acheñeneshaꞌ attho Cristopaꞌ ña orrtateneꞌ Pompor poꞌkowenña.

Filipenses 3:10

Attho eꞌñe yeparrokmateñoth Cristopaꞌ oꞌch yagërrñañ poꞌwamenk attho ñapaꞌ nanak awamenkathtena allempotheñ tanterra poerromñoth. Ñamha eꞌñe yeyemteñoth Cristopaꞌ eꞌñech pokteꞌ yeñch amaꞌt eꞌñe errothenothpaꞌ oꞌch yemoeroxhta eꞌñe ñoꞌmara attho ñapaꞌ nanak amoeroxhtatarethteꞌth. Ñamha amaꞌt yemoeroxhetwaneñoth Cristokopchaꞌ yerromapaꞌ ñeñthpaꞌ eꞌñepaꞌch pokteꞌ yeñch tharroꞌmar atethchaꞌ yerromaprecha Cristo.

Filipenses 3:8

Amaꞌt elloneth allowen poꞌpoñexhno ñeñth nenteꞌth ñeñthoꞌch sherbhatseñ nokoppaꞌ theꞌña eꞌñe neyemteñoth Cristopaꞌ ama asherbenayeꞌ nenteñe, amaꞌt koñeꞌtha, tharroꞌmar theꞌpaꞌ oꞌ neyemtera Yepartseshar Cristo Jesús ñeñth nanak sherbets. Ñapaꞌ ello metanaꞌtwenan allowen poꞌpoñexhno ñeñth ateth nenteꞌth na ñeñthoꞌña nanak sherbets. Ñeñthoꞌmarña nemorrenteñoth Cristo theꞌpaꞌ oꞌ nepoeswerr ora poꞌpoñexhno, nokop theꞌñapaꞌ ama esoyeꞌ nenteñe eshekchaꞌ theꞌpaꞌ eꞌñech noksheñeshaꞌ nokther Cristo.

1 Tesalonicenses 1:9

Ñetñapaꞌ serrpareꞌtyenyet attho sapaꞌ eꞌñe kowen sagapapoey. Ñamha serrpareꞌtatannaꞌtyenet attho sapaꞌ oꞌ sokthapeꞌcherr ello kowen Yomporekop oꞌ sekexhpaꞌwerr ñeñth semchatseꞌtyeseꞌth ayexhkatareth. Theꞌña ñeñthpaꞌ oꞌ sekexhpaꞌwer eꞌñe poktakma atthothña allempotheñ eꞌñe kowen sesherber Yompor ñeñth ama arromñatheshayaye ñeñth eꞌñe poꞌñoxh Yompor.

2 Tesalonicenses 1:8

Allempoch werrapaꞌ koñchatwerranchaꞌ allowen ñeñth ama eñotayeꞌthe Yompor ñeñth ama ameꞌñaꞌpoyeꞌ entayeꞌthe kowen ñoñets ñeñth Yepartsesharekop Jesucristo.

Hebreos 3:1

Ñewa, masheñneshachaꞌ ñamha noxhaneshachaꞌ, sapaꞌ ñeñthes oꞌ saꞌkowentatarethterra Partsokop ñeñthes oꞌ xhoreꞌterres Yompor oꞌch xhapaterres all poeꞌntaño. Theꞌpaꞌ oꞌch notas, oꞌch sokthapeꞌch eꞌñe kowen ñeñth ateth perrnay Cristo Jesús ñeñth yameꞌñerra. Ñapaꞌ attho allsensarethtapaꞌ eꞌñe kowen etsotwan ñeñth ateth llesenseꞌ Pompor. Ñamha ñapaꞌ ña Yekorneshar yepen ñeñth atarr sherbets Partsokop allowenakpay ñeñthey ameꞌñenaya Yompor. Ñapaꞌ eꞌñe atthekma kowen etsotwan ora allpon ñeñth ateth moenach Pompor acheñeneshakop ateth peꞌth ñamha Moisés ñapaꞌxhoꞌña eꞌñe etsotan ñeñth ateth och Yompor allowen poeyochreneshakop. Ñewa, allowen ñeñth poeyochreneshaꞌ pen Yomporpaꞌ ñetpaꞌ paꞌpakëll penanet Yompor.

2 San Pedro 1:2

Eꞌñe newomhchaꞌteñothes sa napaꞌ oꞌch notas: Yomporepaꞌchña atarr sebensareꞌtampeneꞌ; ñepaꞌchña sokshateneꞌña eꞌñe sa seyoxhro allowenes eꞌñe seyemteñoth Yompor ñamha Poechemer Jesús ñeñth Yepartseshar yepen.

2 San Pedro 1:3

Eꞌñe yeyemteñoth Yompor ñapaꞌ xhokma apoeney allowen ñeñth allpon yepalltena alloch yokrrena eꞌñe kowen ñokop. Ñamha apoeney atthoch yokthapeꞌcherr ñeñth eꞌñe pokteꞌ enten ña. Ñeñthpaꞌ eꞌñe ña poꞌpartsoteñoth apoeney. Ñapaꞌ añ moenen oꞌch yekowentapretera ña. Ñamha añ atarr moenen oꞌch yorrtatapreter poꞌkowenña.

2 San Pedro 1:8

Ñerraꞌm atethchaꞌ sepha añexhno ateth ñeñth oꞌ notwaspaꞌ, allempoñapaꞌ alloꞌnach sesen parrokmatats epas Yepartseshar Jesucristo. Allochñapaꞌ amach eꞌñe orrena señotere, añchaꞌña eꞌñe sorrtatyen ñeñth ateth moenen Yompor. Allempoñapaꞌ nanakchaꞌ sesherberr Cristokop.

1 San Juan 1:2

Ñeñthña Jesucristo allempo acheñetos arr patsro yañapaꞌ eꞌñe yeñcheꞌth. Ñeñthoꞌmarña theꞌ yapaꞌxhoꞌña xhokma yeñotatenes samha. Ñeñthoꞌmarña yeserrpareꞌtatenes ñeñthña Cristopaꞌ ñeñth alloch yokrrena amaꞌt thayotheñ eꞌñe errponañowen. Ña awathpaꞌ eꞌñe parroꞌtsen epoet Pompor Parets. Theꞌña attho orrtosnaya arr patsro yapaꞌ eꞌñe yeñcheꞌth eꞌñe yeꞌmeꞌth ateth serrpareꞌtatyesyeꞌth. Ñeñthoꞌmarña theꞌ ya ñeñth ateth yentyeseꞌth, ñeñth ateth yeꞌmyesoñeꞌth, theꞌñapaꞌ oꞌch yeserrpareꞌtatas samha.

1 San Juan 1:3

Allochñapaꞌ atthoch alloweney yeparrokmaterr epay Yompor Parets ñamha Poechemer ñeñth Jesucristo.

1 San Juan 2:23

Allowen ñeñth aꞌnasotenaya Yompor Poechemer, ñetpaꞌ Pomporeꞌnaña ama agëññañeto. Tharraña allowen ñeñth otets, Jesúspaꞌ Yomporo Poechemer ñeñth Cristotets, ñetñapaꞌ eꞌñe agëññañet Pompor.

1 San Juan 4:6

Yaña poꞌñoxhpaꞌ Yomporenaꞌtarey. Ñeñth poꞌñoxh eñoteneꞌ Yompor, ñetñapaꞌ eꞌñech kowen eꞌmhñotenyet ya. Ñeñthña ama Yomporenaꞌtareyaye, ñetñapaꞌ amach eꞌmhñotenyeto. Yapaꞌ alloña yeñotenña kothaphñats ñeñth poꞌñoxh wetsa Yomporeshoth atthoña yeñotenña ñamha kothaphñats ñeñth shekëñets.

1 San Juan 5:20

Yañapaꞌ yeñoteñ ñeñth Poechemer pen Yomporpaꞌ ñañapaꞌ oꞌ wapa. Ñaña yexhapaterreꞌña yeyoxhro atthochña yapaꞌ oꞌch yeñoter Yompor ñeñth eꞌñe poꞌñoxh Parets. Ñeñthoꞌmarña yeñoteñ oꞌ yeparrokmaterr epay ñeñth eꞌñe poꞌñoxh Yompor Poechemer ñeñthpaꞌ Jesucristo. Atthoña yapaꞌ oꞌ eꞌñe yeñoter Yompor ñeñth eꞌñe poꞌñoxh Parets, ñeñthña yapaꞌ allochña eꞌñe korretsayach yoksheñeshokmañen thayotheñ eꞌñe errponañowen.