San Juan 15:5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁵ ‘Napaꞌ na atthen ñerraꞌmrratheꞌ uvachrexhmoꞌr poeꞌchor, sapaꞌ sa poetakres. Eseshaꞌ neparrokmaterreꞌ ñamha napaꞌ eꞌñech neparrokmatenanet, ñeñthchaꞌña nanak meꞌtats. Ñerraꞌm aꞌyoꞌtsensa neshoth amatheꞌ errothenoth sorrtatyesoña ñeñth kowen enten Yompor.

San Juan 15:5 Iomraidhean Croise

San Juan 12:24

Ñeñthpaꞌ eꞌñech poꞌñoxh ateth netmaꞌntatasa ateth pena poerets. Amaꞌt erraꞌtsena poertsor ama xho pampallmeꞌcho patso allchaꞌ poetsowa paꞌtall ñeñthach pathrrara poeꞌllomer. Tharraña ñerraꞌm xho pampallmeꞌcha patso allchaꞌ poetsaꞌ paꞌtall atthochña chop. Amaꞌt poellmharra pampallmeꞌchatsa atarrchaꞌ aton ellomhreꞌterr. Ñeñthpaꞌ añ notenes eꞌñe pokteꞌ oꞌch nerroma na ñeñthen poesheñarrana atthochña shonterra ñeñthchaꞌ nameꞌñerraya.

San Juan 15:16

Sapaꞌ ama sayeꞌ naꞌkrerraye, napaꞌ naña saꞌkrerreꞌña sa. Atthoña oꞌ napoerresña llesens atthoch seta meꞌtarsats atthoch eꞌñe kowen es sorrtatyen ñeñth kowen enten Yompor. Ñeñthpaꞌ ñeñthchaꞌ seꞌmer seperr ñeñthña seꞌmerpaꞌ amach awañañathterro amaꞌt awatha. Allochñapaꞌ amaꞌt erraꞌtsena senamoeñ Apa eꞌñe na nesoꞌchño eꞌñe seyemteñothen na, ñapaꞌ apaschaꞌ.

San Juan 5:19

Jesúsñapaꞌ ateth oterraneterr: —Eꞌñe poꞌñoxh notenes, na ñeñthen Poechemer pen Yompor amatheꞌ errothenoth es nephoña eꞌñe notha. Napaꞌ añña ateth nephaꞌyen ateth nenteññañ Apa, tharroꞌmar ñeñth ateth pen Apapaꞌ napaꞌxhoꞌña ñeñthen Poechemerenpaꞌ atethchaꞌ es nephaꞌyen namha.

San Juan 9:33

Ñerraꞌm ñapaꞌ ama Yomporeshoth wapañe amatheꞌ errothenoth kowaterrnoñe.

Los Hechos 4:12

Poꞌpsheñeñpaꞌ ama eñalle alloch yekeshperra, tharroꞌmar ama eñalle poꞌpsheñeñ ñeñth anareth ñeñthchaꞌ yexhoreꞌt atthoch oꞌch aꞌkeshphatey. Amaꞌt ora errakmañen añe patsro ama eñalle atthoch yekeshperra, ñapthaña Jesús. Ñeñthpaꞌ allowa ateth otanet Pedro.

Romanos 12:5

Ñamha atthekma yepena alloweney ñeñthey ameꞌñenaya Cristo. Amaꞌt shonteyeñ ñamha amaꞌtchaꞌ poꞌpoñeꞌttsokma yethorraꞌyesa ñokoppaꞌ ñañapaꞌ eꞌñech pathrra enteney, ateth ñerraꞌmrratheꞌ eꞌñe poꞌchets peney. Atthochña eꞌñech yeparrokmaten eꞌñe poesheñaꞌttsoy epay Cristo. Atthoña eꞌñe yeparrokmateñoth Cristopaꞌ oꞌch yeparrokmatwawa alloweney ñeñthey ameꞌñenaya Cristo.

Romanos 6:22

Tharraña theꞌpaꞌ oꞌwañchaꞌ alla tarwasaterryerr yoꞌchñar. Añchaꞌña yethorrateneꞌ Yompor poꞌtarwas atthoch yesherbeñ. Allochñapaꞌ ñach yetsaꞌtenaya alloch yaꞌkowentatarethterra eꞌñe kowen ñokop añe patsro. Allochñapaꞌ atthochña apwerrey allochña yapaꞌ korretsayach yoksheñeshokmañen thayotheñ errponañowen.

Romanos 7:4

Ñeñthoꞌmarña oꞌch, masheñnesha ñamha noxhanesha, notas, yapaꞌxhoꞌña oꞌwañchaꞌ amhchaꞌnoxhtanaꞌtenya añ ñoñets ñeñth ateth anareth awath Moiséseshoth, tharroꞌmar ñeñthey oꞌ yameꞌñerrapaꞌ oꞌ yerromapretera Cristo. Ñeñthoꞌmarña theꞌpaꞌ eꞌñe pokteꞌ oꞌch yoꞌpatera poꞌpsheñeñ. Ñamha ñeñth oꞌ yoꞌpaterra theꞌ, ñeñthpaꞌ Cristo ñeñthara ñeñth tanterrtsa rromoth. Allochñapaꞌ atthoch yorrtatyen ñeñth eꞌñe kowen ateth moenen Yompor.

1 Corintios 10:16

Ñeñthoꞌmarña allempo yorreññañ ñeñth tomaꞌntenaya Cristo poꞌrras ñeñth ateth anareth Yomporekoppaꞌ, xhoch ñanom yemaꞌyochampesya atthoch yeparasyosoꞌch Yompor. Allempo yorreñ alloweneypaꞌ eꞌñech yeyemteñoth Cristo ñeñth rromats yokop poꞌñoxhpaꞌ oꞌch yeparrokmatwa alloweney amaꞌt ñamha Cristo. Ñamha atthekmach yepena ñerraꞌm esempo yerren pan ñeñth tomaꞌntenaya Cristo poꞌchets. Allempo yeshotaꞌten pan, oꞌch yerreñ parro alloweneypaꞌ eꞌñech yeyemteñoth Cristo ñeñth aꞌrroyeꞌ poꞌchets yokop poꞌñoxh allempopaꞌ eꞌñe yeparrokmatwen alloweney amaꞌt ñamha Cristo.

1 Corintios 12:12

Ñatoꞌ oꞌch netmaꞌntacha ñeñth ateth yexhkëna yechets. Ñewa, allemeñ yechetspaꞌ amaꞌtchaꞌ ellopaꞌtetstenañpaꞌ tharraña allowenpaꞌ eꞌñe pathrra yechtsoth. Atthekma yepena yamha alloweney ñeñthey ameꞌñaꞌyenaya Cristo. Amaꞌt shonteyeñ poꞌpoñeꞌttsokmaypaꞌ tharraña eꞌñe yameꞌñeñoth Cristopaꞌ oꞌch yeparrokmatwawa alloweney.

1 Corintios 12:27

Ñewa, añ yechets ñeñth oꞌ notwapaꞌ añ tomaꞌntena ya alloweney ñeñthey oꞌ yameꞌñera, Cristopaꞌ oꞌ enterrey ateth ñerraꞌm eꞌñe ña poꞌchtsoy, tharroꞌmar oꞌ yeparrokmat epay Cristo. Ñamha amaꞌt shonteyeñ eꞌñe poꞌpoñeꞌttsokmaypaꞌ tharraña eꞌñe yeparrokmateñothpaꞌ oꞌ ateth yeperra ateth ñerraꞌm Cristo poꞌchtsoy.

2 Corintios 13:8

Tharroꞌmar napaꞌ ama nemno oꞌch nepatareꞌt ñeñth eꞌñe poꞌñoxh kowentetsa Yomporekop. Napaꞌ añña atarr nemnen oꞌch nepatwawoñ ñeñth eꞌñe poꞌñoxh kowentetsa ñokop.

2 Corintios 9:10

Yomporpaꞌ apoeneschaꞌ shonteꞌ esokmañen allochñapaꞌ atthoch xhokma sechenchaꞌ shonteꞌ atthoch seyenpoenanet paꞌnamenoth ñeñth kowentetsa Yomporekop. Ñamha ñapaꞌ alloꞌnach sen es sapoeneꞌ paꞌnamen allochñapaꞌ alloꞌnach sesen yenpoeneꞌ paꞌnamenoth ñeñth kowentetsa Yomporekop. Ñeñthpaꞌ ñerraꞌm netmaꞌntacha ñatoꞌ oꞌch not: Ñeñthara Yompor ñeñth yapoeneꞌ poerets ñeñthchaꞌ yenareꞌten oꞌch xhap allempo poꞌnenpaꞌ allempochña yeyoren ñeñthchaꞌ yerrar yepen, ñeñthpaꞌ Yomporña aꞌthoreneꞌ atthoch yaꞌyapaxheñ oꞌch yeshonteñ.

Gálatas 5:22

Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

Efesios 5:9

Ñewa, ñerraꞌm poetaroch yokrrena, ñeñthpaꞌ atethchaꞌ yorrtatyen. Eꞌñech kowenakma es yephannaꞌtyena ñeñth eꞌñe pokteꞌ enten Yompor ñamha ñeñthpaꞌ ama shekëñtsoyaye amaꞌt mamesha.

Filipenses 1:11

Ora ateth nenamoennas Yompor sokoppaꞌ ateth noten, eꞌñe sameꞌñeñoth Jesucristo poktakmapaꞌ añepaꞌchña kowen ateth sephaꞌyen ñeñth nanak sherbets Yomporekop. Ñerraꞌm ateth yepenapaꞌ atthochña eꞌñe kowen yaꞌkshapretarethtena Yompor poꞌkowenña.

Filipenses 4:13

Ñeñthoꞌmarña napaꞌ eꞌñe neñoteñ, yapaꞌ amaꞌt errothenoꞌtsenyapaꞌ xhokmach awamenkathey tharroꞌmar Cristopaꞌ ñach nanak awamenkath yepeneꞌ.

Filipenses 4:17

Ñewa, napaꞌ ama nokpayeꞌ nemnapretenso oꞌch es sapoenen. Añña nemnen ñamha allochñapaꞌ sokoppaꞌxhoꞌña ellopaꞌ oꞌch atonetnoma atthoch koshatwerres Yompor.

Colosenses 1:10

Allochñapaꞌ oꞌch eꞌñe seyxherr ñeñth ateth poktetsa allowenakop ñeñthey poeyochreshaꞌ pen Yepartseshar. Allochñapaꞌ atthochña eꞌñe sokshateñ. Eꞌñe attho es kowen sorrtatyenpaꞌ nanakchaꞌ kowenoth sesherbeñ. Alloꞌnepaꞌchña sesen eñotnomoeꞌ ñeñth ateth penaña Parets.

Colosenses 1:6

Ñeñthña kowen ñoñets ñeñth xhapats sesho ñeñthña theꞌpaꞌ allemeñ xhapyen, allpaꞌxhoꞌña nanak ameꞌñatenana shonteꞌ acheñeneshaꞌ. Allpaꞌ alloꞌna senet orrtatyeset ñeñth eꞌñe kowen enten Yompor. Ñetpaꞌ eꞌñe ateth penet ateth sepena samha. Sa poꞌñoxh allempo errtes eꞌmoerreꞌ Yompor poꞌñoñ attho ñapaꞌ atarr morrentenya, sañapaꞌ eꞌñe allempotheñ xhaponasa seyoxhro ñeñthña ñoñetspaꞌ eꞌñe poꞌñoxh Yomporo poꞌñoñ. Allempotheñña sapaꞌxhoꞌña alloꞌna sesen orrtatyesnomoeꞌ ñeñth eꞌñe kowen enten Yompor.

Santiago 1:17

Yomporpaꞌ eꞌñe kowenareꞌ es apoeney ñeñthchaꞌ alloꞌna yeyenpoeneꞌ ñeñthara ñeñth moeñennay poeꞌntañoth. Ñamha ñeñthara Yompor ñeñth yexhkateꞌ allowen ñeñth yexhoyoꞌtampeneꞌ poeꞌntañoth. Tharraña errotheno eꞌñe poechopeꞌcheñothpaꞌ amach tama xhoyoꞌtampenye. Tharraña Paretspaꞌ ama attheyeꞌ peno. Ñapaꞌ amach ellopaꞌ alla aꞌpoꞌpoñetamperrye ñeñth ateth moenateney.

1 San Pedro 2:4

Añ poktetsa oꞌch separrokmaterr epas Cristo. Cristo ñeñth atarr sherbets ateth ñerraꞌm mapoeꞌ ñeñth nenet kellpach paꞌrrphoth allo orratenet pokoll ñeñth nanak echarr. Tharraña mapoeꞌ amaꞌt nanak sherbenpaꞌ ama añeyaye alloch eꞌñe yokrra. Añña Cristo attho sherbenpaꞌ allochña eꞌñe yokrra poꞌñoxh. Amaꞌt acheñeneshaꞌ amaꞌt ama kowenayeꞌ enteñeto Cristopaꞌ Pomporñapaꞌ eꞌñe pokteꞌ enteñ. Pomporñapaꞌ ña akreꞌ ñeñthchaꞌ nanak sherbhats ñokop ateth ñerraꞌm mapoeꞌ ñeñth nanak kowen allochña thomatenan paꞌpakëll.

2 San Pedro 3:18

Añchaꞌña eꞌñe Yompor poemoereñothpaꞌ alloꞌnepaꞌch sesen kothapeꞌchnomoeꞌ eꞌñe kowen, ñamha alloꞌnepaꞌch sesen yemoetnomaya Yepartseshar Jesucristo ñeñthara Yaꞌkeshphatañer yepen. Yaꞌyeꞌchoxhtatoñepaꞌch thayotheñ eꞌñe errponowañen. Theꞌpaꞌ ñeñthach notas, ñeñthpaꞌ atthetepaꞌch Nompore. Allowa. Pedro