San Juan 14:27 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁷ ‘Nokshateña nenaꞌnerrnaschaꞌ alloch eꞌñe soksherra seyoxhro, napaꞌ xhochña atarr nokshaterres seyoxhro. Ñeñth ateth nokshatenes na seyoxhro ñeñthpaꞌ ama attheyaye ñerraꞌmrratheꞌ añ patsoꞌmar kosheñets. Ñeñthoꞌmarña seyoxhropaꞌ amach xha sellkaꞌpeno amaꞌt mamesha, amach xha es semhchaꞌteno.

San Juan 14:27 Iomraidhean Croise

San Mateo 10:26

‘Amaꞌt attheñpaꞌ tharraña sapaꞌ amach semhchaꞌtatstaneto tharroꞌmar yapaꞌ yeñoteñ allowen ñeñth attho eꞌñe aꞌnawa shekareꞌtyenet theꞌ, esempowañenñapaꞌ aꞌmethamphsarethterretchaꞌ. Amaꞌt allowen ñeñth eꞌñe aꞌnasotyenet theꞌpaꞌ esempowañenñapaꞌ eꞌñech eñotatarethetwerret.

San Lucas 1:79

Atthochña aꞌpoetarsamphsarethterra allowen acheñeneshaꞌ ñeñth chekmetoꞌtsaꞌyeneta, ñeñth ama eñotenaye Yompor, ñetñapaꞌ aña oꞌpatenawet rromoeñets ñeñthara koñcheñets. Ñeñth attho aꞌpoetarsamphsarethey ñeñthchaꞌña yeñotateneꞌ atthoch eꞌñe kowen yoksheñeshokmañen yeyxhena arr patsro. Arrpaꞌ allowa wañ attho Zacaríaspaꞌ axhotenan Yompor eꞌñe poksheñeshokmañen.

San Lucas 10:5

Allempoch sexhap amaꞌt erraꞌtsena anetsro all sesen, amaꞌt erraꞌtsena pokoll allchaꞌ sexhappaꞌ ñanomchaꞌ ateth sephosa. Eꞌñe sewomhchaꞌteñoth ñeñth apakllatheshaꞌpaꞌ oꞌch senamatosñañ Yompor paꞌnateña. Ñerraꞌm ñetña poꞌñoxh eꞌneññañet Yompor paꞌnateña, Yomporñapaꞌ aꞌnatenanetchaꞌ.

San Lucas 12:4

Theꞌpaꞌ oꞌch notas masheñneshachaꞌ, amach aña semhchaꞌtatsto ñeñthchaꞌ semtseꞌ. Tharroꞌmar añach moetsonaset sechets, sekamkëññapaꞌ amach errothenoth moetsonaseto.

San Lucas 2:14

Ateth otoset: ¡Ayeꞌchoxhtaterrapoꞌch Yeyomporer ñeñth poeꞌntañoꞌtsen! Amaꞌt ñamha acheñeneshaꞌ ñeñth añe patsroꞌtsen koshaꞌrrtetepaꞌ ñamet ñeñth koshaten Yompor.

San Juan 14:1

Jesúspaꞌ alla oterraneterr: —Seyoxhropaꞌ amach xha sellkatsto. Attho seyemteña Yompor napaꞌxhoꞌña xhoña seyemterrna.

San Juan 16:33

Ora allowen añexhnopaꞌ oꞌ eꞌñe notwas allochñapaꞌ eꞌñe seyemteñothen napaꞌ xhokmach sokshena seyoxhro. Poꞌñoxh añ patsropaꞌ xhokmach semoeroxhtena. Tharraña eꞌñe seyoxhro sapaꞌ xhokmoepaꞌchña sokshena tharroꞌmar napaꞌ oꞌ naꞌmchechatwe allowen ñeñth eꞌmoñeꞌteneꞌ Yompor añe patsroth.

San Juan 20:19

Ñeñthe yethrokma allempo mothtaꞌmoena yethñats temenk, ellerronethña poeyochreshaxhnopaꞌ apxhaꞌnenet. Ñetpaꞌ xha yoreꞌtenanet judioneshaꞌ ñeñthoꞌmarña ñetpaꞌ eꞌñe echarr yottampenet. Amaꞌt ateth yottampenetañpaꞌ Jesúsñapaꞌ xhepaꞌtchaꞌ beꞌthoswets. Eꞌñe rroxho thomwen allempoñapaꞌ ateth otwenanet: —Theꞌña poꞌñoxhpaꞌ xhosa kosherrtsa seyoxhro.

San Juan 20:21

Allempoña Jesúspaꞌ oterraneterr alla: —Theꞌña poꞌñoxhpaꞌ xhosa eꞌñe kosherrtsa seyoxhro. Attho na moeñan Apa, napaꞌxhoꞌña theꞌpaꞌ oꞌch nemñas samha.

San Juan 20:26

Allempoña posokmaterrpaꞌ poeyochreshaꞌñapaꞌ alla apxherreterr oꞌpono. Allempopaꞌ alloꞌtsen ñamha Tomás. Amaꞌt yetarrpaꞌ eꞌñe echarr ayotetwareth Jesúsñapaꞌ all beꞌthoswenerr thomwenerr eꞌñe allpaꞌ alla otwenaneterr: —Theꞌña poꞌñoxhpaꞌ xhosa kosherrtsa seyoxhro.

Los Hechos 10:36

Alla oterrerr Pedro: —Sapaꞌ señoteñeꞌtña Yomporpaꞌ oꞌ moeñonay Poechemer Jesucristo, ñeñthey judioneshakpay. Añ ñeñthara Jesúspaꞌ oꞌ aꞌpoktatwonay eꞌñe kowen Partsokop atthoch kosheñtsoꞌtseneychaꞌ. Theꞌñapaꞌ ñach Yepartseshar yeperr alloweney. Añ kowen ñoñetspaꞌ oꞌ serrpareꞌtwet errakmañen Judeoꞌmar. Ñanompaꞌ serrpareꞌcheteꞌth Galileo allempo apateꞌth Juanañ.

Los Hechos 18:9

Attheñapaꞌ orrtoña Pablo ateth ñerraꞌm xho es yexhopoꞌten. Yomporpaꞌ awoꞌt otan Pablo: —Amach pemhchaꞌtatsto, xhokmach peserrpareꞌt, amach attha pemamthetatsto.

Romanos 1:7

Theꞌpaꞌ eꞌñe newomhchaꞌteñothes sa, napaꞌ oꞌch notas: Yomporepaꞌchña sebensareꞌtampeneꞌ ñeñth nanak Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

Romanos 15:13

Yomporpaꞌ ñachña atarr ayemoetpoterrtsa. Ñamha ñepaꞌchña sokshateneꞌ eꞌñe poktakma. Allochñapaꞌ amach eñalle amaꞌt koñeꞌtha ñeñthchaꞌ sellkateneꞌ attho sameꞌñeña ña. Allochñapaꞌ Paretsña Poekamkëñpaꞌ ñachña awamenkath sepeneꞌ. Atthochña eꞌñech soksheñeshaꞌ sekwen ñeñth oꞌpatatensa Yompor.

Romanos 5:1

Ñeñthoꞌmarña theꞌpaꞌ yeñoteñ eꞌñe yeyemteñotha Jesucristo, Yomporñapaꞌ eꞌñe pokteꞌ enteney, oꞌwañchaꞌ yoroxhenoꞌtseney Yomporeshoth, tharroꞌmar Yepartseshar Jesucristopaꞌ awoꞌt aꞌpoktatwerrnay yoꞌchñar Yomporesho.

Romanos 5:10

Amaꞌt allempo ora yeꞌmoñeꞌteñ Yomporpaꞌ Poechemerña poꞌrromñothpaꞌ awoꞌt eꞌñe yamoꞌtstannerra epay Pompor. Elloña theꞌpaꞌ attho korrena Cristopaꞌ atthoña yapaꞌxhoꞌña aꞌkeshphaterreychaꞌ.

Romanos 8:6

Tharroꞌmar ñerraꞌm añach yeꞌnen ñeñth ateth moenatseꞌtateney yechetspaꞌ ñeñthpaꞌ ñeñthchaꞌña yanerreꞌ rromoeñtso ñeñthara koñcheñtso. Tharraña ñerraꞌm añ yeꞌmhñoten ñeñth ateth kothapeꞌchateney Parets Poekamkëñpaꞌ ñeñthpaꞌ ñeñthchaꞌña allochña yapaꞌ korretsayach eꞌñe kowen yoksheñeshokmañen.

1 Corintios 1:3

Theꞌña eꞌñe newomhchaꞌteñothespaꞌ oꞌch notas: Yomporepaꞌchña sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

Gálatas 1:3

Theꞌpaꞌ eꞌñe newomhchaꞌteñothes oꞌch notas: Yomporepaꞌchña sebensareꞌtampeneꞌ ñeñth atarr Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

Gálatas 5:22

Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

Gálatas 6:16

Yomporepaꞌchña saꞌnataya allowenes ñeñthes ateth petsa ñeñth ateth oꞌ notwas ñeñth kowentetsa Yomporekop. Ñamha Yomporepaꞌchña semoeraya allowenes ñeñthes poꞌñoxh Yomporenaꞌtares.

Filipenses 4:7

Ñerraꞌm atethchaꞌ xhokma sepena, Yomporpaꞌ ñachña ama semnatenaye oꞌch es senaꞌyen seyoxhro amaꞌt koñeꞌtha. Atthoch eñmataterrnay Yompor yeyoxherpaꞌ ya acheñey eꞌñe yokthaphñothapaꞌ amatheꞌ errothenoth eꞌñe yothapaꞌ yeñmataterro ateth. Ñeñthoꞌmarña eꞌñe yeparrokmateñoth epay Cristo Jesús, Pomporñapaꞌ kowampennaychaꞌ yeyoxher atthoch amach alloꞌna yenaꞌneno yeyoxhro ñeñth allkatañtetsa.

Colosenses 1:20

Ñañapaꞌ eꞌñe alla parrokmaten Pomporesho eꞌñe parrokma allowen esokmañen, amaꞌt ñeñth patsoꞌtsaꞌyen, amaꞌt ñeñth entoꞌtsaꞌyen. Allempo ashatarethta Cristo poꞌrras korsocho, ñeñthña eꞌñe aꞌmchechatweꞌña allowen esokmañen.

Colosenses 3:15

Attho Yompor oꞌ eꞌñe koshaterres seyoxhro, ñeñthchaꞌña sokthapeꞌchaterreꞌña eꞌñe kowen, tharroꞌmar ñeñthekopña oꞌ xhoreꞌterreyña Yompor atthoch eꞌñe yeparrokmatwerr alloweney ñeñthey ameꞌñenaya. Ñamha oꞌch notas: Sapaꞌ xhokmoepaꞌchña separasyosoꞌteñ Yompor.

2 Tesalonicenses 1:2

Eꞌñe newomhchaꞌteñothes sa napaꞌ oꞌch notas: Yomporepaꞌchña sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

2 Tesalonicenses 3:16

Yepartseshar ñeñth eꞌñe yokshateneꞌ yeyoxhro ñepaꞌchña sokshaterreꞌ sa seyoxhro amaꞌtchaꞌ errothenoꞌtsenes. Yepartsesharpaꞌ eꞌñepaꞌchña parro alloꞌtsenes allowenes.

2 Timoteo 1:7

Tharroꞌmar Yomporpaꞌ ama añekpayeꞌ chorratenyoña Poekamkëñ atthoch yapaꞌ oꞌch xha yemhchaꞌt, añekopña chorratenya atthoch awamenkath phaꞌy, ñamha atthoch yemorrentannaꞌta alloweney, ñamha atthoch eꞌñe kowen yorrtatyen ñeñth ateth moenen Yompor.

Hebreos 13:20

Theꞌñapaꞌ Yomporepaꞌchña eꞌñe awamenkath sepeneꞌ amaꞌt allowen paꞌnamenakop ñeñth atarr sherbets ñokop. Eꞌñe yameꞌñeñoth Poechemer ñeñth Jesucristo ñachña yaꞌkowentateneꞌña ora yokthaphña ñeñth ateth yokthapeꞌchyen yeyoxhro allochñapaꞌ atthochña eꞌñe kowen yokthapeꞌcherr ora allowen ñeñth kowen enten ña. Atthochña eꞌñech kowenareꞌ sorrtatyen ñeñth eꞌñe ateth moenen ña. Ñeñthpaꞌ ñeñthara Yompor ñeñth eꞌñe yokshateneꞌ yeyoxhro ñamha ñeñthara ñeñth tantaterreꞌ Poechemer rromoth ñeñth Yepartseshar yepen, Jesucristo ñeñthña atarr kowen yekwampeneꞌ ateth ñerraꞌmrratheꞌ ñeñth atarr kowen kowampeneꞌ poꞌcarneror. Eꞌñe poꞌrrasoña alloña aꞌpoktatonay ñeñth eꞌñe etserra ñeñthña aꞌpoktateñetspaꞌ amaꞌt errponañapaꞌ amach wañerro. Theꞌña eꞌñe thayotheñpaꞌ yekowentatoñepaꞌch Cristo amaꞌt errponowañen. Ñeñthpaꞌ atthetepaꞌch Nompore yokop.

Hebreos 7:2

Ora ñeñth allpon yoramphsan ñeñth oꞌ kellaraꞌwenaꞌpaꞌ allempoña Abrahampaꞌ apwenan korneshaꞌ Melquisedec allpon ñeñth Partsokop. Allpon apweñpaꞌ ñeñthpaꞌ ñeñth allpon otenet la décima parte. Ñeñthpaꞌ ateth ñerraꞌm es eñall ñeñth yechen xharrapaꞌttsokma, patheꞌtetsñapaꞌ oꞌch yeneñ eꞌñe Partsokop. Ñewa, ñeñth soꞌchñetser Melquisedecpaꞌ añ otenet “ñeñth pompor pen allowen amhchaꞌtarethexhno ñeñth eꞌñe pokteꞌ enten Parets.” Allothpaꞌ ñamha ñapaꞌ arr amhchaꞌtarethtena anetso añ paꞌsoꞌcheñ Salem. Ñeñth anetser paꞌsoꞌcheñ añ otenet “moechethteñtsompaño” tharroꞌmar all amhchaꞌtarethtena ñapaꞌ ña orrtateneꞌ eꞌñe kowen morrentannaꞌteñets atthoña yexhenet eꞌñe kowen moecheth.

El Apocalipsis 1:4

Napaꞌ oꞌch nekellkonas carta allowenakpas ñeñthes apxhaꞌyetsa eꞌñe sameꞌñeñoth Yompor all ñeñth poꞌpoñeꞌttsokma anets ñeñth kanxherr ñeñth Asioꞌtsaꞌyen. Eꞌñe newomhchaꞌteñothespaꞌ oꞌch notas: Yomporepaꞌchña semoeraya epoet ñamha Poekamkëñ epoet ñamha Poechemer ñeñth Jesucristo. Ñetepaꞌchña sebensareꞌtampeneꞌ. Añ ñeñthara Yompor ñeñth xhokma eñall, amaꞌt awathotheñ xhokma eñall ñamha ñeñthara ñeñthchaꞌ werrtsa poꞌpocheño. Ñamha Poekamkëñ ñeñthpaꞌ ñeñthara kanxherr ñeñth sherbhaꞌyets eꞌñe all poꞌkonaño eꞌñe poꞌpoñeꞌttsokma sherbenet. Ñamha ñeñthara Jesucristo ñeñth atarr ayemoetpoꞌ yenten ñeñth ora allpon ñeñth eñotateney; ñamha ñeñthara Jesucristo ñeñth ñanom tanterrtsa poerromñoth ñapaꞌ amach alla rromoerreꞌthe. Atthoña paꞌmhchaꞌtarether peñ allowen amaꞌt allowen amhchaꞌtarethexhno añe patsro. Yaꞌyeꞌchoxhtatoñepaꞌch ñeñthara Jesucristo ñeñth atarr amorrentña, eꞌñe ña poemorrenteñotheypaꞌ atthoña rroma yokop allochñapaꞌ atthoch ashatarethta poꞌrras eꞌñe yokop allochñapaꞌ atthoch eꞌñe eꞌshowarethterra yoꞌchñar.

El Apocalipsis 2:10

Amach yoreꞌtatstaso moeroxhteñets ñeñthchaꞌ awen sewapoya. Tharroꞌmar ñeñthchaꞌ seyottamphseꞌ patantaꞌttsos, ñeñthpaꞌ oneñetheshoth wena añekopña atthoch topatwas ñerraꞌm poꞌñoxhtheꞌ sameꞌñena. Poesheñaꞌttsos moeroxhtatasetchaꞌ eꞌñe xharramat. Amaꞌtchaꞌ moetsasetpaꞌ añ pokteꞌ oꞌch serromapes attho sameꞌñena. Allochña napaꞌ napwerreschaꞌ ñeñth noꞌpatatensa alloch sokrraꞌwerra eꞌñe soksheñeshokmañen. Ñeñthpaꞌ ñeñthara noten poꞌpoñ ñoñtso napwerreschaꞌ sepremio ñeñthchaꞌ sokshatwerreꞌ eꞌñe poktakma.

El Apocalipsis 21:8

Tharraña allowen ñeñth ama nameꞌñenayo ñeñth echarrtetsa poeyoxhro, ñetñapaꞌ aña oꞌpatenawet all parraren tsoꞌ errapharen, ñamha allowen ñeñth etsoteneꞌ sosyaꞌtsañexhno ñeñth atarr atsenaꞌtpoꞌ ñamha ñeñth amtsañneshaꞌ ñamha ñeñth kañoreshaꞌtets, ñetpaꞌxhoꞌña allowenetpaꞌ aña oꞌpatenawet all parraren tsoꞌ errapharen. Ñamha ñeñth amaseꞌñethexhno ñamha ñeñth poꞌyomporer phaꞌyeneꞌ ayexhkatarethexhno ñamha allowen ashkarñathexhno, ñetpaꞌxhoꞌña aña oꞌpatenawet all parraren tsoꞌ errapharen ñeñth wortets shemasher. Ñeñthpaꞌ allchaꞌ poepocheño rromoerret.