San Juan 13:14 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁴ Attho na neꞌpatkaꞌtas sa, amaꞌt na ñeñthen Separtseshar sepen ñamha Semaestror sepenen, sapaꞌxhoꞌña ñeñth eꞌñe poktetsa sokop seꞌpatkaꞌtannaꞌtepaꞌch samha. Ñewa, ñeñth poꞌñoxh notenes, ñeñthpaꞌ ateth: Amach sañeña atarr kowen entetso, atthochña eꞌñe kowen sesherbhannena.

San Juan 13:14 Iomraidhean Croise

San Juan 11:2

Ñewa, ñeñthña Maríapaꞌ ña aꞌyatkateꞌña Partseshaꞌ eñmosatho paꞌtko allempoña eꞌñe ña poeꞌchopaꞌ alloña aꞌporrarraꞌtkër, ña poꞌse Lázaropaꞌ xha atsnaꞌten.

Los Hechos 20:35

Eꞌñe na netarwasothpaꞌ xhokma neñotatenes ñeñth poktetsa oꞌch yetarwasaꞌ atthoch es yechyes alloch yeyenpoeꞌ ñamha poꞌpsheñeñ ñeñth es palltetsa. Añ pokteꞌ oꞌch yeyerpoeña ateth otyeꞌth Yepartseshar Jesús. Ñapaꞌ ateth oteꞌth: “Nanak yokshena ñerraꞌm esempo es yapaꞌyeñ poꞌpsheññexhno, añña ama tama yoksheno ñerraꞌm esempo poꞌpsheñeñpaꞌ oꞌch es apoeney ya.”

Romanos 12:10

Ñamha añ poktetsa amorrentannaꞌtpoꞌch yentannena alloweney ateth ñerraꞌm poꞌñoxh eꞌñe yemoꞌnasheñ yephannena. Oꞌch ateth yeñch poꞌpsheñeñ ñapaꞌ atarr sherben, amachña yañeña nanak asherben entetso.

Romanos 12:16

Amachña xha atsrreꞌmoxhen sentannaꞌteno. Ñamha amach aña seꞌnatsto atthoch sommoꞌchena. Añchaꞌña pokteꞌ senten oꞌch seyemteña ñeñth ama esosheꞌmayeꞌ entyeneto. Ñamha amach sentatsto sañeña, soꞌña eꞌñe sapoeth atarroꞌ es señoten.

1 Corintios 12:3

Tharraña ñerraꞌm machaya eseshaꞌ eñoratsa, napaꞌ nemneñ xhochña eꞌñe señoch ñatoꞌ poꞌñoxhtheꞌ añ eñorateneꞌ Parets Poekamkëñ, ñatoꞌ amatheꞌ. Ñeñthoꞌmarña oꞌch neñotatas ateth atthoch sapaꞌ señoch: Ñerraꞌm eseshaꞌ achmhareꞌteneꞌ Jesúspaꞌ ñeñthña sapaꞌ oꞌch señoch ama añeyeꞌ eñoratenaye Yompor Poekamkëñ. Tharraña ñerraꞌm eseshaꞌña otets: “Jesúspaꞌ ñeñth poꞌñoxh Yepartseshar yepen”, ñeñthña poꞌñoxhpaꞌ oꞌch señoch añ eñorateneꞌ Parets Poekamkëñ.

1 Corintios 8:13

Ñeñthoꞌmarña theꞌpaꞌ oꞌch notas ateth, ñerraꞌm esempo yerren poꞌchets ñeñth anareth ayexhkatarethekop, ñerraꞌm yerreñothpaꞌ ñatoꞌ yaꞌpoerratater yemoꞌnasheñpaꞌ eꞌñe pokteñ amach yerratsto ñeñth poꞌchets. Ñeñthoꞌmarña napaꞌ amaꞌt esempapaꞌ amach nerratsto ñeñth poꞌchets theꞌtaꞌ neyoren noꞌchñar nemoꞌnasheñekop atthothchaꞌ naꞌpoerratater.

2 Corintios 10:1

Ñewa, theꞌpaꞌ na Pablon oꞌch alla nokthapeꞌchaterrserr eꞌñe nemoereñothes atthen ñerraꞌm Cristo ñeñth nanak amoerañtostsa. Poemoereñothey ya ñapaꞌ eꞌñe pokteꞌ eñcheꞌth oꞌch ateth enteñet ñerraꞌm ñapaꞌ ama esosheꞌmayaye. Ñewa, sapaꞌ patantaꞌttsospaꞌ atthach sentenen ama erroth notenso atsrreꞌmoxhen ñerraꞌm esempo alloꞌtsenen sesho. Tharraña ñerraꞌm esempo allapharoꞌtsenen, allempo nekellkënnas cartapaꞌ allempoña sapaꞌ ateth sentenen ñerraꞌmrratheꞌ ama xhoyeꞌ nemhchaꞌtenso amaꞌt eꞌñe mamesha, eꞌñech echeꞌxharr notenes necartoth. Tharraña ñeñthpaꞌ ama attheyaye. Amaꞌt allempo alloꞌtsenen sesho, ñerraꞌm nemneñeñ ateth neꞌñoronasapaꞌ eꞌñetheꞌ echeꞌxharr neꞌñorennasa. Ñeñthoꞌmarña theꞌpaꞌ eꞌñe neyoxhrokmañen oꞌch notas, sokthapeꞌcherr kowen eꞌñe thayekma allochñapaꞌ ñerraꞌm esempoch nexherr seshopaꞌ amach xha seꞌñoratno echeꞌxharr. Tharroꞌmar ñerraꞌm ama sokthapeꞌcherro kowen, poꞌñoxh ñerraꞌm esempo nexherr seshopaꞌ xhach seꞌñoraten echeꞌxharr, ñeñthes noteneꞌ napaꞌ eꞌñoꞌ nañeña nokthaphñoth ateth es nephatseꞌtyen ñeñth ateth phaꞌyena acheñeneshaꞌ arr patsro, ñeñthpaꞌ eꞌñe ñokpoeta sherben. Tharraña napaꞌ ama attheyeꞌ nepeno.

2 Corintios 8:9

Ñewa, sapaꞌ oꞌ señoter ñeñth ateth pha Yepartseshar Jesucristo. Ñapaꞌ atarr amoerañtosa, ñapaꞌ esokmañen echeneñ Pomporesho, tharraña eꞌñe poemorrenteñothey ya, ñañapaꞌ attha wokchañetos. Allochña eꞌñe poewokchañeteñoth yokop, yañapaꞌ shonteꞌch esokmañen yecherr Yomporeshoth.

Gálatas 5:13

Tharroꞌmar sa masheñneshachaꞌ ñamha noxhaneshachaꞌ oꞌ waꞌñerres Yompor atthoch kowenoꞌtseneschaꞌ. Ñapaꞌ ama moeno oꞌch amhchaꞌnoxhtena sokop ñoñets ñeñth ateth anareth. Tharraña amaꞌt oꞌ waꞌñerrey Yompor atthoch kowenoꞌtseneypaꞌ ñeñthpaꞌ ama añekpayaye oꞌch yephaꞌyesa nanak sosey ñeñth ateth moenateney yechets. Ñapaꞌ moeneñ eꞌñe yemorrentannaꞌteñothpaꞌ oꞌch yeyenpannaꞌta, tharroꞌmar yapaꞌ kowenoꞌtseney.

1 Timoteo 5:10

Ñamha erraꞌtsentheꞌ senten ñeñth eꞌñe kowenareꞌ es pets, ñeñth eꞌñe kowen kowampeneꞌ poechoyoreshaꞌ, ñamha ñeñth nanak amoeraña, ñamha ñeñth eꞌñe kowen agëneꞌ poemoꞌtoꞌ, ñamha ñeñth eꞌñe poeñmañeshaꞌ sherbeneꞌ allowen ñeñth ameꞌñetsa, ñamha ñeñth nanak yenpoeneꞌ amaꞌt ñeñth moeroxhtetsa, ñamha ñeñth nanak phaꞌyeneꞌ poꞌpoñexhno ñeñth kowentetsa.

Hebreos 12:2

Añchaꞌña xhokmoepaꞌchña eꞌñe yeyemoetneña Jesús ñeñth orrtaterreꞌ atthoch yeyemtera ñamha ñeñthchaꞌ yetsotaterreꞌ ñeñth attho atarr yeyemoetneña. Tharroꞌmar ñapaꞌ eꞌñe pokteꞌ eñcheꞌth oꞌch awantaꞌwan allowen ñeñth echarr enteꞌth amaꞌt attho rroma korsocho. Amaꞌt ñeñth atarr apenkoxhen entyenet, ñapaꞌ eꞌñe poktakma awantaꞌwanemh. Tharroꞌmar eꞌñe poeyemteñotha Pompor ñapaꞌ eñoteñ ñach apapoerreꞌ ñeñthchaꞌña atarr koshatwerreꞌ. Ñeñthoꞌmarña theꞌpaꞌ oꞌ alla anorrwerr Pompor poꞌkowenroth all anen poꞌkonaño allña partsotwerr ñamha.

1 San Pedro 4:1

Cristo allempo añe patsroꞌtsenpaꞌ ñapaꞌ eꞌñe pokteꞌ enteñ atthoch moeroxhtateñet nanak. Ñeñthoꞌmarña sapaꞌxhoꞌ eꞌñepaꞌchña pokteꞌ senteñ oꞌch semoeroxhta eꞌñe ñokop. Eꞌñe yemoeroxhteñothpaꞌ oꞌch womenk yephaꞌ yeyoxher. Yemoeroxhteñoth yechtsopaꞌ oꞌch yekexhpaꞌwerr ñeñth ama pokteyaye Yomporekop.

1 San Pedro 5:5

Ñeñthes wepaneshas, theꞌpaꞌ napaꞌ oꞌch notas samha. Añ poktetsa oꞌch sameꞌñeña ñeñth poꞌn yakma ñeñth sompor sepen. Poꞌñoxh oꞌch notas allowenes, eꞌñech kowen sameꞌñannena amach sañeña eꞌñe kowen entatstatso tharroꞌmar: Yomporpaꞌ ama pokteyeꞌ entenano ñeñth ateth ommoꞌchetsa. Añña ñeñth ama esoyeꞌ entetso ñeñthña atarr moerenaña Yompor.