San Juan 12:27 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁷ ‘Theꞌ na neyoxhropaꞌ xha atarr nellkëna. Tharraña amaꞌt attheñpaꞌ Nomporña napaꞌ amach xha notatsche amach moenatano oꞌch wapona ñeñth atarr amoeroxhtatañ nenten. Ñeñth atethpaꞌ amach notatsche tharroꞌmarña napaꞌ ñeñthekopkaꞌyeña nowapa nach amoeroxhtatarethterrtsa. Añchaꞌña noch Nompor:

San Juan 12:27 Iomraidhean Croise

San Mateo 11:25

Allempoña Jesúspaꞌ maꞌyochenana Pompor, ñeñthpaꞌ ateth oten: —Na Apachaꞌ oꞌch naꞌyeꞌchoxhtatonaph, phapaꞌ pha ñeñtheph atarr ayochreshathtetsa peꞌntaño amaꞌt ñamha arr patsro. Naꞌyeꞌchoxhtatonaph tharroꞌmar ora añexhno ñeñth pekowenña pepen, ñeñthpaꞌ ama arreyeꞌ pexhapateñe poeyoxhro ñeñth atarr eñotañ entyetsa. Phapaꞌ aña pexhapaten poeyoxhreto ñeñth ama eñotañeyeꞌ entyetso.

San Mateo 11:26

Tharroꞌmar Apa eꞌñe pemoereñoth ñeñthpaꞌ atethña eꞌñe pokteꞌ penten pha. Arrpaꞌ allowa ñeñth ateth maꞌyochenana Pompor.

San Mateo 26:42

Jesúsñapaꞌ alla awerrerr poepocheño oꞌch maꞌyocherrerr, ñeñthara ateth otwerrerr: —Ñerraꞌm Apachaꞌ aña pemnaten oꞌch xhapona ñeñthchaꞌ atarr naꞌmoeroxhtateꞌ, ñerraꞌm ama errothenoth phaꞌwañatamperrno, ñeñthpaꞌ eꞌñe pokteꞌ. Añepaꞌchña ateth pephaton ñeñth pemnen pha.

San Mateo 26:45

Oꞌña maꞌyochwerrapaꞌ allempoñapaꞌ alla werrerr poeyochreshesho, ateth otwerraneterr: —Amaꞌt themeꞌttsenpaꞌ allaꞌt semanrren; amaꞌtpaꞌ alla sames. Theꞌpaꞌ señochepaꞌch oꞌ xhap allempoch pomataterrnet na Ñeñthen Acheñetosets atthothchaꞌ errothwanen perren ñeñth atarr ochñatheneshaꞌ.

San Lucas 22:44

Ñapaꞌ atarr nanak poellkëñeshaꞌ maꞌyochena; poemaꞌyocheñothpaꞌ atarr nanak ñorraꞌten. Poꞌñorrñapaꞌ xha watena ateth ñerraꞌmrratheꞌ errasats tsopsaꞌtets patso.

San Lucas 22:53

Napaꞌ allponmatwanen alloꞌtsenen Parets paꞌpakllo eꞌñe parro sesho, esoꞌmareꞌtña amaña allempokmayeꞌña serrmaꞌneꞌthe. Tharroꞌmar theꞌ oꞌ xhap allempo ñeñth poktetsa sokop ñeñthoꞌmar theꞌ oꞌ xhap allempoch oneñethpaꞌ oꞌch orrtatennas poꞌwamenk, ñeñthpaꞌ eꞌñe ateth ñerraꞌm chekmeteꞌ.

San Juan 11:41

Allempoñapaꞌ aꞌrrotheꞌtet mapoeꞌ aꞌyeneth, Jesúsñapaꞌ kowaꞌ enoneth ateth ot: —Apa, neparasyosoꞌtaph tharroꞌmar theꞌ phapaꞌ peꞌmhñotenen ñeñth ateth nenamoeneph.

San Juan 12:23

Jesúsñapaꞌ ateth otapanet: —Theꞌña poꞌñoxhpaꞌ oꞌ etsoterra allempoch na Ñeñthen Acheñetosetspaꞌ oꞌch alla kowentaterren Nompor.

San Juan 13:21

Jesúsña allempo ateth otwapaꞌ poeyoxhroñapaꞌ xha llekaꞌwena. Allempoñapaꞌ ateth otanet: —Poꞌñoxh theꞌpaꞌ oꞌch notas, poesheñarrothes sapaꞌ ñeñtheschaꞌ nepomoerreꞌ.

San Juan 18:37

Pilatoñapaꞌ ateth otererr: —Ñeñthepñapaꞌ pepaꞌtkaꞌyeña amhchaꞌtareth. Jesúsñapaꞌ ateth otererr: —Na poꞌñoxhpaꞌ amhchaꞌtarethenkaꞌye eꞌñe ateth photenen pha. Napaꞌ ñeñthoꞌmarña neꞌñalletosa añe patsro atthoch nach aꞌpothoseꞌ ñeñth eꞌñe poꞌñoxh Yompor pokthaphña. Allowen ñeñth moeneneꞌ ñeñth eꞌñe poꞌñoxh Yompor pokthaphña, ñetñapaꞌ eꞌmhñotennet.

1 Timoteo 1:15

Ñeñthoꞌmar theꞌpaꞌ oꞌ neñoter añepaꞌtña ñoñets ñeñth eꞌñe poꞌñoxh: Cristo Jesúspaꞌ añekopña wapa añ patso atthoch aꞌkeshphatosan allowen ochñatheneshaꞌ. Ñeñthoꞌmarña theꞌ napaꞌ neñotena, allowen ñeñth ochñatheneshaꞌpaꞌ na ello metanaꞌtwenawet poꞌchñaret. Ñeñthoꞌmar theꞌpaꞌ aña poktetsa oꞌch yameꞌñaꞌwerra ñeñthara añ ñoñets.

Hebreos 2:14

Ñewa, allowen ñeñth eꞌñe paꞌmoꞌnasheñekmoet phannetsa, ñetpaꞌ eꞌñe ñeñthenaꞌtarekmoet. Ñeñthoꞌmarña Jesúspaꞌ eꞌñe acheñetos atthoch paꞌmoꞌnasheñ phosey. Eꞌñe arromñathenaꞌtartosa eꞌñe ateth ñerraꞌmrratheꞌ ya. Ñapaꞌ tharroꞌmarña ateth phosa allochñapaꞌ atthoch rromos. Tharroꞌmar allempo rromapaꞌ atthoña poerratampeswan oneñeth poꞌwamenk attho atarr amhchaꞌnoxhtanaꞌteney allempo yerromoen.

Hebreos 5:7

Allempo alloꞌtsenmeñ Cristo arr patsropaꞌ maꞌyochamphsa ñañeña. Maꞌyochamphsa eꞌñe womenk poellkëñeshaꞌ. Poeyaꞌchpeñeshaꞌ enaman Pompor ñeñth atarr awamenkatheshaꞌ atthoch aꞌkeshphach poerromoeñoth. Eꞌñe pomhchaꞌnaꞌteñothan Pomporpaꞌ ateth och: “Amach añeyeꞌ ateth pephatstono ñeñth nemnen na; añchaꞌña ateth pephon ñeñth pemnen pha.” Ñeñthoꞌmarña Pomporpaꞌ eꞌñe eꞌmhñoch.