Gálatas 5:1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Cristopaꞌ oꞌ aꞌpoktaterrnay atthoch eꞌñe yameꞌñeñothpaꞌ kowenoꞌtseneychaꞌ. Atthoch yokoppaꞌ amach amhchaꞌnoxhteno ñoñets ñeñth ateth anareth judioneshakop. Ñeñthoꞌmar theꞌpaꞌ amach alloꞌna sameꞌñatsterrerro judioneshaꞌ pokthaphña ñeñth nanak amoeroxhtatañ. Eꞌñepaꞌchña womenk sephaꞌ seyoxher Cristokop.

Gálatas 5:1 Iomraidhean Croise

San Mateo 23:4

Ñetpaꞌ xhakaꞌye atarr atontatennasetña ñoñets ñeñthchaꞌ eꞌñe ateth sephoweneñ ñetpaꞌ ñeñthakaꞌyeña nennaset ñeñth atarr thorrapoꞌ sentyen. Ñeñthpaꞌ atethchaꞌ netmaꞌntacha ñetpaꞌ xhakaꞌye ottenet ñerraꞌmrratheꞌ añ wankënnaset ñeñth atarr eñerr seꞌmoen atthoch sechechnomh. Tharraña ñet amaꞌt mameshapaꞌ amaña anmapretenseto, amaꞌt potaphothetapaꞌ ama echantapretnenseto ñeñth chechatnenset.

San Lucas 5:38

Añña ñerraꞌm emasa vinos, arrchaꞌña yesheꞌ emerra orrotho ñeñth ayexhkatareth paꞌrrom. Allochñapaꞌ amaꞌtchaꞌ chasaꞌ vinospaꞌ amach xha potsaꞌphsoña vinos ñeñthpaꞌ allach yechen epoꞌmar. Ñeñthpaꞌxhoꞌña atthoña Jesúspaꞌ eñotatanet ña pokthaphña eꞌñe etserra.

Los Hechos 15:10

Theꞌñapaꞌ esoꞌmareꞌtña ama pokteyeꞌ senteñe ñeñth ateth oꞌ phowa Yompor. Añekop ñeñth ameꞌñetsapaꞌ esoꞌmareꞌtña semneñ oꞌch senanet ñeñth nanak thorrapoꞌ entenet. Amaꞌt ya judioneshaypaꞌ amach errotheno oꞌch yetsotwa allowen ñeñth ateth anareth. Amaꞌt yatañneshañpaꞌxhoꞌña ama etsoteteꞌthe.

Romanos 6:14

Tharroꞌmar theꞌpaꞌ amach errothenoth alloꞌna tarwasatnenye yoꞌchñar, tharroꞌmar theꞌpaꞌ añ yeyemtena Yompor attho moerenyapaꞌ awoꞌt aꞌpoktatonay yoꞌchñar. Ama añeyeꞌ yeyemteno ñoñets ñeñth ateth anareth ñeñthchaꞌ ateth yephowa eshekchaꞌ kowen enteney Yompor.

Romanos 6:18

Ñamha theꞌpaꞌ oꞌwañchaꞌ tarwasaterrserr soꞌchñar. Añchaꞌña setarwasaterreꞌ Yompor erraꞌtsentheꞌ moenen ña.

Romanos 7:6

Tharraña theꞌpaꞌ eꞌñe yerromapreteñoth Cristo añ ñoñets ñeñth ateth anarethpaꞌ oꞌwañ amhchaꞌnoxhtanaꞌtenya ateth ñerraꞌm awath. Ñeñthoꞌmarña theꞌpaꞌ eꞌñe kowen yokrrena Yomporekop. Theꞌpaꞌ ama añekpayaye ñeñth ateth yepeꞌth awath atthoch eꞌñe yaꞌmoeroxhtameꞌteñoth yetsotatwañ ñeñth ateth otyeꞌth ñoñets ñeñth ateth anareth. Añekopña yokrrena eꞌñe kowen Yomporekop tharroꞌmar theꞌ Parets Poekamkëñpaꞌ oꞌ etserrataterrnay yokthaphña.

Romanos 8:15

Ñeñthoꞌmarña amach alla yemhchaꞌterrerro ateth ñerraꞌmrratheꞌ ñeñth ñañrets, atarrchaꞌ mechaꞌtenan pamoꞌmteꞌ. Tharroꞌmar yapaꞌ allempotheñ oꞌ yagërrñañ Yompor Poekamkëñ yañapaꞌ oꞌ poechemer perrey poꞌñoxh. Ñeñthoꞌmarña amach yemhchaꞌnañotheyeꞌ yemaꞌyocheñothpaꞌ oꞌch yexhoreꞌch, oꞌch yoch: “Apa.”

Romanos 8:2

Tharroꞌmar theꞌpaꞌ ateth ñerraꞌm napaꞌ eꞌñe neparrokmateñoth Cristopaꞌ añña Parets Poekamkëñpaꞌ ñeñthña womenk nepeneꞌ neyoxhro, allochña napaꞌ korretsanach thayotheñ amaꞌt ñamha errponowañen. Atthothña oꞌ aꞌwañamperren attho noꞌchñarpaꞌ ñeñtha womenk nephayeꞌth neyoxhro, ñeñthchaꞌ nanmayeñ rromoeñtso, ñeñthara koñcheñets.

1 Corintios 15:58

Ñeñthoꞌmar eꞌñe nemorrenteñothpaꞌ oꞌch, masheñneshachaꞌ ñamha noxhaneshachaꞌ, noterrserr: Theꞌpaꞌ womenkëpaꞌch sephaꞌ seyoxher, amach sekexhpatstere. Ñamha xhokmoepaꞌch sethorrena Yomporekop. Ñamha sapaꞌ señochepaꞌch ñeñth attho yethorrena Yomporekoppaꞌ ama orrena yethorreno.

1 Corintios 16:13

Eꞌñe allowanenpaꞌ oꞌch noterrserr: Theꞌpaꞌ eꞌñech señota, tharroꞌmar xhokma eñall ñeñthchaꞌ yaꞌpsaterreꞌ Yompor. Ñamha eꞌñe sameꞌñeñothpaꞌ womenkëpaꞌch sephaꞌ seyoxher. Ñamha amach semhchaꞌtatsto, xhochña sewmenkta Yomporekop.

1 Corintios 7:22

Ñatoꞌ oꞌch netmaꞌntacha ateth: Eñall poesheñarr yakma ñeñth atarwasatareth eꞌñe attha, tharraña oꞌ xhap allempo agapan Yepartseshar ñeñthchaꞌ Pamoꞌmteꞌ perr. Allempopaꞌ amaꞌt atthera tarwasateñeñ ñeñth poꞌpatronar pen arr patsopaꞌ tharraña theꞌña Cristopaꞌ aꞌrroyatamper poꞌchñar ñeñth nanak tarwasatayeꞌth awaña. Theꞌpaꞌ añchaꞌña tarwasaterreꞌ Cristo ñeñth Yepartseshar yepen. Ñamha eñall poesheñarr yakma ñeñthñapaꞌ kowenoꞌtsen ñeñth ama atarwasataretheyaye. Ñapaꞌxhoꞌña oꞌ xhap allempoch agërran Yepartseshar Cristo ñeñthchaꞌ Pamoꞌmteꞌ perr. Theꞌña Pamoꞌmteꞌ Cristopaꞌ ñachña tarwasaterreꞌ eꞌñe kowen ñeñth awañapaꞌ ama atarwasatarethe eꞌñe attha.

2 Corintios 11:20

Amaꞌt ñet attho pomnaren penset, sañapaꞌ eꞌñech pokteꞌ senteñ. Amaꞌt es poerratamphsaset ñeñth allpon sechyen, sañapaꞌ eꞌñech pokteꞌ senteñ. Amaꞌt paꞌnamenoth shekareꞌtenset, sañapaꞌ eꞌñech pokteꞌ senteñ. Amaꞌt atarr poetsenaꞌteñothetaspaꞌ sañapaꞌ eꞌñech pomnaren sephatena. Ñerraꞌm esempo amaꞌt xho takllapechenset, sañapaꞌ eꞌñech pokteꞌ senteñ attho atarr penknaꞌntatenset.

2 Corintios 3:17

Ñeñth yoten Parets Poekamkëñ, ñeñthara Yepartseshar Cristo Poekamkëñ. Ñamha atarr kosheñtsoꞌtseney ñerraꞌm esempoch xhaponaya Cristo Poekamkëñ yeyoxhro. Oꞌwañchaꞌ yemoeroxhtameꞌta atthoch poechemer perrey Yompor, eꞌñech yoksheñeshaꞌ yokther Yompor.

Gálatas 2:4

Tharraña amaꞌt allempopaꞌ ama eñallñeña ñeñth thorrapoꞌ yentyenpaꞌ añña poesheñaꞌtetspaꞌ oꞌ wapyesa yesho. Ñamha ñetpaꞌ amaꞌt otenetañ awoꞌ ameꞌñerret ateth ñerraꞌm ya tharraña eꞌñe aꞌnawapaꞌ moeneñetañ awoꞌch nonayet ñoñets ñeñth nanak thorrapoꞌ yenten. Ñetpaꞌ añekpa wapoet aꞌnawa oꞌch eꞌmonayet attho yapaꞌ yoten eꞌñe yameꞌñeñotha Cristo Jesúspaꞌ oꞌch yekeshperra. Tharraña ñetpaꞌ aña moeneñetañ oꞌch alla nerrnayet judioneshaꞌ pokthaphña ñeñth nanak thorrapoꞌ yenten.

Gálatas 3:25

Tharraña theꞌña oꞌ yameꞌñera Cristopaꞌ ama yepallteno ñeñthchaꞌ alloꞌna yekwamphseꞌ.

Gálatas 4:26

Tharraña ñeñthey ameꞌñenaya Cristopaꞌ añ ñoñets ñeñth ateth anareth awathotheñpaꞌ ama amhchaꞌnoxhteno yokop. Eꞌñe yameꞌñeñotha alloweney Cristopaꞌ eꞌñe kowenoꞌtseney. Ñamha ñeñthpaꞌ eꞌñe kowen yenteñ ateth ñerraꞌmrratheꞌ yachor. Ñamha ñeñthpaꞌ atethchaꞌ netmaꞌntatererr ateth: Eꞌñe yeparrokmateñoth alloweney epay Cristopaꞌ eꞌñe atthey ñerraꞌm Yompor paꞌnetser etserra Jerusaléñ, ñamha ñeñthpaꞌ eꞌñe ateth yenteñ ñerraꞌmrratheꞌ yachor.

Gálatas 4:31

Ñeñthoꞌmarña theꞌ masheñneshachaꞌ ñamha noxhaneshachaꞌ oꞌch alla noterrserr: Ama pallteno oꞌch yameꞌña judioneshaꞌ pokthaphña. Ñatoꞌ oꞌch netmaꞌntacha ateth: Ama poechoyoreyayye Abraham poeñañra ñeñth paꞌtarwasañer eꞌñe attha. Añña poechoyorey Abraham poethapor ñeñth ama paꞌtarwasañreyaye. Ñeñthara ñeñth yoten eꞌñe yameꞌñeñotha Cristopaꞌ eꞌñech kowenoꞌtseney.

Gálatas 4:9

Tharraña theꞌpaꞌ oꞌ senterr ñeñth eꞌñe poꞌñoxh Yompor, amapaꞌ ñatoꞌ oꞌch yot, Yomporpaꞌ oꞌ enterres sa. Theꞌñapaꞌ esoꞌmareꞌtña semneñ oꞌch alla sepoerrerra, oꞌch alla sameꞌñerra añ kothaphñats ñeñth ama es sherbeno sañapaꞌ alloꞌch poꞌnoxh sekeshperra. Esoꞌmareꞌt semneñña oꞌch alla sethorrerrerr nanak ñeñth eꞌñe orrena.

Gálatas 5:13

Tharroꞌmar sa masheñneshachaꞌ ñamha noxhaneshachaꞌ oꞌ waꞌñerres Yompor atthoch kowenoꞌtseneschaꞌ. Ñapaꞌ ama moeno oꞌch amhchaꞌnoxhtena sokop ñoñets ñeñth ateth anareth. Tharraña amaꞌt oꞌ waꞌñerrey Yompor atthoch kowenoꞌtseneypaꞌ ñeñthpaꞌ ama añekpayaye oꞌch yephaꞌyesa nanak sosey ñeñth ateth moenateney yechets. Ñapaꞌ moeneñ eꞌñe yemorrentannaꞌteñothpaꞌ oꞌch yeyenpannaꞌta, tharroꞌmar yapaꞌ kowenoꞌtseney.

Efesios 6:14

Theꞌpaꞌ oꞌch neñotatas ñeñth apoeney Yompor ñeñthña yemoñenaya atthoch ama aꞌpoerrataterrye oneñeth allempo topateney. Ñatoꞌ oꞌch netmaꞌntacha ñeñth ateth paꞌnamen chorraꞌyena solltarneshaꞌ allempo kellarenet. Ñeñth ñanom ñeñthpaꞌ Yompor poꞌñoñ ñeñth eꞌñe poꞌnoxh ama shekëñtsoyaye amaꞌt mamesha. Ñeñthoꞌmarña yapaꞌ eꞌñech yeñmañeshaꞌ es yephaꞌyen, amach yeshkareꞌtannaꞌtyesatsto. Ñatoꞌ oꞌch netmaꞌntacha ñeñthpaꞌ ñeñthña yechanar yepen ñeñthchaꞌ awamenkath yepeꞌ ateth ñerraꞌm solltar apoeñet chanarets alloch chanena ñeñth kellaraten. Elloñapaꞌ eꞌñepaꞌch kowen es yephannaꞌtyesnoma ñeñth ateth eꞌñe pokteꞌ enten Yompor. Ñeñthpaꞌ añ tomaꞌntena asrom ateth ñerraꞌmrratheꞌ ñeñth chorrena solltar ñeñth aꞌnateneꞌ poesomap allempo kellarena.

Filipenses 1:27

Theꞌpaꞌ añach notas, xhokmoepaꞌch sokrra eꞌñe kowen ñeñth ateth yorrtaten ñeñthey ameꞌñenaya Cristo poꞌñoñ. Allochñapaꞌ ñerraꞌm machayotha nabhcherrsaꞌ amapaꞌ ñerraꞌm amaꞌtchaꞌ ama yabhchannerropaꞌ eꞌñepaꞌchña kowen neꞌmareꞌtenes attho eꞌñe womenk sepen seyoxher atthoch eꞌñe pathrra sokthapeꞌchen. Ñamha oꞌch neꞌmareꞌtas attho sapaꞌ semaꞌyoxhrena allowenes parro atthoch semoñena añ kowen ñoñets alloch yekeshperra.

1 Tesalonicenses 3:8

Attho sapaꞌ eꞌñe kowen womenk sepen seyoxher Yepartsesharekop, napaꞌ ñeñthña eꞌñe kowen nokshateneꞌ attho nokrrena arr patsro.

2 Tesalonicenses 2:15

Ñeñthoꞌmarña oꞌch, masheñneshachaꞌ ñamha noxhaneshachaꞌ, noterrserr: Sapaꞌ eꞌñepaꞌchña womenk sephaꞌnom seyoxher Yomporekop. Ñamha ora allpon ñeñth yeyxhatyesaseꞌth eꞌñe ya yenamoth yeserrpareꞌtataseꞌth amaꞌt ñamha yecartoth ñeñthñapaꞌ eꞌñepaꞌch womenk seyoxhreꞌcha.

Hebreos 10:23

Xhokmoepaꞌchña yekweñña ñeñth yeyemtena allochñapaꞌ aꞌkeshphaterreychaꞌ, amoepaꞌchña xha yeꞌcharrtatatstenoña yeyoxher tharroꞌmar Yompor ñapaꞌ xhokmach aꞌpoktaterrnay poꞌñoñ ñeñth ateth oteney.

Hebreos 3:14

Alloꞌnepaꞌchña eꞌñe womenk yephaꞌnom yeyoxher. Eꞌñepaꞌchña yeyoxhrokmañen yeyemteña Cristo ateth yepha allempo eꞌñe errtey ameꞌñenaya. Ñerraꞌm atethchaꞌ yeyemoetnomha allempopaꞌ yagapapreterchaꞌ Cristo ñeñth oꞌpatateña Pompor.

Hebreos 3:6

Ñapaꞌ añkaꞌyeña Poechemer pen Cristo ñeñthchaꞌ sherberrets tsapathoneth allowenakop ñeñthchaꞌ eꞌñe paꞌpakëll perr Pompor. Ñapaꞌ eꞌñe kowen etsoterran ñeñth eꞌñe Pomporekop. Alloweneypaꞌ eꞌñe paꞌpakëll phoweney Yompor allchaꞌ yexhena ña ñerraꞌm alloꞌnach womenk yeyemoetneña atthochña eꞌñe yoksheñeshokma yekwaꞌwanom ñeñth oꞌpatatenya.

Hebreos 4:14

Ñewa, yeñoteñ eñall ñeñth Yekorneshar yepen ñeñth atarr Partseshatets, ñeñthpaꞌ ñeñthara Jesús ñeñth Yompor Poechemer. Ñañapaꞌ oꞌ alla xherr allowanen poeꞌntaño eꞌñe all Pomporesho, allña eꞌñe kowen aꞌpoktatennay yokop. Ñeñthoꞌmarña yapaꞌxhoꞌña alloꞌnepaꞌch yeyemoetneña. Amoepaꞌchña yekexhpatstere.

1 San Pedro 2:16

Ñamha eꞌñech sameꞌña kowen amaꞌt Yompor poꞌñoñpaꞌ ama amhchaꞌnoxhenayeꞌ senteñe sokop. Tharraña amaꞌt ama amhchaꞌnoxhteno poꞌñoñ yokoppaꞌ amach alloꞌna yephaꞌyesneno ñeñth sosyaꞌtsañ. Añchaꞌña oꞌch ateth yameꞌña attho poeyochreshaꞌ perrey Yompor.

2 San Pedro 2:19

Ñeñth ama Yomporeyeꞌ poꞌñoñ yexhatetsopaꞌ oꞌch alla oterraneterr: “Ama palltenoña oꞌch es yeswanom. Yapaꞌ eꞌñe kowenoꞌtseney. Yokoppaꞌ ama eñalleña ñeñthchaꞌ yeyoreꞌterreꞌ.” Amaꞌt ateth oteneñ ñeñth athpareꞌtetspaꞌ tharraña napaꞌ oꞌch notas, ñeñth atethpaꞌ aña yexhenet eꞌñe ñet pokthaphña ñeñth nanak sosyareꞌ. Tharroꞌmar ñerraꞌm erraꞌtsen es yeyxhateneꞌ ñeñthpaꞌ ñeñthaña pomnaren yepeneꞌ.

San Judas 1:3

Theꞌpaꞌ oꞌch notas, masheñneshachaꞌ ñamha noxhaneshachaꞌ napaꞌ atarr nemneñ oꞌtheꞌ nekellkonas atthoch neñotatas ñeñth eꞌñe errothenothchaꞌña aꞌkeshphatarethey eꞌñe alloweney ñeñthey ameꞌñenaya Jesucristo. Tharraña theꞌpaꞌ añ nenten ñeñth atarr palltetsa oꞌch notas, nankëpaꞌch semaꞌyoxhra añ ñeñth attho yameꞌñena atthochña eꞌñech kowen semoñena, atthoch amach semnateñe amaꞌt poesheñarra oꞌch aꞌpoꞌpoñetonaset ñeñth ateth yameꞌñeña Jesucristo.

El Apocalipsis 2:25

Añña notenes, amach sekexhpatsche ñeñth attho sokthapeꞌchen kowen Yomporekop, amaꞌt thayotheñ ñamha esempowañen allempoch nowerra.

El Apocalipsis 3:3

Xhokmachña seyerpoeña ñeñth attho aserrpareꞌtatarethes awañmoꞌchotheñ. Amach sepsatsche añ ñoñets ñeñth sameꞌñataya. Ñeñthoꞌmarña theꞌpaꞌ añ poktetsa oꞌch alla sokthapeꞌcherr kowen Yomporekop. Ñerraꞌm ama attheyeꞌ sepeno napaꞌ machayothach nowerrnasa ateth ñerraꞌmrratheꞌ eñethpaꞌ amach señoteñe esempopaꞌ machayothach waponasa.