Efesios 6:11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹¹ Ñeñthoꞌmarña añ poktetsa yokop oꞌch yagërrñañ ora allpon ñeñth apoeney Yompor allochñapaꞌ ñeñthchaꞌña yemoñenaya atthoch amach alla aꞌpoerrataterrye oneñeth. Tharroꞌmar yeñoteñ oneñethpaꞌ xhokma eꞌnenan atthoch shekareꞌteney.

Efesios 6:11 Iomraidhean Croise

San Marcos 13:22

Orretyerrachkaꞌye ñeñthchaꞌ otyerrets ñapaꞌ ñoꞌña Cristotets. Tharraña ñeñthpaꞌ atthachkaꞌye shekareꞌtyerranña acheñeneshaꞌ. Orretyerrach ñamha ñeñthchaꞌ otyerrets ñapaꞌ ñoꞌña aꞌmhteneꞌña Yompor poꞌñoñ, tharraña ñeñthpaꞌxhoꞌña eꞌñech atthekma shekareꞌtyerran acheñeneshaꞌ, amachña Yomporeyeꞌña poꞌñoñ aꞌmhteno. Ñeñthchaꞌ ateth shekareꞌtyerrets, ñetñapaꞌ orrtatyerretchaꞌ ñeñth amaꞌt awatha acheñeneshaꞌpaꞌ ama poentare, atthochña kowanrrortateretña acheñeneshaꞌ. Amaꞌt ñeñth Yompor paꞌkrarnesharpaꞌ moeneñetañchaꞌ ñeñtheꞌnachña shekërret.

Romanos 13:12

Arr patsropaꞌ eñall shonteꞌ sosyaꞌtsañexhno. Ñatoꞌ oꞌch yetmaꞌntacha ateth ñerraꞌmrratheꞌ yapaꞌ chekmeta yeyxhena. Tharraña theꞌpaꞌ eꞌñe ateth pena ñerraꞌmrratheꞌ oꞌ metwamoch chekmeteꞌ oꞌ poetarenmoch, tharroꞌmar yapaꞌ yeñoteñ oꞌ xhapmoch allempoch werra Cristo. Ñeñthoꞌmarña añ poktetsa oꞌch yeswanom allowen ñeñth ama kowenayaye ñeñth ateth atmaꞌntatareth chekmeteꞌ. Añchaꞌña ateth yephaꞌyen ñeñth kowen enten Yompor ñeñth ateth atmaꞌntatareth poetareꞌ. Atthochña yethorrena Yomporekop ateth ñerraꞌmrratheꞌ xho yekhllarena ñokop.

Romanos 13:14

Añchaꞌña awamenkath sepeneꞌ Yepartseshar Jesucristo, allochñapaꞌ atthoch amach semnatatsto sechets oꞌch moenatseꞌtatas ñeñth ama kowenayaye.

1 Corintios 10:13

Tharroꞌmar alloweneypaꞌ xhokmach waponaya topateñets, ñeñthara topateñets ñeñth yexhenoya alloweney ñeñthey arromñathey. Tharraña Yomporpaꞌ xhokmach yeyomcha tharroꞌmar ñapaꞌ ama moenatenye oꞌch topatey atthoch metanonay yewamenk. Tharraña ñerraꞌm esempoch xhaponaya topateñetspaꞌ ñapaꞌ xhokmach orrtatonay atthoch yaꞌwanteꞌ atthoch amach metanonaye yewamenk.

2 Corintios 10:4

Tharroꞌmar ñeñth ateth yemaꞌyoxhrena Yomporekoppaꞌ ñeñthpaꞌ ama añeyaye ñeñth ateth yokthapeꞌchen ya acheñey arr patsro. Añña attho yemaꞌyoxhrena ñokop, eꞌñe ña poꞌwamenkoth ateth yepena. Atthochña yewaporeꞌtoñ allowen ñeñth epatareꞌteneꞌ Yompor pokthaphña.

2 Corintios 11:3

Tharraña napaꞌ xha sellkatenen. Napaꞌ noten sapaꞌ oꞌtheꞌ xha semnatena oꞌch shekaset samha, ateth pha awath shecheph allempo shekan Eva tharroꞌmar ñeñth shechephpaꞌ atarr etsotenan shekëñets. Ñerraꞌm sapaꞌxhoꞌña poeshkëñothetaspaꞌ añach yexhatenset ñeñth ama kowenayaye kothaphñats, ñeñthoꞌmarña oꞌwañchaꞌ alloꞌna sesen ameꞌñenaya Cristo ñapoeth ñeñth eꞌñe kowen.

2 Corintios 2:11

Ñamha añ eꞌñe poktetsa oꞌch yephretnannena. Allochñapaꞌ amaꞌt oneñethpaꞌ amach alla aꞌpsaterrye Yompor. Tharroꞌmar ñapaꞌ yeñoteñ xhokma eꞌnenan atthoch shekëney.

2 Corintios 4:4

Ñeñthara acheñeneshaꞌ ñeñth ama ameꞌñetso, ñetpaꞌ añña poꞌyomporer penet arr patsro ñeñth oneñeth, ñeñthña ama moenatenaneto oꞌch xhapanet poeyoxhreto Yompor poꞌñoñ; allochñapaꞌ atthothchaꞌ amach eshkayeꞌ kowen enteññañeto Cristo poꞌkowenña. Ñapaꞌ atthekma kowentena ñerraꞌmrratheꞌ Pompor Parets ñeñth ama entpawoyaye. Ñeñth poꞌkowenñapaꞌ ñeñthara yoten kowen ñoñets alloch yekeshperra. Ñatoꞌ oꞌch netmaꞌntacha attho oneñethpaꞌ aꞌnataklleꞌchenanet atthochña amach eshkayeꞌ kowen enteññañeto Cristo poꞌpoetarenña.

2 Corintios 6:7

Ñamha attho yeꞌñorena ñeñthpaꞌ eꞌñe poꞌñoxh ateth. Yomporña poꞌwamenk ñeñth awamenkath yepeneꞌ. Ñamha ñeñth eꞌñe pokteꞌ enten Yompor, ñeñthpaꞌ ñeñthña allo xhokma es yephaꞌyen, alloña yekhllarena Yomporekop, ñeñthpaꞌ alloña yemoñeññaña Yompor pokthaphña.

Efesios 4:14

Ya theꞌpaꞌ ama attheye ñerraꞌm cheshaneshaꞌ ñeñth ama es eñotetso ñeñth epwoyeꞌ kothapeꞌcheneꞌ kowen. Ñewa, ateth ñerraꞌm cheshaneshaꞌ theꞌpaꞌ ñatoꞌ poꞌpoñchaꞌ kothapeꞌchyenet, ñatoꞌ tsapathñapaꞌ oꞌchxhoꞌ kothapeꞌchyeneterr poꞌpoñ. Yapaꞌxhoꞌña ateth yepena yamha allempo ama yepoꞌnenaꞌ Cristokop. Yaña ñeñthey ama epwoyeꞌ yoktheñe Cristopaꞌ amach errothenoth yeꞌmhñocheña ya ashkañ atthoch ameꞌñatya ña pokthaphña, aththoch oꞌch pantatey.

Efesios 4:24

Añepaꞌchña chorraterrsa Yompor ñeñthchaꞌ sokthapeꞌchaterreꞌ kowen eꞌñe etserra. Ñeñthpaꞌ atthochña etserrataterrnas Yompor sokthaphña eꞌñe ateth kothapeꞌchen ña. Allochñapaꞌ atthoch eꞌñe pokteꞌ es sephaꞌyen arr patsro ñeñth eꞌñe poꞌñoxh kowen enten Parets.

Efesios 6:13

Ñeñthoꞌmarña notenes, oꞌch sagërrñañ allowen allpon ora ñeñth apoeney Yompor allochñapaꞌ ñeñthchaꞌña allo yemoñena atthoch amach alla aꞌpoerrataterrye oneñeth ñerraꞌm esempo atarr nanak topateney. Tharraña amaꞌt allempo paꞌnamenoth atarr topateney yañapaꞌ amach errothenoth aꞌpoerrataterrye.

Colosenses 3:10

Sapaꞌ añchaꞌña sechorrerraya ñeñth etserra ñeñthchaꞌña sokthapeꞌchaterreꞌ ello etserra allochña setserrataterrña sokthaphña. Atthoña eꞌñe setserrateñothpaꞌ oꞌch sokthapeꞌcherr eꞌñe kowen ñeñth ateth kothapeꞌchen Yompor ñeñth seyexhkateꞌ. Atthochña sapaꞌ alloꞌnach sesen eñotneneꞌ ñeñth ateth kothapeꞌchen ña.

1 Tesalonicenses 5:8

Tharraña yapaꞌ yethoꞌmarneshay ñeñthoꞌmar xhokmoepaꞌch eꞌñe yeñoteñoth yeñoseꞌreꞌtyeswena. Eꞌñe yameꞌñeñoth Yompor ñamha yemorrentannaꞌteñoth ñeñthña kowampeneꞌña yeyoxher Yomporekop atthoch amach aña yokthapeꞌchatsto ñeñth ama pokteyeꞌ enteno Yompor. Ñeñthpaꞌ añ tomaꞌntena asrom ateth ñerraꞌmrratheꞌ ñeñth chorrena solltar ñeñth aꞌnateneꞌ poesomap allempo kellarena atthoch ama etarethteneto. Ñamha yapaꞌ yeyemteñoth Cristo theꞌñapaꞌ eꞌñe aꞌkeshphatarethey ñeñthpaꞌxhoꞌña ñeñthña yemoñenaya. Ñeñthpaꞌ añ tomaꞌntena ateth pena solltar oꞌch naꞌnman asret poño atthoch ama ettoꞌtarethteto.

Hebreos 7:25

Ñeñthoꞌmar Cristopaꞌ ña eñoteneꞌ atthoch xhokma aꞌkeshphatenan allowen ñeñth eꞌneneꞌ Yompor ñerraꞌm eꞌñe poeyemteñothet ña, tharroꞌmar ñapaꞌ xhokma alloꞌtsen Pomporesho allekma aꞌpoktatennay ñeñth eꞌñe kowen yokop.

Santiago 4:7

Ñeñthoꞌmarña sapaꞌ xhokmach eꞌñe kowen sameꞌñeña Yompor. Añchaꞌña sathpareꞌt oneñeth tharroꞌmar ñerraꞌm atethchaꞌ sephapaꞌ, oneñethpaꞌ kexhpaꞌnerreschaꞌ.

1 San Pedro 5:8

Eꞌñe señotateñothpaꞌ señotaꞌthach, tharroꞌmar oneñeth ñeñth seꞌmoñeꞌteneꞌpaꞌ xhokma chopeñeꞌchen errapharen ateth ñerraꞌm maꞌyarr, xhach amhchaꞌnoxhetnena eꞌnyeseꞌ ñeñthchaꞌ aꞌchenkat.

San Judas 1:24

Theꞌña Yompor ñeñth eꞌñe ñapoeth partsotets, ñeñth allowen es eñotyets, ñamha ñeñth Yaꞌkeshphatañer yepen, ñañapaꞌ atarr awamenkatheshaꞌ, ñachña awamenkath sepeneꞌ allochñapaꞌ amach alla seshoraꞌnerro. Atthochña sapaꞌ xhapatwerreschaꞌ eꞌñe ñesho all atarr kowentena ña. Eꞌñech soksheñeshokmañen sexhaxherr, amach eñalle amaꞌt koñeꞌtha ñeñthchaꞌ entapreterres ñeñth ama pokteyeꞌ enteno ña. Theꞌpaꞌ eꞌñe yameꞌñeñoth Yepartseshar Jesucristo ayeꞌchoxhtaterrapoꞌch Yompor atthoch eꞌñe kowen yekowentaterrñañ. Xhokmoepaꞌch eꞌñe ñapoeth Yepartseshar yepeñ, xhokmoepaꞌch amhchaꞌtarethtena eꞌñe thayotheñ errponañowen ñeñth ateth pha awathotheñ. Theꞌpaꞌ ñeñthach notas, ñeñthpaꞌ atthetepaꞌch Nompore. Allowa. Judas

El Apocalipsis 19:20

Allempoña kellarannaꞌtet maꞌyarrmaꞌthñapaꞌ xha rremoet epoet ñamha ñeñth aꞌmhteneꞌ eꞌñe ña poꞌñoñ tharraña ñeñthpaꞌ ashkaña. Añ ñeñth ashkañerpaꞌ eꞌñe maꞌyarrmaꞌth poꞌwamenkoth gatenan acheñeneshaꞌ ñeñth ama poentareto. Ñeñthpaꞌ alloña shekënan acheñeneshaꞌ atthoch ameꞌñeñet. Ñeñthña acheñeneshaꞌpaꞌ oꞌ eꞌñe yatoꞌmatwanet maꞌyarrmaꞌth poeyotsaparo. Ñetñapaꞌ aña maꞌyochenet ayexhkatareth ñeñth tomaꞌntatenet maꞌyarrmaꞌth. Allempoña rremoet maꞌyarrmaꞌth epoet ñamha ñeñth aꞌmhteneꞌ poꞌñoñ allempoñapaꞌ awaporeꞌtarethtet epsheñoꞌmaret eꞌñe bethareret all parraren tsoꞌ errapharen. Ñeñth tsoꞌpaꞌ atarr shemasher worten.

El Apocalipsis 2:24

Tharraña poꞌpotantañes ñeñthes tiatiroꞌmarneshas sapaꞌ ama soktheññañe ñeñth ateth yexhaten koyaneshaꞌ. Amaꞌt ñamha ñeñth otenet oneñeth pokthaphña ñeñth ama eñotpawoyaye, poesheñaꞌttsa eꞌñe etsoteneꞌ —ñeñthpaꞌxhoꞌña sapaꞌ ama seyxheñe. Ñeñthoꞌmar theꞌpaꞌ oꞌch notas, napaꞌ amach nenonaso poꞌpoñ ñoñets ñeñth atarr echarr senten.