Efesios 5:8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho8 Ñewa, sapaꞌ awathpaꞌ poꞌñoxh eꞌñe ateth sokshapretatseꞌtyeseꞌth allempo sapaꞌ chekmeta sokrraꞌyeseꞌth. Tharraña theꞌ eꞌñe seyemteñoth Yepartseshar oꞌ xhapatonas seyoxhro ñeñth kowen enten ña. Ñeñthoꞌmarña theꞌ sokoppaꞌ añ poktetsa oꞌch sorrtateññañ ñeñth kowen enten ña, attho sapaꞌ oꞌ sokrrerra poetaro. Faic an caibideil |
Efesios 5:8
43 Iomraidhean Croise
Ñeñth acheñenesharpaꞌ ñetpaꞌ aña yexhaꞌyenet ñeñth ama kowenayeꞌ enteno Yompor; ñetpaꞌ xha ottenet ñerraꞌm chekmetoꞌtseneta. Tharraña theꞌñapaꞌ oꞌ enteret ñeñthchaꞌ eꞌñe kowen aꞌpoetarsamperrawet pokthaphñet. Ñetña amaꞌt aña oꞌpatyesawetañeꞌth rromoeñets ñeñthara chenkëñets, theꞌñapaꞌ amaꞌt ñokpoetpaꞌ oꞌ aꞌpoetarsamphsarethterret eꞌñe kowen. Arrpaꞌ allowa ateth naneꞌth Isaías poꞌñoñ.
Atthochña aꞌpoetarsamphsarethterra allowen acheñeneshaꞌ ñeñth chekmetoꞌtsaꞌyeneta, ñeñth ama eñotenaye Yompor, ñetñapaꞌ aña oꞌpatenawet rromoeñets ñeñthara koñcheñets. Ñeñth attho aꞌpoetarsamphsarethey ñeñthchaꞌña yeñotateneꞌ atthoch eꞌñe kowen yoksheñeshokmañen yeyxhena arr patsro. Arrpaꞌ allowa wañ attho Zacaríaspaꞌ axhotenan Yompor eꞌñe poksheñeshokmañen.
Allempo pamoꞌmteꞌ eñotan ñeñth paꞌtarwasañer attha shekareꞌteñ, ñañapaꞌ ateth oten: “Añ acheñer amaꞌt poeshkëñothpaꞌ eꞌñe eñoteñ oꞌch entan ñeñthchaꞌ atarr sherberreꞌ ñokop tsapathoneth.” Poꞌñoxh acheñeneshaꞌ arr patsro ñeñth ama ameꞌñetso ñetñapaꞌ atarr eñoteñet atthoch eꞌñech aña eꞌnenet ñeñthchaꞌ atarr sherberrets ñokpoet tsapathoneth. Tharraña ñeñthña ameꞌñetsapaꞌ ama tama eñoteñeto, ama es kothapeꞌcheneto oꞌch eꞌnenet ñeñthchaꞌ atarr sherberrawet ñamet tsapathoneth.
Jesúsñapaꞌ ateth oterraneterr: —Mameshamha palltena arroꞌtsenmeñen na ñeñthen aꞌpoetarsamphsañtetsa. Sokthapeꞌcherrnan eꞌñe thayekma neñoñ thayepaꞌtña arroꞌtsenmeñen ñeñthenchaꞌ aꞌpoetarsamperreꞌ sokthaphña allochñapaꞌ atthoch amach xha sechenkaꞌwerro. Poꞌñoxh ñeñth ama ameꞌñetso ñetpaꞌ ama eñoteñeto atthoch chenkaꞌwerret. Ñeñthoꞌmarña ñetpaꞌ eꞌñe ateth penet ñerraꞌmrratheꞌ chekmeta chopeꞌchenet ama eñoteñeto errenethchaꞌ tet.
Na ñeñthen saꞌpoetarsampeneꞌ sokthaphñapaꞌ theꞌpaꞌ arroꞌtsenmeñen. Sokthapeꞌcherrnan neñoñ thayepaꞌtñapaꞌ arroꞌtsenmeñen. Allochñapaꞌ oꞌch seyexhkërra sa acheñres ñeñtheschaꞌ atarr kowen orrtatyerreꞌ ñeñth kowen enten Yompor tharroꞌmar sapaꞌ eꞌñech poetaro sokrrena. Otwa Jesús atethpaꞌ awerr aꞌnawa; acheñeneshaꞌñapaꞌ ama eñocheto erratheꞌ awerr.
Jesúsña poꞌpocheñopaꞌ serrpareꞌtaterranerr acheñeneshaꞌ, ñeñthpaꞌ ateth oterraneterr: —Napaꞌ na ñeñthen aꞌpoetarsampeneꞌ acheñeneshaꞌ pokthaphña añe patsro. Eseshaꞌch noktherreꞌ oꞌwañchaꞌ alloꞌna kothapeꞌchatnenanet pokthaphña ñeñth atarr sosyaꞌtsañ; ñeñthpaꞌ chekmeta chopeñeꞌchyenet. Ñetñapaꞌ Yomporchaꞌ poꞌkowenño korrerret ñeñthara ñeñth poetarets.
Tharroꞌmarchaꞌ nemñaph alloꞌtsaꞌyen ñeñth ama judioneshayayeñaꞌ allochñapaꞌ atthoch peserrpareꞌtatwanet atthoch xhapanet poeyoxhro, atthoch oꞌwañchaꞌ chopeꞌchet chekmeto. Añchaꞌña oꞌch alla chopeꞌcherret poetaro. Ñamha atthoch oꞌwañchaꞌ awamenkath phanet oneñeth, añchaꞌña awamenkath penawet Yompor. Allochñapaꞌ oꞌch ameꞌñaꞌwerrnet na, allempoñapaꞌ nephretnaꞌwerranetchaꞌ poꞌchñar, atthoch oꞌch parrokmatwerret eꞌñe atthekma ateth ñerraꞌm ñeñth oꞌ naꞌkowentatwa.”
Ñamha amaꞌt eñoteñetañ ñeñth ateth penaña Yomporpaꞌ tharraña ama mechaꞌnaꞌteñetoña Parets, ñamha ama koshateñeto ñeñth ora añekop. Atthoña oꞌwañchaꞌ kothapeꞌchenet ñeñth sherbets Partsokop. Ñeñthoꞌmarña poeyoxhretopaꞌ oꞌwañchaꞌ eñoteñet ñeñth kowentetsa Yomporekop; ateth ñerraꞌm poeyoxhretpaꞌ nanak aꞌchekmetamphsareth.
Arr patsropaꞌ eñall shonteꞌ sosyaꞌtsañexhno. Ñatoꞌ oꞌch yetmaꞌntacha ateth ñerraꞌmrratheꞌ yapaꞌ chekmeta yeyxhena. Tharraña theꞌpaꞌ eꞌñe ateth pena ñerraꞌmrratheꞌ oꞌ metwamoch chekmeteꞌ oꞌ poetarenmoch, tharroꞌmar yapaꞌ yeñoteñ oꞌ xhapmoch allempoch werra Cristo. Ñeñthoꞌmarña añ poktetsa oꞌch yeswanom allowen ñeñth ama kowenayaye ñeñth ateth atmaꞌntatareth chekmeteꞌ. Añchaꞌña ateth yephaꞌyen ñeñth kowen enten Yompor ñeñth ateth atmaꞌntatareth poetareꞌ. Atthochña yethorrena Yomporekop ateth ñerraꞌmrratheꞌ xho yekhllarena ñokop.
Tharroꞌmar ñaptha Yompor yapoeneꞌña atthoch yapaꞌ korretsayach. Eꞌñe yeparrokmateñoth Cristo Jesús aꞌkrrateney Pompor. Ñamha Yomporpaꞌ attho nan Poechemer Cristo ñach yeñotaterreꞌ ñeñth kowentetsa Yeyompor-rekop, ñamha ñeñthara Cristo ñeñthchaꞌ eꞌñe kowen aꞌpoktateneꞌ yokop atthoch kowen entweney Pompor ñamha ñeñthara Cristo ñeñthña aꞌkowentaterrey Partsokop, ñamha ñeñthara Cristo ñeñth yetsaꞌterroya yoꞌchñar atthoch yekeshperra.
Alloweney ñeñthey ameꞌñenaya Yepartseshar Cristo, ña Poekamkëñpaꞌ ñachña yaꞌpoꞌpoñeterreꞌ, allochñapaꞌ alloꞌnach yesen kowentapretaya Cristo. Yapaꞌ ama attheyayye ñerraꞌmrratheꞌ ñeñth aꞌnataklleꞌchareth atthoch amach enteññañeto Cristo poꞌkowenña. Yapaꞌ eꞌñe yekweñoth Cristo poꞌkowenña, yapaꞌxhoꞌña oꞌch yekowentapreteña yamha, ateth ñerraꞌmrratheꞌ rerep poptetsa ñerraꞌm xho yekwach atsrrethoneth.
Theꞌpaꞌ oꞌch noterrserr poꞌpoñ, amach eꞌñe seyemtatsche ñeñth ama ameꞌñetso, tharroꞌmar amach pathrrayeꞌ sokthapeꞌchweno. Acheñ ñeñth eꞌñe pokteꞌ es phaꞌyetspaꞌ amatheꞌ errothenoth yemtanoña acheñ ñeñth ama kowenayeꞌ es phaꞌyetso, tharroꞌmar ama atthekmayeꞌ es phaꞌyeneto. Ñatoꞌ oꞌch netmaꞌntacha ateth ñerraꞌmrratheꞌ chekmeteꞌpaꞌ amatheꞌ errothenoth alla epteto parro epoet poetareꞌ.
Aña seyxheꞌth ñeñth ateth phatseꞌtyena acheñeneshaꞌ arr patsro ñeñth ama ameꞌñetso. Allempo sapaꞌ aña sameꞌñatayeꞌth oneñeth ñeñth paꞌmhchaꞌtarether pen allowen ñeñth errakmañen amhchaꞌnoxhetyetsa entoth ñeñth ama entpawoyaye. Ñeñthña oneñeth pokthaphñapaꞌ ñeñth atarr koshateneꞌ allowen acheñeneshaꞌ ñeñth athparñathtetsa theꞌ arr patsro.
Elloña Cristopaꞌ atarr morrentenya. Ñeñthoꞌmarña eꞌñe pokteꞌ eñch atthoña poma ñañeña attho rroma yokop ateth peteꞌth awath allempo moetseteꞌth carnero Yomporekop. Ñeñthña eꞌñe kowen enteꞌth Yompor eꞌñe ateth ñerraꞌmrratheꞌ ñeñth allo atarr eñmosathtamphsacheteꞌth awath ña. Attho atarr morrentya Cristo, yokoppaꞌxhoꞌña añ poktetsa eꞌñech kowen yemorrentannaꞌtwena.
Tharroꞌmar poꞌñoxhpaꞌ ama acheñeyeꞌ yekhllareno ñeñth entpoꞌ poꞌchets. Yapaꞌ añña yekhllaren oneñethexhno ñeñth ama erroth aphapawo eꞌñe ya yototh tharroꞌmar ñeñthpaꞌ ama entpawoyaye poꞌchets errothentheꞌña. Tharraña ñeñthpaꞌ atarr amhchaꞌnoxhetyena ñamha atarr awamenkathexhno. Atthoña pomnaren penan allowen acheñeneshaꞌ arr patsro ñeñth phatseꞌtyeneꞌ ñeñth ama kowenayaye ñeñth chekmetoꞌtsena. Ñeñthara oneñethexhno ñeñth ama kowenayeꞌ yexhkatetso ñeñth errakmañen amhchaꞌnoxhetyetsa entoth.
Ñeñthpaꞌ eꞌñe pokteꞌ atethchaꞌ phannenet tharroꞌmar yapaꞌxhoꞌña yeñoteñ awathpaꞌ aña yephatseꞌtyeseꞌth ñeñth ama pokteyaye. Yapaꞌxhoꞌña atthach ama es yepxheꞌthe allempo nanak yephatseꞌtyeseꞌth sosyaꞌtsañ. Ñamha nanak yathpareꞌteꞌth awath, ñamha aña yexhatyesyeteꞌth ñeñth ama poꞌñoxhoyaye kothaphñats. Yechetspaꞌ aña nanak moenatseꞌtatyeꞌth ñeñth ama kowenayaye ñamha allempopaꞌ aña nanak yoksheꞌth paꞌnamen sosyaꞌtsañexhno. Ñamha allempopaꞌ nanak atsrreꞌmoxhen yentannaꞌtyeseꞌth ñamha nanak es yeyeꞌchapretannaꞌtyeseꞌth. Ñamha allempopaꞌ ñerraꞌm eseshaꞌ yeꞌmoñeꞌteꞌpaꞌ yapaꞌxhoꞌña oꞌchxhoꞌ yeꞌmoñeꞌchxhoꞌ yamha.
Tharraña ñerraꞌm eꞌñe kowenareꞌ es yorrtatyen ateth pena Yompor, ñeñthñapaꞌ eꞌñe ateth yepena ñerraꞌmrratheꞌ arr yechopeꞌchen poetaro eꞌñe alloꞌtseney epay Yompor. Atthoña alloweney eꞌñech kowen yeparrokmatwen ñamha Yompor Poechemer ñeñth Jesucristo ña poꞌrrasoña xhokma eꞌshennayña allowen yoꞌchñar.
Sanasan