Efesios 5:21 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²¹ Eꞌñe semorrenteñoth Cristopaꞌ eꞌñepaꞌchña kowen sameꞌñannena. Atthochña yekowentateññañ Cristo.

Efesios 5:21 Iomraidhean Croise

1 Corintios 16:16

Ñeñthoꞌmar theꞌpaꞌ oꞌch notas: Eꞌñe pokteꞌ oꞌch seꞌmhñoch Estéfanas, ñamha amaꞌt allowen poꞌpoñexhno acheñ ñeñth xhokma thorrapretetsa Yomporekop.

2 Corintios 5:11

Ñeñthpaꞌ amaꞌt atarr yoroxhen yenteñeñña Yompor, tharraña nokoppaꞌ ama yoroxhenayaye tharroꞌmar Yomporpaꞌ entenen eꞌñe kowen ñeñth ateth nepena. Theꞌpaꞌ aña palltetsa oꞌch nokthapeꞌchater allowen acheñeneshaꞌ atthoch ñetpaꞌxhoꞌña eꞌñech kowen entapretennet. Amaꞌt sapaꞌxhoꞌña theꞌpaꞌ nekwenes, nemneñ oꞌch señoter samha eꞌñe seyoxhro attho eꞌñe neñmañeshaꞌ kowen es nephaꞌyen.

2 Corintios 7:1

Ñewa, eꞌñe nemorrenteñothes, masheñneshachaꞌ ñamha noxhaneshachaꞌ oꞌ notwas ateth oteney Yompor ñeñthchaꞌ ateth perrnay. Ñeñthoꞌmarña theꞌpaꞌ añ poktetsa yokop yapaꞌ oꞌch yeswanem ora allowen ñeñth xhokma aꞌsosyateneꞌ yechets ñamha ñeñth xhokma aꞌsosyateneꞌ amaꞌt yekamkëñ. Añña eꞌñe yemhchaꞌnaꞌteñoth Yomporpaꞌ añchaꞌña yemaꞌyoxhrena ñeñth pokteꞌ enten ña.

Gálatas 5:13

Tharroꞌmar sa masheñneshachaꞌ ñamha noxhaneshachaꞌ oꞌ waꞌñerres Yompor atthoch kowenoꞌtseneschaꞌ. Ñapaꞌ ama moeno oꞌch amhchaꞌnoxhtena sokop ñoñets ñeñth ateth anareth. Tharraña amaꞌt oꞌ waꞌñerrey Yompor atthoch kowenoꞌtseneypaꞌ ñeñthpaꞌ ama añekpayaye oꞌch yephaꞌyesa nanak sosey ñeñth ateth moenateney yechets. Ñapaꞌ moeneñ eꞌñe yemorrentannaꞌteñothpaꞌ oꞌch yeyenpannaꞌta, tharroꞌmar yapaꞌ kowenoꞌtseney.

Efesios 5:22

Ñeñthes arrollarethes oꞌch notas, añ pokteꞌ serrollarpaꞌ ñachña eꞌñe sameꞌñena ateth yepeñ ñamha Yepartseshar Cristopaꞌ ñachña eꞌñe sameꞌñena.

Efesios 5:24

Ñeñthoꞌmar añ pokteꞌ serrollarpaꞌ ñach pomnaren sepeneꞌ allowenakop, atthekmay yamha ñeñthey ameꞌñetsapaꞌ añchaꞌ pomnaren yepeneꞌ Cristo.

Filipenses 2:3

Ñamha amach aña atarr sellkatsto ñeñth eꞌñe sokpa. Añchaꞌña poesheñaꞌttsospaꞌ sellkapreta ñeñth llekatyeneꞌ samoꞌts. Ñamha amach sañeña entatstatso ateth ñerraꞌmrratheꞌ ñeñthes nanak sherbets. Añchaꞌña ateth sent samoꞌts ateth ñerraꞌmrratheꞌ ñetña nanak sherbetset, phañapaꞌ amach es asherbenayeꞌ penteno.

1 Timoteo 2:11

Ñamha allempo sapxhena Yomporekoppaꞌ añ koyaneshaxhnopaꞌ eꞌmhñotetepaꞌ eꞌñe moetsoññen atthoch es eñotet. Amachña xha athpareꞌteneto amaꞌt mamesha.

1 Timoteo 3:4

Ñamha ñeñthchaꞌ amhchaꞌtarethtatsapaꞌ añchaꞌ seꞌn ñeñth eꞌñech kowen ameꞌñatwenana poechemereshaꞌ, ñamha ñeñth eꞌñech mechaꞌnaꞌtweñ allowen amaꞌt ñeñth parro yexhena.

Hebreos 13:17

Ñamha ñeñth saꞌmhchaꞌtaretherneshaꞌ sephaꞌyenpaꞌ xhokmoepaꞌchña sameꞌñenanet, tharroꞌmar ñetpaꞌ añekop anarethtenet ñetchaꞌ kowampenet sekamkëñ Yomporekop. Ñamha Yomporpaꞌ eñotatwerranetchaꞌ ñeñth ateth phaꞌyenet, ñatoꞌ eꞌñetheꞌ kowen kowampenset ñatoꞌpaꞌ amatheꞌ kowenayeꞌ kowampenseto. Ñeñthoꞌmarña sokoppaꞌ añ poktetsa eꞌñechña kowen sameꞌñenanet atthochña ñetpaꞌ eꞌñech poksheñeshokmañen thorrenet sokop. Amoepaꞌch xha sellkatatstenaneto tharroꞌmar ñerraꞌm atethpaꞌ amach errothenoth koshaterrsetoña samha.

1 San Pedro 2:13

Theꞌpaꞌ oꞌch notas ñamha, allpon ñoñets ñeñth nen amhchaꞌtareth añ patsropaꞌ añ poktetsa oꞌch sameꞌñya. Yameꞌñeñoth Yepartseshar Cristopaꞌ añ palltetsa oꞌch yameꞌñera ñamha allpon ñoñets ñeñth nen ñeñth atarr amhchaꞌtarethtetsa arr patsro.

1 San Pedro 2:17

Añ poktetsa oꞌch semhchaꞌnaꞌch allowen acheñ. Oꞌch semorrentannaꞌta allowenes ñeñthes ameꞌñetsa. Oꞌch semhchaꞌnaꞌch ñamha Yompor. Oꞌch sameꞌñya ñamha ñeñth amhchaꞌtarethetyetsa arr patsro.

1 San Pedro 5:5

Ñeñthes wepaneshas, theꞌpaꞌ napaꞌ oꞌch notas samha. Añ poktetsa oꞌch sameꞌñeña ñeñth poꞌn yakma ñeñth sompor sepen. Poꞌñoxh oꞌch notas allowenes, eꞌñech kowen sameꞌñannena amach sañeña eꞌñe kowen entatstatso tharroꞌmar: Yomporpaꞌ ama pokteyeꞌ entenano ñeñth ateth ommoꞌchetsa. Añña ñeñth ama esoyeꞌ entetso ñeñthña atarr moerenaña Yompor.