Efesios 4:24 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

²⁴ Añepaꞌchña chorraterrsa Yompor ñeñthchaꞌ sokthapeꞌchaterreꞌ kowen eꞌñe etserra. Ñeñthpaꞌ atthochña etserrataterrnas Yompor sokthaphña eꞌñe ateth kothapeꞌchen ña. Allochñapaꞌ atthoch eꞌñe pokteꞌ es sephaꞌyen arr patsro ñeñth eꞌñe poꞌñoxh kowen enten Parets.

Efesios 4:24 Iomraidhean Croise

San Lucas 1:75

Atthoch yetsotoñ ñeñth eꞌñe pokteꞌ enten Parets allochñapaꞌ atthochña pokteꞌ enteney ñamha acheñeneshaꞌ attho eꞌñe kowen es yephaꞌyen eꞌñech tharrempowa esempowach yokrrena arr patsro.

San Juan 17:17

Pameꞌñeñothet pha peñoñ phaꞌkowentamphsanetepaꞌch eꞌñe phokop. Pha peñoñpaꞌ ñeñthña eꞌñe poꞌñoxh ama shekëñtsoyaye.

Romanos 12:2

Allochñapaꞌ amach alloꞌna ateth es yephatseꞌtyesneno ñeñth ateth yeyxhen ya añe patsro, ellochña yokthapeꞌcherr etserra atthoch etserrataterrnay Yompor yokthaphña. Atthochña eꞌñe kowen señoch erraꞌtsentheꞌña moenen Yompor ñeñth eꞌñe kowen enten ña, ñamha ñeñthchaꞌña koshateneꞌ eꞌñe poktakma.

Romanos 13:12

Arr patsropaꞌ eñall shonteꞌ sosyaꞌtsañexhno. Ñatoꞌ oꞌch yetmaꞌntacha ateth ñerraꞌmrratheꞌ yapaꞌ chekmeta yeyxhena. Tharraña theꞌpaꞌ eꞌñe ateth pena ñerraꞌmrratheꞌ oꞌ metwamoch chekmeteꞌ oꞌ poetarenmoch, tharroꞌmar yapaꞌ yeñoteñ oꞌ xhapmoch allempoch werra Cristo. Ñeñthoꞌmarña añ poktetsa oꞌch yeswanom allowen ñeñth ama kowenayaye ñeñth ateth atmaꞌntatareth chekmeteꞌ. Añchaꞌña ateth yephaꞌyen ñeñth kowen enten Yompor ñeñth ateth atmaꞌntatareth poetareꞌ. Atthochña yethorrena Yomporekop ateth ñerraꞌmrratheꞌ xho yekhllarena ñokop.

Romanos 13:14

Añchaꞌña awamenkath sepeneꞌ Yepartseshar Jesucristo, allochñapaꞌ atthoch amach semnatatsto sechets oꞌch moenatseꞌtatas ñeñth ama kowenayaye.

Romanos 6:4

Allempo yapatarethtapaꞌ eꞌñe ateth ñerraꞌmrratheꞌ xho yerromapreteña Cristo ñamha ateth ñerraꞌm xho yepampapreteña Cristo. Allempoña Yomporpaꞌ awoꞌt tantaterran Poechemer eꞌñe poꞌwamenkoth ñeñth atarr kowen, yapaꞌxhoꞌña ñeñthara poꞌwamenkarothña eꞌñe kowen oꞌ etserrataterrnay yokthaphña, ñeñthchaꞌ ateth yokrrena.

Romanos 7:6

Tharraña theꞌpaꞌ eꞌñe yerromapreteñoth Cristo añ ñoñets ñeñth ateth anarethpaꞌ oꞌwañ amhchaꞌnoxhtanaꞌtenya ateth ñerraꞌm awath. Ñeñthoꞌmarña theꞌpaꞌ eꞌñe kowen yokrrena Yomporekop. Theꞌpaꞌ ama añekpayaye ñeñth ateth yepeꞌth awath atthoch eꞌñe yaꞌmoeroxhtameꞌteñoth yetsotatwañ ñeñth ateth otyeꞌth ñoñets ñeñth ateth anareth. Añekopña yokrrena eꞌñe kowen Yomporekop tharroꞌmar theꞌ Parets Poekamkëñpaꞌ oꞌ etserrataterrnay yokthaphña.

Romanos 8:29

Tharroꞌmar alloweney ñeñthey eꞌñe eñotwayeꞌth Yompor awath, ñeñtheychaꞌ ameꞌñerraya esempo, ñañapaꞌ kothapeꞌcheꞌth awath yokop ñeñthchaꞌ ateth moenatey, allochñapaꞌ yach kothapeꞌcherrets kowen atthochña yeyexhkërra eꞌñe ora ateth ñerraꞌm Poechemer ñeñth Cristotets. Allochñapaꞌ alloweney yepoꞌnarchaꞌ yepeñ Cristo amaꞌt shontey ñeñthey ameꞌñetsa.

1 Corintios 15:53

Tharroꞌmar yechets ñeñth aptsañapaꞌ añ palltetsa oꞌch poenasa ñeñth ama aptsaño. Tharroꞌmar ñeñthey arromñatheypaꞌ añ palltetsa oꞌch yepnasa ñeñth ama arromñatheyaye.

2 Corintios 3:18

Alloweney ñeñthey ameꞌñenaya Yepartseshar Cristo, ña Poekamkëñpaꞌ ñachña yaꞌpoꞌpoñeterreꞌ, allochñapaꞌ alloꞌnach yesen kowentapretaya Cristo. Yapaꞌ ama attheyayye ñerraꞌmrratheꞌ ñeñth aꞌnataklleꞌchareth atthoch amach enteññañeto Cristo poꞌkowenña. Yapaꞌ eꞌñe yekweñoth Cristo poꞌkowenña, yapaꞌxhoꞌña oꞌch yekowentapreteña yamha, ateth ñerraꞌmrratheꞌ rerep poptetsa ñerraꞌm xho yekwach atsrrethoneth.

2 Corintios 4:16

Ñeñthoꞌmarña napaꞌ ama nellkëñotheyeꞌ nethorreññañoña Yompor poꞌtarwas. Amaꞌt nechetspaꞌ alloꞌna sen wañwanmats attho nowmenknaꞌntena, tharraña nekamkëññapaꞌ alloꞌna sen womenkatnomoets eꞌñe patheꞌtets yeth.

2 Corintios 5:17

Ñeñthoꞌmarña ñeñthey oꞌ yeyemtera Cristo, Yomporpaꞌ oꞌ etserrataterrnay yokthaphña eꞌñe poktakma. Ñeñth ateth yokthapeꞌcheꞌth awath, ñeñthpaꞌ oꞌ wañerr, theꞌñapaꞌ oꞌ eꞌñe yokthapeꞌcherr ñeñth eꞌñe kowenareꞌ etserra.

Gálatas 3:27

Ñamha allowenes ñeñthes oꞌ sapatarethterra eꞌñe sameꞌñeñoth Cristopaꞌ oꞌ chorrerrsa Cristo.

Gálatas 6:15

Amaꞌt yaꞌtsorrarethtatstapaꞌ ñeñthpaꞌ ama es sherbeno. Ñamha amaꞌt ama yaꞌtsorrarethtatstopaꞌ ñeñthpaꞌxhoꞌña ama es sherbeno. Añña nanak sherbets Yomporekop, oꞌch yetserrataterr yokthaphña, oꞌch yeyexhkërra etserra Yomporekop.

Efesios 2:10

Tharraña Yomporpaꞌ oꞌ etserrataterrnay yokthaphña allochñapaꞌ atthoch eꞌñe kowen es yephaꞌyen. Poꞌñoxh eꞌñe yeparrokmateñoth Cristo, Yomporñapaꞌ oꞌ etserra yexhkaterrey. Tharroꞌmar ñapaꞌ amaꞌt awathotheñpaꞌ ateth kothapeꞌcheꞌth yokop atthochña yapaꞌ eꞌñepaꞌchña kowenareꞌ es yephaꞌyen.

Efesios 2:15

Ñeñthpaꞌ ateth phonay Cristo allempo rroma yokop. Eꞌñe ña poꞌchtsothpaꞌ oꞌ aꞌwañampeney attho amhchaꞌnoxhen yenten añ ñoñets ñeñth ateth anareth awath judioneshakop, ñeñthara paꞌnamen aꞌpoktateñtsoñ ñeñth ateth anarethtetañ ñokpoet ñeñthchaꞌ ateth phowetañ. Atthoña allempotheñpaꞌ oꞌ eꞌñe pathrra yokthapeꞌchen ñeñth ateth kothapeꞌchateney Cristo. Allempotheñña amach alla atsrreꞌmoxhen yentannaꞌtyerreꞌthe. Ñatoꞌ oꞌch yot attho awath allowen acheñeneshaꞌ ellopaꞌtetsteteꞌth eꞌñe ñet pokthaphñoꞌmareta, Cristoñapaꞌ oꞌ aꞌwañamphsanet atthoña eꞌñe parrokmatatwerrey, eꞌñe kowen yamoꞌtstannaꞌtwerra alloweney.

Efesios 6:11

Ñeñthoꞌmarña añ poktetsa yokop oꞌch yagërrñañ ora allpon ñeñth apoeney Yompor allochñapaꞌ ñeñthchaꞌña yemoñenaya atthoch amach alla aꞌpoerrataterrye oneñeth. Tharroꞌmar yeñoteñ oneñethpaꞌ xhokma eꞌnenan atthoch shekareꞌteney.

Tito 2:14

Tharroꞌmar ñapaꞌ ña pokteꞌ enteꞌ oꞌch rroma yokop atthoch oꞌwañchaꞌ alloꞌna yephatseꞌtnena sosyaꞌtsañ. Ñamha ñapaꞌ atthoña eꞌshowerrnay allowen ñeñth ama pokteyaye. Allochñapaꞌ atthoch poeyochreshaꞌ perrey, ñamha atthoch yapaꞌ yemaꞌyoxhrena ñeñth kowentetsa.

Hebreos 1:8

Tharraña Poechemerekoppaꞌ ama attheyeꞌ oteno. Ñokoppaꞌ ateth eñora: Phapaꞌ atarr Partsoph, ñeñthephchaꞌ xhokma amhchaꞌtarethtetsa pekonaño ñeñth errponañowen. Ñamha ñeñth attho phaꞌmhchaꞌtarethtena phapaꞌ eꞌñe pokteꞌ es pephaꞌyenanet.

Hebreos 12:14

Añepaꞌchña semaꞌyoxhrena atthoch eꞌñe kowen samoꞌtstannena, eꞌñech moecheth seyxhena epas allowen samoꞌtseshaxhno. Ñamha añchaꞌña sokthapeꞌchyen ñeñth eꞌñe kowenareꞌ enten Parets. Tharroꞌmar ñerraꞌm añ ama yokthapeꞌcheno ñeñth kowenareꞌ enten Paretspaꞌ amach errothenoth yentereña Yompor.

1 San Pedro 2:2

Añña poktetsa atarrchaꞌ yeyeꞌcheññaña Yompor poꞌñoñ eꞌñe ateth pena emathollpaꞌ nanakchaꞌ yeꞌchenana poemomos. Yapaꞌxhoꞌña añ poktetsa oꞌch yeyeꞌchya ateth ñerraꞌm ñeñth yemomos yepen, tharraña ñeñthpaꞌ ñeñthara Yompor poꞌñoñ. Yompor poꞌñoñpaꞌ nanak kowenareꞌ alloch yokshaten yekamkëñ, atthothchaꞌ alloꞌna yesen eñotnomoeꞌ ñeñth poktetsa Yomporekop atthochña aꞌkeshphataretheychaꞌ.

2 San Pedro 1:4

Eꞌñe poꞌkowenñoth ñapaꞌ ateth otnerrey ñeñthchaꞌ apoerrey ñeñthchaꞌ nanak kowen yenterr, ñamha ñeñthchaꞌ atarr nanak sherberrets yokop. Añ apoerrey poꞌwamenk atthoch amach aña atarr yemnaꞌyeno ñeñth yentyen arr patsro. Atthochña amach atarr nanak yaꞌsosyateno eꞌñe yañeña. Allochñapaꞌ eꞌñe yeyemteñoth Paretspaꞌ oꞌch yagërrñañ ñeñth eꞌñe ateth pena ña.