Efesios 4:17 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁷ Ñeñthoꞌmarña theꞌpaꞌ oꞌch notas ñeñth poꞌñoxh sherbets Yepartsesharekop. Sapaꞌ amach alloꞌna ateth sephaꞌyesneno ñeñth ateth phatseꞌtyena ñeñth ama ameꞌñenayo Yompor. Tharroꞌmar ñeñth ateth kothapeꞌchatseꞌtyenet ñetpaꞌ ñeñthpaꞌ eꞌñe orrena amaꞌt mameshapaꞌ ama es sherbeno.

Efesios 4:17 Iomraidhean Croise

San Lucas 16:28

Tharroꞌmar all napaꞌ nechen amnarsheña nemoꞌnasheñ. Ñeñthoꞌmarña nemneñ oꞌch awerr oꞌch kothapeꞌchaterranetaꞌ eꞌñe kowen theꞌt ñetpaꞌxhoꞌña esempopaꞌ alla xhapoet arr koñchaꞌpoetso.”

Los Hechos 14:15

ateth otet: —Esoꞌmartheꞌkaꞌye, masheñneshachaꞌ, ateth sepena. Yapaꞌxhoꞌ arromñatheya atthey ñerraꞌm sa. Ñeñthoꞌmarña oꞌ yeserrpareꞌtatas kowen ñoñets atthothchaꞌ sekexhpoerr ñeñth ateth sepena ñeñth eꞌñe orrena. Theꞌpaꞌ añña poktetsa oꞌch sameꞌñera Yompor ñeñth ama arromñatheshayaye, ñeñthara Yompor ñeñth yexhkateꞌ enet ñamha pats ñamha ñeñth añekmoen saꞌp. Ñamha ora allowen ñeñth yentyen ento ñamha ñeñth yentyen patsopaꞌ ña yexhkatweꞌ ñamha ñeñth saꞌpoꞌtsen ña yexhkatweꞌ.

Los Hechos 18:5

Allempoñapaꞌ wapa ñamha Silas epoet Timoteo. Thaya wapoet Macedonioth. Allempopaꞌ añ nanak thorrena Pablo serrpareꞌteꞌ. Ñapaꞌ añ eñotatenan judioneshaꞌ Jesúspaꞌ ñeñtharakaꞌye Cristoterrets ñeñth atarr kowenet awathotheñ.

Los Hechos 2:40

Allempoñapaꞌ oꞌ alla serrpareꞌtaterraneterr atthoch otanet paꞌnamen ñoñets. Atthoch kothapeꞌchatanetpaꞌ ateth otanet: —Amach sokthapeꞌchatsto ateth kothapeꞌchen poꞌpoñ acheñeneshaꞌ ñeñth ama ameꞌñetso. Atthothchaꞌ sekeshperrach.

Los Hechos 20:21

Oꞌ neserrpareꞌtatwas añ pokteꞌ oꞌch sokthapeꞌcherr ello kowen Yomporekop ñamha añ pokteꞌ oꞌch sameꞌñera Yepartseshar Jesucristo. Ñeñthpaꞌ ateth oꞌ notwas allowenes ñeñthes judioneshas ñamha amaꞌt ñeñthes griegoneshas.

Romanos 1:21

Ñamha amaꞌt eñoteñetañ ñeñth ateth penaña Yomporpaꞌ tharraña ama mechaꞌnaꞌteñetoña Parets, ñamha ama koshateñeto ñeñth ora añekop. Atthoña oꞌwañchaꞌ kothapeꞌchenet ñeñth sherbets Partsokop. Ñeñthoꞌmarña poeyoxhretopaꞌ oꞌwañchaꞌ eñoteñet ñeñth kowentetsa Yomporekop; ateth ñerraꞌm poeyoxhretpaꞌ nanak aꞌchekmetamphsareth.

1 Corintios 1:12

Ñeñth notenespaꞌ ñeñthpaꞌ ateth sepena: Poesheñaꞌttsospaꞌ ateth sotyen: “Napaꞌ añchaꞌ nameꞌña masheñ Pablo.” Poꞌpotantaññapaꞌ ñeñthpaꞌ ateth otyenet: “Napaꞌ añchaꞌ nameꞌña masheñ Apolos.” Poꞌpotantaññapaꞌ ñeñthpaꞌ ateth otyenet: “Napaꞌ añchaꞌ nameꞌña masheñ Pedro.” Poꞌpoñexhnoñapaꞌ ateth otyenet: “Napaꞌ añchaꞌ nameꞌña Cristo.”

1 Corintios 15:50

Ñeñthoꞌmarña masheñneshachaꞌ ñamha noxhaneshachaꞌ notenes: Eꞌñe yechtsothpaꞌ amach es yoꞌpato all amhchaꞌtarethtena Yompor. Tharroꞌmar allempo arromñathayapaꞌ amatheꞌ errothenoth es yoꞌpatoña ñeñth ama awañaño.

2 Corintios 9:6

Xhokmach seyerpoena añ ñoñets, ñeñthpaꞌ ateth oten: Ñerraꞌm ya atarr koñeꞌth es yapaꞌyen Yomporekop, yapaꞌxhoꞌña oꞌch alla yagërr ñeñth atarr koñeꞌth. Ñerraꞌm atarr aton es yapaꞌyen Yomporekop, yapaꞌxhoꞌña oꞌch alla yagërr ñeñth atarr aton. Ñewa, ñatoꞌ oꞌch netmaꞌntacha ateth ñerraꞌmrratheꞌ xho yenareꞌtatseꞌten yaꞌmro. Ñerraꞌm atarr koñeꞌth yenareꞌtatseꞌtpaꞌ atarrchaꞌ koñeꞌth yaꞌyapaxherr ñerraꞌm esempo poꞌnen. Ñerraꞌm atarr aton yenareꞌtatseꞌtpaꞌ atarrchaꞌ aton yaꞌyapaxherr ñerraꞌm esempo poꞌnen.

Gálatas 3:17

Añmapaꞌ ñeñthña ateth neyxhatenes. Ñewa, yapaꞌ yeñotweñ attho Yomporpaꞌ aꞌpoktachet amaꞌt awathotheñ epoet Abraham. Allothñapaꞌ allempo oꞌ met cuatrocientos treinta charpaꞌ allempoñapaꞌ xhap allempoch anarethta añ ñoñets judioneshakop ñeñth ateth kellkanet Moisés. Tharraña amaꞌt oꞌ anarethta añ ñoñets ñeñth kellkanet Moiséspaꞌ tharraña ñeñthpaꞌ yeñoteñ amach errotheno waporeꞌtatereto ñeñth ateth oꞌ anarethetwa ñeñth ateth oꞌ aꞌpoktatwa Yompor epoet Abraham amaꞌt awathotheñ, tharroꞌmar Yomporpaꞌ ama poenesho poꞌñoñ.

Gálatas 5:3

Tharraña theꞌpaꞌ oꞌch alla noterrserr, ñeñth moenets oꞌch atsorrarethtapaꞌ ñewa, poꞌñoxh añ palltetsa ñamha oꞌch eꞌñe etsotwan amaꞌt ñamha allowen ñoñets ñeñth ateth anareth judioneshakop.

Efesios 1:22

Ñamha Yomporpaꞌ oꞌ nan Poechemer Cristo allochñapaꞌ ñach pomnaren peneꞌ ora allpon ñeñth esokmañen eñall. Ñamha allowen allpon ñeñth ameꞌñenaya, Yomporpaꞌ atthoña apanet Poechemer allochñapaꞌ ñach yochreshaꞌtenawet allowenet.

Efesios 4:22

Sa awathpaꞌ attha sokthapeꞌchatseꞌtyeseꞌth theꞌña ñeñthpaꞌ oꞌch saꞌypoꞌñamper. Sapaꞌ ñeñthaña atarr seshkareꞌtayeꞌth atthoña añach eꞌñe semnatseꞌtyeseꞌth ñeñth ama kowenayaye amaꞌt mamesha.

Colosenses 2:18

Ñamha amach sameꞌñatsche ñeñthchaꞌ soterreꞌ sapaꞌ añoꞌch sagërroña atthoch koshaterres Yompor tharroꞌmar sapaꞌ añoꞌ attheyeꞌ sepeno ñeñth ateth penet ñet. Ñeñth acheñer ateth, ñetpaꞌ aña kothapeꞌchyenet oꞌch moeroxhtatenet eꞌñe ñañeñeta, tharraña ñetpaꞌ pommoꞌcheñotha ateth penet ñeñth poꞌñoxhpaꞌ ama es sherbeno Yomporekop. Ñeñthoꞌmarkaꞌyeña ñetpaꞌ añakaꞌye maꞌyochyenet Yompor poꞌmhllañotheñer. Ñamha ñetpaꞌ aña nanak yemtenet ñeñth entpesaꞌtyenetañ. Pokthaphñothet ñeñth eꞌñe ñeta poꞌchtsothet wena, ñetpaꞌ ñeñtha atarr ommoꞌchenet, ñeñthoꞌmarña ñeñthpaꞌ eꞌñe orrena ateth penet.

Colosenses 2:4

Ñeñthoꞌmarña napaꞌ ateth notenes allochñapaꞌ sapaꞌ amach eseshaꞌ seshkërraye amaꞌtchaꞌ kothapeꞌchatyesaset ñeñth atarr kowen ñoñets sentyerreñ.

1 Tesalonicenses 4:6

Amaꞌt poesheñarrothesapaꞌ amach soꞌchñaꞌtamphsatscheña semoꞌnasheñ, amach sechtapretatsche poethapor. Allowen ñeñth ateth yephaꞌpaꞌ xhokmach tsaꞌtaterrya Yompor esempo. Ñeñthpaꞌ awañmoꞌchotheñ eꞌñe poꞌñoxh oꞌ yotwas.

1 Timoteo 5:21

Añpaꞌ xhokmach ateth pepha ñeñth ateth oꞌ notwaph amaꞌt errothentheꞌ oꞌ phowa ñeñth parro nanak peyemtena awaña. Tharroꞌmar Yomporpaꞌ enteneph epoet Poechemer Jesucristo ñeñthara Yepartseshar yepen, ñamha epoet poꞌmhllañotheñnaneshar ñeñth epoet yemtena ña. Allowenetpaꞌ eꞌñe entwenpet ñeñthoꞌmarña theꞌpaꞌ añ pokteꞌ oꞌch pepena ñeñth ateth oꞌ notwaph.

1 Timoteo 6:13

Theꞌpaꞌ oꞌch, masheñe, noterrperr poꞌpoñ ñeñthchaꞌ ateth pepha. Xhokmach petsotwa ora ñeñth ateth oteneph Yompor. Amach phokthapeꞌchatsto poꞌpoñoneth atthoch amach eñalle atthoch thanmareꞌtapha acheñeneshaꞌ. Añpaꞌ atethchaꞌ pepha tharrempowa esempowañenchaꞌ werra Yepartseshar Jesucristo. Tharroꞌmar amaꞌt theꞌ Yomporpaꞌ enteneph, ñeñthara Yompor ñeñth yapoeneꞌ yokrreña themeꞌttsen, ñamha allowen ñeñth yentyen. Ñamha Poechemer Jesucristopaꞌxhoꞌña enteneph, añ ñeñthara Cristo ñeñth eñosets eꞌñe kowen allempo aꞌphthoꞌtareꞌteñ Poncio Pilato.

2 Timoteo 4:1

Theꞌpaꞌ oꞌch alla noterrperr ñeñthchaꞌ ateth pepha: Xhokmach peserrpareꞌtoñ Yompor poꞌñoñ amaꞌt esempo errothenoꞌtsenpha. Tharroꞌmar Yomporpaꞌ enteney epoet Poechemer Jesucristo, ñeñthara ñeñth Yepartseshar yepen, ñamha ñeñtharach werrtsa amaꞌt esempowañen, ñamha ñeñtharach amhchaꞌtarethetwerrtsa esempowañen, ñeñthchaꞌ akrerreꞌ allowen acheñeneshaꞌ ñeñth eꞌñe kowenareꞌ, ñamha amaꞌt ñeñth ama kowenayaye. Atethchaꞌ phan allowen ñeñth korretsmeñ allempo, ñamha amaꞌt ñeñth oꞌ kollaꞌwena. Ñamha theꞌ phapaꞌ oꞌch peñotatyes acheñeneshaꞌ ñerraꞌm esempo ñetpaꞌ ama pokteyeꞌ es peneto. Phañapaꞌ phach otyesawet amach ateth yephatsto, allothpaꞌ oꞌch phokthapeꞌchatyerranet eꞌñe peñmañeshaꞌ. Ñamha xhokmach peyxhatyesanet ñeñth poktetsa Yomporekop.

1 San Pedro 1:18

Sapaꞌ satañneshañpaꞌ apaꞌnmaset pokthaphña ateth peteꞌth eꞌñe orrena. Theꞌña sapaꞌ oꞌ señoter Yomporpaꞌ oꞌ tsaꞌtwonasa atthoch seswanom ñeñth awathnaneshañ pokthaphña. Ama kellayoyeꞌ tsaꞌtonaye. Kellepaꞌ awañaña.

2 San Pedro 2:18

Ñamha nanakchaꞌ ommoꞌchenet attho phaꞌyenet ñeñth nanak sosyareꞌ. Ñamha oꞌch aꞌsecheñet poꞌpsheñeñ atthoch oꞌch phachet ñeñth nanak moenenet poꞌchets atthothchaꞌ aꞌpsatarethterret, allempoñapaꞌ oꞌchxhoꞌ alla poerrerret. Shonteꞌ acheñ ñeñth eꞌñe etserra poeswanmoeꞌ ñeñth ateth yexhaꞌyeseteꞌth ñeñth nanak sosyareꞌ, tharraña allempoñapaꞌ oꞌch alla moenereterr ñeñth oꞌ poeswanmoetañ awath pokthaphñet.