Efesios 4:16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁶ Ñatoꞌ oꞌch netmaꞌntacha ñeñth ateth pena yechets. Ñewa, yechetspaꞌ amach errothenoth ellopaꞌtetsteno. Amaꞌt allemeñ meynaꞌten yechets xhokma parrokmaten attho rremannenet eꞌñe kowen atthoña yenpannenet. Ñamha yapaꞌ yameꞌñeñoth Cristo eꞌñe poꞌchets phoweney alloweney amaꞌt paꞌnamen acheñrey. Atthoña Cristopaꞌ eꞌñe parrokmatateney ñeñthoꞌmarña eꞌñe yemorrentannaꞌteñoth oꞌch yeyenpannena eꞌñe kowen. Atthochña alloꞌnach yesen atontatnomoeꞌ ñeñth ateth eñotateney Yompor oꞌch yemorrentannerra alloweney.

Efesios 4:16 Iomraidhean Croise

San Juan 15:5

‘Napaꞌ na atthen ñerraꞌmrratheꞌ uvachrexhmoꞌr poeꞌchor, sapaꞌ sa poetakres. Eseshaꞌ neparrokmaterreꞌ ñamha napaꞌ eꞌñech neparrokmatenanet, ñeñthchaꞌña nanak meꞌtats. Ñerraꞌm aꞌyoꞌtsensa neshoth amatheꞌ errothenoth sorrtatyesoña ñeñth kowen enten Yompor.

Romanos 12:4

Ñatoꞌ oꞌch yetmaꞌntacha ñeñth ateth pena yechets. Ñewa, yechetspaꞌ ama eꞌñe pathrrayaya, ateth ñerraꞌm yeklleꞌ ñamha yot ñamha yetak. Ñamha ama eꞌñe pathrrayaye sherbenye, eꞌñe poꞌpoñeꞌttsokma sherbeney. Tharraña amaꞌt poꞌpoñeꞌttsokma sherbeneypaꞌ eꞌñe yokma yechets yephoweñ, tharroꞌmar eꞌñe pathrra yechets ateth petsa.

1 Corintios 10:17

Ñamha amaꞌtchaꞌ shonteypaꞌ eꞌñech pathrra pan yeshotaꞌt ñeñthchaꞌ yerraꞌyes amaꞌt alloweney. Ñeñthoꞌmarña yeñoteñ amaꞌt shonteypaꞌ eꞌñe yeparrokmateñoth Cristopaꞌ eꞌñe pathrra enteney alloweney, ñamha ñeñthara eꞌñech poꞌchets peney.

1 Corintios 13:13

Ñeñthoꞌmar theꞌpaꞌ yeñoteñ eñall maꞌpa ñeñthchaꞌ ama awañañathtatso ñeñthpaꞌ añ: attho yeyemteña Yompor, ñamha attho yeyemteñoth yekwameꞌteñ ñeñth oꞌpatatenya, ñamha attho yemorrentannena. Tharraña añ maꞌpoꞌmarpaꞌ añña nanak sherbets Yomporekop attho yemorrenteña allowen acheñeneshaꞌ.

1 Corintios 8:1

Theꞌpaꞌ oꞌch neserrpareꞌtatas poꞌpoñ ñeñth ateth saꞌphthoꞌtenen awaña, ñeñthpaꞌ ateth sotenen: Ñeñthey ameꞌñenaya Cristopaꞌ ñatoꞌ ¿poktoꞌtheꞌ oꞌch serraꞌ poꞌchets ñeñth moetsenet ayexhkatarethekop? Napaꞌ neñotenes poesheñaꞌttsospaꞌ sotyen sapaꞌ señotenoꞌ ñeñth kowentetsa Yomporekop. Ñewa, poꞌñoxh alloweneypaꞌ yeñoteñ ñeñth kowentetsa Yomporekop. Tharraña ñerraꞌm esempo yoten: “Napaꞌ eꞌñe neñotwen ñeñth kowentetsa Yomporekop”, ñerraꞌm eꞌñe yommoꞌcheñotha yotenpaꞌ ñeñthpaꞌ eꞌñech orrena ateth yoten. Yommoꞌcheñothpaꞌ amach xhoyeꞌ yeyenpanneno atthoch womenk yephaꞌ yeyoxher Yomporekop. Yemorrentannaꞌteñothpaꞌ xhochña yeyenpannaꞌta.

Gálatas 5:22

Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

Gálatas 5:6

Ñerraꞌm oꞌ yeparrokmaterr epay Cristo Jesúspaꞌ ama sherbeno attho yetsorrannaꞌtena, ñamha amaꞌt ama atsorraretheyepaꞌ ñeñthpaꞌxhoꞌña ama sherbeno Yomporekop. Aña ñapoeth sherbets eꞌñe yameꞌñeñoth Cristopaꞌ oꞌch yemorrentannaꞌta.

Efesios 1:4

Ateth awath paꞌmothrotheñ allempo ama ayexhkatarethtenaꞌ añe patserpaꞌ Yomporñapaꞌ allempotheñña akramperrey parro epay Poechemer Cristo atthoch yapaꞌ aꞌparrokmataterreychaꞌ epay Poechemer. Tharroꞌmar añekop akramperrey Poechemereshoth allochña yapaꞌ añach eꞌñe yemaꞌyoxhrena ñeñth kowentetsa Partsokop. Allochñapaꞌ atthochña eꞌñe pokteꞌ entweney Yompor, amach eñalle atthoch otteñeꞌcherrey amaꞌt eꞌñe mamesha.

Efesios 3:17

Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

Efesios 3:7

Ñeñthoꞌmarña napaꞌ oꞌ naparethterra llesens atthoch nach thorrerraya serrpareꞌterreꞌ añ kowen ñoñets ñeñth alloch yekeshperra. Napaꞌ attho naparethterra amaña añotheyeꞌ oꞌ naparethterro attho eꞌñe kowen es nephaꞌyen ñeñth eꞌñe nokpa. Ñapaꞌ eꞌñe poemoereñothen oꞌ awamenkath perren,

Efesios 4:12

Atthoña awamenkath phaꞌyeney allochñapaꞌ ñach poꞌwamenkaro yethorraꞌyesa poꞌpoñeꞌttsokma eꞌñe poesheñaꞌttsokmay ñeñthey poeyochreshaꞌ oꞌ perrey Parets. Atthochña eꞌñe kowen yeyenpanneñothpaꞌ oꞌch womenk yephannaꞌta yeyoxher Yomporekop alloweney ñeñthey ameꞌñenaya Cristo.

Efesios 4:15

Yapaꞌ añachña eꞌñech pathrra yokthapeꞌchen ñeñth eꞌñe poꞌñoxh alloch yekeshperra ñeñth ateth oteney Yompor poꞌñoñ. Eꞌñech yemorrentannaꞌteñoth es yephaꞌyen. Atthochña eꞌñe yephowen allowen ñeñth ateth kothapeꞌchateney Cristo. Atthochña yapaꞌ eꞌñech ora yokthapeꞌchen eꞌñe ateth kothapeꞌchen Cristo. Ñeñthoꞌmarña eshekchaꞌña yeparrokmat epay Cristo, ñeñthña Cristopaꞌ yeyoxher yepeñ ñeñth xhokma yokthapeꞌchateneꞌ kowen Yomporekop.

Filipenses 1:9

Ateth nenamoennas Yompor sokoppaꞌ ateth noten, alloꞌnepaꞌch sesen morrentannaꞌtnomtsa nanak ñamha alloꞌnepaꞌch sesen eñotnomoeꞌ ñeñth nanak sherbets yamoꞌtseshakop. Allochñapaꞌ atthoch xhokma yorrtaten yemorrenteña eꞌñe poꞌñoxh.

Colosenses 2:19

Ñetpaꞌ ama parrokmateñeto Cristo ñeñthoꞌmarña ama poeyoxhreyeꞌ peñetoña Cristo. Ñewa, yapaꞌ yoten yeyoxher ñeñthña atarr sherbets tharroꞌmar ñeñth atarrtateneꞌña ora yechets. Ateth pena yellokëmh ñamha yechtsorexh ñeñthña orreneꞌña yechets ñeñthoꞌmarña eꞌñe parrokmatateñ atthoña ora yechetspaꞌ atarrtena. Ateth penaña Cristo ateth ñerraꞌm poꞌñoxh ñeñth yeyoxher yepen. Alloweney ñeñthey ameꞌñaꞌyenaya Cristo eꞌñe parrokmatateney, allochña yapaꞌ alloꞌnach yesen orrtatyesnomoeꞌ ñeñth atarr sherbets Yomporekop tharroꞌmar yapaꞌ ateth moenateney Yompor.

Colosenses 2:2

Allochñapaꞌ atthochña eꞌñe soksherra seyoxhrowen attho eꞌñe semorrentannaꞌteñothpaꞌ oꞌch eꞌñe separrokmaterr. Atthochña xhaponasa seyoxhro atthoch atarr es señotyerr. Oꞌch señoterr ñeñth ama eñoteteꞌthe awathotheñ, ñeñthpaꞌ ñapthaña Yompor eñoteneꞌ. Ñeñthpaꞌ eꞌñepaꞌtkaꞌye Cristeshoꞌtsenña

1 Tesalonicenses 1:3

Tharroꞌmar allempo yemaꞌyocheña Yompor xhokma yeyerpoensa attho sapaꞌ eꞌñe seyemteñoth Yompor atarr sethorraꞌyena ñokop ñamha eꞌñe semorrentannaꞌteñothpaꞌ atarr seyenpannena. Ñamha eꞌñe seyemteñoth Yepartseshar Jesucristo sapaꞌ oꞌ womenk sephaꞌnom seyoxher eꞌñe ñokop.

1 Tesalonicenses 2:13

Ñeñthoꞌmarña añekop xhokma yeparasyosoꞌteñ Yompor ñamha attho sapaꞌ allempo yeꞌmhñotaterres Yompor poꞌñoñ sañapaꞌ eꞌñe kowen sagërrñañ poꞌñoñ. Amaꞌt ya seserrpareꞌtatosayeñ ama acheña poꞌñoñ senteñe, ñeñthpaꞌ Yomporoña poꞌñoñ sentña allempo. Ñewa, ñeñthpaꞌ eꞌñe poꞌñoxh Yompor poꞌñoñ. Theꞌña sa ñeñthes oꞌ sameꞌñerra, Yomporña poꞌñoñ oꞌ kothapeꞌchaterres eꞌñe kowen seyoxhro oꞌ eꞌñe wenaterres ñeñth ateth xhokma sephatseꞌtyeseꞌth awath; theꞌña sapaꞌ añ sorrtatyen ñeñth eꞌñe kowen enten Yompor.

1 Tesalonicenses 3:12

Yepartsesharepaꞌchña atontaterreꞌña semorrenteña allochñapaꞌ alloꞌnach nanak sesen morrentannaꞌttsa eꞌñe sagattsa atthochña alloꞌnach sesen morrentenaya allowen acheñeneshaꞌ, eꞌñe ateth yepena ya sapaꞌ nanak yemorrentensa.

2 Tesalonicenses 1:3

Oꞌch masheñneshachaꞌ ñamha noxhaneshachaꞌ notas, eꞌñe pokteꞌ xhokmach yeparasyosoꞌteñ Yompor sokop tharroꞌmar sapaꞌ poꞌñoxh alloꞌna sesen ameꞌñaꞌnmaya Yompor ñamha allowenes eꞌñe poesheñaꞌttsospaꞌ alloꞌna sesen morrentannaꞌtyesnomtsa.

1 Timoteo 1:5

Yomporpaꞌ añña moenen oꞌch yeyxhach acheñeneshaꞌ amorrentannaꞌtpawepaꞌch alloweney. Tharroꞌmar eꞌñe yameꞌñeñoth Cristo poktakma arrña yeyoxhropaꞌ eꞌñech kowenareꞌ yokthapeꞌchyen Yomporekop. Ñamha eꞌñech yeñmañeshaꞌ yokthapeꞌchen kowen.

1 San Pedro 1:22

Sapaꞌ oꞌ sameꞌñaꞌwa ñoñets ñeñth eꞌñe poꞌñoxh Yompor poꞌñoñ. Ñeñthoꞌmarña eꞌñe Parets poꞌwamenkoth oꞌ seswanom allpon sosyaꞌtsañ ñeñth seyoxhroꞌtsen, atthothchaꞌ eꞌñe semorrentannaꞌta. Theꞌñapaꞌ semorrentannaꞌtepaꞌch poktakma eꞌñe seyoxhrokmañen.

1 San Juan 4:16

Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor.