Efesios 4:14 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁴ Ya theꞌpaꞌ ama attheye ñerraꞌm cheshaneshaꞌ ñeñth ama es eñotetso ñeñth epwoyeꞌ kothapeꞌcheneꞌ kowen. Ñewa, ateth ñerraꞌm cheshaneshaꞌ theꞌpaꞌ ñatoꞌ poꞌpoñchaꞌ kothapeꞌchyenet, ñatoꞌ tsapathñapaꞌ oꞌchxhoꞌ kothapeꞌchyeneterr poꞌpoñ. Yapaꞌxhoꞌña ateth yepena yamha allempo ama yepoꞌnenaꞌ Cristokop. Yaña ñeñthey ama epwoyeꞌ yoktheñe Cristopaꞌ amach errothenoth yeꞌmhñocheña ya ashkañ atthoch ameꞌñatya ña pokthaphña, aththoch oꞌch pantatey.

Efesios 4:14 Iomraidhean Croise

San Mateo 11:7

Allempoña Juan poeyochreshaꞌpaꞌ oꞌ awanerret. Jesúsñapaꞌ alla serrpareꞌtaterranerr acheñeneshaꞌ ñeñth ateth peꞌth awaña Juan, ñeñthpaꞌ ateth otanet: —Awaña allempo seteꞌth amayo all serrpareꞌten Juan, sapaꞌ amakaꞌ añekpayeꞌ seteꞌtheña all oꞌch sentenaꞌ amoesmaꞌ ateth aꞌymaꞌtateñ mhorr.

San Mateo 24:11

Ñamha allempopaꞌ orretyerrach shonteꞌ ñeñthchaꞌ ayxhaꞌnaterrtsa ñetpaꞌ añoꞌ aꞌmhtenet Yompor poꞌñoñ. Tharraña poꞌñoxh amach Yomporeyeꞌ poꞌñoñ aꞌmhterreto, ñetpaꞌ atthachña shekëretña shonteꞌ acheñeneshaꞌ.

San Mateo 24:24

Orretyerrachkaꞌye ñeñthchaꞌ otyerrets ñapaꞌ ñoꞌña Cristotets. Tharraña ñeñthpaꞌ atthachkaꞌye shekareꞌtyerranña acheñeneshaꞌ. Orretyerrach ñamha ñeñthchaꞌ otyerrets ñapaꞌ ñoꞌña aꞌmhteneꞌña Yompor poꞌñoñ, tharraña ñeñthpaꞌxhoꞌña eꞌñech atthekma shekareꞌtyerran acheñeneshaꞌ, amachña Yomporeyeꞌña poꞌñoñ aꞌmhteno. Ñeñthchaꞌ ateth shekareꞌtyerrets, ñetñapaꞌ orrtatyerretchaꞌ ñeñth amaꞌt awatha acheñeneshaꞌpaꞌ ama poentare, atthochña kowanrrortateretña acheñeneshaꞌ. Amaꞌt ñeñth Yompor paꞌkrarnesharpaꞌ moeneñetañchaꞌ ñeñtheꞌnachña shekërret.

Los Hechos 23:21

Tharraña amach phameꞌñatstaneto errothenchaꞌ otospet tharroꞌmar metentheꞌ paꞌtatsoth xharrasheña judioneshaꞌ ñeñthchaꞌ kamroya thoño ñeñthchaꞌ rromapoeꞌ goꞌ. Ñetpaꞌ oꞌ aꞌpoktachet amach rrerreto ñamha amach es orreto ñerraꞌm amoꞌch moetseto goꞌ. Ñamha oꞌ aꞌpoktachet ñerraꞌm amoꞌch atthetopaꞌ amaꞌtpaꞌ esepaꞌtoꞌ tantawet. Theꞌpaꞌ aña palltetsa ñeñthchaꞌ ateth photanet.

1 Corintios 12:2

Amaꞌt sapaꞌ señoteñ awañmoꞌcha allempo ama sameꞌñerraꞌpaꞌ attha semaꞌyochatseꞌtyeseꞌth ayexhkatarethexhno. Ñamha ayexhkatarethexhnopaꞌ amaꞌt ama eñorenopaꞌ attha nanak ameꞌñataseteꞌth, amaꞌt all setaꞌyeseꞌth.

1 Corintios 14:20

Ñeñthoꞌmarña masheñneshachaꞌ ñamha noxhaneshachaꞌ amach sokthapeꞌchatsto ateth kothapeꞌchen cheshaneshaꞌ ñeñth ama eñotenaye ñeñth ateth kowentetsa. Ñewa, poꞌñoxh ñerraꞌm esempo yokthapeꞌchyen sosyaꞌtsañ allempoña pokteꞌ oꞌch yokthapeꞌchen ñeñth ateth kothapeꞌchen cheshatholl, tharroꞌmar cheshathollpaꞌ ama tama kothapeꞌchenetaꞌ sosyaꞌtsañ. Tharraña allempo yokthapeꞌchen ñeñth kowentetsa Yomporekoppaꞌ allempoña poꞌñoxhpaꞌ oꞌch yokthapeꞌchen ateth kothapeꞌchen poꞌnaneshaꞌ ñeñth atarr es eñotets.

1 Corintios 3:19

Tharroꞌmar ñerraꞌm esempo ñeñthey acheñey añe patsro ñerraꞌm xha yotenapañ yapaꞌ atarrtheꞌ es yeñoten, Yomporñapaꞌ ateth enteney ñerraꞌmrratheꞌ xha yotatseꞌtyen. Ñeñthpaꞌ anwareth ñamha awathotheñ Yompor poꞌñoño, ñeñthpaꞌ ateth oten: “Amaꞌt attho es eñotatseꞌtyenetpaꞌ Yomporñapaꞌ oꞌch eñotanet attha otatseꞌtyenet, amaꞌt ñetpaꞌ otenapoetañ nanaktheꞌ es eñotenet tharraña ñeñthpaꞌ shekëñtsa.”

2 Corintios 2:17

Añ pokteꞌ enten Yompor ñeñthchaꞌ serrpareꞌteneꞌ poꞌñoñ ñeñth eꞌñe poeñmañeshokmañen serrpareꞌteneꞌ. Ateth ñerraꞌm ya, tharroꞌmar yapaꞌ ama xhoyeꞌ yetseteno Yompor poꞌñoñ acheñ pokthaphño ñeñth ateth pena shonteꞌ poꞌpotantañ acheñeneshaꞌ. Ñetpaꞌ ateth penet atthoch pokshateñoth acheñeneshaꞌpaꞌ oꞌch es apaꞌyenanet. Añchaꞌña eꞌñe yeñmañeshokmañen yeserrpareꞌteññañ poꞌñoñ ateth llesenseney Yompor. Ñapaꞌ enteney ñeñth ateth yeꞌñorena ñokop eꞌñe yeyemteñoth Poechemer Cristo.

2 Corintios 4:2

Ñeñth aꞌnawa es phaꞌyenet ñeñth apenkoxhen yenten yokop ya ñeñthey thorretsa Yomporekoppaꞌ ñeñthña napaꞌ oꞌ naꞌypoꞌñamper. Ñamha napaꞌ ama es neshkëñoth nephaꞌyeno masheñneshakop. Ñamha napaꞌ allempo neserrpareꞌtateñ acheñeneshaꞌ ama xhoyeꞌ naꞌpoꞌpoñeteññañe Yompor poꞌñoñ. Añchaꞌña eꞌñe naꞌpotheññañ Yompor poꞌñoñ eꞌñe poꞌñoxh ñeñth ateth oten poꞌñoñ. Yomporpaꞌ entenen ñeñth ateth notenes ñeñthpaꞌ eꞌñe poꞌñoxh ateth. Ñamha amaꞌt erraꞌtsena acheñer ñeñth eñoteneꞌ ñeñth eꞌñe pokteꞌ entenet ñet poeyoxhretopaꞌ ñetpaꞌxhoꞌña eꞌñech kowen entapretennet.

Gálatas 3:1

Sapaꞌ nanak, galacioꞌmarneshachaꞌ, sepanteñ. Poꞌñoxh sa oꞌkaꞌye xha shekaset atthoña theꞌ sapaꞌ oꞌwañ sameꞌñenaña ñeñth eꞌñe poꞌñoxh alloch yekeshperra. Amaꞌt awaña allempo yeserrpareꞌtatensaꞌpaꞌ yapaꞌ añ yeñotatwas attho poꞌñoxh Jesucristopaꞌ oꞌ akorsoꞌtamphsarethta eꞌñe yokop. Ñeñthña poꞌñoxh sameꞌñaña sa allempo.

Efesios 6:11

Ñeñthoꞌmarña añ poktetsa yokop oꞌch yagërrñañ ora allpon ñeñth apoeney Yompor allochñapaꞌ ñeñthchaꞌña yemoñenaya atthoch amach alla aꞌpoerrataterrye oneñeth. Tharroꞌmar yeñoteñ oneñethpaꞌ xhokma eꞌnenan atthoch shekareꞌteney.

1 Timoteo 3:6

Ñamha ñeñthchaꞌ amhchaꞌtarethtatsapaꞌ amach aña senatsto ñeñth errteꞌ ameꞌñetsa, tharroꞌmar ñerraꞌm aña senaꞌ amhchaꞌtareth ñeñth errteꞌ ameꞌñetsapaꞌ ñeñthpaꞌ amach eꞌñe eñotwenano ñeñth kowentetsa Yomporekop, allempopaꞌ eꞌñe ña paꞌmhchaꞌtarethteñothpaꞌ xhatheꞌ atarr ommoꞌcha. Tharroꞌmar ñerraꞌm xha yommoꞌchapaꞌ ñeñthpaꞌ ama pokteyeꞌ enteñe Yompor. Xhatheꞌ awaporeꞌtarethey ateth pet awath oneñeth eꞌñe pommoꞌcheñothpaꞌ awoꞌt waporeꞌchet.

2 Timoteo 1:15

Napaꞌ oꞌ notaph ateth tharroꞌmar amaꞌt phapaꞌ peñoteñtheꞌ shonteꞌ acheñ ñeñth yexhaꞌyetsa Asioꞌmarpaꞌ oꞌ sowanerrnet, ateth ñerraꞌm Figelo ñamha Hermógenes.

2 Timoteo 3:13

Tharraña ñeñth ama kowenayaye acheñpaꞌ alloꞌnach senet phatseꞌtnomoet sosyaꞌtsañ. Ñamha ñeñth attha shekaꞌyetspaꞌ alloꞌnach senet shekannaꞌtatset.

2 Timoteo 4:3

Tharroꞌmar esempowañenpaꞌ xhapchaꞌ allempo acheñeneshaꞌpaꞌ oꞌwañchaꞌ moenet oꞌch ameꞌñet ñeñth eꞌñe paxharr kothaphñats, ñeñth ateth yexhateney Yompor poꞌñoñ. Allempopaꞌ añach eꞌnyerret erraꞌtsentheꞌ serrpareꞌteneꞌ kothaphñatser ñeñth eꞌñe kowen entenet ñet atthothchaꞌña atonterraña ñeñthchaꞌ yexhaterrawet ñeñth eꞌñe ñet pokthaphñet.

Hebreos 13:9

Ñeñthoꞌmarña amach seyemtatstoña ñeñth poꞌpoñexhno yexhateñets ñeñth ama attheyeꞌ ayxhataretheso awañmoꞌchotheñ. Tharroꞌmar añña poktetsa oꞌch womenk yephaꞌ yeyoxher eꞌñe Yompor poemorrenteñothey attho atarr yenpoeney eꞌñe attha. Ama añotheyeꞌ womenk yepenoña yeyoxher attho es yerraꞌyen amapaꞌ attho es yethoreꞌtyena. Tharroꞌmar ñeñth kotheneꞌ añ yexhateñets rreñtsokpaꞌna, ñeñth yexhateñtsorpaꞌ ama yenpoenaneto atthoch womenk phaꞌnmoet poeyoxher Yomporekop.

Santiago 1:6

Tharraña ñerraꞌm esempo es senamoeñ Yomporpaꞌ eꞌñech seyemteñoth es sanamh. Amach xha seꞌcharrtatsto seyoxhro amaꞌt mamesha. Tharroꞌmar ñeñth xhokma echarrtetsa poeyoxhropaꞌ amach eꞌñeyeꞌ yemtenano Yompor ñeñthoꞌmarña ñeñth ateth petsapaꞌxhach ottena ñerraꞌmrratheꞌ oñ poeꞌmoꞌyer ñeñth allemhatheñ anen mhorr.

Santiago 3:4

Ñatoꞌ oꞌch netmaꞌntacha ñamha ñeñth ateth pena bote ñeñth chopeꞌchets oño. Ñewa, botepaꞌ amaꞌtchaꞌ nanak añekmoen noñthpaꞌ eꞌñe poepopaphothpaꞌ oꞌch aneñet all sechateñ pamoꞌmteꞌ. Ñamha amaꞌtchaꞌ poepopaphpaꞌ añethollphach, ñamha amaꞌt mhorrpaꞌ moeneñeñchaꞌ oꞌch anemh aꞌyeneth alleneth ama yesechateñe, eꞌñe poepopaphothpaꞌ oꞌch eꞌñe kowen aneñet alleneth sechateñ pamoꞌmteꞌ.

2 San Pedro 2:18

Ñamha nanakchaꞌ ommoꞌchenet attho phaꞌyenet ñeñth nanak sosyareꞌ. Ñamha oꞌch aꞌsecheñet poꞌpsheñeñ atthoch oꞌch phachet ñeñth nanak moenenet poꞌchets atthothchaꞌ aꞌpsatarethterret, allempoñapaꞌ oꞌchxhoꞌ alla poerrerret. Shonteꞌ acheñ ñeñth eꞌñe etserra poeswanmoeꞌ ñeñth ateth yexhaꞌyeseteꞌth ñeñth nanak sosyareꞌ, tharraña allempoñapaꞌ oꞌch alla moenereterr ñeñth oꞌ poeswanmoetañ awath pokthaphñet.

1 San Juan 2:19

Amaꞌt awañmoꞌcha eꞌñe parrokma yapxhañeꞌth ñetña theꞌpaꞌ oꞌ awanmoet elloneth oꞌ sowanerryet tharroꞌmar poꞌñoxhpaꞌ ama allowenakmayeꞌ yeparrokmaterro. Ñerraꞌm poꞌñoxhchaꞌ allowenakmay yeparrokmaterreñ allempoña ñetpaꞌ alloꞌtsaꞌyenetañatheꞌ ñamet yesho. Tharraña theꞌña ñetpaꞌ oꞌ awanerret elloneth atthoña oꞌ yeñoterranet poꞌñoxhpaꞌ ama allowenakmayeꞌ yeparrokmaterro.

1 San Juan 2:26

Ñeñth notenes añ nekellkoth ñeñthpaꞌ añekpa nekellkënnas atthoch sapaꞌ eꞌñech señoter allochñapaꞌ atthoch ama saꞌshkarethterro.

1 San Juan 4:1

Ñamha theꞌpaꞌ oꞌch, masheñneshachaꞌ ñamha noxhaneshachaꞌ, noterrserr: sapaꞌ ñatoꞌt sameꞌñenaꞌña allowen paꞌnamen kothaphñats tharroꞌmar ñetpaꞌ amaꞌt otenetañ Partsoꞌ Poekamkëñ eñoratenawet, sapaꞌ xhochña señotyesña ñeñth paꞌnamen kothaphñatser atthochña sapaꞌ eꞌñe señoch erraꞌtsentheꞌña ñeñth eꞌñe poꞌñoxh wetsa Yomporeshoth. Tharroꞌmar shonteñ ñeñth otetseñ ñetpaꞌ Yomporoꞌ poꞌñoñ aꞌmhtenet tharraña ñeñthpaꞌ ama Yomporeyaye poꞌñoñ. Ñeñthpaꞌ errapharen oꞌ orretyesa añ patsro.

San Judas 1:12

Ñeñthña ashkañneshaꞌpaꞌ sapaꞌ ñeñthña sepenknaꞌntateneꞌ allempo sapxhena oꞌch serratallmeꞌchannena ñeñthes ameꞌñenaya Yompor. Sapaꞌ serratallmeꞌchannena eꞌñe semorrentannaꞌteñoth, tharraña ñetpaꞌ atthach nanak rratseꞌtyenet amach ayetñathteneto amach kowaꞌpeñetoña ñamha poꞌpsheñeñ ñeñth cheporretsa ñeñth moenets oꞌch rraꞌ ñamha. Ñetpaꞌ eꞌñe ateth penetañ ñerraꞌmrratheꞌ ñeñth kowampenayeñ carnero ñeñthchaꞌ rratenayeñ tharraña amachña carneroyeꞌña rrateno, ñeñthapaꞌ ñañeñetach atarr rretset. Ñetpaꞌ ama es sherbeneto eꞌñe attha penet ateth ñerraꞌmrratheꞌ os ñeñth ama watetso atthach matateñ mhorr. Ñamha eꞌñe atthet ñerraꞌmrratheꞌ narmetsoch ñeñth ama ameꞌtño, amaꞌtchaꞌ xhen poemeꞌteñporopaꞌ amach meꞌteno. Ñamha ñeñthña narmetsocherpaꞌ eꞌñech ateth pena ñerraꞌmrratheꞌ rromoech oꞌch yaꞌmare ora poerxhowenpaꞌ oꞌch eꞌñe poetsowa oꞌch wañ. Ñeñthña amaꞌt mameshapaꞌ amach es sherberrye.

El Apocalipsis 19:20

Allempoña kellarannaꞌtet maꞌyarrmaꞌthñapaꞌ xha rremoet epoet ñamha ñeñth aꞌmhteneꞌ eꞌñe ña poꞌñoñ tharraña ñeñthpaꞌ ashkaña. Añ ñeñth ashkañerpaꞌ eꞌñe maꞌyarrmaꞌth poꞌwamenkoth gatenan acheñeneshaꞌ ñeñth ama poentareto. Ñeñthpaꞌ alloña shekënan acheñeneshaꞌ atthoch ameꞌñeñet. Ñeñthña acheñeneshaꞌpaꞌ oꞌ eꞌñe yatoꞌmatwanet maꞌyarrmaꞌth poeyotsaparo. Ñetñapaꞌ aña maꞌyochenet ayexhkatareth ñeñth tomaꞌntatenet maꞌyarrmaꞌth. Allempoña rremoet maꞌyarrmaꞌth epoet ñamha ñeñth aꞌmhteneꞌ poꞌñoñ allempoñapaꞌ awaporeꞌtarethtet epsheñoꞌmaret eꞌñe bethareret all parraren tsoꞌ errapharen. Ñeñth tsoꞌpaꞌ atarr shemasher worten.