Efesios 4:1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñeñthoꞌmarña theꞌpaꞌ añ notenes amaꞌt na ñeñthen ayottamphsarethen eꞌñe nethorreñoth serrpareꞌteꞌ Yepartseshar Cristo. Theꞌpaꞌ oꞌch notas: Eꞌñech kowen es sorrtatyen ñeñth ateth poktetsa añekop ñeñth oꞌ waꞌñerr Yompor ñeñthchaꞌ poeyochreshaꞌ perr ateth ñerraꞌm sa.

Efesios 4:1 Iomraidhean Croise

Los Hechos 9:31

Attheñapaꞌ oꞌ moetsoñeñtwerra ñeñth amoeroxhtatañ. All Judeo ñamha Galileo ñamha Samariopaꞌ oꞌwañ amoeroxhtatarethtet ateth peteꞌth awaña. Allowen ñeñth ameꞌñetsa alloꞌna senet womenk phaꞌnmoet poeyoxhret. Attheñapaꞌ oꞌ shontaꞌnma ñeñth ameꞌñetsa. Pameꞌñeñothetpaꞌ alloꞌna senet mechaꞌnaꞌtnomoet Yompor. Ñamha alloꞌna Parets Poekamkëñpaꞌ nanak koshatenanet.

Romanos 11:29

Tharroꞌmar Yomporpaꞌ ama poenesho poꞌñoñ. Ateth otaneteꞌth awath ñeñthchaꞌ oꞌpataterranetpaꞌ eꞌñech etsotwerra. Ñamha ateth otaneteꞌth ñeñthchaꞌ ateth xhoreꞌterranet atthoch eꞌñe ameꞌñaꞌweretpaꞌ ñeñthpaꞌxhoꞌña eꞌñech etsotwerra.

Romanos 12:1

Ñeñthoꞌmarña theꞌpaꞌ oꞌch, masheñneshachaꞌ ñamha noxhaneshachaꞌ, notas, attho Yomporpaꞌ atarr moerenya, yapaꞌ añ eꞌñe poktetsa oꞌch yapwer Yompor yechets. Oꞌch yapwer allowen yechets ateth ñerraꞌmrratheꞌ ñeñth moetseteꞌth awath Yomporekop ñeñthchaꞌ nenet ñokop. Tharraña ya yechets eꞌñech bethnathoth yapwer Yompor tharroꞌmar ñeñthpaꞌ eꞌñech ñokpa, ñeñthchaꞌ nanak koshateneꞌ ña. Atthochña eꞌñech yeyoxhrokmañen kowen yokther Yompor.

1 Corintios 4:16

Ñeñthoꞌmarña napaꞌ notenes: Ateth sentenen ateth nepena na eꞌñe kowen, sapaꞌxhoꞌña atethchaꞌ sepha samha.

2 Corintios 10:1

Ñewa, theꞌpaꞌ na Pablon oꞌch alla nokthapeꞌchaterrserr eꞌñe nemoereñothes atthen ñerraꞌm Cristo ñeñth nanak amoerañtostsa. Poemoereñothey ya ñapaꞌ eꞌñe pokteꞌ eñcheꞌth oꞌch ateth enteñet ñerraꞌm ñapaꞌ ama esosheꞌmayaye. Ñewa, sapaꞌ patantaꞌttsospaꞌ atthach sentenen ama erroth notenso atsrreꞌmoxhen ñerraꞌm esempo alloꞌtsenen sesho. Tharraña ñerraꞌm esempo allapharoꞌtsenen, allempo nekellkënnas cartapaꞌ allempoña sapaꞌ ateth sentenen ñerraꞌmrratheꞌ ama xhoyeꞌ nemhchaꞌtenso amaꞌt eꞌñe mamesha, eꞌñech echeꞌxharr notenes necartoth. Tharraña ñeñthpaꞌ ama attheyaye. Amaꞌt allempo alloꞌtsenen sesho, ñerraꞌm nemneñeñ ateth neꞌñoronasapaꞌ eꞌñetheꞌ echeꞌxharr neꞌñorennasa. Ñeñthoꞌmarña theꞌpaꞌ eꞌñe neyoxhrokmañen oꞌch notas, sokthapeꞌcherr kowen eꞌñe thayekma allochñapaꞌ ñerraꞌm esempoch nexherr seshopaꞌ amach xha seꞌñoratno echeꞌxharr. Tharroꞌmar ñerraꞌm ama sokthapeꞌcherro kowen, poꞌñoxh ñerraꞌm esempo nexherr seshopaꞌ xhach seꞌñoraten echeꞌxharr, ñeñthes noteneꞌ napaꞌ eꞌñoꞌ nañeña nokthaphñoth ateth es nephatseꞌtyen ñeñth ateth phaꞌyena acheñeneshaꞌ arr patsro, ñeñthpaꞌ eꞌñe ñokpoeta sherben. Tharraña napaꞌ ama attheyeꞌ nepeno.

2 Corintios 5:20

Ñeñthoꞌmarña yapaꞌ allsensarethey ñeñthchaꞌ yetarwas yeperr ñeñtheychaꞌ eñosets kowen Cristokop atthoch yameꞌñacha allowen acheñeneshaꞌ. Ñeñthpaꞌ attho Yomporpaꞌ oꞌ waꞌñerres oꞌch sameꞌñera, tharraña ñeñthpaꞌ eꞌñe ya yeserrpareꞌtateñothes oꞌ waꞌñerres Yompor. Ñeñthoꞌmar theꞌpaꞌ oꞌch notas Cristokop, ñach sameꞌñerra allochñapaꞌ atthoch eꞌñe amoꞌtsterrsa Yompor eꞌñe poktakma.

2 Corintios 6:1

Theꞌpaꞌ attho yethorraprecha Yompor, napaꞌ oꞌch notas, amach eꞌñe orrena sagapatstoñe Yompor poemoereña.

Gálatas 4:12

Theꞌpaꞌ oꞌch masheñneshachaꞌ ñamha noxhaneshachaꞌ notas, atarr nemneñ oꞌch sokthapeꞌcherr ateth nokthapeꞌchen na. Tharroꞌmar napaꞌ oꞌ naꞌypoꞌñerrñañ judioneshaꞌ pokthaphña. Theꞌpaꞌ oꞌ nokthapeꞌcherr ñeñth ateth sepeꞌth awath sa, allempo ama sokthapeꞌcherrñañaꞌ judioneshaꞌ pokthaphña. Awañmoꞌcha allempo alloꞌtsenen seshopaꞌ eꞌñe kowen semoeraꞌneꞌth.

Efesios 2:10

Tharraña Yomporpaꞌ oꞌ etserrataterrnay yokthaphña allochñapaꞌ atthoch eꞌñe kowen es yephaꞌyen. Poꞌñoxh eꞌñe yeparrokmateñoth Cristo, Yomporñapaꞌ oꞌ etserra yexhkaterrey. Tharroꞌmar ñapaꞌ amaꞌt awathotheñpaꞌ ateth kothapeꞌcheꞌth yokop atthochña yapaꞌ eꞌñepaꞌchña kowenareꞌ es yephaꞌyen.

Efesios 3:1

Ñeñthoꞌmarña napaꞌ xhokma nemaꞌyochena sokop. Neserrpareꞌtateñothes sa Cristo Jesús ñeñthes ama judioneshayayso ñeñthoꞌmarña na theꞌpaꞌ yottampennet.

Efesios 4:17

Ñeñthoꞌmarña theꞌpaꞌ oꞌch notas ñeñth poꞌñoxh sherbets Yepartsesharekop. Sapaꞌ amach alloꞌna ateth sephaꞌyesneno ñeñth ateth phatseꞌtyena ñeñth ama ameꞌñenayo Yompor. Tharroꞌmar ñeñth ateth kothapeꞌchatseꞌtyenet ñetpaꞌ ñeñthpaꞌ eꞌñe orrena amaꞌt mameshapaꞌ ama es sherbeno.

Efesios 4:4

Tharroꞌmar poꞌñoxhpaꞌ eꞌñe yeparrokmatwen alloweney ñeñthey ameꞌñenaya Cristo ñamha ñeñthara patherr Parets Poekamkëñ ñeñth yechorraꞌyenaya alloweney. Ñamha amaꞌt paꞌnameney shontey ñeñthey oꞌ xhoreꞌterrey Yompor tharraña eꞌñe ñeñthara yeyemteñoth yekwen alloweney ñeñth oꞌpatatenya Yompor ñeñthchaꞌ apaꞌyeswerrey.

Efesios 5:2

Elloña Cristopaꞌ atarr morrentenya. Ñeñthoꞌmarña eꞌñe pokteꞌ eñch atthoña poma ñañeña attho rroma yokop ateth peteꞌth awath allempo moetseteꞌth carnero Yomporekop. Ñeñthña eꞌñe kowen enteꞌth Yompor eꞌñe ateth ñerraꞌmrratheꞌ ñeñth allo atarr eñmosathtamphsacheteꞌth awath ña. Attho atarr morrentya Cristo, yokoppaꞌxhoꞌña añ poktetsa eꞌñech kowen yemorrentannaꞌtwena.

Filipenses 1:27

Theꞌpaꞌ añach notas, xhokmoepaꞌch sokrra eꞌñe kowen ñeñth ateth yorrtaten ñeñthey ameꞌñenaya Cristo poꞌñoñ. Allochñapaꞌ ñerraꞌm machayotha nabhcherrsaꞌ amapaꞌ ñerraꞌm amaꞌtchaꞌ ama yabhchannerropaꞌ eꞌñepaꞌchña kowen neꞌmareꞌtenes attho eꞌñe womenk sepen seyoxher atthoch eꞌñe pathrra sokthapeꞌchen. Ñamha oꞌch neꞌmareꞌtas attho sapaꞌ semaꞌyoxhrena allowenes parro atthoch semoñena añ kowen ñoñets alloch yekeshperra.

Filipenses 3:14

Tharroꞌmar ñeñthekop oꞌ xhoreꞌterrey Yompor poeꞌntañoth atthoch eꞌñe yeparrokmateñoth epay Poechemer ñeñth Cristo Jesús, esempopaꞌ yephowerrach ora errpontheꞌ eꞌñe pokteꞌ enten ña. Allochñapaꞌ apwerreychaꞌ ñeñth oꞌpatatenya ñeñthchaꞌ nanak yokshatwerreꞌ alloweney ñeñthey oꞌ yameꞌñera.

Colosenses 1:10

Allochñapaꞌ oꞌch eꞌñe seyxherr ñeñth ateth poktetsa allowenakop ñeñthey poeyochreshaꞌ pen Yepartseshar. Allochñapaꞌ atthochña eꞌñe sokshateñ. Eꞌñe attho es kowen sorrtatyenpaꞌ nanakchaꞌ kowenoth sesherbeñ. Alloꞌnepaꞌchña sesen eñotnomoeꞌ ñeñth ateth penaña Parets.

Colosenses 2:6

Attho oꞌ sagapoer Yepartseshar Cristo Jesús, theꞌña sapaꞌ alloꞌnepaꞌch sesen eꞌñe parrokmatats epas.

Colosenses 4:12

Ñamha masheñ Epafras ñeñth parroꞌmarneshas, ñapaꞌxhoꞌña moeneñ oꞌch womhchaꞌtas ñamha. Ñapaꞌxhoꞌña nanak thorrena Cristokop. Eꞌñe poemaꞌyocheñoth womenkpaꞌ atarr thorrena sokop. Poemaꞌyocheñothpaꞌ xhokma enamatennas Yomporeshoth atthoch eꞌñe womenk sephaꞌnom seyoxher Yomporekop. Ñamha añ enamoennas atthoch eꞌñech poktakma xhaponasa seyoxhro ora allowen ñeñth ateth moenen Yompor.

1 Tesalonicenses 2:12

poꞌñoxh sapaꞌ eꞌñepaꞌchña kowen sorrtatyen ñeñth ateth poktetsa añekop ñeñth poꞌñoxh ameꞌñenaya Yompor tharroꞌmar ñapaꞌ oꞌ waꞌñerres oꞌch soꞌpatapretera all amhchaꞌtarethtena ña, atthochña sekowentapretera samha.

2 Tesalonicenses 1:11

Ñeñthoꞌmarña yapaꞌ xhokma yemaꞌyochampensa allochñapaꞌ atthoch Yomporpaꞌ eꞌñe pokteꞌ entenes attho ñapaꞌ oꞌ xhoreꞌterres oꞌch poeyochreshaꞌ perres samha. Ñamha yapaꞌ añ yenamoennas Yompor eꞌñepaꞌchña poꞌwamenkoth etsotatonasña allowen ñeñth ateth sokthapeꞌchyen kowen ñokop ñamha ora ñeñth allpon sethorraꞌyena eꞌñe sameꞌñeñoth ña.

2 Timoteo 1:9

Ñeñthara ñeñth oꞌ aꞌkeshphaterrey, atthoña oꞌ xhoreꞌterrey atthoch yemaꞌyoxhra ñeñth kowentetsa Partsokop. Tharraña añmapaꞌ ama añotheyaye attho eꞌñe kowen es yephaꞌyeseꞌth awath, añmapaꞌ tharroꞌmar ateth moenen ña. Yomporpaꞌ nanak morrentyeꞌth ñeñthoꞌmar amaꞌt awathotheñpaꞌ awoꞌt oꞌpatatya Poechemer Cristo Jesús.

Tito 2:10

Ñamha amachña xha etyeneto atthoch poꞌpatronaretpaꞌ eꞌñech yemtenanet poktakma. Allochñapaꞌ eꞌñe pameꞌñeñothet kowen poꞌpatronaretpaꞌ añña acheñeneshaꞌpaꞌ eꞌñech kowen entapretenet Yompor pokthaphña, ñeñthara ñeñth Yaꞌkeshphatañer yepen.

Hebreos 3:1

Ñewa, masheñneshachaꞌ ñamha noxhaneshachaꞌ, sapaꞌ ñeñthes oꞌ saꞌkowentatarethterra Partsokop ñeñthes oꞌ xhoreꞌterres Yompor oꞌch xhapaterres all poeꞌntaño. Theꞌpaꞌ oꞌch notas, oꞌch sokthapeꞌch eꞌñe kowen ñeñth ateth perrnay Cristo Jesús ñeñth yameꞌñerra. Ñapaꞌ attho allsensarethtapaꞌ eꞌñe kowen etsotwan ñeñth ateth llesenseꞌ Pompor. Ñamha ñapaꞌ ña Yekorneshar yepen ñeñth atarr sherbets Partsokop allowenakpay ñeñthey ameꞌñenaya Yompor. Ñapaꞌ eꞌñe atthekma kowen etsotwan ora allpon ñeñth ateth moenach Pompor acheñeneshakop ateth peꞌth ñamha Moisés ñapaꞌxhoꞌña eꞌñe etsotan ñeñth ateth och Yompor allowen poeyochreneshakop. Ñewa, allowen ñeñth poeyochreneshaꞌ pen Yomporpaꞌ ñetpaꞌ paꞌpakëll penanet Yompor.

1 San Pedro 2:11

Oꞌch, masheñneshachaꞌ ñamha noxhaneshachaꞌ, eꞌñe nemorrenteñothes oꞌch notas: Sapaꞌ amaꞌt seyxhenañ añe patsro ñeñthpaꞌ ama saꞌnetsreyaye. Ñeñthoꞌmarña añ poktetsa oꞌch saꞌypoꞌñampes ñeñth moenatseꞌtyeseꞌth sechets. Ateth moenaꞌyen yechetspaꞌ ñeñthña kellareneꞌña yekamkëñ; moeneñ oꞌch aꞌchenkatonay yekamkëñ.

1 San Pedro 3:9

Ñerraꞌm poꞌpsheñeñ erroth phaspaꞌ sapaꞌ amach setsaꞌtatatsche eso. Ñerraꞌm poꞌpsheñeñ sasareꞌtaspaꞌ sapaꞌ amach sesasareꞌtatsterraneto. Añchaꞌña oꞌch senamoñ Yompor aꞌnachepaꞌ, tharroꞌmar ateth moenen Yompor atethchaꞌ yepha. Allochñapaꞌ ñerraꞌm ateth yephapaꞌ ñapaꞌ oꞌch aꞌnatenya yamha.

1 San Pedro 5:10

Amaꞌt moeroxhtatyesasetchaꞌ mameꞌ tharraña Yomporpaꞌ nanak amoeraña. Ñapaꞌ ñachña aꞌpoktatwerreꞌña sokop, atthoch womenk perrnas seyoxher. Allochñapaꞌ amach alla sepoeswere. Atethchaꞌ phatonay Yompor, ñeñthey moeneneꞌ oꞌch yekowentaprecha poꞌkowenño. Eꞌñe yameꞌñeñoth Cristo yekowentapreterach poꞌkowenña ñeñthchaꞌ ama awañañathterrtso.

2 San Pedro 1:3

Eꞌñe yeyemteñoth Yompor ñapaꞌ xhokma apoeney allowen ñeñth allpon yepalltena alloch yokrrena eꞌñe kowen ñokop. Ñamha apoeney atthoch yokthapeꞌcherr ñeñth eꞌñe pokteꞌ enten ña. Ñeñthpaꞌ eꞌñe ña poꞌpartsoteñoth apoeney. Ñapaꞌ añ moenen oꞌch yekowentapretera ña. Ñamha añ atarr moenen oꞌch yorrtatapreter poꞌkowenña.

2 San Juan 1:5

Oꞌch noxheshachaꞌ neyerpatapha, alloꞌnepaꞌch amorrentannaꞌtpoꞌ sentannena allowenes. Ñeñth ateth noteneph arr nekellkothpaꞌ ñeñthpaꞌ ama añeyaye ñoñets ñeñth ama seꞌmare. Amaꞌt allempotheñ eꞌñe errteꞌ sameꞌñerrapaꞌ allempotheñ seꞌmoerrña ñeñth ñoñets.