Efesios 3:6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁶ Ñeñth eñotateney theꞌpaꞌ ñeñthpaꞌ attho amaꞌt ñeñth ama judioneshayaye, ñetpaꞌxhoꞌña oꞌpatapreteretchaꞌ Yompor ñeñthchaꞌ apoerranet atthekma oꞌpatatenya yamha ñeñthey judioneshay. Theꞌpaꞌ eꞌñe separrokmateñoth Cristo, theꞌña sapaꞌ eꞌñe poꞌchets penes ateth ñerraꞌm ya ñeñthey judioneshay. Atthoña oꞌ eꞌñe yeparrokmatwawerr alloweney. Ñamha ateth oteꞌth Yompor awath ñeñthchaꞌ ateth kowen perrnay esempo eꞌñe Cristeshoth atthoch aꞌkeshphaterreypaꞌ ñeñthpaꞌ añekpaꞌnaña ñeñth ama judioneshayaye. Ñewa, ñet añoth aꞌkeshphatarethterret attho eꞌñe pameꞌñeñothet añ kowen ñoñets ñeñth alloch yekeshperra alloweney.

Efesios 3:6 Iomraidhean Croise

1 Corintios 12:12

Ñatoꞌ oꞌch netmaꞌntacha ñeñth ateth yexhkëna yechets. Ñewa, allemeñ yechetspaꞌ amaꞌtchaꞌ ellopaꞌtetstenañpaꞌ tharraña allowenpaꞌ eꞌñe pathrra yechtsoth. Atthekma yepena yamha alloweney ñeñthey ameꞌñaꞌyenaya Cristo. Amaꞌt shonteyeñ poꞌpoñeꞌttsokmaypaꞌ tharraña eꞌñe yameꞌñeñoth Cristopaꞌ oꞌch yeparrokmatwawa alloweney.

1 Corintios 12:27

Ñewa, añ yechets ñeñth oꞌ notwapaꞌ añ tomaꞌntena ya alloweney ñeñthey oꞌ yameꞌñera, Cristopaꞌ oꞌ enterrey ateth ñerraꞌm eꞌñe ña poꞌchtsoy, tharroꞌmar oꞌ yeparrokmat epay Cristo. Ñamha amaꞌt shonteyeñ eꞌñe poꞌpoñeꞌttsokmaypaꞌ tharraña eꞌñe yeparrokmateñothpaꞌ oꞌ ateth yeperra ateth ñerraꞌm Cristo poꞌchtsoy.

Gálatas 3:14

Ñeñthoꞌmarña yeñoteñ eꞌñe pameꞌñeñothet Jesucristopaꞌ oꞌch eñalleta atthoch Yomporpaꞌ eꞌñech pokteꞌ entanet ñamet ñeñth amaꞌt ama judioneshayaye, atthekma peꞌth awathotheñ Yompor eꞌñe pokteꞌ entaneꞌth Abraham. Ñamha eꞌñe yameꞌñeñothpaꞌ atthoña eñall atthoch chorrerrya alloweney Parets Poekamkëñ, ateth Yomporpaꞌ otan awath Abraham.

Gálatas 5:24

Ñamha ñeñth poꞌñoxh oꞌ poeyochreshaꞌ perr Cristo Jesúspaꞌ oꞌ wenerran ñeñth ateth moenatseꞌtyen yechets ñeñth attho es yeyeꞌchyena ya acheñey. Ñeñthpaꞌ eꞌñech ateth yentena ñerraꞌm akorsoꞌtamphsarethey.

Efesios 3:3

Señoteñtheꞌ ñamha attho gaterren Yompor attho theꞌpaꞌ oꞌ neñoterrñañ ñeñth awathotheñpaꞌ ama eñotpawoyaye. Ñewa, ñeñthpaꞌ oꞌ notwanmas mameꞌ necartoth.

Efesios 5:30

Tharroꞌmar ñapaꞌ ña eꞌñe poꞌñoxh poꞌchets phoweney ya. Paꞌnamenoth poꞌchets phaꞌyeney alloweney ñeñthey ameꞌñenaya ña.

Efesios 5:7

Ñeñthoꞌmarña theꞌpaꞌ oꞌch notas, sapaꞌ amach sokshapretatstaneto ñeñth ateth phatseꞌtyenet.

Colosenses 2:19

Ñetpaꞌ ama parrokmateñeto Cristo ñeñthoꞌmarña ama poeyoxhreyeꞌ peñetoña Cristo. Ñewa, yapaꞌ yoten yeyoxher ñeñthña atarr sherbets tharroꞌmar ñeñth atarrtateneꞌña ora yechets. Ateth pena yellokëmh ñamha yechtsorexh ñeñthña orreneꞌña yechets ñeñthoꞌmarña eꞌñe parrokmatateñ atthoña ora yechetspaꞌ atarrtena. Ateth penaña Cristo ateth ñerraꞌm poꞌñoxh ñeñth yeyoxher yepen. Alloweney ñeñthey ameꞌñaꞌyenaya Cristo eꞌñe parrokmatateney, allochña yapaꞌ alloꞌnach yesen orrtatyesnomoeꞌ ñeñth atarr sherbets Yomporekop tharroꞌmar yapaꞌ ateth moenateney Yompor.

1 San Juan 1:3

Allochñapaꞌ atthoch alloweney yeparrokmaterr epay Yompor Parets ñamha Poechemer ñeñth Jesucristo.

1 San Juan 2:25

Jesucristopaꞌ ateth otnerrey oꞌch apoerrey eꞌñe poꞌñoxh atthochña yapaꞌ korretsayach yoksheñeshokmañen thayotheñ eꞌñe errponañowen.