Efesios 3:17 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹⁷ Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

Efesios 3:17 Iomraidhean Croise

San Mateo 13:6

Oꞌña enomeꞌtaꞌmoen atsrrethpaꞌ alla aꞌwyatwer. Ama erxhaꞌtenaꞌ ñeñthoꞌmarña alla weyaꞌwerra.

San Lucas 6:48

Ñeñth acheñer ñeñth ateth petsa oꞌch netmaꞌntacha ateth ñerraꞌmrratheꞌ poesheñarr yakma ñeñth atarr es eñotets ñeñth thomateneꞌ pokoll ñeñth eꞌñech echarr penan paꞌpakëll. Ñañapaꞌ atarrchaꞌ oꞌpono eñan pats atthoch eꞌñe echarr phan poꞌkellpach. Attheñapaꞌ oꞌ xhap allempo apellchena oñ, pokollñapaꞌ ama aꞌmato apellcheꞌ tharroꞌmar kellpachpaꞌ atarr womenk athomatareth.

San Juan 14:17

Ñeñthña Yompor Poekamkëñ ñeñthchaꞌña señotaterreꞌ ñeñth eꞌñe poꞌñoxh Yompor pokthaphña. Ñeñthña ama ameꞌñetso arr patsropaꞌ ñetpaꞌ amach errothenoth chorrerranetoña Yompor Poekamkëñ tharroꞌmar ñetpaꞌ ama enteñeto ñamha amach eñoteñeto. Tharraña sapaꞌ oꞌ señoter tharroꞌmar ñapaꞌ alloꞌtsenes parro epas allchaꞌ chorrerrsa.

San Juan 14:23

Jesúsñapaꞌ ateth oterraneterr: —Ñerraꞌm eseshaꞌch nemorrentaya na eꞌñechña ateth perret ñeñth ateth notenanet. Apañapaꞌ atarrchaꞌ morrentenanet. Ñeshetoñapaꞌ yexhapchaꞌ atthoch yeyxherra ñet poeyoxhreto.

San Juan 17:23

Napaꞌ neparrokmatenanet, phañapaꞌ peparrokmatenna. Allochña allowenetpaꞌ eꞌñech parrokmatwenet eꞌñe poktakma. Atthoch acheñeneshaꞌ arr patsro ñetpaꞌ eñoteretchaꞌ phapaꞌ pha nellsenserreꞌ. Ñamha eñoteretepaꞌch phapaꞌ atarr pemorrentenanet eꞌñe ateth atarr pemorrentenna na.

San Juan 6:56

Ñeñthchaꞌ rreneꞌ nechets ñamha ñerraꞌm orrennanet nerras ñetñapaꞌ eꞌñech parrokmatennet na, napaꞌxhoꞌña eꞌñech neparrokmatenanet ñet.

Romanos 5:5

Ñamha eꞌñe yekweñoth ñeñth oꞌpatatenya Yompor ñapaꞌ xhokmach aꞌpoktatenan poꞌñoñ ñeñth ateth oten yokop. Yapaꞌ amaꞌt esempapaꞌ amach es yeꞌnaterrayeꞌthe poꞌpoñ, tharroꞌmar Yomporpaꞌ awoꞌt apoey Poekamkëñ ñeñthchaꞌ yexhetsa yeyoxhro ñeñthchaꞌña yeñotateneꞌ attho Yomporpaꞌ nanak morrentenya.

1 Corintios 3:6

Ateth ñerraꞌm napaꞌ na ñanom sameꞌñateꞌ Yompor poꞌñoñ. Allothñapaꞌ awoꞌt wapa ñamha Apolos, ñapaꞌ ña seserrpareꞌtateꞌ atthoch alloꞌna sesen womenk phaꞌnmoeꞌ seyoxher. Oꞌch netmaꞌntacha ateth: Napaꞌ atthen ñerraꞌmrratheꞌ ñeñth nareꞌtets. Allothñapaꞌ oꞌch wapa poꞌpsheñeñ ñeñthchaꞌ sheꞌtamoꞌreꞌtosets, Yomporñapaꞌ ñach aꞌchpateꞌ narmets.

1 Corintios 8:1

Theꞌpaꞌ oꞌch neserrpareꞌtatas poꞌpoñ ñeñth ateth saꞌphthoꞌtenen awaña, ñeñthpaꞌ ateth sotenen: Ñeñthey ameꞌñenaya Cristopaꞌ ñatoꞌ ¿poktoꞌtheꞌ oꞌch serraꞌ poꞌchets ñeñth moetsenet ayexhkatarethekop? Napaꞌ neñotenes poesheñaꞌttsospaꞌ sotyen sapaꞌ señotenoꞌ ñeñth kowentetsa Yomporekop. Ñewa, poꞌñoxh alloweneypaꞌ yeñoteñ ñeñth kowentetsa Yomporekop. Tharraña ñerraꞌm esempo yoten: “Napaꞌ eꞌñe neñotwen ñeñth kowentetsa Yomporekop”, ñerraꞌm eꞌñe yommoꞌcheñotha yotenpaꞌ ñeñthpaꞌ eꞌñech orrena ateth yoten. Yommoꞌcheñothpaꞌ amach xhoyeꞌ yeyenpanneno atthoch womenk yephaꞌ yeyoxher Yomporekop. Yemorrentannaꞌteñothpaꞌ xhochña yeyenpannaꞌta.

2 Corintios 13:5

Theꞌpaꞌ oꞌch noterrserr, sokoppaꞌ añ poktetsa oꞌch señota sañeña, ¿poꞌñoxhtheꞌ sameꞌñena? Oꞌch señota eshekchaꞌ señoch poꞌñoxhtheꞌ sapaꞌ sameꞌñena. Amaꞌt señoteñe Jesucristoña sechorrenaya. Ñewa, ñerraꞌm poꞌñoxh ama sameꞌñeño, amachña errothenoth chorraso.

2 Corintios 6:16

Ñamha ñeñth paꞌpakëll pen Yomporpaꞌ ama attheyaye ñerraꞌmrratheꞌ ñeñth ayexhkatareth ñeñth poꞌyomporer phaꞌyen poꞌpotantañ acheñeneshaꞌ arr patsro. Tharroꞌmar amaꞌt yapaꞌ alloweney ñeñthey ameꞌñenaya, yañapaꞌ paꞌpakëll peney Yompor ñeñth ama arromñatheshayaye. Añpaꞌ ñeñth ateth oten Yompor: Napaꞌ xhokmach neyxhena eꞌñe ñesheto parro allchaꞌ nechopeñeꞌchen. Napaꞌ Poꞌyomporer pennet, ñetpaꞌxhoꞌña eꞌñe neyochreneshaꞌ nepenanet.

Gálatas 2:20

Ñeñthoꞌmarña yapaꞌ oꞌ yekexhpaꞌwerr ateth moenatseꞌtatyesyeꞌth yechets. Ñeñthoꞌmarña oꞌ eꞌñe ateth yeperra ñerraꞌmrratheꞌ oꞌ korsoꞌtamperryet epay Cristo. Theꞌpaꞌ amaꞌt ora yokrrenañpaꞌ tharraña ama yayeꞌ korretso, añña Cristo ñeñth yechorrenayapaꞌ ñeñthña korretsa theꞌ yechtso. Theꞌpaꞌ eꞌñe yeyemteñoth Yompor Poechemerpaꞌ yokrrena eꞌñe kowen arr patsro, tharroꞌmar ña yemorrenterraya, ñamha ña rromats yokop.

Gálatas 5:6

Ñerraꞌm oꞌ yeparrokmaterr epay Cristo Jesúspaꞌ ama sherbeno attho yetsorrannaꞌtena, ñamha amaꞌt ama atsorraretheyepaꞌ ñeñthpaꞌxhoꞌña ama sherbeno Yomporekop. Aña ñapoeth sherbets eꞌñe yameꞌñeñoth Cristopaꞌ oꞌch yemorrentannaꞌta.

Colosenses 1:23

Ñerraꞌm poꞌñoxh xhokmach sameꞌñera Cristo, ñerraꞌm eꞌñech womenk seperr seyoxher atthochña sapaꞌ amach sepoerrerro. Kowen ñoñets ñeñth oꞌ seꞌmwa alloch yekeshperra ñerraꞌm amach xha saꞌypoꞌñampere ñeñth oꞌ seyemterra Yomporñapaꞌ enterreschaꞌ oꞌ eꞌñe saꞌkowentatarethterra. Añ kowen ñoñets ñeñth oꞌ seꞌmareꞌtwa sa, theꞌñapaꞌ aserrpareꞌtatarethterrach ñamha allowen ñeñth korraꞌyetsa añe patsro. Ñeñthoꞌmarña na ñeñthen Pablon nach sherberrets theꞌñapaꞌ nach serrpareꞌtaterrawet.

Colosenses 1:27

Theꞌña Yomporpaꞌ atarr moeneñ oꞌch eñotaterrey ñeñth atarr koxhneshareꞌ ñeñth poꞌkowenña eꞌñe awathotheñpaꞌ ama eseshayeꞌ eñotayeꞌthe. Theꞌña ñeñth poꞌkowenñapaꞌ oꞌ eꞌñe orrtatarethterra añekop amaꞌt ñeñth ama judioneshayaye. Ñeñthña ama eñoteteꞌthe awathpaꞌ, ñeñthñapaꞌ añepaꞌt Cristo ñeñth chorrenaya yeyoxher. Atthoña eꞌñe yeyemteñoth ña yañapaꞌ oꞌch yekowentapretera.

Colosenses 2:7

Atthochña sapaꞌ eꞌñech womenk serrmoerrñañ poꞌñoñ ateth ñerraꞌmrratheꞌ tsachrexh atarr womenk rromoenan pats, eꞌñe separrokmateñoth epaspaꞌ alloꞌnepaꞌchña atonetnomaña ñeñth attho sameꞌñena. Eꞌñe sameꞌñeñothpaꞌ womenkëpaꞌchña sephaꞌyesnom seyoxher. Attherepaꞌchña alloꞌna sesen ñeñth ateth yexhatyenes. Ñamha xhokmoepaꞌchña separasyosoꞌchña Yompor.

1 San Juan 4:16

Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor.

1 San Juan 4:4

Saña poꞌñoxh nechemerneshachaꞌ eꞌñe poꞌñoxh Yomporenaꞌtares tharroꞌmar sapaꞌ ama aña seꞌmhñoteno attho paꞌnamenoth shekareꞌtyensetañ. Yompor Poekamkëñ ñeñth sechorrenayapaꞌ ñeñthña sapaꞌ atarr awamenkathtatenes. Ñeñthña chorrenaya añ patsoꞌmarneshaꞌpaꞌ ñapaꞌ ama eꞌñeyeꞌ awamenkathtatenaneto.

El Apocalipsis 3:20

Señochepaꞌch ñeñthchaꞌ ateth netmaꞌntaterrsa. Napaꞌ atethchaꞌ nepena ñerraꞌmrratheꞌ eseshaꞌ ñeñth xhokma xhoreꞌtets yetarroth. Ñerraꞌm eseshas seꞌmapoerrnan neñoñ ñamha ñerraꞌm setorampenen, nañapaꞌ oꞌch nebeꞌthos all, allñapaꞌ oꞌch yerrallmeꞌchen parro.