Efesios 3:1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñeñthoꞌmarña napaꞌ xhokma nemaꞌyochena sokop. Neserrpareꞌtateñothes sa Cristo Jesús ñeñthes ama judioneshayayso ñeñthoꞌmarña na theꞌpaꞌ yottampennet.

Efesios 3:1 Iomraidhean Croise

San Lucas 21:12

‘Ñewa, allempoch ama orrtenaꞌ atethpaꞌ saña allempopaꞌ rremanaterrsetchaꞌ atthoch moeroxhtaterrset, sanmarethterrach judioneshaꞌ poꞌprawo allchaꞌña eꞌñe otteñeꞌcherrset, atthochña abeꞌtherrset cárcelo allchaꞌ koñchaterrset. Eꞌñe sameꞌñeñothen na sapaꞌ sanmarethterrach amhchaꞌtarethnesheshoꞌmar ñamha alloꞌtsaꞌyen ñeñth nanak amhchaꞌtarethneshaꞌ.

Los Hechos 21:33

Allempoña xhap amhchaꞌtarethpaꞌ oꞌ rromatan Pablopaꞌ oꞌ wankët epa cadeno. Allempoñapaꞌ aꞌphthoꞌtanet: —¿Esoꞌtña paꞌsoꞌcheñ añ acheñer? Ñamha oꞌ aꞌphthoꞌtanet: —¿Estheꞌña oꞌ phowa ña?

Los Hechos 23:18

Capitánñapaꞌ oꞌxhoꞌña anman wepoeshaꞌ alloꞌtsen paꞌmhchaꞌtarether. Allempoña xhappaꞌ ateth otosan paꞌmhchaꞌtarether: —Añ Pablo ñeñth ewankarethpaꞌ awoꞌt xhoreꞌten allothpaꞌ oten awoꞌch nanemh añ wepoeshaꞌ pesho tharroꞌmar ñapaꞌ nanak moeneñ oꞌch es aꞌmethenaꞌ pesho.

Los Hechos 26:29

Pabloñapaꞌ alla otererr: Amaꞌt thayekma amapaꞌ tsapathonethpaꞌ napaꞌ atarr nemneñ Yomporpaꞌ oꞌch ameꞌñaterrpha, ñamha amaꞌt allowenes ñeñthes neꞌmhñoteneꞌ theꞌ. Atarr nemneñ oꞌch sameꞌñerra allowenes ateth ñerraꞌm na, tharraña amaꞌtchaꞌ attheseñ ñerraꞌm na, sapaꞌ amoepaꞌchña ewankaretheyayso.

Los Hechos 9:15

Yepartsesharñapaꞌ alla otererr: —Tharraña amaꞌt ateth theꞌpaꞌ oꞌch aweph all, ñeñth ateth oꞌ notwaph. Theꞌpaꞌ oꞌ neneꞌ Saulo ñeñthchaꞌ naꞌpotheneꞌ neñoñ amhchaꞌtarethneshesho. Amaꞌt poꞌpoñexhno acheñeneshopaꞌ ñapaꞌ aꞌpothonchaꞌ neñoñ. Ñamha amaꞌt israelenaꞌtarneshopaꞌ oꞌch aꞌpothon neñoñ.

2 Corintios 1:6

Ñeñthoꞌmarña theꞌpaꞌ oꞌch notas, ñerraꞌm esempo nemoeroxhtena na, ñeñthpaꞌ eꞌñe poꞌñoxh sokop, tharroꞌmar ñerraꞌm esempo nemoeroxhtena napaꞌ ñeñthpaꞌ alloch soksherra samha atthothchaꞌña sekeshperra. Ñamha ñerraꞌm esempo koshaterren Yompor ñeñthpaꞌxhoꞌña alloch nokshaterres samha. Allochñapaꞌ eꞌñe soksheñeshokmañen xhokmach saꞌwanten allowen moeroxhteñets ñeñth ateth nepena na.

2 Corintios 10:1

Ñewa, theꞌpaꞌ na Pablon oꞌch alla nokthapeꞌchaterrserr eꞌñe nemoereñothes atthen ñerraꞌm Cristo ñeñth nanak amoerañtostsa. Poemoereñothey ya ñapaꞌ eꞌñe pokteꞌ eñcheꞌth oꞌch ateth enteñet ñerraꞌm ñapaꞌ ama esosheꞌmayaye. Ñewa, sapaꞌ patantaꞌttsospaꞌ atthach sentenen ama erroth notenso atsrreꞌmoxhen ñerraꞌm esempo alloꞌtsenen sesho. Tharraña ñerraꞌm esempo allapharoꞌtsenen, allempo nekellkënnas cartapaꞌ allempoña sapaꞌ ateth sentenen ñerraꞌmrratheꞌ ama xhoyeꞌ nemhchaꞌtenso amaꞌt eꞌñe mamesha, eꞌñech echeꞌxharr notenes necartoth. Tharraña ñeñthpaꞌ ama attheyaye. Amaꞌt allempo alloꞌtsenen sesho, ñerraꞌm nemneñeñ ateth neꞌñoronasapaꞌ eꞌñetheꞌ echeꞌxharr neꞌñorennasa. Ñeñthoꞌmarña theꞌpaꞌ eꞌñe neyoxhrokmañen oꞌch notas, sokthapeꞌcherr kowen eꞌñe thayekma allochñapaꞌ ñerraꞌm esempoch nexherr seshopaꞌ amach xha seꞌñoratno echeꞌxharr. Tharroꞌmar ñerraꞌm ama sokthapeꞌcherro kowen, poꞌñoxh ñerraꞌm esempo nexherr seshopaꞌ xhach seꞌñoraten echeꞌxharr, ñeñthes noteneꞌ napaꞌ eꞌñoꞌ nañeña nokthaphñoth ateth es nephatseꞌtyen ñeñth ateth phaꞌyena acheñeneshaꞌ arr patsro, ñeñthpaꞌ eꞌñe ñokpoeta sherben. Tharraña napaꞌ ama attheyeꞌ nepeno.

2 Corintios 11:23

Ñetpaꞌ pommoꞌcheñothet otenet ñetpaꞌ atarroꞌ thorrenet Cristokop. Ñewa, napaꞌxhoꞌña elloña atarr nanak nethorrena Cristokop. Amaꞌt eꞌñe notatseꞌteñotha noten, ñeñthpaꞌ eꞌñe poꞌñoxh ateth. Amaꞌt allpon thorrenet ñet, elloña napaꞌ atarr nanak nethorrena na. Ñamha amaꞌt allpon amoeroxhtatarethetyenet ñet elloña napaꞌ atarr nanak amoeroxhtatarethen. Allpon ayottamphsarethen all koñchatennet, ñeñthpaꞌxhoꞌña nanak atonocheꞌtats. Ñamha allpon ashtennetpaꞌ ñeñthpaꞌxhoꞌña atarr nanak atonocheꞌtats. Ñamha ñeñth allpon awtsanchaꞌ rromoetseñ, ñeñthpaꞌxhoꞌña atarr nanak atonocheꞌtats.

Gálatas 5:11

Ñatoꞌ napaꞌxhoꞌña xhatheꞌ otyennet añoꞌ neserrpareꞌtaten oꞌch yetsorrannaꞌta atthoch yekeshperra. Ñewa, masheñneshachaꞌ ñamha noxhaneshachaꞌ ñerraꞌm poꞌñoxh ñeñthara neserrpareꞌtateneñ atethpaꞌ amatheꞌ errothenoth eꞌmoñeꞌtennoñeña judioneshaꞌ ñeñth serrpareꞌteneꞌ oꞌch yetsorrannaꞌta. Tharraña poꞌñoxhpaꞌ ama attheyeꞌ neserrpareꞌtateno. Añña neserrpareꞌtaten attho Cristopaꞌ rroma korsocho yokop attho tsaꞌtwerrnaya yoꞌchñar, allochñapaꞌ eꞌñe yameꞌñeñotha ñapaꞌ oꞌch yekeshperra. Ñeñthña ateth neserrpareꞌteñoth añña ñeñth serrpareꞌteneꞌ oꞌch yetsorrannaꞌtapaꞌ ñetñapaꞌ ñeñthña nanak atsrreꞌmatenawet. Ñerraꞌm oꞌwañchaꞌ ateth neserrpareꞌtañpaꞌ oꞌwañtheꞌ eꞌmoñeꞌtnetañ.

Gálatas 5:2

Ñewa, theꞌpaꞌ oꞌch seꞌmhñoten na ñeñthen allsensarethen ñeñthchaꞌ ateth notas: Ñeñth ateth seyemtenañ atthoꞌch sekeshperra eꞌñe setsorrannaꞌteñothapaꞌ tharraña ñeñthoth Cristopaꞌ amach errothenoth yenpaso.

Gálatas 5:24

Ñamha ñeñth poꞌñoxh oꞌ poeyochreshaꞌ perr Cristo Jesúspaꞌ oꞌ wenerran ñeñth ateth moenatseꞌtyen yechets ñeñth attho es yeyeꞌchyena ya acheñey. Ñeñthpaꞌ eꞌñech ateth yentena ñerraꞌm akorsoꞌtamphsarethey.

Efesios 3:11

Ñeñthpaꞌ ateth kothapeꞌcheꞌth Yompor awath poeyochreshakop ñeñthchaꞌ sherbhats allempotheñ eꞌñe errponañowen. Ñamha añ onañcheꞌth ñeñthchaꞌ etsoterreꞌ pokthaphña ñeñthpaꞌ añ Cristo Jesús ñeñthara Yepartseshar yepen.

Efesios 3:13

Ñeñthoꞌmarña napaꞌ oꞌch notas, attho señotenen napaꞌ atarr nemoeroxhtena sokop, sapaꞌ amach sellkëñotha seꞌcharrtatatsto seyoxher. Eꞌñepaꞌchña kowen sokshapretenna.

Efesios 3:8

amaꞌt napaꞌ ama esoyayno amaꞌt mamesha, atarr koñeꞌthoth nesherben. Ora allowen allpon ñeñth poeyochreshaꞌ pen Parets ñeñth sherbeneꞌ ña, naña ellonethpaꞌ eꞌñe ateth nentena ñerraꞌmrratheꞌ atarr koñeꞌthoth nesherbeñ Parets. Tharraña amaꞌt ama esoyaynopaꞌ Yomporña poemoereñoth oꞌ moenaterren nach serrpareꞌtatyeseꞌ ñeñth ama judioneshayaye. Atthochña nach eñotatyenawet attho Cristopaꞌ shonteꞌ esokmañen echyen paꞌnamen ñeñthña yoꞌpatapreteña ñeñthey yemtenaya ña. Amaꞌt ya arromñathaya amatheꞌ errothenoth eꞌñe xhapwonayo yeyoxhro ñeñth ora allpon oꞌpatatarethey eꞌñe yeyemteñoth Cristo.

Efesios 4:1

Ñeñthoꞌmarña theꞌpaꞌ añ notenes amaꞌt na ñeñthen ayottamphsarethen eꞌñe nethorreñoth serrpareꞌteꞌ Yepartseshar Cristo. Theꞌpaꞌ oꞌch notas: Eꞌñech kowen es sorrtatyen ñeñth ateth poktetsa añekop ñeñth oꞌ waꞌñerr Yompor ñeñthchaꞌ poeyochreshaꞌ perr ateth ñerraꞌm sa.

Efesios 6:20

Napaꞌ allsensarethen ñeñthen eñosyets eꞌñe kowen Yomporekop. Eꞌñe neñosyeñoth Yomporekop ñeñthoꞌmarña theꞌpaꞌ yottampennet. Ñeñthoꞌmarña nemneñ oꞌch semaꞌyochampenna atthoch amach nemhchaꞌnañotha neserrpareꞌteno ñeñth eꞌñe kowen ñoñets alloch yekeshphaꞌwerra. Atthochña eꞌñe noksheñeshokmañen neserrpareꞌten tharroꞌmar ñeñth eꞌñe kowen ateth poktetsa nokop.

Filipenses 1:7

Ñeñth ateth nentapretenespaꞌ ñeñthpaꞌ eꞌñe pokteꞌ tharroꞌmar atarr nemorrentensa eꞌñe neyoxhrokmañen. Ñeñthoꞌmarña yellkannaꞌteñothpaꞌ yeñoteñ Yompor eꞌñe poemoereñothpaꞌ amach aꞌypoꞌñerrno na amaꞌt ñamha sa. Ateth napaꞌ amaꞌt cárceloꞌtsenen Yompor poemoereñothenpaꞌ amach aꞌypoꞌñerrno. Ñamha ñerraꞌm allempo achmhareꞌtenet añ kowen ñoñets alloch yekeshperra, attho napaꞌ nemoñena añ kowen ñoñets, Yompor poemoereñothenpaꞌ xhokma awamenkath penen. Ñamha allempo nameꞌñateña acheñeneshaꞌ añ kowen ñoñets alloch yekeshperra, Yompor poemoereñothpaꞌ xhokma awamenkath penen.

Colosenses 1:24

Theꞌña na eꞌñe nemoeroxhteñoth sokoppaꞌ atarr nokshena. Eꞌñe nemoeroxhteñoth nechtsopaꞌ ñeñthpaꞌ atthoña netsotatennas allpon ñeñth palltetsa atthoch nemoeroxhtaprecha Cristo allowenakop ñeñth ameꞌñenaya ña ñeñth eꞌñe poꞌchets pen Cristo ñeñth eꞌñe aꞌparrokmataten.

Colosenses 4:18

Na ñeñthen Pablon arrpaꞌ nekellkëñoth eꞌñe na notothpaꞌ oꞌch newomhchaꞌtnerres. Theꞌpaꞌ oꞌch seyerpaꞌna napaꞌ ayottamphsarethen. Theꞌpaꞌ ñeñthach notas, Yomporepaꞌchña saꞌnataya. Ñeñthpaꞌ atthetepaꞌch Nompore. Allowa. Pablo

Colosenses 4:3

Ñamha oꞌch semaꞌyocheña Yompor yokop, oꞌch senamonay atthoch eñalleta allchaꞌ yeserrpareꞌtoñ poꞌñoñ, allchaꞌ eꞌñe yaꞌpotwa ñeñth awathotheñ ñeñth amaꞌt poesheñarrapaꞌ ama eseshayeꞌ eñotenaye ñeñth ateth penaña Cristo. Ñeñthoꞌmarña na theꞌpaꞌ ayottamphsarethen cárcelo.

2 Timoteo 1:16

Theꞌpaꞌ aña xhokma nokshateneꞌ Onesíforo tharroꞌmar ñapaꞌ ama penkënno amaꞌt napaꞌ cárceloꞌtsenen. Ñeñthoꞌmarña Yomporpaꞌ aꞌnatanepaꞌ Onesíforo pamoꞌtseshaꞌ.

2 Timoteo 1:8

Ñeñthoꞌmarña theꞌpaꞌ amach pepenkatsto attho peserrpareꞌteññañ ñeñth ateth pena Yepartseshar Cristo. Ñamha amach pepenkatsto eꞌñe noꞌmar attho napaꞌ oꞌ cárceleꞌterrnet eꞌñe nameꞌñeñoth Cristo. Elloña xhochña pokteꞌ peñch phamha oꞌch pemoeroxhtapretna eꞌñe peserrpareꞌteñoth Cristo poꞌñoñ tharroꞌmar Yomporpaꞌ atthoña awamenkath peneph.

Filemón 1:1

Oꞌch, masheñe Filemóna, nekellkonaph añ carta, na Pablon epan masheñ Timoteo. Napaꞌ oꞌ yottampennet eꞌñe neserrpareꞌteñoth Cristo Jesús poꞌñoñ. Theꞌpaꞌ oꞌch masheñe yewomhchaꞌtaph pha ñeñtheph atarr yemorrentena ñeñtheph atarr yethorrapretenaya Yomporekop.

Filemón 1:23

Arr necartoth all womhchaꞌteneph ñamha masheñ Epafras ñeñth parro yottampenyet eꞌñe yeserrpareꞌteñoth Cristo Jesús poꞌñoñ.

Filemón 1:9

Tharraña neñoteneph phapaꞌ atarr amoerañaph ñeñthoꞌmarña theꞌpaꞌ oꞌch notaph eꞌñe pha pemoereñoth atethñakaꞌyeña pepha. Ñewa, na Pablon ñeñthen ateth photeneꞌ napaꞌ poꞌnmhotha oꞌ yottamperrnet eꞌñe neserrpareꞌteñotha Cristo Jesús poꞌñoñ.

El Apocalipsis 2:10

Amach yoreꞌtatstaso moeroxhteñets ñeñthchaꞌ awen sewapoya. Tharroꞌmar ñeñthchaꞌ seyottamphseꞌ patantaꞌttsos, ñeñthpaꞌ oneñetheshoth wena añekopña atthoch topatwas ñerraꞌm poꞌñoxhtheꞌ sameꞌñena. Poesheñaꞌttsos moeroxhtatasetchaꞌ eꞌñe xharramat. Amaꞌtchaꞌ moetsasetpaꞌ añ pokteꞌ oꞌch serromapes attho sameꞌñena. Allochña napaꞌ napwerreschaꞌ ñeñth noꞌpatatensa alloch sokrraꞌwerra eꞌñe soksheñeshokmañen. Ñeñthpaꞌ ñeñthara noten poꞌpoñ ñoñtso napwerreschaꞌ sepremio ñeñthchaꞌ sokshatwerreꞌ eꞌñe poktakma.