Efesios 2:3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

³ Ñewa, amaꞌt alloweney awathpaꞌ eꞌñe atthekma yeyxheꞌth. Aña yokthapeꞌchyeseꞌth ñeñth eꞌñe ateth yemnatseꞌtyen ya, ñeñth ateth moenatseꞌtateney ya yechets ñamha ñeñth kowen yenteꞌth eꞌñe yañeña yokthaphñoth. Eꞌñe ya yokthaphñoth ñeñth ateth yeyxheꞌthpaꞌ ñeñthaña eꞌñe yokthapeꞌchatseꞌtatyesayeꞌth. Ñeñthoꞌmarña Yomporpaꞌ aña oꞌpatatyeꞌth atthoch koñchaterrey. Ñewa, amaꞌt allowen poꞌpotantañ acheñeneshaꞌ ñeñth ateth phatseꞌtyeseteꞌthpaꞌ Yomporñapaꞌ eꞌñe atthekma oꞌpatataneteꞌth ñeñthara koñcheñets. Ñerraꞌm allempokmach yerromañpaꞌ eꞌñech yechenkaꞌwerrañ,

Efesios 2:3 Iomraidhean Croise

San Marcos 4:19

Amaꞌtchaꞌ xhapanetañ poeyoxhreto tharraña ñetpaꞌ alloꞌnach senet eꞌñech aña atarr kothapeꞌchenet ñeñth llekaꞌyenet arr patsro ñeñth eꞌñe ñokpoeta. Añach moenenet oꞌch esokmañen es echyenet tharraña ñeñthpaꞌ xhakaꞌye shekënanet. Atthach paꞌnamen yeꞌchatseꞌtyenet. Atthoña wenanet topateñets ñeñthoꞌmarña ñetpaꞌ amach errothenoth orrtatoñetoña ñeñth eꞌñe kowen enten Yompor. Ñetpaꞌ eꞌñe attheta ñerraꞌm narmets ñeñth xha kaꞌmateñ ajmaꞌ ñeñthoꞌmarña amach errothenoth meꞌteneto oꞌch ellomhreꞌtyeset.

San Juan 1:13

Ñeñth attho poechemer perrey Yompor ñeñthpaꞌ ama attheyaye ateth yeꞌñalletena ya ñeñthey arromñathey. Tharroꞌmar ñeñth attho yeꞌñalletena arr patsropaꞌ ñeñthpaꞌ ateth anarethey ya ñeñthey arromñathey. Ñamha attho poechemer oꞌ perrey Yompor, ñeñthpaꞌ ama añotheyaye ñeñth ateth kothapeꞌchateney poꞌpsheñeñ acheñ pokthaphña. Yapaꞌ añothña oꞌ poechemer perrey Yompor attho oꞌ moenaterrey eꞌñe ña pokthaphña.

San Juan 8:44

Sapaꞌ oneñethakaꞌye ñeñth sompor sepen. Ñeñthoꞌmarña sapaꞌ aña semnen oꞌch sepha ñeñth moenen sompor. Ñapaꞌ awathotheñ eꞌñe paꞌmothrotheñ amtsañta. Ñapaꞌ amaꞌt mameshapaꞌ ama eñoraꞌpenoña Yompor poꞌñoñ ñeñth eꞌñe poꞌñoxh tharroꞌmar ñoñets ñeñth eꞌñe poꞌñoxhpaꞌ amakaꞌye atanenoña ña poeyoxhro. Ñerraꞌm xho eñorenapaꞌ, shekëñtsach eñorena tharroꞌmar ñapaꞌ eꞌñe shekëñtsa eñoten. Poꞌñoxh sekëñetspaꞌ pomporkaꞌ penanña oneñeth.

Los Hechos 14:16

Alla oterraneterr Pablo: —Awath Yomporpaꞌ moenatan acheñeneshaꞌ oꞌch phaꞌyeset ñeñth ateth moenaꞌyenet eꞌñe ñañeñeta.

Romanos 1:24

Atthoña oꞌwañchaꞌ ameꞌñeñet ñeñth poꞌñoxh Parets, añachña ameꞌñenet ñeñth ama poꞌñoxhoyaye. Oꞌwañchaꞌ maꞌyocheñet ñeñth eꞌñe Yomporaꞌ, añachña maꞌyocheññañet ñeñth eꞌñe ña poeyexhkatwar. Ñamha oꞌwañchaꞌ sherbeñet ñeñth eꞌñe Yomporaꞌ, añachña sherbeññañet ñeñth eꞌñe ña poeyexhkatar. Tharraña Yomporepaꞌchña ñapoeth ayeꞌchoxhtatarethtatsa thayotheñ amaꞌt errponowañen. Ñeñthpaꞌ atthetepaꞌch. Tharraña attho aꞌypoꞌñeñet Yomporpaꞌ ñapaꞌxhoꞌña eꞌñe paꞌypoꞌñeñothanet ñamhapaꞌ awoꞌt moenatyesanet oꞌch alloꞌna senet moenatseꞌtyeset ñeñth nanak sosey enten Yompor. Ñeñth attho moenatseꞌtyenet attho oꞌch agapannenet, ñeñthothpaꞌ nanakchaꞌ apenkoxhen yexhenet.

Romanos 11:30

Awath sapaꞌ atarr sathpareꞌcheꞌth Yompor, theꞌñapaꞌ judioneshaꞌ ateth petsa ateth sathpareꞌteꞌth sa awath. Tharraña theꞌpaꞌ allempo athpareꞌta judioneshaꞌpaꞌ ñeñthpaꞌ atthoch Yomporpaꞌ oꞌch moererrsa samha.

Romanos 13:14

Añchaꞌña awamenkath sepeneꞌ Yepartseshar Jesucristo, allochñapaꞌ atthoch amach semnatatsto sechets oꞌch moenatseꞌtatas ñeñth ama kowenayaye.

Romanos 2:14

Ñewa, oꞌch yokthapeꞌch ñeñth ateth pena acheñeneshaꞌ ñeñth ama judioneshayaye, añeneshaꞌ ñeñth ama echenaye Yompor poꞌñoñ. Ñetpaꞌ amaꞌt ama echeneto Yompor poꞌñoñpaꞌ errothenopaꞌ eꞌñe poeyoxhretoth pokthapeꞌcheñothetpaꞌ awoꞌtchaꞌ ateth phaꞌyenet ñeñth eꞌñe kowentetsa Yomporekop, ñeñth eꞌñe ateth oꞌ anwarethetwa Yompor poꞌñoño ñeñth ateth poktetsa ñokop. Amaꞌt ama echeneto Yompor poꞌñoñ ñeñth ateth akellkarethpaꞌ tharraña poeyoxhretoñapaꞌ eꞌñe eñoteñet erraꞌtsentheꞌ ñeñth kowentetsa.

Romanos 5:10

Amaꞌt allempo ora yeꞌmoñeꞌteñ Yomporpaꞌ Poechemerña poꞌrromñothpaꞌ awoꞌt eꞌñe yamoꞌtstannerra epay Pompor. Elloña theꞌpaꞌ attho korrena Cristopaꞌ atthoña yapaꞌxhoꞌña aꞌkeshphaterreychaꞌ.

Romanos 5:9

Ñeñthoꞌmarña theꞌpaꞌ eꞌñe pokteꞌ enteney Yompor tharroꞌmar Cristopaꞌ awoꞌt rroma yokop. Elloña atthothña aꞌkeshphatey allochñapaꞌ amach aꞌkoñchataretheye amaꞌt errponaña.

Romanos 6:12

Ñeñthoꞌmarña theꞌpaꞌ oꞌch notas, amach semnatatsche soꞌchñarpaꞌ oꞌch alla tarwasaterrnaserr saꞌrromñathechets. Allochñapaꞌ amach alloꞌna sephatseꞌtyesneno ñeñth ateth moenatseꞌtatyenes sechets.

Romanos 7:18

Napaꞌ neñotena eꞌñe attha eñalletñan, neyoxhroñapaꞌ ama eñalle atthoch kowen enten Yompor, amaꞌt koñeꞌtha. Amaꞌt nemneñeñ oꞌch ateth nephañ ñeñth eꞌñe kowen enten Yompor, tharraña ama erroth nepeñe ateth phatsa ñeñth ateth kowentetsa.

Romanos 9:22

Amaꞌt attheñpaꞌ elloña Yompor awathpaꞌ atarr awantaneꞌth attho nanak athpareꞌcheꞌth ñeñth oꞌpateꞌth chenkëñets. Ñerraꞌm ña moenatseñ eꞌñe pokteñ atthoch tsaꞌtaterranetañ eꞌñe allempokma poꞌyoroxhenñoth. Atthochña entatanetañ poꞌwamenk tharraña ama attheyeꞌ phaneto, atthaña awantaneteꞌth poꞌchñaret.

1 Corintios 4:7

Sapaꞌ atarr kowen sentena sañeña tharraña amaña poꞌpsheññeyeꞌ atarr eñotañ sentenaye amaꞌt poesheñarra. Amaꞌt allpon señotyenpaꞌ amakaꞌye eꞌñe sothayeꞌ es señotyeno; Yomporkaꞌye señotateneꞌ. Poꞌñoxhpaꞌ attho Yompor es eñotatenespaꞌ esoꞌmareꞌtña sommoꞌchyenaña ateth ñerraꞌm eꞌñe sotha es señotyen.

2 Corintios 7:1

Ñewa, eꞌñe nemorrenteñothes, masheñneshachaꞌ ñamha noxhaneshachaꞌ oꞌ notwas ateth oteney Yompor ñeñthchaꞌ ateth perrnay. Ñeñthoꞌmarña theꞌpaꞌ añ poktetsa yokop yapaꞌ oꞌch yeswanem ora allowen ñeñth xhokma aꞌsosyateneꞌ yechets ñamha ñeñth xhokma aꞌsosyateneꞌ amaꞌt yekamkëñ. Añña eꞌñe yemhchaꞌnaꞌteñoth Yomporpaꞌ añchaꞌña yemaꞌyoxhrena ñeñth pokteꞌ enten ña.

Gálatas 3:22

Tharroꞌmar Yompor poꞌñoñ ñeñth anwareth awathotheñpaꞌ oteney, alloweneypaꞌ eꞌñe yoꞌchñaꞌtwen, amach errothenoth eꞌñe yetsotwoñe ñeñth ateth anareth Yomporekop. Ñeñthoꞌmarña ñeñthpaꞌ ama añekpayaye alloch yekeshperra. Añña eꞌñe yameꞌñeñotha Jesucristopaꞌ oꞌch yekeshperra, ñeñthara Cristo ñeñth ateth Yomporpaꞌ otan awath Abraham.

Efesios 2:2

Aña seyxheꞌth ñeñth ateth phatseꞌtyena acheñeneshaꞌ arr patsro ñeñth ama ameꞌñetso. Allempo sapaꞌ aña sameꞌñatayeꞌth oneñeth ñeñth paꞌmhchaꞌtarether pen allowen ñeñth errakmañen amhchaꞌnoxhetyetsa entoth ñeñth ama entpawoyaye. Ñeñthña oneñeth pokthaphñapaꞌ ñeñth atarr koshateneꞌ allowen acheñeneshaꞌ ñeñth athparñathtetsa theꞌ arr patsro.

Efesios 4:22

Sa awathpaꞌ attha sokthapeꞌchatseꞌtyeseꞌth theꞌña ñeñthpaꞌ oꞌch saꞌypoꞌñamper. Sapaꞌ ñeñthaña atarr seshkareꞌtayeꞌth atthoña añach eꞌñe semnatseꞌtyeseꞌth ñeñth ama kowenayaye amaꞌt mamesha.

Colosenses 1:21

Amaꞌt sa awathpaꞌ atarr ellapharoꞌtsaꞌyenes Yomporeshoth. Eꞌñe seꞌmoñeꞌteñoth Yompor seyoxhro sañapaꞌ aña seyexhkatyeseꞌth ñeñth ama kowenayaye.

1 Tesalonicenses 4:13

Masheñneshachaꞌ ñamha noxhaneshachaꞌ, yapaꞌ yemneñ oꞌch eꞌñe señoter errothenoꞌtsaꞌyentheꞌña ñeñth pameꞌñeñoth rromoets. Allochñapaꞌ amach attha atarr sellkënaneto ñeñth ateth pena poꞌpotantañ, ñetpaꞌ ama es yemteneto.

1 Tesalonicenses 5:6

Ñeñthoꞌmarña oꞌch notas: Yapaꞌ amach xha yekhllatsto Yomporekop, tharroꞌmar ñerraꞌm ateth yephapaꞌ xhach yottena ñerraꞌm xha yemoen Yomporekop ateth pena poꞌpotantañ ñeñth attha es poexhaꞌyetsa. Yapaꞌ amachña xha yemanrraꞌtatsto xhochña eꞌñe yeñotena atthochña yeñoseꞌreꞌtyeswena.

1 Timoteo 6:9

Tharroꞌmar ñeñth moenets oꞌch echan esokmañenpaꞌ amach errothenoth awantano attho topatyeney oneñeth. Atthach paꞌnamen yeꞌchatseꞌtyenet ñeñth ama es sherbetso. Elloña ñeñthpaꞌ ñeñthchaꞌ anmawet chenkëñtso esempowañen.

Tito 3:3

Ñeñthpaꞌ eꞌñe pokteꞌ atethchaꞌ phannenet tharroꞌmar yapaꞌxhoꞌña yeñoteñ awathpaꞌ aña yephatseꞌtyeseꞌth ñeñth ama pokteyaye. Yapaꞌxhoꞌña atthach ama es yepxheꞌthe allempo nanak yephatseꞌtyeseꞌth sosyaꞌtsañ. Ñamha nanak yathpareꞌteꞌth awath, ñamha aña yexhatyesyeteꞌth ñeñth ama poꞌñoxhoyaye kothaphñats. Yechetspaꞌ aña nanak moenatseꞌtatyeꞌth ñeñth ama kowenayaye ñamha allempopaꞌ aña nanak yoksheꞌth paꞌnamen sosyaꞌtsañexhno. Ñamha allempopaꞌ nanak atsrreꞌmoxhen yentannaꞌtyeseꞌth ñamha nanak es yeyeꞌchapretannaꞌtyeseꞌth. Ñamha allempopaꞌ ñerraꞌm eseshaꞌ yeꞌmoñeꞌteꞌpaꞌ yapaꞌxhoꞌña oꞌchxhoꞌ yeꞌmoñeꞌchxhoꞌ yamha.

1 San Pedro 1:14

Seꞌmhñoch Yompor ateth ñerraꞌm ñapaꞌ poechemereshaꞌch perres. Amach aña seyxhatsto ateth ñerraꞌm awath allempo ama señoteñaꞌ; allempopaꞌ aña semnatseꞌtyeseꞌth ñeñth ama kowenayaye.

2 San Pedro 2:14

Ñeñth ama Yomporeyeꞌ poꞌñoñ yexhatetsopaꞌ xhokmach moeneñ oꞌch kowaꞌyesan koyaneshaꞌ atthoch nanak kañoreshaꞌtenet. Amach wañeno attho kothapeꞌchenet sosey. Nanakchaꞌ shekëñet koyaneshaꞌ ñeñth ama tama es eñoto atthoch agëñet. Añach yexhenet attho es yeꞌchatseꞌtyenet. Tharraña ñeñth ateth petsapaꞌ oꞌpatatarethetchaꞌ koñcheñets.

2 San Pedro 2:18

Ñamha nanakchaꞌ ommoꞌchenet attho phaꞌyenet ñeñth nanak sosyareꞌ. Ñamha oꞌch aꞌsecheñet poꞌpsheñeñ atthoch oꞌch phachet ñeñth nanak moenenet poꞌchets atthothchaꞌ aꞌpsatarethterret, allempoñapaꞌ oꞌchxhoꞌ alla poerrerret. Shonteꞌ acheñ ñeñth eꞌñe etserra poeswanmoeꞌ ñeñth ateth yexhaꞌyeseteꞌth ñeñth nanak sosyareꞌ, tharraña allempoñapaꞌ oꞌch alla moenereterr ñeñth oꞌ poeswanmoetañ awath pokthaphñet.

1 San Juan 2:16

Allowen ñeñth eñall añe patsro, ateth ñerraꞌm ñeñth ateth moenatyeney yechets, ñamha ñeñth yeyeꞌchapretyena eꞌñe ya yekweñoth, ñamha ñeñth eꞌñe yemnen ya oꞌch eꞌñe kowen entapretenyet, ñeñthña allowenpaꞌ ama Yomporeshotheyeꞌ weno, ñeñthpaꞌ añe patsroꞌmarnesha pokthaphña.

1 San Juan 2:8

Tharraña morrentannaꞌteñets ñeñth ateth nekellkënnas theꞌ ñeñthpaꞌ eꞌñe ateth ñerraꞌmrratheꞌ oꞌ thayoꞌ orrtatonasetña ateth morrentannaꞌteñets, tharroꞌmar Cristo eꞌñe poꞌñoxh orrtatonayña eꞌñe etserra atthoch eꞌñe kowen yemorrentannaꞌterra, ñeñthoꞌmarña sapaꞌxhoꞌña theꞌpaꞌ oꞌ eꞌñe etserra sorrtaterrña samha atthoch semorrentannerra. Morrentannaꞌteñets poꞌñoxhpaꞌ ñeñthña atarr sherbets tharroꞌmar ora allowen ñeñth ama kowenayeꞌ enteno Yompor, ñeñthñapaꞌ alloꞌna sen wañwanmats. Ñeñthpaꞌ eꞌñe ateth pena ñerraꞌmrratheꞌ chekmeteꞌpaꞌ alloꞌna sen metwanmats. Allowen ñeñth eꞌñe poꞌñoxh kowen enten Yompor, ñeñthpaꞌ ateth ñerraꞌmrratheꞌ poetareꞌ, ñeñthña poꞌñoxh oꞌ aꞌpoetarsamperres.