Efesios 2:11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹¹ Ñewa, theꞌpaꞌ oꞌch alla seyerpoerra ñeñth ateth sepeꞌth awath. Allempopaꞌ atarr allapharoꞌtsaꞌyenes Yomporeshoth. Ñewa, sapaꞌ ateth eñalletñas ama judioneshayayso. Añña ñeñth ateth eñalletena judioneshaꞌ ñetpaꞌ aña yexhenet oꞌch tsorrannenet. Ñeñthoꞌmarña ñetpaꞌ otarethtenet atsorrarethneshaꞌ. Ñeñthoꞌmar ñet sañapaꞌ attha sochatseꞌtenset sapaꞌ añoꞌ atsorratarethneshayayso añoꞌ poechemereyayso Yompor.

Efesios 2:11 Iomraidhean Croise

San Mateo 20:7

Ñetñapaꞌ ateth ochet: “Yapaꞌ amakaꞌyeña eseshayeꞌ yetarwasatenaye ñeñthoꞌmarkaꞌye ama es yotteno.” Ñañapaꞌ ateth otanet: “Ñewa, sapaꞌxhoꞌña oꞌch awes naꞌmro, amaꞌt mameshapaꞌ setarwasaꞌnen. Napaꞌ netsaꞌtasach allpon ñeñth poktetsa.”

Romanos 11:17

Theꞌpaꞌ ñeñthes ama judioneshayayso napaꞌ oꞌch notas, Yomporpaꞌ awoꞌt ellopaꞌtetstatan patantarr judioneshaꞌ ñeñth athpareꞌteneꞌ ña. Allochñapaꞌ atthoch sapaꞌ oꞌch separrokmaterr epas ñeñth ameꞌñenaya Yompor. Ñatoꞌ oꞌch netmaꞌntacha ateth pena tsach ñeñth otenet olivoch. Ñewa, judioneshaꞌpaꞌ ñetpaꞌ atthet ñerraꞌmrratheꞌ olivoch ñeñth eꞌñe kowen narmets. Tharraña ñatoꞌ ñeñth allpon poetakërpaꞌ awoꞌt pechaꞌtamphset awoꞌt waporeꞌchet. Allochñapaꞌ atthoch aꞌtapaꞌllateret epoet ñeñth poetsathoꞌmar olivochtakër ñeñth ama narmetsoyaye. Sa ñeñthes ama judioneshayaysopaꞌ sapaꞌ aña poetakër sepeneꞌ ñeñth poetsathoꞌmar olivochtakër. Theꞌñapaꞌ oꞌ aꞌtapaꞌllataterrset olivochtakro alloth apechaꞌtareth ñeñth awaporeꞌtareth. Allochñapaꞌ atthochña sapaꞌxhoꞌña oꞌch separrokmaterr epas ñeñth ameꞌñenaya Yompor, ñamha atthoch sagapapreter Yompor paꞌnateña ñeñth ateth otaneꞌth Yompor judioneshaꞌ paꞌtañneshañ awath.

Romanos 2:26

Ñeñthoꞌmarña yeñoteñ ñamha, amaꞌt ñeñth ama atsorraretheyayepaꞌ ñerraꞌm añ ateth penet ñeñth ateth oteney Yompor poꞌñoñothpaꞌ amaꞌt ama atsorraretheyayye, Yomporñapaꞌ atethchaꞌ enteney ñerraꞌm eꞌñe poechemer peney poꞌñoxh. Atthekmach enteney ñerraꞌmrratheꞌ ñeñth atsorrareth, tharraña eꞌñech poechemer perrey poꞌñoxh.

Romanos 2:27

Ñeñthoꞌmarña yeñoteñ amaꞌt ñeñth attha korretsa ateth eñalleta, ama atsorraretheyaye, ñerraꞌm añ ateth penet poꞌñoxh ñeñth ateth oteney Yompor poꞌñoñothpaꞌ ñetñapaꞌ penkaterrsetchaꞌ, tharroꞌmar ñetpaꞌ ello metanennaset ñeñth allpon kowen oꞌ sephowa Yomporekop. Tharroꞌmar sapaꞌ sathpareꞌteññañ poꞌñoñ ñeñth ateth anareth. Metanenset sa, amaꞌt sapaꞌ secheññañeñ Yompor poꞌñoñ awathotheñ, ñamha amaꞌt sapaꞌ eꞌñe atsorrwaretheseñ.

1 Corintios 12:2

Amaꞌt sapaꞌ señoteñ awañmoꞌcha allempo ama sameꞌñerraꞌpaꞌ attha semaꞌyochatseꞌtyeseꞌth ayexhkatarethexhno. Ñamha ayexhkatarethexhnopaꞌ amaꞌt ama eñorenopaꞌ attha nanak ameꞌñataseteꞌth, amaꞌt all setaꞌyeseꞌth.

1 Corintios 6:11

Sapaꞌxhoꞌña poesheñaꞌttsos atthekma sepeꞌth samha awaña. Tharraña theꞌpaꞌ oꞌ eꞌshowarethterra soꞌchñar, atthoña oꞌ saꞌkowentatarethterra Partsokop. Eꞌñe seyemteñoth Yepartseshar Jesucristo theꞌña Pomporpaꞌ oꞌ pokteꞌ enterres. Ñamha eꞌñe poechorreñothes Yompor Poekamkëñpaꞌ oꞌ pokteꞌ enterres Yompor.

Gálatas 2:15

Yapaꞌ eꞌñe judionaꞌtareshoth eꞌñalletñay. Tharraña yapaꞌ ama attheyayye ñerraꞌm ñeñth ama judioneshayaye ñeñth nanak ochñath.

Gálatas 6:12

Oꞌch alla noterrserr: Ñeñth moeneneꞌ oꞌch tsorrataspaꞌ añekpa moeneñet atthoch judioneshaꞌpaꞌ oꞌch kowen entanet. Tharroꞌmar ñetpaꞌ ama moeneñeto oꞌch eꞌmoñeꞌtanet judioneshaꞌ. Ñetpaꞌ eñoteñet ñerraꞌm oꞌch serrpareꞌtet attho eꞌñe yameꞌñeñotha Cristo ñeñth rromats yokop oꞌch yekeshphapaꞌ añña judioneshaꞌpaꞌ oꞌch eꞌmoñeꞌtanetpaꞌ oꞌch kothareꞌtanet.

Efesios 2:2

Aña seyxheꞌth ñeñth ateth phatseꞌtyena acheñeneshaꞌ arr patsro ñeñth ama ameꞌñetso. Allempo sapaꞌ aña sameꞌñatayeꞌth oneñeth ñeñth paꞌmhchaꞌtarether pen allowen ñeñth errakmañen amhchaꞌnoxhetyetsa entoth ñeñth ama entpawoyaye. Ñeñthña oneñeth pokthaphñapaꞌ ñeñth atarr koshateneꞌ allowen acheñeneshaꞌ ñeñth athparñathtetsa theꞌ arr patsro.

Efesios 5:8

Ñewa, sapaꞌ awathpaꞌ poꞌñoxh eꞌñe ateth sokshapretatseꞌtyeseꞌth allempo sapaꞌ chekmeta sokrraꞌyeseꞌth. Tharraña theꞌ eꞌñe seyemteñoth Yepartseshar oꞌ xhapatonas seyoxhro ñeñth kowen enten ña. Ñeñthoꞌmarña theꞌ sokoppaꞌ añ poktetsa oꞌch sorrtateññañ ñeñth kowen enten ña, attho sapaꞌ oꞌ sokrrerra poetaro.

Filipenses 3:3

Tharraña yapaꞌ yaña eꞌñe poꞌñoxh poechemer oꞌ enterrey Yompor, tharroꞌmar yapaꞌ eꞌñe yeñoteñ ama yetsorrannaꞌteñotheyeꞌ poechemer penye Yompor. Poꞌñoxh poechemer perrey tharroꞌmar yapaꞌ eꞌñe yoksheñoth Parets ñeñthpaꞌ eꞌñe Poekamkëñoth wena. Ñamha poechemer oꞌ perrey Yompor tharroꞌmar yapaꞌ yoksheññaña Poechemer Cristo Jesús ñamha tharroꞌmar yapaꞌ ama añeyeꞌ yeyemteno ñeñth ateth yetsotaten eꞌñe yañeña, ñeñth eꞌñech yechtsochaya.

Colosenses 1:21

Amaꞌt sa awathpaꞌ atarr ellapharoꞌtsaꞌyenes Yomporeshoth. Eꞌñe seꞌmoñeꞌteñoth Yompor seyoxhro sañapaꞌ aña seyexhkatyeseꞌth ñeñth ama kowenayaye.

Colosenses 2:11

Sapaꞌ eꞌñe separrokmateñoth Cristo theꞌpaꞌ seswanom ateth moenatyesaseꞌth sa sechets. Ñeñthpaꞌ ama añotheyeꞌ weno oꞌch setsorratannena eꞌñe sañeña sechets ñeñth ateth yexhena judioneshaꞌ. Ñeñthpaꞌ Cristeshothña wena eꞌñe seyemteñoth ña. Ñeñthoꞌmarña eꞌñe separrokmateñoth Cristopaꞌ theꞌña sapaꞌ oꞌ seyomporenaꞌtarterra eꞌñe poꞌñoxh.

Colosenses 2:13

Awath sapaꞌ soꞌchñarothña ama es sokthapeꞌchperraꞌ seyoxhro amaꞌt eꞌñe mamesha ñeñth kowentetsa Yomporekop. Eꞌñe ateth sepeꞌth ñerraꞌm poꞌpoñ acheñ ñeñth ama Yomporenaꞌtareyaye. Ñeñthoꞌmarña sapaꞌ xha sotteꞌth ñerraꞌmrratheꞌ sekamkëñpaꞌ xha rromoen. Tharraña theꞌña Yomporpaꞌ oꞌ apoerres atthoch sapaꞌxhoꞌña korretsasach eꞌñe ateth pena Cristo, tharroꞌmar ñapaꞌ oꞌ peretnaꞌwerrnas allowen soꞌchñar.

Colosenses 3:11

Attho yetserrataterr yokthaphña Cristokop, yaña alloweneypaꞌ eꞌñechkaꞌye atthekma poechemer phoweneyña Yompor. Ñeñthoꞌmarña yokoppaꞌ ama eñalleña atthoch yotarethta yapaꞌ poꞌpoñoꞌ acheñrey, yapaꞌ ellopaꞌtetstataretheyoꞌ añoꞌ judioneshayayye, añoꞌ atsorraretheyayye, ñamha poꞌpoñoꞌ acheñrey ñeñth awapña poꞌpoñ anetsoth ñamha ñeñtheyoꞌ yapaꞌ añoꞌ es yeñoteno ñamha ñeñth acheñrey ñeñtheyoꞌ atarwasatarethey eꞌñe attha ñamha ñeñth acheñrey eꞌñe kowenoꞌtseney, tharroꞌmar Cristopaꞌ ñeñthkaꞌyeña eꞌñe allowenakpay, ñapaꞌ ña eꞌñe yechorraꞌwenaya alloweney paꞌnamen acheñrey ñeñth parrokmatenaya.