Efesios 1:4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁴ Ateth awath paꞌmothrotheñ allempo ama ayexhkatarethtenaꞌ añe patserpaꞌ Yomporñapaꞌ allempotheñña akramperrey parro epay Poechemer Cristo atthoch yapaꞌ aꞌparrokmataterreychaꞌ epay Poechemer. Tharroꞌmar añekop akramperrey Poechemereshoth allochña yapaꞌ añach eꞌñe yemaꞌyoxhrena ñeñth kowentetsa Partsokop. Allochñapaꞌ atthochña eꞌñe pokteꞌ entweney Yompor, amach eñalle atthoch otteñeꞌcherrey amaꞌt eꞌñe mamesha.

Efesios 1:4 Iomraidhean Croise

San Mateo 24:22

Allempoch atarr amoeroxhtatarethterret. Tharraña allempoña Yomporpaꞌ ñach oterrets theꞌpaꞌ allowach. Ñerraꞌm amach oto allowachpaꞌ allempoña amaꞌt poesheñarrapaꞌ amach eseshaꞌ keshperrtso. Tharraña ñeñthña ameꞌñenaya ña ñeñth akrenpaꞌ ñokpoetñapaꞌ oterrchaꞌ theꞌpaꞌ allowach.

San Mateo 24:24

Orretyerrachkaꞌye ñeñthchaꞌ otyerrets ñapaꞌ ñoꞌña Cristotets. Tharraña ñeñthpaꞌ atthachkaꞌye shekareꞌtyerranña acheñeneshaꞌ. Orretyerrach ñamha ñeñthchaꞌ otyerrets ñapaꞌ ñoꞌña aꞌmhteneꞌña Yompor poꞌñoñ, tharraña ñeñthpaꞌxhoꞌña eꞌñech atthekma shekareꞌtyerran acheñeneshaꞌ, amachña Yomporeyeꞌña poꞌñoñ aꞌmhteno. Ñeñthchaꞌ ateth shekareꞌtyerrets, ñetñapaꞌ orrtatyerretchaꞌ ñeñth amaꞌt awatha acheñeneshaꞌpaꞌ ama poentare, atthochña kowanrrortateretña acheñeneshaꞌ. Amaꞌt ñeñth Yompor paꞌkrarnesharpaꞌ moeneñetañchaꞌ ñeñtheꞌnachña shekërret.

San Mateo 24:31

Nemñerchaꞌ nemhllañotheñnaneshar ñetchaꞌña poktoraꞌnerrtset atarr womenk. Ñetchaꞌña aꞌyapaxhaꞌwerret allemhatheñ ñeñth akren Nompor nokop eꞌñech paꞌtatsshemhtoꞌmarowen allothekma orrnotena. Eꞌñech allemhatheñ aꞌyapaxhaꞌweretchaꞌ eꞌñe allowanen añ patsroth.

San Mateo 25:34

Naña allempoch atarr naꞌmhchaꞌtarethterrapaꞌ, atethchaꞌ noter ñeñth nekowenrontheꞌtsaꞌyen: “Sapaꞌ sonaxhaꞌt allowenes tharroꞌmar Nompor oꞌkaꞌye atarr bensareꞌtamperres. Theꞌña sapaꞌ oꞌch sagërr ñeñth oꞌpatatensa awathotheñ. Amaꞌt allempotheñ Nomporpaꞌ errteꞌ yexhkateneꞌ pats sañapaꞌ allempotheñ oꞌpatatasa atthoch saꞌmhchaꞌtarethtapretera.

San Juan 10:16

Eñall poꞌpoñexhño ñeñthchaꞌ necarneror neperr, ñetpaꞌ ama parrokmateneto arr alloꞌtsen ñeñth necarneror nepen theꞌ. Añ poktetsa oꞌch nerranetaꞌ atthoch eꞌmhñoterrnanet neñoñ, allochñapaꞌ oꞌch eꞌñe parrokmaterret. Poesheñarrana ñeñthenchaꞌ kowamperrawet.

San Juan 15:16

Sapaꞌ ama sayeꞌ naꞌkrerraye, napaꞌ naña saꞌkrerreꞌña sa. Atthoña oꞌ napoerresña llesens atthoch seta meꞌtarsats atthoch eꞌñe kowen es sorrtatyen ñeñth kowen enten Yompor. Ñeñthpaꞌ ñeñthchaꞌ seꞌmer seperr ñeñthña seꞌmerpaꞌ amach awañañathterro amaꞌt awatha. Allochñapaꞌ amaꞌt erraꞌtsena senamoeñ Apa eꞌñe na nesoꞌchño eꞌñe seyemteñothen na, ñapaꞌ apaschaꞌ.

San Juan 17:24

‘Apachaꞌ, allowen ñeñth peyochreshaꞌtatenna na, napaꞌ añ nemnen erroꞌtsenenchaꞌ ñetpaꞌxhoꞌña alloꞌtsenakmayepaꞌchña eꞌñe parro. Allochñapaꞌ atthoch enterrnanet nekowenña allo oꞌ alla pekowentaterren na, tharroꞌmar phapaꞌ pemorrentenna allempotheñ ama ayexhkatarethtenaꞌ añ patser.

Los Hechos 13:48

Allempoña ñeñtha eꞌmwet añ ñoñetspaꞌ añña ñeñth ama judioneshayaye atarr koshet, nanak kowen eñchet Yompor poꞌñoñ. Allempoñapaꞌ oꞌ ameꞌñenet allowen ñeñth oꞌ anarethta atthoch ñetpaꞌ korretsetach thayotheñ eꞌñe errponañowen.

Los Hechos 15:18

Ateth ot Yompor ñeñthara ñeñth eñotatey awathotheñ ñeñthchaꞌ ateth pha. Añpaꞌ allowa ot ñeñth aꞌmhtayeꞌth Yompor poꞌñoñ awath.

Los Hechos 18:10

Napaꞌ oꞌch nekwampeneph atthoch amach eseshaꞌ erroth es pephaye. Tharroꞌmar napaꞌ nechen shonteꞌ acheñ añ anetsroth ñeñthchaꞌ nameꞌñaya.

Romanos 8:33

Ñeñthey akrerr Yompor ñeñtheychaꞌ poechemer perr, amaꞌt eseshaꞌ moenenayeñ oꞌch otteñeꞌchenyetañ, tharraña ñeñthpaꞌ ama esoyeꞌ yenteñe yokop, tharroꞌmar Yomporpaꞌ oten eꞌñoꞌ pokteꞌ enteney. Amach errothenoth eseshaꞌ yetsaꞌtaterrayo yoꞌchñar,

1 Corintios 1:8

Ñeñthara Jesús ñeñthchaꞌ alloꞌna womenk sephaꞌneneꞌ seyoxher. Atthothach xhap allempoch werra Yepartseshar Jesucristo. Atthochña allempopaꞌ amach eñalle alloch otteñeꞌcharethes amaꞌt mamesha.

Gálatas 5:13

Tharroꞌmar sa masheñneshachaꞌ ñamha noxhaneshachaꞌ oꞌ waꞌñerres Yompor atthoch kowenoꞌtseneschaꞌ. Ñapaꞌ ama moeno oꞌch amhchaꞌnoxhtena sokop ñoñets ñeñth ateth anareth. Tharraña amaꞌt oꞌ waꞌñerrey Yompor atthoch kowenoꞌtseneypaꞌ ñeñthpaꞌ ama añekpayaye oꞌch yephaꞌyesa nanak sosey ñeñth ateth moenateney yechets. Ñapaꞌ moeneñ eꞌñe yemorrentannaꞌteñothpaꞌ oꞌch yeyenpannaꞌta, tharroꞌmar yapaꞌ kowenoꞌtseney.

Gálatas 5:22

Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

Gálatas 5:6

Ñerraꞌm oꞌ yeparrokmaterr epay Cristo Jesúspaꞌ ama sherbeno attho yetsorrannaꞌtena, ñamha amaꞌt ama atsorraretheyepaꞌ ñeñthpaꞌxhoꞌña ama sherbeno Yomporekop. Aña ñapoeth sherbets eꞌñe yameꞌñeñoth Cristopaꞌ oꞌch yemorrentannaꞌta.

Efesios 2:10

Tharraña Yomporpaꞌ oꞌ etserrataterrnay yokthaphña allochñapaꞌ atthoch eꞌñe kowen es yephaꞌyen. Poꞌñoxh eꞌñe yeparrokmateñoth Cristo, Yomporñapaꞌ oꞌ etserra yexhkaterrey. Tharroꞌmar ñapaꞌ amaꞌt awathotheñpaꞌ ateth kothapeꞌcheꞌth yokop atthochña yapaꞌ eꞌñepaꞌchña kowenareꞌ es yephaꞌyen.

Efesios 3:17

Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

Efesios 4:2

Amaꞌt mameshapaꞌ amach sañeña entatstatso ñeñthesoꞌ atarr nanak sherbets. Eꞌñe semorrentannaꞌteñoth eꞌñech akopha es sephannaꞌtyena. Xhokmoepaꞌch saꞌwantannena ñerraꞌm erroth penes poꞌpsheñeñ, amachña seꞌmoñeꞌtatsche samha. Añchaꞌña eꞌñech kowen semorrentannaꞌtwena allowenes.

Efesios 5:2

Elloña Cristopaꞌ atarr morrentenya. Ñeñthoꞌmarña eꞌñe pokteꞌ eñch atthoña poma ñañeña attho rroma yokop ateth peteꞌth awath allempo moetseteꞌth carnero Yomporekop. Ñeñthña eꞌñe kowen enteꞌth Yompor eꞌñe ateth ñerraꞌmrratheꞌ ñeñth allo atarr eñmosathtamphsacheteꞌth awath ña. Attho atarr morrentya Cristo, yokoppaꞌxhoꞌña añ poktetsa eꞌñech kowen yemorrentannaꞌtwena.

Efesios 5:27

Allempoña oꞌ yaꞌkowentatarethterrapaꞌ ñapaꞌ moeneñ oꞌch agërrey alloweney ñeñthey ameꞌñenaya ña. Ñamha ya attho oꞌ yaꞌkowentatarethterrapaꞌ amach alla eñalleterreꞌthe amaꞌt mamesha ñeñthchaꞌ yaꞌsosyaterrayerr. Amach alla enterryeꞌthe attho ama kowenayeꞌ yorrteno amaꞌt errothena. Eꞌñechña yaꞌkowentatarethterra Partsokop.

Filipenses 2:15

Allochñapaꞌ ñerraꞌm ama ateth yepenopaꞌ eꞌñech kowen entyeney allowen acheñeneshaꞌ, amach eñalle atthoch eseshaꞌpaꞌ oꞌch eñosyenet yokop añoꞌ pokteyeꞌ es yephaꞌyeno, tharroꞌmar eꞌñech kowen es yokthapeꞌchyen atthoch yorrtaten ateth penaña ñeñth poꞌñoxh oꞌ poechemer per Yompor. Amach eñalle ñeñthchaꞌ aꞌsosyateneꞌ attho yokrrena eꞌñe kowen Yomporekop añe patsro. Eꞌñech kowen yorrtena acheñeneshakop amaꞌt ñeñth ama ameꞌñetso ñeñth atarr nanak sosey kothapeꞌchenet. Kowenchaꞌ yorretyena ateth ñerraꞌmrratheꞌ rantoxhno ñeñth aꞌpoetareneꞌ chekmeteꞌ tsapo.

Colosenses 1:22

Tharraña theꞌña Yomporpaꞌ oꞌ eꞌñe parrokmataterres eꞌñe ñesho. Ñewa, allempo amoeroxhtatarethta Cristo eꞌñe ña poꞌchtso attho rroma, ñeñthpaꞌ atthochña eꞌñe parrokmataterres samha. Oꞌ eꞌñe parrokmataterres atthothña sapaꞌxhoꞌña oꞌ saꞌkowentatarethterra Partsokop, ñamha atthoch amach saꞌthanmarethterro, amach eñalle atthoch sotteñeꞌcharethterra. Theꞌpaꞌ atethkaꞌye enterresña Yompor.

Colosenses 2:2

Allochñapaꞌ atthochña eꞌñe soksherra seyoxhrowen attho eꞌñe semorrentannaꞌteñothpaꞌ oꞌch eꞌñe separrokmaterr. Atthochña xhaponasa seyoxhro atthoch atarr es señotyerr. Oꞌch señoterr ñeñth ama eñoteteꞌthe awathotheñ, ñeñthpaꞌ ñapthaña Yompor eñoteneꞌ. Ñeñthpaꞌ eꞌñepaꞌtkaꞌye Cristeshoꞌtsenña

Colosenses 3:12

Yomporña poemorrenteñothes sapaꞌ oꞌ akrerres ñeñtheschaꞌ aꞌkowentatarethterrtsa Partsokop. Attho akrerrespaꞌ eꞌñepaꞌchña seyxhen atthoch eꞌñe kowen semoerannena, eꞌñepaꞌchña kowen es sorrtatyen poꞌpotantañekop. Sapaꞌ eꞌñepaꞌchña pokteꞌ señch ñerraꞌm poꞌpsheñeñ oꞌch entenes sapaꞌ ama esosheꞌmayayso. Ñamha sapaꞌ amachña aña seꞌnatsto ñeñth eꞌñe sokpa ñeñth ateth sokthapeꞌchen sa tharroꞌmar sapaꞌ ñeñthes alleshonkatets. Ñeñthoꞌmarña sapaꞌ eꞌñepaꞌchña saꞌwantaꞌwanomña ñeñth atarr echarrareꞌ sentyen.

1 Tesalonicenses 3:12

Yepartsesharepaꞌchña atontaterreꞌña semorrenteña allochñapaꞌ alloꞌnach nanak sesen morrentannaꞌttsa eꞌñe sagattsa atthochña alloꞌnach sesen morrentenaya allowen acheñeneshaꞌ, eꞌñe ateth yepena ya sapaꞌ nanak yemorrentensa.

1 Tesalonicenses 4:7

Yomporpaꞌ ama añekpayeꞌ xhoreꞌtenye oꞌch aña ateth yephaꞌyes ñeñth atarr sosey, añekopña xhoreꞌteney oꞌch eꞌñe yaꞌkowentatarethterra ñokop.

2 Timoteo 1:9

Ñeñthara ñeñth oꞌ aꞌkeshphaterrey, atthoña oꞌ xhoreꞌterrey atthoch yemaꞌyoxhra ñeñth kowentetsa Partsokop. Tharraña añmapaꞌ ama añotheyaye attho eꞌñe kowen es yephaꞌyeseꞌth awath, añmapaꞌ tharroꞌmar ateth moenen ña. Yomporpaꞌ nanak morrentyeꞌth ñeñthoꞌmar amaꞌt awathotheñpaꞌ awoꞌt oꞌpatatya Poechemer Cristo Jesús.

2 Timoteo 2:10

Ñeñthoꞌmarña napaꞌ xhokma naꞌwanten attho nemoeroxhtena, allochñapaꞌ ñerraꞌm erraꞌtsenchaꞌ akrerr Yompor ñeñthchaꞌ ameꞌñerrayapaꞌ keshperretchaꞌ eꞌñe pameꞌñeñothet Cristo Jesús. Ñamha all Yompor poꞌkowenñopaꞌ korrerretchaꞌ errponowañen.

2 Timoteo 2:19

Amaꞌt ateth phañ patantarrpaꞌ tharraña Yompor poꞌñoxhpaꞌ ama poeno poꞌñoñ. Amaꞌt Yompor poꞌñoñ ñeñth akellkareth awathotheñpaꞌ ateth eñotateney eñallach patheꞌtets acheñ ñeñth poꞌñoxh ameꞌñenaya. Ñeñthpaꞌ ateth oten: “Yomporpaꞌ chemeꞌtenan ñeñth poꞌñoxh ameꞌñenaya.” Añpaꞌ arr eñotateney poꞌpoñ Yompor poꞌñoñ ñeñth akellkareth awathotheñ, ñeñthpaꞌ ateth oten: “Alloweney ñeñthey kotheneꞌ Cristopaꞌ yekexhpaꞌwerrepaꞌ allowen sosyaꞌtsañ.”

Santiago 2:5

Masheñneshachaꞌ ñamha noxhaneshachaꞌ, eꞌñe nemorrenteñothes theꞌpaꞌ nemneñ oꞌch seꞌmhñoten ñeñthchaꞌ ateth notas. Elloña Yomporpaꞌ añña nanak moenen oꞌch akrerran allowen ñeñth nanak wokchañetets añ patsro, atthoch eꞌñe pameꞌñeñothet ñetpaꞌ echerretchaꞌ esokmañen Yomporeshoth. Esempowañenñapaꞌ oꞌch agërret ñamha ñeñth oꞌpatatenanet Yompor all amhchaꞌtarethtena poeꞌntaño. Ñamha ñeñth oꞌpatatenya alloweney ñeñthey morrentenaya ña.

1 San Pedro 1:20

Amaꞌt ama ayexhkatarethtenaꞌ pats Yomporpaꞌ oꞌ nan Poechemer Cristo, ñach tsaꞌterraya yoꞌchñar. Amaꞌt awathotheñ anarethpaꞌ tharraña ama orrteno añe patsro. Theꞌñapaꞌ orrta eꞌñe yokop, tharroꞌmar theꞌpaꞌ oꞌ mellapoterrmocha.

1 San Pedro 2:9

Tharraña sapaꞌ ama añeyayso ñeñth athpareꞌteneꞌ Yompor. Ya ñeñthey ameꞌñenaya Yomporpaꞌ atethchaꞌ enteney ñeñthey akrarethterrtsa ñokop. Ñamha atethchaꞌ enteney ñeñtheychaꞌ sherberrets Partsokop, ñeñtheychaꞌ anarethterrtsa ñokop. Ñamha eꞌñech Yomporenaꞌtar enteney. Ñeñthoꞌmarña yokoppaꞌ añ poktetsa oꞌch yorrtatyesoñ poꞌkowenña. Oꞌch yeserrpareꞌtoñ attho ñapaꞌ cheterrey chekmetoth all sosyaꞌtsañoth, theꞌñapaꞌ oꞌ xhapaterrey eꞌñe ña poꞌpoetarenño all eꞌñe kowentena ña.

2 San Pedro 3:14

Ñewa, masheñneshachaꞌ ñamha noxhaneshachaꞌ oꞌch sekwameꞌteñ. Sekwameꞌteñothpaꞌ oꞌch semaꞌyoxhrena atthoch entwerres Yompor eꞌñe pokteꞌ, atthoch amach eñalle ñeñthchaꞌ sepenkateꞌ. Oꞌch kowen sentannena epas samoꞌtseshaꞌ.

1 San Juan 4:16

Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor.

El Apocalipsis 13:8

Ora allowen acheñeneshaꞌ ñeñth añe patsroꞌtsaꞌyen añach maꞌyochenet maꞌyarrmaꞌth tharroꞌmar ñeñth acheñeneshaꞌpaꞌ ama akellkaretheyayeto paꞌsoꞌcheñ Cristo poꞌlibro all akellkarethtena allowen ñeñth korretsetach ñeñth ameꞌñenaya Cristo ñeñth amtsarethtatsa ochñartsokop ateth ñerraꞌm carnero. Awath allempo errteꞌ ayexhkatarethta pats, Cristoña poꞌlibropaꞌ all akellkareth soꞌchñetsoxhno atthochña ñetpaꞌ korretsetach.

El Apocalipsis 17:8

Añ berrmaꞌth ñeñth penten, ñeñthpaꞌ añ tomaꞌntena ñeñth korratseꞌth awañmoꞌcha theꞌpaꞌ ama eñalle oꞌ rroma. Tharraña oꞌ mameshamerra oꞌch alla tanterra oꞌch xhaꞌnerr arrorothoth. Tharraña ñeñthpaꞌ mamekpach ateth perra, ellochña oꞌch alla rromoerrerr. Allempochña oꞌch chenka eꞌñe poktakma. Acheñeneshaꞌ ñeñth yexhaꞌyetsa añe patsro ñeñth ama ameꞌñetso ñetñapaꞌ atarrchaꞌ kowanrrorteret añ berrmaꞌth tharroꞌmar ama poentareto ñeñth ateth pena añ berrmaꞌth. Amaꞌt ñeñth korratseꞌth arr patsro, tharraña awañmoꞌchapaꞌ oꞌ rroma. Amaꞌt oꞌ rromwañ tharraña oꞌ alla orrterrerr. Ñeñthoꞌmarña acheñeneshaꞌpaꞌ atarr kowanrrorteñet. Ñewa, ñeñth kowanrrorteneꞌpaꞌ ama akellkaretheyaye paꞌsoꞌcheñ Yompor poꞌlibro all akellkarethtena paꞌsoꞌchñexhno ñeñth poeyochreshaꞌ pen Yompor; ñetñapaꞌ korretsetach errponañowen. Ñeñth ama ameꞌñetso ama akellkaretheyayeto paꞌsoꞌcheñ awathotheñ allempotheñ eꞌñe errteꞌ ayexhkatarethtetsa pats.