1 San Juan 4:4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁴ Saña poꞌñoxh nechemerneshachaꞌ eꞌñe poꞌñoxh Yomporenaꞌtares tharroꞌmar sapaꞌ ama aña seꞌmhñoteno attho paꞌnamenoth shekareꞌtyensetañ. Yompor Poekamkëñ ñeñth sechorrenayapaꞌ ñeñthña sapaꞌ atarr awamenkathtatenes. Ñeñthña chorrenaya añ patsoꞌmarneshaꞌpaꞌ ñapaꞌ ama eꞌñeyeꞌ awamenkathtatenaneto.

1 San Juan 4:4 Iomraidhean Croise

San Juan 12:31

Theꞌpaꞌ oꞌ anarethta allowen acheñeneshaꞌ arr patsro ñeñth ama nameꞌñenaye ñetpaꞌ amñarethterretchaꞌ koñcheñtso. Ñamha oneñeth ñeñth paꞌmhchaꞌtarether pen acheñeneshaꞌ arr patsro, theꞌ ñokoppaꞌ oꞌ anarethta awaporeꞌtarethterrach esempowañen.

San Juan 14:30

‘Theꞌ eꞌñe parroꞌtseneypaꞌ oꞌwañchaꞌ alloꞌna neñosnen shonteꞌ tharroꞌmar oꞌ wapmocha oneñeth ñeñth paꞌmhchaꞌtarether pen acheñeneshaꞌ arr patsro. Tharraña amaꞌt oꞌ wapañpaꞌ eꞌñe ñothapaꞌ amach erroth phosno.

San Juan 16:11

Paretsña Poekamkëñpaꞌ ñachña eñotaterrawet poꞌñoxhpaꞌ koñcheñtsach amñarethterret ñeñth ama ameꞌñetso tharroꞌmar oneñeth ñeñth paꞌmhchaꞌtarether pen shonteꞌ acheñeneshaꞌ arr patsro, ñokoppaꞌ eꞌñe poꞌñoxh anwareth amñarethterrach koñcheñtso.

San Juan 17:23

Napaꞌ neparrokmatenanet, phañapaꞌ peparrokmatenna. Allochña allowenetpaꞌ eꞌñech parrokmatwenet eꞌñe poktakma. Atthoch acheñeneshaꞌ arr patsro ñetpaꞌ eñoteretchaꞌ phapaꞌ pha nellsenserreꞌ. Ñamha eñoteretepaꞌch phapaꞌ atarr pemorrentenanet eꞌñe ateth atarr pemorrentenna na.

Romanos 8:31

Ñeñthoꞌmar theꞌpaꞌ oꞌch notas, Yomporpaꞌ atarr kowen morrentenya. Ñamha yapaꞌ yeñoteñ attho nanak morrentenya Yomporpaꞌ amaꞌt eseshapaꞌ amach errothenoth aꞌwañamperetoña attho morrentenya.

Romanos 8:37

Amaꞌt yemoeroxhetwawapaꞌ elloña nanakchaꞌ awamenkath perrey Cristo ñeñth nanak amorrentña yenten.

1 Corintios 2:12

Yapaꞌ oꞌ yagapoñ Yompor Poekamkëñ, amaña acheña pokthaphña yagërro ñeñth patsoꞌmarekpa. Ñeñthara Yompor Poekamkëñ ñeñth xhapateneꞌ yeyoxhro ñamha ñeñth yeñotateneꞌ attho ña moerenya. Eꞌñe poemoereñothey shonteꞌ es apaꞌyeney.

1 Corintios 6:13

Ñamha neñotenes poesheñaꞌttsospaꞌ ateth sotatseꞌtyen, eꞌñoꞌ pokteꞌ senteñ oꞌch señmatat sechets eꞌñe sa sekañoreshaꞌteñoth tharroꞌmar ñeñthekpoꞌ yexhkënaña sechets oꞌch ateth sephateñ. Ñeñthoꞌmarña ateth setmaꞌntatenaña sechets ñerraꞌmrratheꞌ allempo sachporrena xhoch serraꞌ serrar atthochña eꞌñe señmatat sath eꞌñe ora sechtsowen tharroꞌmar sathpaꞌ ñeñthekpoꞌ yexhkëna. Tharraña theꞌ napaꞌ oꞌch notas, amaꞌt pokteñ oꞌch yeñmatateneñ yath arr patsropaꞌ xhapchaꞌ esempowañen allempopaꞌ oꞌwañchaꞌ yemnaꞌ yath ñamha yerrar, tharroꞌmar ateth neꞌ Yompor. Tharraña amaꞌt pokteñ oꞌch yeñmatateneñ yathpaꞌ tharraña ama pokteyaye oꞌch eꞌñe yeñmataten yechets yekañoreshaꞌteñoth tharroꞌmar ama añekpayeꞌ ayexhkataretheña yechets atthoch yekañoreshaꞌten. Yechetspaꞌ añekopña ayexhkatareth atthoch yethorraꞌyesa Yepartsesharekop. Ñamha ñapaꞌ ñach yekwampeneꞌña yechets.

2 Corintios 4:4

Ñeñthara acheñeneshaꞌ ñeñth ama ameꞌñetso, ñetpaꞌ añña poꞌyomporer penet arr patsro ñeñth oneñeth, ñeñthña ama moenatenaneto oꞌch xhapanet poeyoxhreto Yompor poꞌñoñ; allochñapaꞌ atthothchaꞌ amach eshkayeꞌ kowen enteññañeto Cristo poꞌkowenña. Ñapaꞌ atthekma kowentena ñerraꞌmrratheꞌ Pompor Parets ñeñth ama entpawoyaye. Ñeñth poꞌkowenñapaꞌ ñeñthara yoten kowen ñoñets alloch yekeshperra. Ñatoꞌ oꞌch netmaꞌntacha attho oneñethpaꞌ aꞌnataklleꞌchenanet atthochña amach eshkayeꞌ kowen enteññañeto Cristo poꞌpoetarenña.

2 Corintios 6:16

Ñamha ñeñth paꞌpakëll pen Yomporpaꞌ ama attheyaye ñerraꞌmrratheꞌ ñeñth ayexhkatareth ñeñth poꞌyomporer phaꞌyen poꞌpotantañ acheñeneshaꞌ arr patsro. Tharroꞌmar amaꞌt yapaꞌ alloweney ñeñthey ameꞌñenaya, yañapaꞌ paꞌpakëll peney Yompor ñeñth ama arromñatheshayaye. Añpaꞌ ñeñth ateth oten Yompor: Napaꞌ xhokmach neyxhena eꞌñe ñesheto parro allchaꞌ nechopeñeꞌchen. Napaꞌ Poꞌyomporer pennet, ñetpaꞌxhoꞌña eꞌñe neyochreneshaꞌ nepenanet.

Efesios 2:2

Aña seyxheꞌth ñeñth ateth phatseꞌtyena acheñeneshaꞌ arr patsro ñeñth ama ameꞌñetso. Allempo sapaꞌ aña sameꞌñatayeꞌth oneñeth ñeñth paꞌmhchaꞌtarether pen allowen ñeñth errakmañen amhchaꞌnoxhetyetsa entoth ñeñth ama entpawoyaye. Ñeñthña oneñeth pokthaphñapaꞌ ñeñth atarr koshateneꞌ allowen acheñeneshaꞌ ñeñth athparñathtetsa theꞌ arr patsro.

Efesios 3:17

Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

Efesios 6:10

Allowanen arr necartoth oꞌch masheñneshachaꞌ ñamha noxhaneshachaꞌ notas, awamenkathepaꞌch phas Yepartseshar tharroꞌmar ñapaꞌ ña atarr awamenkathtetsa.

1 San Juan 2:1

Nechemerneshachaꞌ theꞌ sokoppaꞌ oꞌch nekellkonas atthoch amach alloꞌna sephaꞌneno ñeñth amaꞌt mameshapaꞌ ama pokteyeꞌ enteno Yompor. Tharraña ñerraꞌm eseshaꞌ orrtateneꞌ ñeñth ama kowenayaye, ñerraꞌm oꞌch enamoerr peretneñets, Yomporpaꞌ oꞌch peretner tharroꞌmar eñall yokop ñeñthchaꞌ eñosets Apoesho. Ñeñthñapaꞌ añ Jesucristo ñeñth eꞌñe pokteꞌ es phaꞌyets.

1 San Juan 2:13

Ñamha theꞌpaꞌ oꞌch notas samha allowenes ñeñthes eꞌñe pomporneshaꞌ penset. Sa theꞌpaꞌ oꞌ señoter Cristo ñeñth eꞌñe awathotheñ eñall amaꞌt eꞌñe allempotheñ ama ayexhkatarethtenaꞌ pats; ñeñthoꞌmarña theꞌpaꞌ ateth nekellkënnas samha. Ñamha theꞌpaꞌ oꞌch notas samha allowenes ñeñthes wepoeshares, sapaꞌ oꞌ eꞌñe sathpareꞌter oneñeth; ñeñthoꞌmarña sokop theꞌpaꞌ ateth nekellkënnas samha. Ñamha sa nechemerneshachaꞌ theꞌ sapaꞌ oꞌ eꞌñe señoter ateth penaña Yompor Parets; ñeñthoꞌmarña theꞌpaꞌ ateth nekellkënnas eꞌñe sokop.

1 San Juan 3:20

Tharroꞌmar ñerraꞌm ama eꞌñe yeñmañeshokmayeꞌ es yephaꞌyeno Yomporekop, Yomporñapaꞌ elloña eꞌñe poꞌñoxh ateth eñoteney tharroꞌmar ñapaꞌ ña atarr eñotañeshaꞌ.

1 San Juan 3:24

Erraꞌtsenchaꞌ eꞌñe kowen ameꞌñenaya Yompor poꞌñoñ ñeñth ateth oteney, ñetñapaꞌ eꞌñe parrokmatenet epoet Yompor. Ñeñthoꞌmarña yeñoteñ yeparrokmaten, Parets Poekamkëñoth ñeñth chorratenya ñeñthña yeñotateneꞌña eꞌñe yeparrokmateña Yompor.

1 San Juan 4:13

Ña attho apoerrey eꞌñe ña Poekamkëñ ñeñthña yeñotateneꞌña yapaꞌ eꞌñe yeparrokmaten epay Yompor.

1 San Juan 4:16

Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor.

1 San Juan 4:6

Yaña poꞌñoxhpaꞌ Yomporenaꞌtarey. Ñeñth poꞌñoxh eñoteneꞌ Yompor, ñetñapaꞌ eꞌñech kowen eꞌmhñotenyet ya. Ñeñthña ama Yomporenaꞌtareyaye, ñetñapaꞌ amach eꞌmhñotenyeto. Yapaꞌ alloña yeñotenña kothaphñats ñeñth poꞌñoxh wetsa Yomporeshoth atthoña yeñotenña ñamha kothaphñats ñeñth shekëñets.

1 San Juan 5:19

Theꞌña yapaꞌ yeñoteñ oꞌ yeyomporenaꞌtarterra ya. Poꞌpotantañña acheñeneshaꞌ arr patsro ñeñth ama ameꞌñetso, ñetñapaꞌ aña yochreshaꞌtenawet oneñeth.

1 San Juan 5:4

Tharroꞌmar alloweney ñeñthey poechemer pen Yompor, yañapaꞌ eꞌñe yeyemteñoth Jesús xhokma pomnaren yepen allowen ñeñth ama pokteyeꞌ entyeno Yompor arr patsro.

El Apocalipsis 12:11

Ñeñth masheñneshaxhnor ñeñth ameꞌñenaya Yompor, ñetñapaꞌ oꞌ eꞌñe aꞌmchechweret oneñeth ñeñth tomaꞌtampesyenawet eꞌñe attha. Añ aꞌmchechaterreꞌ ñeñth attho Cristo rroma, ashatarethta poꞌrras ñeñth tomaꞌntenaya Carnero ñeñth moetseteꞌth ochñartsokop. Ñamha añ aꞌmchechaterreꞌ ñeñth attho masheñneshaxhno xhokma eñosyenet eꞌñe kowen ñeñth ateth pena Cristo poꞌkowenña. Amaꞌt amoeroxhtatarethetyenetpaꞌ ñetpaꞌ ama kexhpoeñeto attho eñosyenet eꞌñe kowen Cristokop, tharroꞌmar ñetpaꞌ ama mechaꞌteneto amaꞌt mamesha oꞌch rromoet eꞌñe pameꞌñeñothet Cristo.