1 San Juan 1:2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho2 Ñeñthña Jesucristo allempo acheñetos arr patsro yañapaꞌ eꞌñe yeñcheꞌth. Ñeñthoꞌmarña theꞌ yapaꞌxhoꞌña xhokma yeñotatenes samha. Ñeñthoꞌmarña yeserrpareꞌtatenes ñeñthña Cristopaꞌ ñeñth alloch yokrrena amaꞌt thayotheñ eꞌñe errponañowen. Ña awathpaꞌ eꞌñe parroꞌtsen epoet Pompor Parets. Theꞌña attho orrtosnaya arr patsro yapaꞌ eꞌñe yeñcheꞌth eꞌñe yeꞌmeꞌth ateth serrpareꞌtatyesyeꞌth. Ñeñthoꞌmarña theꞌ ya ñeñth ateth yentyeseꞌth, ñeñth ateth yeꞌmyesoñeꞌth, theꞌñapaꞌ oꞌch yeserrpareꞌtatas samha. Faic an caibideil |
1 San Juan 1:2
37 Iomraidhean Croise
Ñewa, añ ñoñets ñeñth ateth anareth ñeñthchaꞌ yetsotateneñpaꞌ amach errothenoth aꞌkeshphaterrye, tharroꞌmar ya arromñathey yoꞌchñarpaꞌ ama moenatenye oꞌch ateth yephowa ora ñeñth ateth oteney añ ñoñets. Tharroꞌmar añ ñoñetspaꞌ ama eñalle atthoch womenk phonay yeyoxher eshekchaꞌ yetsotwe ora allpon ñeñth ateth oteney ñeñthchaꞌ ateth yephoweneñ. Tharraña attho Yomporpaꞌ awoꞌt aꞌpoktatwonay yoꞌchñar ñeñthpaꞌ ateth pha. Ñapaꞌ awoꞌt moeñonay eꞌñe ña Poechemer ñeñthchaꞌ eñalletostsa arr patsro eꞌñe ateth ñerraꞌm ya ñeñthey arromñathey, ñeñthey ochñathey. Allochñapaꞌ ñach rromosets yoꞌchñarekop; allochñapaꞌ atthoch tsaꞌtwonaya yoꞌchñar. Atthochña aꞌwañamperrey attho yoꞌchñara ñeñtha womenk yepeneꞌ yeyoxhro.
Ñamha yapaꞌ yeñoteñ ñeñth ateth kothapeꞌchateney Yompor attho yameꞌñerapaꞌ ñeñthpaꞌ nanak koxhneshaꞌ amaꞌt awathotheñpaꞌ ama eseshayeꞌ eñotenaye. Añpaꞌ ñeñth ateth yaꞌxhoteñ Cristo: Amaꞌt Paretspaꞌ oꞌ acheñetos añe patsro, tharraña Yompor Poekamkëñothña nanak awamenkathtosa ñeñth eñotateneꞌña acheñeneshaꞌ ñapaꞌ eꞌñe poꞌñoxh kowen. Amaꞌt allowen mellañotheñnaneshaꞌpaꞌ eꞌñe entwoñeteꞌth ñeñth ateth phaꞌyeseꞌth añ patsro, ñamha ñeñth ameꞌñayeꞌthpaꞌ xhokma aꞌpothet Cristo errakmañen arr patsro amaꞌt all ama judioneshayaye. Ñamha shonteꞌ acheñ ameꞌñerraya Cristo, allothña Yompor poꞌkowenñothpaꞌ oꞌ alla agër poeꞌntaño.
Ñeñth wapatsa atthoña theꞌpaꞌ oꞌ yeñoter attho nanak morrentya Pompor. Ñeñthara Poechemer Jesucristo ñeñth Yaꞌkeshphatañer yepen, tharroꞌmar ñach yaꞌkeshphaterreꞌ yerromñoth atthoch elloch yokrraꞌwerra, allempopaꞌ amach alla yaꞌrromñathterreꞌthe. Ñeñthoꞌmarña yoten theꞌña yapaꞌ oꞌ aꞌwañamperrey Cristo attho oꞌpatyeꞌth rromoeñets. Theꞌpaꞌ oꞌ yeñoter tharroꞌmar ateth yexhateney kowen ñoñets ñeñth wetsa Yomporeshoth.
Theꞌpaꞌ oꞌch neserrpareꞌtatas arr nekellkoth ñeñth ateth pena Jesucristo; ñapaꞌ xhokma eñall amaꞌt awathotheñ amaꞌt allempo ama ayexhkatarethtenaꞌ pats. Ñeñthña yapaꞌ eꞌñe yeꞌmeꞌth ateth serrpareꞌtatyesyeꞌth allempo orrtosa arr patsro, amaꞌt ya yeklloyothpaꞌ eꞌñe yeñcheꞌth eꞌñe allameꞌtets, amaꞌt eꞌñe ya yotothpaꞌ yaꞌphllaꞌyeseꞌth. Ñeñthña Jesucristo ñapaꞌ ñeñthña poꞌñoñ penña Pompor Parets tharroꞌmar ñach eꞌñe eñotaterreꞌña acheñeneshaꞌ ateth oten Pompor Parets. Ñeñthña ña poꞌñoñpaꞌ poꞌñoxh yapaꞌ allochña korretsayach.
Tharraña ñeñth xhokma orrtatyeneꞌ ñeñth ama pokteyeꞌ enteno Yompor, ñeñthña acheñerpaꞌ poꞌñoxh oneñethenaꞌtar, tharroꞌmar oneñethpaꞌ eꞌñe awathotheñ ñapaꞌ aña orrtatyes ñeñth amaꞌt mameshapaꞌ ama pokteyeꞌ enteno Yompor. Ñeñthoꞌmarña Yompor Poechemerpaꞌ wapa, allochñapaꞌ ñach eꞌnwerreꞌ ateth phatseꞌtyena oneñeth.
Yañapaꞌ yeñoteñ ñeñth Poechemer pen Yomporpaꞌ ñañapaꞌ oꞌ wapa. Ñaña yexhapaterreꞌña yeyoxhro atthochña yapaꞌ oꞌch yeñoter Yompor ñeñth eꞌñe poꞌñoxh Parets. Ñeñthoꞌmarña yeñoteñ oꞌ yeparrokmaterr epay ñeñth eꞌñe poꞌñoxh Yompor Poechemer ñeñthpaꞌ Jesucristo. Atthoña yapaꞌ oꞌ eꞌñe yeñoter Yompor ñeñth eꞌñe poꞌñoxh Parets, ñeñthña yapaꞌ allochña eꞌñe korretsayach yoksheñeshokmañen thayotheñ eꞌñe errponañowen.
Sanasan